၁.၁.၃။ ဝတ္ထုကၞုဲၝောံ
40) ပ္ဍဲမွဲအခိၚ်တေံ ခမဳမွဲဇကု ပ္ဍဲဂြိုပ်မဟာန်ဝိုန် ဇရေၚ်ဍုၚ်ဝေသာလဳ လှေံလှန်ကၞုဲၝောံနကဵုစၞတုဲ သွိုန်ဗပိုန် (ဒ္ဂေတ်သ္ပ) ဒ္ဂေတ်မေထုန် ပ္ဍဲကၞုဲၝောံဂှ်ရ၊ ပ္ဍဲကြဴနူဂှ် ခမဳဂှ် ပ္ဍဲအခိၚ်နူဂယး ရုၚ်လတက်ပဠေဝ်သ္ၚာဲတုဲ သီုမထ္ၜဂိုၚ်ကေတ် ဗဗေၚ်သ္ၚာ လုပ်ဂ္ၚေၚ်ပိဏ္ဍပါတ် ဍုၚ်ဝေသာလဳရ။ ပ္ဍဲအခိၚ်ဂှ် ခမဳဂမၠိုၚ်မဂၠိုၚ်ဂၠေၚ် ဂေတ်ဂ္ၚေၚ်လၟေၚ်လၟေၚ်ဘာအိုတ်မ္ဂး ပြာပ်စိုပ်အာဘာခမဳဂှ်အိုတ်ရ၊ ကၞုဲၝောံဂှ် ညာတ်ဒးခမဳအာဂန္တုကဂမၠိုၚ် မက္ညကၠုၚ်နူဇမ္ၚောဲတုဲ ပ္ဍဲကြဴ ပြာပ်အာဇရေၚ် ခမဳဂမၠိုၚ်တုဲမ္ဂး ပ္ဍဲဂတခမဳဂမၠိုၚ်ဂှ် ဂၞိၚ်လေဝ် ပချဳထ္ၜးရ၊ ဗ္တလေဝ် ပချဳထ္ၜးရ၊ ဂၞိၚ်လေဝ် ပကုန်ထ္ၜးရ၊ သၞိၚ်နိမိတ် (သွက်ဂွံဒ္ဂေတ်သ္ပမေထုန်) လေဝ် သ္ပရ။ ပ္ဍဲအခိၚ်ဂှ် “အဆတ်ဨကန်ဟွံမွဲပၠန်သၠေဟ်ပၟာ ခမဳဂှ် သွိုန်ဗပိုန် (ဒ္ဂေတ်သ္ပ) ဒ္ဂေတ်မေထုန် ပ္ဍဲကၞုဲၝောံဝွံရ” ရဴဝွံ ကသပ်ဒှ် ကုခမဳအာဂန္တုကဂမၠိုၚ်အိုတ်ရ၊ (ကသပ်ဒှ်တုဲမ္ဂး) အောပ်ဗ္ဒဒၟံၚ်ပ္ဍဲမွဲဒၞါဲတုဲ (တောပ်ကျောဝ်ဒၟံၚ်) အိုတ်ရ၊ ပ္ဍဲအခိၚ်ဂှ် ခမဳ (ပဒတဴဘာ) ဂှ် ဂ္ၚေၚ်ပိဏ္ဍပါတ် နူဍုၚ်ဝေသာလဳတုဲပ္ဍဲကြဴ ဂိုၚ်ကေတ်ပိဏ္ဍပါတ်တုဲ ကလေၚ်စဴကၠုၚ်ရ။
41) ပ္ဍဲအခိၚ်ဂှ် ကၞုဲၝောံဂှ် ပြာပ်ကၠုၚ်ဇရေၚ် ခမဳ (ပဒတဴဘာ) ဂှ်ရ၊ ပ္ဍဲအခိၚ်ဂှ် ခမဳဂှ်ပိဏ္ဍပါတ်လ္ၚဵုဂှ်စတုဲ လ္ၚဵုဂှ်ကဵုကုကၞုဲၝောံရ၊ ပ္ဍဲကြဴနူဂှ် ကၞုဲၝောံဂှ် စပုၚ်တုဲ ပကုန်ကဵုဂၞိၚ်ကုခမဳဂှ်ရ၊ ပ္ဍဲအခိၚ်ဂှ် ခမဳဂှ် သွိုန်ဗပိုန် (ဒ္ဂေတ်သ္ပ) ဒ္ဂေတ်မေထုန် ပ္ဍဲကၞုဲၝောံဂှ်ရ။
ပ္ဍဲအခိၚ်ဂှ် ခမဳအာဂန္တုကဂမၠိုၚ်ဂှ် “ယွံကောန်တၠ တဳလမၞုံပိုဉ်ကျာ်တြဲ ဂပ်ဝ်ပညပ်လဝ်သိက္ခာပိုဒ်တုဲရ ဟွံသေၚ်ဟာ၊ ယွံကောန်တၠ မုဟိုတ်တၠအဲ သွိုန်ဗပိုန် (ဒ္ဂေတ်သ္ပ) ဒ္ဂေတ်မေထုန် ပ္ဍဲကၞုဲၝောံဂှ်ရော?” ရဴဝွံ ဟီုသ္ဂးကဵု ခမဳ (ပဒတဴဘာ) ဂှ်အိုတ်ရ။
ယွံကောန်တၠတအ် တဳလမၞုံပိုဉ်ကျာ်တြဲ ဂပ်ဝ်ပညပ်လဝ်သိက္ခာပိုဒ်တုန် ဍာံပြရ၊ ၜိုန်ဂှ်သိက္ခာပိုဒ်ဂှ် ဂပ်ဝ်ပညပ်လဝ်ပ္ဍဲမၞိဟ်ဗြဴဟေၚ်ရ၊ ဂပ်ဝ်ပညပ်လဝ် ပ္ဍဲတိရစ္ဆာန်ၝောံ ဟွံသေၚ်ရ ရဴဝွံ (ကလေၚ်ဂရၚ်ပတီရ)။
ယွံကောန်တၠ ပွမသွိုန်ဗပိုန် (ဒ္ဂေတ်သ္ပ) ဒ္ဂေတ်မေထုန်ပ္ဍဲကၞုဲၝောံဂှ် တုပ်သၟဟ်ကေုာံပွမသွိုန်ဗပိုန် (ဒ္ဂေတ်သ္ပ) ဒ္ဂေတ်မေထုန် ပ္ဍဲမၞိဟ်ဗြဴဟေၚ်ရ ဟွံသေၚ်ရ၊ ယွံကောန်တၠ (ကမၠောန်ပွတၠအဲ) ဝွံ ဟွံထေက်ကုခမဳဂမၠိုၚ်ရ၊ ဟွံဗဗွဲရ၊ ဟွံသပ္ပါယ်ရ၊ အာကာရအရာ ခမဳတအ်ဟွံသေၚ်ရ၊ ဟွံဂပ်ဝ်ရ၊ ဟွံထေက်ကဵုသ္ပရ၊ ယွံကောန်တၠ မုဟိုတ်တၠအဲဂှ် သ္ပခမဳ ပ္ဍဲ ‘ဓမ္မဝိနယ’ သာသနာ မဂပ်ဝ်တွံလဝ် ဗွဲမဒးရး ရဴဝွံတုဲ သွက်သ္ဂောံဒ္ဂေတ်လ္ၚတ် ဒ္ဂေတ်မပြဲ ဗွဲမဍိုက်ပေၚ်သအးဇ္ၚး စဵုကဵုလအိတ်လမျီုဂှ် ဟွံသၟဟ်အရထဂှ်ရော? ယွံကောန်တၠ တဳလမၞုံပိုဉ်ကျာ်တြဲဂှ် နဟိုတ်မဂၠိုၚ်ဂၠၚ် ဟွံတွံလဝ်ဓရ် တၞဟ်နပွမဒှ်မွဲဟာန်ကေုာံရာဂတုဲ တွံလဝ်သွက်ဂွံစာ်စ္ဍးနူရာဂရ ဟွံသေၚ်ဟာ ။ ပ ။ တွံလဝ် ပွမၜိုဟ်လလမ် ဒတူတၠာဲကာမဂုဏ်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ကုညးလျုၚ်ဇြုၚ်သ္ဍိုက်တုဲဂမၠိုၚ် တၞဟ်နပွမကဵုလျုၚ်ဇြုၚ်သ္ဍိုက်ဂၠိုၚ်တိုန်ကီု ကဵုကတဵုဒှ်ဟွံမာန်ရ။ ယွံကောန်တၠ ဍာံဍာံစၟတ်စၟတ် ပွယုတ်မာတၠအဲ သ္ပဒးဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမဟွံကဵုလျုၚ်ဇြုၚ်သ္ဍိုက်ကီု ကုညးလျုၚ်ဇြုၚ်သ္ဍိုက်တုဲလ္ၚဵုဂမၠိုၚ် တၞဟ်နပွမကဵုလျုၚ်ဇြုၚ်သ္ဍိုက်လီုလာ်ကီု ကဵုကတဵုဒှ်ရ ရဴဝွံ (ဟီုသ္ဂးအိုတ်ရ)။
ပ္ဍဲကြဴနူဂှ် ခမဳဂမၠိုၚ်ဂှ် ဟီုဂရိုဟ်တၚ်ဒုဟ် ခမဳ (မဒ္ဂေတ်သ္ပဒ္ဂေတ်မေထုန် ပ္ဍဲကၞုဲၝောံ) ဂှ် နဟိုတ်မဂၠိုၚ်အိုတ်တုဲ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
42) ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ကဵုခမဳသၚ်ကောံဓရီုတုဲမ္ဂး “ယွံခမဳ တၠအဲ သွိုန်ဗပိုန် (ဒ္ဂေတ်သ္ပဒး) ဒ္ဂေတ်မေထုန် ပ္ဍဲကၞုဲၝောံရဂှ် ဍာံပြဟာ” ရဴဝွံ စၟဳစၟတ်သၟာန်သၟုက် ခမဳဂှ်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။
တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ၊ “ယွံတြုံမလ္ၚုသၟး (နူမဂ်ဖိုလ်) (ပွကမၠောန်တၠအဲ) ဝွံ ဟွံထေက်ကုခမဳဂမၠိုၚ်ရ၊ ဟွံဗဗွဲရ၊ ဟွံသပ္ပါယ်ရ၊ အာကာရအရာ ခမဳတအ်ဟွံသေၚ်ရ၊ ဟွံဂပ်ဝ်ရ၊ ဟွံထေက်ကဵုသ္ပရ၊ ယွံတြုံမလ္ၚုသၟး (နူမဂ်ဖိုလ်) မုဟိုတ် တၠအဲဂှ် သ္ပခမဳ ပ္ဍဲ ‘ဓမ္မဝိနယ’ သာသနာ မဂပ်ဝ်တွံလဝ် ဗွဲမဒးရး ရဴဝွံတုဲ သွက်သ္ဂောံဒ္ဂေတ်လ္ၚတ်ဒ္ဂေတ်မပြဲ ဗွဲမဍိုက်ပေၚ်သအးဇ္ၚး စဵုကဵုလအိတ်လမျီုဂှ် ဟွံသၟုဟ်ရထဂှ်ရော? ယွံတြုံမလ္ၚုသၟး (နူမဂ်ဖိုလ်) အဲဂှ် နဟိုတ်မဂၠိုၚ်ဂၠၚ် ဟွံတွံလဝ်ဓရ် တၞဟ်နပွမဒှ်မွဲဟာန်ကေုာံရာဂတုဲ တွံလဝ်သွက်ဂွံစာ်စ္ဍးနူရာဂရ ဟွံသေၚ်ဟာ ။ ပ ။ တွံလဝ်ဓရ် ပွမၜိုဟ်လလမ် ဒတူတၠာဲကာမဂုဏ်ဂမၠိုၚ်ရ ဟွံသေၚ်ဟာ။
ယွံတြုံမလ္ၚုသၟး (နူမဂ်ဖိုလ်) ပွမပၠုပ်စုတ်အၚ်္ဂဇာတ်တၠအဲ ပ္ဍဲပါၚ်ဇြုံ မၞုံကဵုဂျိမပြဟ် မၞုံကဵုဂျိမသကာတ်ဂှ် ပြဲသန်ဏီရ၊ ပွမပၠုပ်စုတ်အၚ်္ဂဇာတ်တၠအဲ ပ္ဍဲအၚ်္ဂဇာတ်ကၞုဲၝောံဂှ် ဟွံပြဲဟေၚ်ရ။
ယွံတြုံမလ္ၚုသၟး (နူမဂ်ဖိုလ်) ပွမပၠုပ်စုတ်အၚ်္ဂဇာတ်တၠအဲ ပ္ဍဲပါၚ်ဇြုံဗုဲ ဇြုံဇာတ်ဂှ် ပြဲသန်ဏီရ၊ ပွမပၠုပ်စုတ်အၚ်္ဂဇာတ်တၠအဲ ပ္ဍဲအၚ်္ဂဇာတ်ကၞုဲၝောံဂှ် ဟွံပြဲဟေၚ်ရ။
ယွံတြုံမလ္ၚုသၟး (နူမဂ်ဖိုလ်) ပွမပၠုပ်အၚ်္ဂဇာတ်တၠအဲ ပ္ဍဲဗွဝ်ဖအုမ်လ္ၚပၟတ် မဂဵုတူဍာဲဂြၚ် မဂဵုလဟဵုတူပွဳပွူ မဒှ်မွဲဟာန်ကေုာံသၞပၟတ်ဂၠန်ပၟတ်ဂှ် ပြဲသန်ဏီ၊ ပွမပၠုပ်စုတ်အၚ်္ဂဇာတ်တၠအဲ ပ္ဍဲအၚ်္ဂဇာတ်ကၞုဲၝောံဂှ် ဟွံပြဲဟေၚ်ရ။
ပွမဒှ်သာ်ဂှ်ဂှ် မုဟိုတ်ရောဟီုမ္ဂး ယွံတြုံမလ္ၚုသၟး (နူမဂ်ဖိုလ်) ဟိုတ်နူဟိုတ် (မတွံဂးပွမပၠုပ်စုတ်အၚ်္ဂဇာတ် ပ္ဍဲပါၚ်ဇြုံ ဗွဝ်ဖအုမ်လ္ၚပၟတ်) ဂှ် သ္ဒးအာစိုပ် ပွမချိုတ်ကီု ဒဒိုခ်မဆိုက်ညောန်ကဵုချိုတ်ကီုရ၊ ဟိုတ်နူဟိုတ် (မတွံဂးမပၠုပ်စုတ် အၚ်္ဂဇာတ်ပ္ဍဲပါၚ်ဇြုံ ဗွဝ်ဖအုမ်လ္ၚပၟတ်) ဂှ် ခန္ဓဇကုလီုလာ်တုဲ ပ္ဍဲကြဴနူချိုတ်ဂှ် နရက်မစာ်စ္ဍးနူတသိုခ် မဒှ်လအာဂတိညးဟွံခိုဟ်ဆာဲတအ် မဒှ်အရာဒၞါဲဒတုံစှေ်ပြးဆာဲတုန် အာစိုပ်ဟွံမာန်ဟေၚ်ရ။
ယွံတြုံမလ္ၚုသၟး (နူမဂ်ဖိုလ်) ဟိုတ်နူဟိုတ် (မတွံဂးပွမပၠုပ်စုတ်အၚ်္ဂဇာတ် ပ္ဍဲအၚ်္ဂဇာတ်ကၞုဲၝောံ) ဝွံတုန် ခန္ဓဇကုလီုလာ်တုဲ ပ္ဍဲကြဴနူချိုတ်တုဲဂှ် သ္ဒးအာစိုပ်နရက် မစာ်စ္ဍးနူတသိုခ် မဒှ်လအာဂတိ ညးဟွံခိုဟ်ဆာဲတအ် မဒှ်အရာဒၞါဲ ဒတုံစှေ်ပြးဆာဲရ။
ယွံတြုံ မလ္ၚုသၟး (နူမဂ်ဖိုလ်) သီုကဵုဒှ်တဴသာ်ဂှ် တၠအဲ ဒ္ဂေတ်သ္ပတဴ ဒ္ဂေတ်မေထုန် မဟွံသေၚ်ကဵုဒ္ဂေတ်ညးသပ္ပရိုဟ် မဒှ်ဒ္ဂေတ် ညးပဒတဴပ္ဍဲကွာန် ဒ္ဂေတ်ညးယုတ်ဂမၠိုၚ် မရုန်မဵုသကာတ်မြဟ် မၞုံလအိတ်ဍေံ ပွမဒးကြဴကြာတ်ကဵုဍာ် (မၞိဟ်ညာတ်ဒးမ္ဂး ဟွံဆာဲတုဲ) မဒးဒ္ဂေတ်သ္ပ ပ္ဍဲဌာန်ဂြောပ်ဗ္ဒန် မၞိဟ်တြုံမၞိဟ်ဗြဴၜါၜါမွဲစွံ မဒးဒ္ဂေတ်သ္ပရသွံ။ ယွံတြုံမလ္ၚုသၟး (နူမဂ်ဖိုလ်) ပွယုတ်မာတၠအဲ သ္ပဒးဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴသာ်ဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
“ယြဴခမဳမွဲ ဗွဲတွဵုမယုတ် ပ္ဍဲတိရစ္ဆာန်ၝောံလေဝ် သွိုန်ဗပိုန်သိပ်ဂၠိပ် ဒ္ဂေတ်မေထုန်မ္ဂး၊ ခမဳဂှ် အာစိုပ်ပွမယျဟောမ်အာနူသာသနာရ၊ ဟွံမွဲကဵုပွမပံၚ်ဖက်ဆက်ဆောံကေုာံ ခမဳခိုဟ်ဆာဲဂမၠိုၚ်မွဲစွံရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴသာ်ဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဂမၠိုၚ်ရ။
ဝတ္ထုကၞုဲၝောံတုဲရ။
