၄.၁.၉။ ဒုတိယဥပကက္ခဋသိက္ခာပိုဒ်
532) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် တြုံမွဲဂှ် “ကြက်ဂြောပ်လတက်ကဵုဒါန် ကုတဳလပိုဉ်ဥပနန္ဒ နကဵုသ္ၚာရ” ရဴဝွံ ဟီုကဵုတြုံမွဲရ၊ ညးဂှ်လေဝ် “အဲလေဝ်ကြက်ဂြောပ်လတက်ကဵုဒါန် ကုတဳလပိုဉ်ဥပနန္ဒ နကဵုသ္ၚာရ” ရဴဝွံ ဟီုသ္ဂးရ၊ ခမဳဂ္ၚေၚ်စဴပိဏ္ဍပါတ်မွဲဇကု မိၚ်အာဂလာန်တြုံဂမၠိုၚ်ဂှ်ရ။ ပ္ဍဲအခိၚ်ဂှ် ခမဳဂှ် ပြာပ်အာဇရေၚ် တဳလပိုဉ်ဥပနန္ဒကောန်သၟိၚ်သာကျဝၚ်တုဲ— “ယွံကောန်တၠဥပနန္ဒ တၠအဲ ပိုန်ဇၞော်ကွေံရ၊ ပ္ဍဲဌာန်မၞုံယၟုဝွံ တြုံမွဲဂှ် ‘ကြက်ဂြောပ်လတက်ကဵုဒါန် ကုတဳလပိုဉ်ဥပနန္ဒ နကဵုသ္ၚာရ’ ရဴဝွံ ဟီုသ္ဂးကဵုတြုံမွဲရ၊ ညးဂှ်လေဝ် ‘အဲလေဝ် ကြက်ဂြောပ်လတက်ကဵုဒါန် ကုတဳလပိုဉ်ဥပနန္ဒ နကဵုသ္ၚာရ’ ရဴဝွံ ဟီုသ္ဂးရ” ရဴဝွံ သ္ဂးကဵု တဳလပိုဉ်ဥပနန္ဒ ကောန်သၟိၚ်သာကျဝၚ်ရ။ ယွံကောန်တၠ နွံဒၟံၚ်အိုတ်ရ၊ ညးဂမၠိုၚ်ဂှ် ဒကာကၠောန်ၜိုတ်ဥပကာအဲအိုတ်ရ ရဴဝွံ သ္ဂးရ၊ ပ္ဍဲအခိၚ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ် ပြာပ်အာဇရေၚ်တြုံဂမၠိုၚ်ဂှ်တုဲမ္ဂး— “ယွံဒကာတအ် မၞးတအ်ညးဂမၠိုၚ် မိက်ဂြောပ်လတက်ကဵုဒါန်အဲ နကဵုသ္ၚာအိုတ်ရ” ဟီုဂှ် ဍာံပြဟာ ရဴဝွံ သၟာန်ရ။ ယွံကောန်နာဲ ကြက်ဂြောပ်လတက်ကဵုဒါန် တဳလပိုဉ်ဥပနန္ဒ နကဵုသ္ၚာရ ရဴဝွံ ကသပ်ဒှ်ကုပိုဲညးဂမၠိုၚ်အိုတ်ရ ရဴဝွံ (ဂရၚ်ပတီအိုတ်ရ)။ ယွံဒကာတအ် ယဝ်မၞးတအ်ညးဂမၠိုၚ် မိက်ဂြောပ်လတက်ကဵုဒါန်အဲ နကဵုသ္ၚာဒှ်အိုတ်မ္ဂး၊ ဩဝ်ဂြောပ်လတက်ကဵုဒါန် နသ္ၚာမၞုံသဘဴမဖှ်သာ်ဝွံအိုတ်ညိ၊ နကဵုသ္ၚာဂမၠိုၚ် အဲရပ်စပ်သုၚ်စောဲဟွံသေၚ်ဂှ် ၜိုန်ဂြောပ်လတက်ကဵုဒါန်လေဝ် ပသာ်ဝွံသ္ပဂှ်ရော?” ရဴဝွံ (သ္ဂးရ)။ ပ္ဍဲအခိၚ်ဂှ် တြုံဂမၠိုၚ်ဂှ် “ခမဳဂမၠိုၚ် မဒှ်တၞောဝ်ကျာ် ကောန်သၟိၚ်သာကျဝၚ်ဝွံ ပၟိက်ဇၞော်အိုတ်ရ၊ ဟွံအေၚ်သတှေ်အိုတ်ရ။ (ဟွံတရိုပ်စိုတ်အိုတ်ရ) ကုခမဳဂမၠိုၚ်ဝွံ တၞဟ်နပွမဂြောပ်လတက်ကဵုဒါန် နသ္ၚာဂမၠိုၚ်ဂှ် ဟွံလောဲသွာရ။ မုဟိုတ်တဳပိုဉ်ဥပနန္ဒ သီုပိုဲညးဂမၠိုၚ် ဟဂပ်ဝ်ဘိက်နိမန် ပ္ဍဲကိုပ်ကၠာဂှ် ပြာပ်ကၠုၚ်တုဲ အာစိုပ်ပွမစဳရေၚ်လောန် ပ္ဍဲသ္ၚာဂှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “တဳလပိုဉ်ဥပနန္ဒ ကောန်သၟိၚ်သာကျဝၚ် သီုမဟဂပ်ဝ်ဘိက်နိမန်လဝ် ပ္ဍဲကိုပ်ကၠာဂှ် ပြာပ်အာဇရေၚ်သမ္ၚေဟ်ဂမၠိုၚ်တုဲ မုဟိုတ် သ္ဂောံအာစိုပ် ပွမစဳရေၚ်လောန်ပ္ဍဲသ္ၚာဂှ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဟီုဂရိုၚ်တၚ်ဒုဟ် တဳလပိုဉ်ဥပနန္ဒ ကောန်သၟိၚ်သာကျဝၚ် နဟိုတ်မဂၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြအိုတ်ရ ။ ပ ။ “ယွံဥပနန္ဒ တၠအဲ သီုမဟဂပ်ဝ်ဘိက်နိမန်လဝ် ပ္ဍဲကိုပ်ကၠာဂှ် ပြာပ်အာဇရေၚ်သမ္ၚေဟ်ဂမၠိုၚ်တုဲ အာစိုပ်ပွမစဳရေၚ်လောန် ပ္ဍဲသ္ၚာရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ ယွံဥပနန္ဒ ဒှ်ကဠောမသကေုာံတၠအဲအိုတ်ဟာ၊ ဟွံဒှ်ကဠောမသအိုတ်ဟာ ရဴဝွံ (သၟာန်တိုန်ဂှ်)— ယွံကျာ်မၞုံပိုဉ် ဟွံဒှ်ကဠောမသအိုတ်ရ ရဴဝွံ (ဂရၚ်ပတီရ)။ ယွံတြုံမလ္ၚုသၟး (နူမဂ်ဖိုလ်) တြုံဟွံသေၚ်ကဵုကဠောမသဂှ် ဗဗွဲသပ္ပါယ်ကီု ဟွံဗဗွဲသပ္ပါယ်ကီု နွံကီု ဟွံမွဲကီု ဒဒက်တဴညးဟွံသေၚ်ကဵုကဠောမသဂှ် တီကေတ်ဟွံမာန်ရ၊ ယွံတြုံမလ္ၚုသၟး (နူမဂ်ဖိုလ်) သီုဒှ်သာ်ဂှ် တၠအဲဂှ် သီုမဟဂပ်ဝ်ဘိက်နိမန်လဝ် ပ္ဍဲကိုပ်ကၠာ ပြာပ်အာဇရေၚ်သမ္ၚေဟ်ဂမၠိုၚ် ဟွံသေၚ်ကဵုကဠောမသတုဲ အာစိုပ်ပွမစဳရေၚ်လောန် ပ္ဍဲသ္ၚာရသွံ။ ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
533) ရန်တၟံကဵုခမဳဟေၚ်တုဲ ‘ပိုဲညးဂမၠိုၚ် နၚုဟ်သ္ၚာဂမၠိုၚ်တၞဟ်တၞဟ်တွံ ရာန်သ္ၚာဂမၠိုၚ်တၞဟ်တၞဟ်တုဲ ကြက်ဂြောပ်လတက်ကဵုဒါန် ခမဳမၞုံယၟုဝွံ နကဵုသ္ၚာဂမၠိုၚ်အိုတ်ရ’ ရဴဝွံ သမ္ၚေဟ်တြုံဂမၠိုၚ်ကီု သမ္ၚေဟ်ဗြဴဂမၠိုၚ်ကီု မဟွံသေၚ်ကဵုကဠောမသၜါတၠဂှ် ဂပ်ဝ်စဳရေၚ်တဴ ၚုဟ်သ္ၚာဂမၠိုၚ်တၞဟ်တၞဟ်အိုတ်ရ။ ဇရေၚ်ဒကာဂမၠိုၚ်တေံဂှ် သီုမဟဂပ်ဝ်ဘိက်နိမန်လဝ် ပ္ဍဲကိုပ်ကၠာ ခမဳဂှ် ပြာပ်အာတုဲ ‘ယွံဒကာတအ် အာတ်ပါန်အခေါၚ်ဖအောဝ်ဗတိုက်ရ၊ နၚုဟ်သ္ၚာဂမၠိုၚ်တၞဟ်တၞဟ်ဝွံ ရာန်သ္ၚာမၞုံသဘဴမဖှ်သာ်ဝွံ မၞုံသဘဴမဖှ်သာ်ဝွံတုဲ မၞးတအ်ညးဂမၠိုၚ်မဒှ်ၜါတၠ ဒှ်မွဲဂကောံဓဝ်အိုတ်တုဲ ဩဝ်ဂြောပ်လတက်ကဵုဒါန်အဲညိ’ ရဴဝွံ သ္ပဟိုတ်ကဵုဒဒှ် မၞုံပၟိက်ခိုဟ်ဆာဲတုဲ ယဝ်အာစိုပ် ပွမစဳရေၚ်လောန် ပ္ဍဲသ္ၚာမ္ဂး၊ (ကုခမဳဂှ်) ဒးအာပတ်နိဿဂ္ဂိပါဲစိုတ်ရ ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
