၂.၂.၂။ ပွံက်ကာယသံသဂ္ဂသိက္ခာပိုဒ်

271) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳမ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ လကိုဟ်ရာဂ ဂပ်ဝ်လုပ်ဍုန်ဒှ်တုဲမ္ဂးဂှ် ထၞေန်စပ်လောန်ဒှ်တုဲ မၞုံကဵုပွမသ္ၚေဝ်မွဲဒှ်တုဲ မၞုံစိုတ်မဂပ်ဝ်ဒက်ဂြေန်ပူပါတ်ဒှ်တုဲ။ ပၠန်ဂတးမ္ဂးဂှ် စိုတ်မထၞေန်စပ်လေဝ် ပၠန်ဂတးမ္ဂးရ၊ စိုန်မထေဲပၞတ်လေဝ် ပၠန်ဂတးမ္ဂးရ၊ စိုတ်မဝိဝိင်လေဝ် ပၠန်ဂတးမ္ဂးရ၊ ၜိုန်ဂှ်လေဝ် ပ္ဍဲအရာဝွံ စိုတ်မထၞေန်စပ်ဂှ် ဂပ်ဝ်နွံပၟိက် ရဴဝွံမ္ဂး “ပၠန်ဂတး” ရ။ မာတုဂါမမ္ဂးဂှ် ဗြဴမၞိဟ်ရောင်၊ လကိုဟ် (ဒေဝတဴ) ဗြဴ ဟွံသေင်၊ ပြိုတ်ဗြဴ ဟွံသေင်၊ တိရစ္ဆာန်ဗြဴ ဟွံသေင်၊ ဗွဲတွဵုမယုတ် ကောန်ၚာ်ဗြဴမၜံင်သၠးတိတ်တ္ၚဲဝွံရောင်။ ပ္ဍဲမၞိဟ်ဗြဴအဝယ်ဇေၞာ်ဂှ် သက်ဟီုဟၟဲဟေင်ရ။ မွဲစွံမ္ဂးဂှ် မွဲဟာန်ကေုာံရောင်။ အာစိုပ်ပွမနှဴရဴဇကုတဲမ္ဂးဂှ် သ္ဂးတဴပွမကလိလောန်ရ။ တဲမ္ဂးဂှ် သ္ပတမ်နူတင်တဲတုဲ စဵုစိုပ်တၞုင်သၞေမ်တဲဂှ် (တဲမ္ဂးရ)။ ဒွက်သော်မ္ဂးဂှ် သော်သက်သက်ဂမၠိုင်ကီု သော်မနှဴရဴကေုာံတောဝ်ဂမၠိုင်ကီု သော်မနှဴရဴကေုာံပကဴဂမၠိုင်ကီု သော်မနှဴရဴကေုာံသြန်ထဝ်ဂမၠိုင်ကီု သော်မနှဴရဴကေုာံထဝ်ဂမၠိုင်ကီု သော်မနှဴရဴကေုာံဇၟန်ဗၠဲဂမၠိုင်ကီု သော်မနှဴရဴကေုာံဇၟန်မၞိက်ဂမၠိုင်ကီုဂှ် (ဒွက်သော်မ္ဂးရ)။ အၚ်္ဂဇၞော်သၟတ်မ္ဂးဂှ် ပါဲကၠေံတဲကီု ဒွက်သော်ကီုတုဲ သၟေဟ်ဂှ် အၚ်္ဂဇၞော်သၟတ်မ္ဂးရ။