၁.၄.၁။ ဝတ္ထု ခမဳပဒတဴသြၚ်ကြုၚ်ဝဂ္ဂုမုဒါဂမၠိုၚ်
193) တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံင် ပ္ဍဲဘာပြာသာဒ် မၞုံကဵုဓုပ်ပြကာ အပ္ဍဲဂြိုပ်မဟာဝိုန် ဇရေင်ဍုင်ဝေသာလဳရ။ ပ္ဍဲအခိင်ဂှ် ခမဳဂမၠိုင်မဂၠိုင်ဂၠင် မဒှ်မိတ်သဟာဲ အယာံမာတ်ကေင်ညာတ် မဒှ်မိတ်သဟာဲ ပဒတဴစသုင်မွဲစွံဂှ် သ္ပဒတဴလုပ်ဒဂိုန် ပ္ဍဲဩင်ကြုင်ဝဂ္ဂုမုဒါအိုတ်ရ။ ပ္ဍဲအခိင်ဂှ် ဝဇ္ဇဳရး စၞစသုင်ဝါတ်ခါဲရ၊ (ကတဵုဒှ်ကၞောဝ်ရ)၊ သွက်ဂွံဂယိုင်လမျီု ဝါတ်ဂါတ်ရ၊ မၞုံကဵုဇုတ်ဗုၜတ်ရ၊ သ္ဒးဂယိုင်လမျီု နကဵုဇြေဟ်လိက်မာဲရ၊ မိန်ထ္ၜကေတ်ဗဗေင် ပ္ဍဲတဲတုဲ နပွမဂ္ၚေင်ပိဏ္ဍပါတ် သွက်ဂွံယိုပ်ယာပ် ဟွံလောဲသွာရ။ ပ္ဍဲအခိင်ဂှ် ကသပ်ကတဵုဒှ် ကုခမဳဂမၠိုင်ရ— “ပ္ဍဲအခိင်လၟုဟ် ဝဇ္ဇဳဳရး စၞစသုင်ဝါတ်ခါဲရ၊ သွက်ဂွံဂယိုင်လမျီု ဝါတ်ဂါတ်ရ၊ မၞုံကဵုဇုတ်ဗုၜတ်ရ၊ သ္ဒးဂယိုင်လမျီု နကဵုဇြေဟ်လိက်မာဲရ၊ မိန်ထ္ၜကေတ်ဗဗေင် ပ္ဍဲတဲတုဲ နပွမဂ္ၚေင်ပိဏ္ဍပါတ် သွက်ဂွံယိုပ်ယာပ် ဟွံလောဲသွာရ၊ ပိုဲညးဂမၠိုင် မုရဴနနဲမွဲ ညဳသာသၟဟ်သၟန်မိပ်စိုတ်အိုဟ်တၟိုဟ် သီုဟွံကယျာန်ဒဝါတ်သေက်ဇဵုဂမၠိုင်ဂှ် သ္ဂောံပြာပ်လုပ်ဒဂိုန် ဗွဲတသိုခ်အိုတ်ဂှ်ရော? သွက်ပိဏ္ဍပါတ်လေဝ် သီုဟွံဒှ်လၟောင်ဍောင်ၜိုတ် ဂွံနွံအိုတ်ဂှ်ရော?” ရဴဝွံ (ကသပ်ကတဵုဒှ်ရ) ခမဳဂမၠိုင်လ္ၚဵုဂှ်— “ယွံကောန်တၠတအ် လၟုဟ်ဝွံ ပိုဲညးဂမၠိုင် စဳရေင်တဴ ကေင်ကာဇၞော်သၟတ် ခရှ်ဂမၠိုင်အိုတ်စိုအ်၊ စဳရေင်တဴရဴဝွံမ္ဂး မၞိဟ်ဂမၠိုင်ဂှ် ကြက်ဗှ်ဗၞုဟ်ဂွံသတိ သွက်သ္ဂောံကဵုဒါန် ကုပိုဲညးဂမၠိုင်အိုတ်ရ၊ ကဵုဒါန်ရဴဝွံအိုတ်မ္ဂး ပိုဲညးဂမၠိုင် ညဳသာသၟဟ်သၟန် မိပ်စိုတ်အိုဟ်တၟိုဟ် သီုဟွံကယျာန်ဒဝါတ်သေက်ဇဵုဂမၠိုင်ဂှ် သ္ဂောံပြာပ်လုပ်ဒဂိုန် ဗွဲတသိုခ်အိုတ်ရ၊ သွက်ပိဏ္ဍပါတ်လေဝ် သီုဟွံဒှ်လၟောင်ဍောင်ၜိုတ် နွံအိုတ်ရ” ရဴဝွံ ဟီုသ္ဂးအိုတ်ရ။ ခမဳဂမၠိုင်လ္ၚဵုဂှ်— ယွံကောန်တၠတအ် နပွမစဳရေင်တဴ ကေင်ကာဇၞော်သၟတ် ခရှ်ဂမၠိုင်ဂှ် မုဖဵုနွံအိုတ်ဂှ်ရော? ယွံကောန်တၠတအ် လၟုဟ်ဝွံ ပိုဲညးဂမၠိုင် ရင်တၠုင်တဴ ကေင်ကာကလုတ် ခရှ်ဂမၠိုင်အိုတ်စိုအ်၊ ရင်တၠုင်တဴရဴဝွံမ္ဂး မၞိဟ်ဂမၠိုင်ဂှ် ကြက်ဗှ်ဗၞုဟ်ဂွံသတိ သွက်သ္ဂောံကဵုဒါန် ကုပိုဲညးဂမၠိုင်အိုတ်ရ၊ ကဵုဒါန်ရဴဝွံအိုတ်မ္ဂး ပိုဲညးဂမၠိုင် ညဳသာသၟဟ်သၟန် မိပ်စိုတ်အိုဟ်တၟိုဟ် သီုဟွံကယျာန်ဒဝါတ်သေက်ဇဵုဂမၠိုင်ဂှ် သ္ဂောံပြာပ်လုပ်ဒဂိုန် ဗွဲတသိုခ်အိုတ်ရ၊ သွက်ပိဏ္ဍပါတ်လေဝ် သီုဟွံဒှ်လၟောင်ဍောင်ၜိုတ် နွံအိုတ်ရ” ရဴဝွံ ဟီုသ္ဂးအိုတ်ရ။ ခမဳဂမၠိုင်လ္ၚဵုဂှ်— “ယွံကောန်တၠတအ် ဟွံဗဗွဲရ၊ နပွမစဳရေင်တဴ ကေင်ကာဇၞော်သၟတ် ခရှ်ဂမၠိုင်ဂှ် မုဖဵုနွံအိုတ်ဂှ်ရော? နပွမရင်တၠုင်တဴ ကေင်ကာကလုတ်ခရှ်ဂမၠိုင် မုဖဵုနွံအိုတ်ဂှ်ရော? ယွံကောန်တၠတအ် လၟုဟ်ဝွံ ပိုဲညးဂမၠိုင် ဟီုသ္ဂးတဴ ဂုဏ်ဓရ်ၛာန်မဂ်ဖိုလ် မပြဲလောန်လတူဓရ်ကုသလကမ္မပထစှ် မဒှ်ဂြပ်မၞိဟ်ဂမၠိုင် ကေုာံရင်သကအ် ကုခရှ်ဂမၠိုင်အိုတ်စိုအ်၊ ‘ခမဳမၞုံယၟုဝွံ ကလိဂွံပဌမၛာန်ရ၊ ခမဳမၞုံယၟုဝွံ ကလိဂွံဒုတိယၛာန်ရ၊ ခမဳမၞုံယၟုဝွံ ကလိဂွံတတိယၛာန်ရ၊ ခမဳမၞုံယၟုဝွံ ကလိဂွံစတုတ္ထၛာန်ရ၊ ခမဳမၞုံယၟုဝွံ သောတာပန်ရ၊ ခမဳမၞုံယၟုဝွံ သကဒါဂါမ်ရ၊ ခမဳမၞုံယၟုဝွံ အနာဂါမ်ရ၊ ခမဳမၞုံယၟုဝွံ တၠအရှန်ရ၊ ခမဳမၞုံယၟုဝွံ ကလိဂွံဝိဇ္ဇာပိပြကာရ၊ ခမဳမၞုးယၟုဝွံ ကလိဂွံအဘိဉာဏ်တြဴပြကာရ’ ဟီုသ္ဂးအိုတ်စိုအ်၊ ဟီုသ္ဂးရဴဝွံအိုတ်မ္ဂး မၞိဟ်ဂမၠိုင်ဂှ် ကြက်သမ္တီထေင်ကေတ် ထေက်ကဵုကဵုဒါန် ကုပိုဲညးဂမၠိုင်အိုတ်ရ၊ ကဵုဒါန်ရဴဝွံအိုတ်မ္ဂး ပိုဲညးဂမၠိုင် ညဳသာသၟဟ်သၟန် မိပ်စိုတ်အိုဟ်တၟိုဟ် သီုဟွံကယျာန်ဒဝါတ် သေက်ဇဵုဂမၠိုင်ဂှ် သ္ဂောံပြာပ်လုပ်ဒဂိုန် ဗွဲတသိုခ်အိုတ်ရ၊ သွက်ပိဏ္ဍပါတ်လေဝ် သီုဟွံဒှ်လၟောင်ဍောင်ၜိုတ် နွံအိုတ်ဂှ်ရ” ရဴဝွံ ဟီုသ္ဂး အိုတ်ရ။ ယွံကောန်တၠတအ် ပွမဟီုသ္ဂးဂုဏ်ဓရ်ၛာန်မဂ်ဖိုလ် မပြဲလောန်လတူဓရ်ကုသလကမ္မပထစှ် မဒှ်ဂြပ်မၞိဟ်ဂမၠိုင် ကေုာံရင်သကအ် ကုခရှ်ဂမၠိုင်ဟေင် ပြဲသန်ရ ရဴဝွံ တုပ်စိုတ်အိုတ်ရ။
194) ပ္ဍဲကြဴနူဂှ် ခမဳဂမၠိုင်ဂှ် ဟီုသ္ဂးတဴဂုဏ်ဓရ်ၛာန်မဂ်ဖိုလ် မပြဲလောန်လတူဓရ်ကုသလကမ္မပထစှ် မဒှ်ဂြပ်မၞိဟ်ဂမၠိုင် ကေုာံရင်သကအ် ကုခရှ်ဂမၠိုင်အိုတ်ရ၊ “ခမဳမၞုံယၟုဝွံ ကလိဂွံပဌမၛာန်ရ ။ ပ ။ ခမဳမၞုံယၟုဝွံ ကလိဂွံအဘိဉာဏ်တြဴပြကာရ” ဟီုသ္ဂးအိုတ်ရ။ ပ္ဍဲအခိင်ဂှ် မၞိဟ်ဂမၠိုင်ဂှ် “ကုပိုဲညးဂမၠိုင် ကလိဂွံခိုဟ်သန်အိုတ်ရသွံ၊ ပိုဲညးဂမၠိုင် ကလိဂွံဗွဲမဒးရးအိုတ်ရသွံ၊ ယြဴပ္ဍဲဇရေင်ပိုဲညးဂမၠိုင် ခမဳဂမၠိုင် မၞုံသဘဴမြဴသာ်ဝွံ ပြာပ်လုပ်ဒဂိုန်အိုတ်ရသွံ၊ ခမဳဂမၠိုင် မၞုံကဵုဒ္ဂေတ်သဳလ မၞုံကဵုသဘဴဓရ်ခိုဟ်ဆာဲ မၞုံသဘဴမဖှ်ညံင်ရဴခမဳဂမၠိုင်ဝွံ နူအခိင်ဝွံ ကိုပ်ကၠာတေံ ဟွံကေင်ပြာပ်လုပ်ဒဂိုန် ပ္ဍဲဇရေင်ပိုဲညးဂမၠိုင်အိုတ်ရသွံ” ရဴဝွံ ယြဴဘောဇိုန်စၞသ္ၚာဲ စၞကၠာန်စၞသုင်ဂမၠိုင် အလဵုဇကုပိုဲတအ် ဟွံစအိုတ် ဟွံသ္ၚာဲအိုတ် ဟွံကၠာန်အိုတ် ဟွံသုင်အိုတ်ရ၊ ဟွံကဵုကုမိမ ကောန်သမ္ဘာ ဍိက်သၟာကမၠောန် မိတ်သဟာဲပြဝါ ကဠောမသနာံရိုင်ကောန်မွဲမိဂမၠိုင်အိုတ်ရ၊ ဘောဇိုန်စၞသ္ၚာဲ စၞကၠာန်စၞသုင်ဂမၠိုင်ဂှ်ဟေင် ကဵုဒါန်ကုခမဳဂမၠိုင်အိုတ်ရ။ ပ္ဍဲအခိင်ဂှ် ကုခမဳဂမၠိုင်ဂှ် မၞုံကဵုပွမရုပ်သာ်ကျေဝ်ဂေါဝ် ပွမဣနြ္ဒဳပေင်အုဟ် ပွမသာ်မုက္ခဝါဇြုင်ကေဝ် သာ်စၞာံဇကု ဇြုင်ကေဝ်ဗွဲတၟေင်အိုတ်ရ။ ပွမပြာပ်အာ သွက်သ္ဂောံဗဵုလ္ၚောဝ် တဳလမၞုံပိုဉ်ကျာ်တြဲ ဒဒက်တဴခမဳဂမၠိုင် မဒၠိုက်ကတဵုနူဝှ်ဂှ် ဒှ်အခိုက်အလေံရ။ ပ္ဍဲအခိင်ဂှ် ကလိလောန်အာပိဂိတုတုဲ ခမဳဂမၠိုင် မဒၠိုက်ကတဵုနူဝှ်ဂှ် လပှ်သီဂိုင်ဒေပ် ဘာသၞာသတိက် သၞာဒၟံင်တုဲမ္ဂး ဂိုင်ကေတ်ဗဗေင်သ္ၚာတုဲ ပ္ၚောံပြာပ်အာ ဍုင်ဝေသာလဳအိုတ်ရ၊ ဗွဲလၟေင်လၟေင် ပြာပ်အာစိုပ် ဇရေင်တဳလမၞုံပိုဉ်ကျာ်တြဲ ပ္ဍဲဘာပြာသာဒ် မၞုံကဵုဓုပ်ပြကာ အပ္ဍဲဂြိုပ်မဟာဝိုန် ဇရေင်ဍုင်ဝေသာလဳအိုတ်တုဲမ္ဂး လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲ ဂဇအ်ဒၟံင် ပ္ဍဲဒၞါဲမွဲအိုတ်ရ။ ပ္ဍဲအခိင်ဂှ် ခမဳဂမၠိုင် မဒၠိုက်ကတဵုနူဝှ် ပ္ဍဲဒိုဟ်ပန်ဂမၠိုင်ဂှ် ဇြာဲသကှ်အိုတ်ရ၊ ဖျုန်ဆီဒေက်ခ္ဍေက်အိုတ်ရ၊ မၞုံကဵုရုပ်သာ် ဟွံကျေဝ်ဂေါဝ်အိုတ်ရ၊ မၞုံကဵုသာ်ဇကုဖျိုဟ်ဖျေတ် သၟဟ်ညံင်တၞးဆုဍုဟ်ဍုဟ်အိုတ်ရ၊ မၞုံကဵုဇကုဓရံင် ဇာလတေင်မံက်ထေင်ဒၟံင် (သၟဟ်ညံင်လးပၠးလဝ်ဇာနှိက်) အိုတ်ရ၊ ခမဳမသ္ပဒတဴ ပ္ဍဲဩင်ကြုင်ဝဂ္ဂုမုဒါတုန် မၞုံကဵုရုပ်သာ်ကျေဝ်ဂေါဝ်အိုတ်ရ၊ မၞုံကဵုဣန္ဒြဳပေင်အုဟ်အိုတ်ရ၊ မၞုံကဵုသာ်မုက္ခဝါဇြုင်ကေဝ်အိုတ်ရ၊ မၞုံကဵုသာ်စၞာံဇကုဇြုင်ကေဝ်ဗွဲတၟေင်အိုတ်ရ။ ပွမဟီုဂလာန်ဆက်မိတ် ဗွဲမမိပ်စိုတ်အိုဟ်တိၟုဟ် ကေုာံခမဳအာဂန္တုကဂမၠိုင်မွဲစွံဂှ် ဒှ်အခိုက်အလေံ တဳလမၞုံပိုဉ်ကျာ်တြဲဂမၠိုင်ရ။ ပ္ဍဲအခိင်ဂှ် တဳလမၞုံပိုဉ်ကျာ်တြဲဂှ်— “ယွံခမဳတအ် မိပ်ဇြိပ်ထတ်ယုက်အိုတ်ဟာ၊ ယိုပ်ယာပ်အိုတ်ဟာ၊ ညဳသာသၟဟ်သၟန် မိပ်စိုတ်အိုဟ်တိၟုဟ် သီုဟွံကယျာန်ဒဝါတ်သေက်ဇဵုဂမၠိုင်ဂှ် သ္ဂောံပြာပ်လုပ်ဒဂိုန် ဗွဲတသိုခ်အိုတ်ရဟာ၊ သွက်ပိဏ္ဍပါတ်လေဝ် သီုဟွံဒှ်လၟောင်ဍောင်ၜိုတ် နွံအိုတ်ရဟာ” ရဴဝွံ သၟာန်တိုန်ခမဳ ဝဂ္ဂုမုဒါဂမၠိုင်ဂှ်— မိပ်ဇြိပ်ထတ်ယုက်အိုတ်ရ ယွံကျာ်မၞုံပိုဉ်၊ ယိုပ်ယာပ်အိုတ်ရ ယွံကျာ်မၞုံပိုဉ်၊ ညဳသာသၟဟ်သၟန် မိပ်စိုတ်အိုဟ်တၟိုဟ် သီုဟွံကယျာန်ဒဝါတ်သေက်ဇဵုဂမၠိုင်ဂှ် သ္ဂောံပြာပ်လုပ်ဒဂိုန် ဗွဲတသိုခ်အိုတ်ရ ယွံကျာ်မၞုံပိုဉ်၊ သွက်ပိဏ္ဍပါတ်လေဝ် သီုဟွံဒှ်လၟောင်ဍောင်ၜိုတ် နွံအိုတ်ရ ယွံကျာ်မၞုံပိုဉ်” ရဴဝွံ ဂရင်ပတီအိုတ်ရ။ ကျာ်တြဲဂမၠိုင် သီုတီတဴလေဝ် သၟာန်သၟုက်အိုတ်ရ၊ သီုမတီတဴလေဝ် ဟွံသၟာန်သၟုက်အိုတ်ရ ။ ပ ။ နကဵုဟိုတ်ဂမၠိုင် ၜါပြကာမတွံဂး “ဓရ်ဂှ်လေဝ် ကြက်တွံအိုတ်ရ၊ သိက္ခာပိုဒ်ဂှ်လေဝ် ကြက်ပညပ်တဴ ကုကွးဂမၠိုင်အိုတ်ရ”ဂှ် ကျာ်တြဲ မပတၠပိုဉ်တြဴပြကာဂမၠိုင် သၟာန်သၟုက်တဴ ခမဳဂမၠိုင်အိုတ်ရ။ ပ္ဍဲကြဴနူဂှ် တဳလမၞုံပိုဉ်ကျာ်တြဲဂှ် “ယွံခမဳတအ် မၞးတအ်ညးဂမၠိုင် မုရဴသာ်လဵု ညဳသာ သၟဟ်သၟန် မိပ်စိုတ်အိုဟ်တၟိုဟ် သီုဟွံကယျာန်ဒဝါတ်သေက်ဇဵုဂမၠိုင်ဂှ် သ္ဂောံပြာပ်လုပ်ဒဂိုန် ဗွဲတသိုခ်အိုတ်ဂှ်ရော? သွက်ပိဏ္ဍပါတ်လေဝ် သီုဟွံဒှ်လၟောင်ဍောင်ၜိုတ် နွံအိုတ်ဂှ်ရော?” ရဴဝွံ အခိင်မသၟာန်တိုန် ခမဳပဒတဴဩင်ကြုင်ဝဂ္ဂုမုဒါဂမၠိုင်ဂှ် ခမဳဂမၠိုင်ဂှ် ကလေင်ဂရင်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ပသာ်ဂှ်ရော? (ဓရ်ၛာန်မဂ်ဖိုလ်) ဂှ် နွံပြကဋ် ကုမၞးတအ်ညးဂမၠိုင်အိုတ်ဟာ ရဴဝွံ (သၟာန်တိုန်ဂှ်)— ဟွံမွဲပြာကဋ်ရ ယွံကျာ်မၞုံပိုဉ် ရဴဝွံ (ဂရင်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ၊ “ယွံတြုံမလ္ၚုသၟး (နူမဂ်ဖိုလ်) တအ် (ပွကမၠောန်) ဝွံ ဟွံထေက် ကုခမဳဂမၠိုင်ရ၊ ဟွံဗဗွဲရ၊ ဟွံသပ္ပါယ်ရ၊ အာကာရအရာခမဳတအ် ဟွံသေင်ရ၊ ဟွံဂပ်ဝ်ရ၊ ဟွံထေက်ကဵုသ္ပရ၊ ယွံတြုံမလ္ၚုသၟး (နူမဂ်ဖိုလ်) တအ် မုဟိုတ်မၞးတအ်ညးဂမၠိုင် သွက်ဗုင်ဂၞဴဂှ် ဟီုသ္ဂးတဴ ဂုဏ်ဓရ်ၛာန်မဂ်ဖိုလ် မပြဲလောန်လတူဓရ်ကုသလကမ္မပထစှ် မဒှ်ဂြပ်မၞိဟ်ဂမၠိုင် ကေုာံရင်သကအ် ကုခရှ်ဂမၠိုင်အိုတ်ဂှ်ရော? ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုင် ရေက်ကလိုဟ်ထောံ ဗုင်ဂၞဴဇကုနကဵုၜုန်ရေက် ဂၠေဟ်ဗုင်ဂၠဴမကေက်ဂှ် ပြဲဏီရ၊ သွက်ဗုင်ဂၞဴဂှ် ပွမဟီုသ္ဂးတဴ ဂုဏ်ဓရ်ၛာန်မဂ်ဖိုလ်ဂှ် မပြဲလောန်လတူဓရ်ကုသလကမ္မပထစှ် မဒှ်ဂြပ်မၞိဟ်ဂမၠိုင် ကေုာံရင်သကအ် ကုခရှ်ဂမၠိုင်တုန် ဟွံပြဲဟေင်ရ။ ပွမဒှ်သာ်ဂှ်ဂှ် မုဟိုတ်ဂှ်ရော? ယွံတြုံမလ္ၚုသၟး (နူမဂ်ဖိုလ်) တအ် ဟိုတ်နူဟိုတ်မတွံဂး ပွမဂစိုတ် နကဵုၜုန်ဂှ် အာစိုပ်ပွမချိုတ်ကီု ဒဒိုခ်မဆိုက်ညောန်ကဵုချိုတ်ကီုရ၊ ဟိုတ်နူဟိုတ်မတွံဂး ပွမရေက်ကလိုဟ်ထောံ ဗုင်ဂၞဴဇကု နကဵုၜုန်ဂှ် ခန္ဓဇကုလီုလာ်တုဲ ပ္ဍဲကြဴနူချိုတ်တုဲဂှ် နရက်မစာ်စ္ဍးနူတသိုခ် မဒှ်လအာဂတိ ညးဟွံခိုတ်ဆာဲတအ် မဒှ်အရာဒၞါဲဒတုံစှေ်ပြးဆာဲတုန်အာစိုပ်ဟွံမာန်ဟေင်ရ။ ယွံတြုံမလ္ၚုသၟး (နူမဂ်ဖိုလ်) တအ် ဟိုတ်နူဟိုတ်မတွံဂး ပွမဟီုသ္ဂးတဴ ဂုဏ်ဓရ်ၛာန်မဂ်ဖိုလ် မပြဲလောန်လတူဓရ်ကုသလကမ္မပထစှ် မဒှ်ဂြပ်မၞိဟ်ဂမၠိုင် ကေုာံရင်သကအ် ကုခရှ်ဂမၠိုင်ဝွံတုန် ခန္ဓဇကုလီုလာ်တုဲ ပ္ဍဲကြဴနူချိုတ်တုဲဂှ် သ္ဒးအာစိုပ်နရက် မစာ်စ္ဍးနူတသိုခ် မဒှ်လအာဂတိ ညးဟွံခိုဟ်ဆာဲတအ် မဒှ်အရာဒၞါဲဒတုံစှေ်ပြးဆာဲရ။ ယွံတြုံမလ္ၚုသၟး (နူမဂ်ဖိုလ်) တအ် ပွ (မၞံတအ်ညးဂမၠိုင် သ္ပဒး) ဝွံ ကုညးမဟွံလျုင်ဇြုင်သ္ဍိုက်ဂမၠိုင်ဏီ တၞဟ်နပွမကဵုလျုင်ဇြုင်သ္ဍိုက်ကီု ။ ပ ။ ဂရိုဟ်တုဲ တွံကဵုဂလာန်ဓရ်တုဲပ္ဍဲကြဴသ္ဂးကဵုခမဳဂမၠိုင်အိုတ်ရ။
