၁.၁.၄။ ခဏ်ထ္ၜးကဵုပရူပရာ ဒုၚ်သာတ်သၞာ
43) ပ္ဍဲမွဲအခိၚ်တေံ ခမဳကောန်ညးဝဇ္ဇဳရးဂမၠိုၚ်မဂၠိုၚ်ဂၠၚ် မသ္ပဒတဴ ဍုၚ်ဝေသာလဳဂှ် ပြဘိုဂ်စအတိုၚ်နွံပၟိက်တုဲ တိက်အတိုၚ်နွံပၟိက်တုဲ ဟုမ်ဍာ်အတိုၚ်နွံပၟိက်တုဲအိုတ်မ္ဂး သ္ပပၠုပ်စိုတ်ဗွဲမဟွံဗဗွဲအိုတ်တုဲ ဟွံဖျေံသိက္ခာ ဟွံသ္ပပွမဍိုန်ကဵုဇြဟတ် ဗွဲမပြာကဋ်အိုတ်တုဲ သွိုန်ဗပိုန် (ဒ္ဂေတ်သ္ပ) ဒ္ဂေတ်မေထုန်အိုတ်ရ။ ခမဳဂမၠိုၚ်ဂှ် ပ္ဍဲအခိၚ်လက္ကရဴ တၟတ်ဒွံစုက်ဒး ကေုာံပွမကဠောမသဂမၠိုၚ်လီုလာ် ပွမပိုဉ်ဟာန်ဘိုဂ်ဘဂ်ဂမၠိုၚ်လီုလာ် ပွမလီုလာ်မ္ဂး ယဲဂမၠိုၚ်ဒှ်တုဲ ပ္ၚောံပြာပ်အာဇရေၚ် တဳလပိုဉ်အာနန္ဒအိုတ်တုဲ—
“ယွံတဳလပိုဉ်အာနန္ဒ ပိုဲဍိက်တအ်ညးဂမၠိုၚ် ဟွံဟီုဂရိုဟ်ကျာ်တြဲအိုတ်ရ၊ ဟွံဟီုဂရိုဟ်ဓရ်အိုတ်ရ၊ ဟွံဟီုဂရိုဟ်သၚ်အိုတ်ရ၊ ယွံတဳလပိုဉ်အာနန္ဒ ပိုဲဍိက်တအ်ညးဂမၠိုၚ် ဟီုဂရိုဟ်တဴ ဇကုဇကုဟေၚ်အိုတ်ရ၊ ဟွံဟီုဂရိုဟ်ညးသအာၚ်အိုတ်ရ၊ ပိုဲဍိက်တအ်ညးဂမၠိုၚ် သ္ပခမဳ ပ္ဍဲ ‘ဓမ္မဝိနယ’ သာသနာ မဂပ်ဝ်တွံလဝ်ဗွဲမဒးရး ရဴဝွံအိုတ်တုဲ မဟွံသၟဟ်အရထ သွက်သ္ဂောံဒ္ဂေတ်လ္ၚတ်ဒ္ဂေတ်မပြဲ ဗွဲမဍိုက်ပေၚ်သအးဇ္ၚး စဵုကဵုလအိုတ်လမျီုအိုတ်ဂှ်ဟေၚ် ဒှ်ညးဟွံမွဲကဵုကျာ်သြဳဂမၠိုၚ် ညးအောန်ကဵုပိုဉ်ဂမၠိုၚ်အိုတ်ရ။
ယွံတဳလပိုဉ်အာနန္ဒ ပ္ဍဲအခိၚ်လၟုဟ်ဝွံ ပိုဲဍိက်တအ်ညးဂမၠိုၚ် ကလိဂွံဒဒှ်ထပိုဲ ပ္ဍဲဇရေၚ်တဳလမၞုံပိုဉ်ကျာ်တြဲအိုတ်မ္ဂး ကလိဂွံဒဒှ်ခမဳပယျၚ်အိုတ်မ္ဂး ပ္ဍဲအခိၚ်လၟုဟ်ဝွံဟေၚ် မၠာ်သ္ၚေဝ်ဓရ်ကုသိုလ်ဂမၠိုၚ် ဗွဲတၟေၚ်တုဲအိုတ်မ္ဂး လုကဴ ‘ပဌမယာမ်’ ကိုပ်ကၠာဗ္တမ် ‘ပစ္ဆိမယာမ်’ သ္ဂာဗ္တမ် သီုမပတိတ်ဇြဟတ် ပွမဇၞော်ပၟဝ် ဓရ် ‘ဗောဓိပက္ခိယ’ မဒှ်ဗော်သွး မဂ်ဉာဏ်ဂမၠိုၚ်မဂၠိုၚ်ဂၠိုၚ်ကဵုဝါဂှ် သ္ပဒတဴအိုတ်ရ။
ယွံတဳလပိုဉ်အာနန္ဒ အာတ်ပါန်အခေါၚ်အိုတ်ရ၊ ဩဝ်ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲညိ” ရဴဝွံ ဂရၚ်ပတီအိုတ်ရ။
ယွံကောန်တၠတအ် ခိုဟ်သန်ရ ရဴဝွံ တဳလပိုဉ်အာနန္ဒ ဒုၚ်ဝန်ကုခမဳကောန်ညးဝဇ္ဇဳရးဂမၠိုၚ် မသ္ပဒတဴဍုၚ်ဝေသာလဳတုဲမ္ဂး ပ္ၚောံပြာပ်ဇရေၚ် တဳလမၞုံပိုဉ်ကျာ်တြဲတုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။
ယွံအာနန္ဒ ဟိုတ်နူဟိုတ် ညးဝဇ္ဇဳရး ကောန်ညးဝဇ္ဇဳရးဂမၠိုၚ် ကျာ်တြဲပါဲနုက်ထောံပါရာဇိကသိက္ခာပိုဒ် မဂပ်ဝ်ပညပ်လဝ်တုဲ ကုကွးဂမၠိုၚ်ရ၊ ပွမပါဲနုက်ထောံဝွံ ဟိုတ်ဟွံသေၚ်အခေါၚ်ဟွံသေၚ်ရ ရဴဝွံ သ္ဂးရ။
ပ္ဍဲကြဴနူဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ဟီုတွံဂလာန်ဓရ်တုဲမ္ဂး သ္ဂးကဵုခမဳဂမၠိုၚ်ရ၊ ယွံခမဳတအ် ယြဴခမဳတအ် ယြဴခမဳမွဲ ဟွံဖျေံသိက္ခာ ဟွံသ္ပပွမဍိုန်ဇြဟတ် ဗွဲမပြာကဋ်တုဲ သွိုန်ဗပိုန် (ဒ္ဂေတ်သ္ပ) ဒ္ဂေတ်မေထုန်ရ၊ ညးဂှ် ကၠုၚ်မ္ဂး သ္ပကဵုခမဳပယျၚ်ဟွံဂွံရ၊ ယြဴခမဳမွဲတုန် ဖျေံကၠေံသိက္ခာ သ္ပပွမဍိုန်ဇြဟတ် ဗွဲမပြာကဋ်တုဲ သွိုန်ဗပိုန် (ဒ္ဂေတ်သ္ပ) ဒ္ဂေတ်မေထုန်ရ၊ ညးဂှ်ကၠုၚ်တဴမ္ဂး သ္ဒးသ္ပကဵုခမဳပယျၚ်ရ။ ယွံခမဳတအ် ရဴသာ်ဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
44) ယြဴခမဳမွဲ ကိရၚ်အာစိုပ် သိက္ခာခမဳဂမၠိုၚ် (မတွံဂးအဓိသဳလ) သာဇဳဝ (မတွံဂးသိက္ခာပိုဒ်) ဟွံဖျေံသိက္ခာ ဟွံသ္ပပွမဍိုန်ဇြဟတ် ဗွဲမပြာကဋ်တုဲ ဗွဲတွဵုမယုတ် ပ္ဍဲတိရစ္ဆာန်ၝောံဂှ်လေဝ် သွိုန်ဗပိုန်သိပ်ဂၠိပ် ဒ္ဂေတ်မေထုန်မ္ဂး၊ ခမဳဂှ် အာစိုပ်ပွမကျဟောမ်အာ နူသာသနာရ၊ ဟွံမွဲကဵုပွမပံၚ်ဖက်ဆက်ဆောံ ကေုာံခမဳခိုဟ်ဆာဲဂမၠိုၚ်မွဲစွံရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
