၈.၄ ။ စၞောန်ထ္ၜးကဵုဝတ်ဒးသ္ပအနုမောဒနာ
၃၆၂။ ပ္ဍဲအခိၚ်ဂှ် ခမဳဂမၠိုၚ် ဟွံသ္ပအနုမောဒနာ ပ္ဍဲဇြပ်ကဵုပိုဉ်အိုတ်ရ။ မၞိဟ်ဂမၠိုၚ် “ခမဳဂမၠိုၚ် မဒှ်တၞောဝ်ကျာ် ကောန်သၟိၚ်သကျဝၚ် ဟွံသ္ပအနုမောဒနာ ပ္ဍဲဇြပ်ကဵုပိုဉ်အိုတ်ရော” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ခမဳဂမၠိုၚ် သ္ဂောံမိၚ်ကေတ်ဂလာန်မၞိဟ်ဂမၠိုၚ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး “ယွံခမဳတအ် ကဵုအခေါၚ် တၞဟ်နသ္ပအနုမောဒနာ ပ္ဍဲဇြပ်ကဵုပိုဉ်ရ” ရဴဝွံ သ္ဂးကဵုခမဳဂမၠိုၚ်ရ။
ပ္ဍဲအခိၚ်ဂှ် “မုရဴခမဳမွဲ ထေက်ကဵုသ္ပအနုမောဒနာ ပ္ဍဲဇြပ်ကဵုပိုဉ်ရော?” ရဴဝွံ ကသပ်ဒှ် ကုခမဳဂမၠိုၚ်ရ၊ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး “ယွံခမဳတအ် ကဵုအခေါၚ် မှာထေရ်ဇၞော် တၞဟ်နသ္ပအနုမောဒနာ ပ္ဍဲဇြပ်ကဵုပိုဉ်ရ” ရဴဝွံ သ္ဂးကဵုခမဳဂမၠိုၚ်ရ။
ပ္ဍဲအခိၚ်ဂှ် ဂကောံဗော်သွးမွဲ ကဵုဒါန်ပိဏ္ဍပါတ်သၚ်ရ၊ တဳလပိုဉ်သာရိပိုတ် ဒှ်သံဃထေရ်ရ၊ ခမဳဂမၠိုၚ် “တဳလမၞုံပိုဉ်ကျာ်တြဲ ကဵုအခေါၚ် ခမဳထေရ်ဇၞော် တၞဟ်နသ္ပအနုမောဒနာ ပ္ဍဲဇြပ်ကဵုပိုဉ်ရ” ရဴဝွံ သှေ်ၜက်စွံလဝ် တဳလပိုဉ်သာရိပိုတ်မွဲဇကုဓဝ်တုဲ စ္ဍးအာအိုတ်ရ။ ပ္ဍဲအခိၚ်ဂှ် တဳလပိုဉ်သာရိပိုတ် သ္ပအနုမောဒနာ ကဵုမၞိဟ်ဂမၠိုၚ်တုဲမ္ဂး လက်ကရဴမှ ညးမွဲဓဝ် က္ညအာရ၊ တဳလမၞုံပိုဉ်ကျာ်တြဲ ညာတ်ဒး တဳလပိုဉ်သာရိပိုတ် မကၠုၚ်ညးမွဲဓဝ် နူဇမ္ၚောဲတုဲ “ ယွံသာရိပိုတ် ပသာ်ရော?၊ ပိဏ္ဍပါတ် ဍိုက်ပေၚ်ဟာ” ရဴဝွံ (သ္ဂးရ)။ “ယွံကျာ်မၞုံပိုဉ် ပိဏ္ဍပါတ် ဍိုက်ပေၚ်ရ၊ ၜိုန်ဍိုက်ပေၚ်လေဝ် ခမဳဂမၠိုၚ် သှေ်ၜက်စွံလဝ် အဲဍိက်မွဲဇကုဓဝ်တုဲ စ္ဍးအာအိုတ်ရ” ရဴဝွံ ဂရၚ်ပတီရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲမ္ဂး” ယွံခမဳတအ် ပ္ဍဲဇြပ်ကဵုပိုဉ် ကဵုအခေါၚ် မှာထေရ်ဇၞော် မှာထေရ်သၟတ် ခမဳဂမၠိုၚ်ပန်ဇကု မသုန်ဇကု တၞဟ်နလၟတ်မၚ်ဒၟံၚ်ရ” ရဴဝွံ သ္ဂးကဵုခမဳဂမၠိုၚ်ရ။
ပ္ဍဲအခိၚ်ဂှ် မှာထေရ်မွဲဇကု ၜိုန်တရဴဇၞော်ပ္ဍဵုပ္ဍိုက်လေဝ် လၟတ်မၚ်ဒၟံၚ် ပ္ဍဲဇြပ်ကဵုပိုဉ်ရ၊ မှာထေရ်ဂှ် အေၚ်တရဴဇၞော်ဟွံမာန်တုဲ ဝိဝိၚ်ဝိုတ်စိပ်ကၠာ လောတ်စှေ်အာရ။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ကိစ္စထေက်ကဵုသ္ပနွံမ္ဂး ဟီုလဴဗ္စ ခမဳနွံဇရေၚ်တုဲ တၞဟ်နအာဂှ် ကဵုအခေါၚ်ရ ရဴဝွံ (သ္ဂးရ)။
