၉.၄။ ညးထေက်ကဵုကလၚ်ပါတိမုက်
၃၈၆။ ပ္ဍဲအခိၚ်ဂှ် ကျာ်တြဲ ကော်လၟိၚ်တိုန်ခမဳဂမၠိုၚ်ရ—
ယွံခမဳတအ် သ္ပတမ်နူတ္ၚဲဝွံတုဲ အဲ ဟွံသ္ပဥပေါသ်ရ၊ ဟွံထ္ၜးပါတိမုက်ရ၊ ယွံခမဳတအ် ပ္ဍဲကြဴနူအခိၚ်လၟုဟ်ဝွံ မၞးတအ်ဟေၚ် ဩဝ်သ္ပဥပေါသ်အိုတ်ညိ၊ ဩဝ်ထ္ၜးပါတိမုက်အိုတ်ညိ၊ ယွံခမဳတအ် ဟိုတ်အရာကျာ်တြဲ ဂွံသ္ပဥပေါသ် ဂွံထ္ၜးပါတိမုက် ပ္ဍဲပရိသာတ် မဟွံသအးဇ္ၚးဂှ် ဒှ်ဟွံမာန်ရ။
ယွံခမဳတအ် ကုခမဳမၞုံကဵုအာပတ်လေဝ် ဟဂပ်ဝ်ကလၚ်ပါတိမုက်ရ၊ ကုခမဳ မကလၚ်ဂှ် ဒးအာပတ်ဒုက္ကဋ်ရ။
ယွံခမဳတအ် ကဵုအခေါၚ် သွက်ဂွံတန်ဒေါံထောံ ပါတိမုက် ပွမကလၚ်ပါတိမုက် ကုခမဳမၞုံကဵု အာပတ်ဂှ်ရ၊ ယွံခမဳတအ် ရဴဝွံ ဒးတန်ဒေါံရ၊ ပ္ဍဲတ္ၚဲဥပေါသ် မရနုက်ကဵုစှ်ပန်ကီု ပ္ဍဲတ္ၚဲဥပေါသ် မရနုက်ကဵုစှ်သုန်ကီု ပူဂိုလ်ဂှ် နွံပ္ဍဲဂတမုက်မ္ဂး ဒးဟီုပတိတ် ပ္ဍဲလဒေါဝ်သၚ်ရ—
“ယွံတဳလပိုဉ်တအ် သၚ် ဩဝ်ကလၚ်ဂလာန် (အဲဍိက်)ညိ၊ ပူဂိုလ်မၞုံယၟုဝွံ မၞုံကဵုအာပတ်ရ၊ တန်ဒေါံထောံ ပါတိမုက် ကုပူဂိုလ်ဂှ်ရ၊ ဃောပူဂိုလ်ဂှ် နွံပ္ဍဲဂတမုက် ဟဂပ်ဝ်ထ္ၜး ပါတိမုက်ရ၊ ဂပ်ဝ်တန်ဒေါံထောံ ပါတိမုက်တုဲဒှ်ရ” ရဴဝွံ (ဒးဟီုပတိတ်ရ)။
ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် “ညးမမိက်ကဵုမွဲမွဲ ဟွံတီကေတ် ပိုဲညးဂမၠိုၚ်ရ” ရဴဝွံ သီုမၞုံကဵုအာပတ်ဟေၚ် ကလၚ်ပါတိမုက်အိုတ်ရ။
ခမဳထေရ်ဇၞော်ဂမၠိုၚ် မတီကေတ်စိုတ် ညးသအာၚ်ဂမၠိုၚ်ဂှ် “ယွံကောန်တၠတအ် ခမဳဆဗ္ဗဂ္ဂဳဂမၠိုၚ် မၞုံယၟုဝွံ မၞုံယၟုဝွံ ‘ညးမမိက်ကဵုမွဲမွဲ ဟွံတီကေတ် ပိုဲညးဂမၠိုၚ်ရ’ ရဴဝွံ သီုမၞုံကဵု အာပတ်ဟေၚ် ကလၚ်ပါတိမုက်အိုတ်ရ” ရဴဝွံ ဟီုလဴဗ္စ ကုခမဳဂမၠိုၚ်အိုတ်ရ။
ခမဳဆဗ္ဗဂ္ဂဳဂမၠိုၚ် ခမဳထေရ်ဇၞော်ဂမၠိုၚ် မတီကေတ်စိုတ်ညးသအာၚ်ဂမၠိုၚ်ဂှ် “ယွံကောန်တၠတအ် ခမဳဆဗ္ဗဂ္ဂဳဂမၠိုၚ် မၞုံယၟုဝွံ မၞုံယၟုဝွံ ‘ညးမမိက်ကဵုမွဲမွဲ ဟွံတီကေတ် ပိုဲညးဂမၠိုၚ်ရ’ ရဴဝွံ သီုမၞုံကဵုအာပတ်ဟေၚ် ကလၚ်ပါတိမုက်အိုတ်ရ” ရဴဝွံ ဟီုလဴဗ္စ ပိုဲတအ် ကုခမဳဂမၠိုၚ်အိုတ်ရ ရဴဝွံ ဂွံမိၚ်ကေတ်အိုတ်ရ။
ခမဳဆဗ္ဗဂ္ဂဳဂမၠိုၚ် “ခမဳမသ္ဍိုက်ဆာန်သဳလဂမၠိုၚ် တန်ဒေါံပါတိမုက် ကုပိုဲညးဂမၠိုၚ်အိုတ်ရ” ရဴဝွံ ပၠုပ်စိုတ်တုဲ ပြဟ်ပြဟ်ဟေၚ် သီုဟွံမွဲကဵုဒုဟ် သီုဟွံမွဲကဵုဟိုတ်ဂှ် တန်ဒေါံပါတိမုက် ကုခမဳဂမၠိုၚ် မသအးဇ္ၚးမဟွံဒးအာပတ်အိုတ်ရ။
ခမဳပၟိက်အောန်ဂမၠိုၚ်ဂှ် “ခမဳဆဗ္ဗဂ္ဂဳဂမၠိုၚ် မုဟိုတ် သီုဟွံမွဲကဵုဒုဟ် သီုဟွံမွဲကဵုဟိုတ်ဂှ် တန်ဒေါံပါတိမုက် ကုခမဳဂမၠိုၚ် မသအးဇ္ၚးမဟွံဒးအာပတ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ခမဳဆဗ္ဗဂ္ဂဳဂမၠိုၚ် သီုဟွံမွဲကဵုဒုဟ် သီုဟွံမွဲကဵုဟိုတ်ဂှ် တန်ဒေါံပါတိမုက် မုခမဳဂမၠိုၚ် မသအးဇ္ၚး မဟွံဒးအာပတ်အိုတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။
ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ) ။ ပ ။ ဟီုဂရိုဟ်တုဲ ။ ပ ။ တွံကဵုဂလာန်ဓရ်တုဲမ္ဂး −
“ယွံခမဳတအ် သီုဟွံမွဲကဵုဒုဟ် သီုဟွံမွဲကဵုဟိုတ်ဂှ် ဟဂပ်ဝ်တန်ဒေါံပါတိမုက် ကုခမဳဂမၠိုၚ် မသအးဇ္ၚး မဟွံဒးအာပတ်ရ၊ ကုခမဳမတန်ဒေါံဂှ် ဒးအာပတ်ဒုက္ကဋ်ရ” ရဴဝွံ သ္ဂးကဵုခမဳဂမၠိုၚ်ရ။
