၈.၂ ။ စၞောန်ထ္ၜးကဵုအာဝါသိကဝတ်
၃၆၀။ ပ္ဍဲအခိၚ်ဂှ် ခမဳကွာ်တရဴဂမၠိုၚ် သီုဟွံလပှ်သီဂိုၚ်ဒေပ် ကယျာဆုကီု ကယျာတိကီု ပံက်စွံလဝ် တြၚ်ဇၞော်ဗတၚ်ကျာဂမၠိုၚ် သီုဟွံဂရၚ်ပတီလဴဗ္စ ဘာသၞာသတိက်သၞာဒၟံၚ်ဂှ် စ္ဍးအာအိုတ်ရ၊ ကယျာဆု ကယျာတိဂမၠိုၚ် လီုလာ်အိုတ်ရ၊ ဘာသၞာသတိက်သၞာဒၟံၚ် ဟွံဂြောပ်ဗ္ဒန်ခိုၚ်ကၠိုက်ရ။
ခမဳပၟိက်အောန်ဂမၠိုၚ်ဂှ်—
“မုဟိုတ် ခမဳကွာ်တရဴဂမၠိုၚ် သီုဟွံလပှ်သီဂိုၚ်ဒေပ် ကယျာဆုကီု ကယျာတိကီု ပံက်စွံလဝ် တြၚ်ဇၞော်ဗတၚ်ကျာဂမၠိုၚ်တုဲ သီုဟွံဂရၚ်ပတီလဴဗ္စ ဘာသၞာသတိက်သၞာဒၟံၚ်ဂှ် စ္ဍးအာအိုတ်ရော?၊ ကယျာဆု ကယျာတိဂမၠိုၚ် လီုလာ်အိုတ်ရ၊ ဘာသၞာသတိက် သၞာဒၟံၚ် သီုဟွံဂြောပ်ဗ္ဒန်ခိုၚ်ကၠိုက်ရ” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။
၃၆၁။ ယွံခမဳတအ် ဒှ်သာ်ဂှ်မ္ဂး ကြက်ပညပ်တဴ ဒ္ဂေတ်ဝတ်ကုခမဳကွာ်တရဴဂမၠိုၚ်ရ၊ အတိုၚ်ဒ္ဂေတ်ဝတ်ဂှ် ခမဳကွာ်တရဴဂမၠိုၚ် ဒးဒ္ဂေတ်ရ။ ယွံခမဳတအ် ခမဳမကွာ်တရဴဂှ် လပှ်သီဂိုၚ်ဒေပ် ကယျာဆု ကယျာတိဂမၠိုၚ်တုဲ ကၟာတ်ဒဝ်ကၠေံ တြၚ်ဇၞော်ဗတၚ်ကျာဂမၠိုၚ်တုဲ ဂရၚ်ပတီလဴဗ္စ ဘာသၞာသတိက်သၞာဒၟံၚ်တုဲ ဒးစ္ဍးအာရ။
ခမဳဟွံမွဲမ္ဂး ဒးဂရၚ်ပတီလဴဗ္စ သာမဏဳရ၊ သာမဏဳဟွံမွဲမ္ဂး ဒးဂရၚ်ပတီလဴဗ္စ ပၟၚ်အာရှာမ်၇၊ ပၟၚ်အာရှာမ်ဟွံမွဲမ္ဂး ဒးဂရၚ်ပတီလဴဗ္စ ဥပးရ၊ ခမဳကဵုဒှ် သာမဏဳကဵုဒှ် ပၟၚ်အာရှာမ်ကဵုဒှ် ဥပးကဵုဒှ် (ညးမမိက်ကဵုမွဲမွဲ) ဟွံမွဲမ္ဂး လးဇံၚ် ပ္ဍဲလတူတၟံဂမၠိုၚ်ပန်ကလောံတုဲ ပတိုန်စွံဇံၚ်မွဲ ပ္ဍဲလတူဇံၚ်မွဲတုဲ ပတိုန်စွံဂတဵုမွဲ ပ္ဍဲလတူဂတဵုမွဲတုဲ သၞာသတိက်သၞာဒၟံၚ်ဂှ် ဖအုံစွံ ပ္ဍဲလတူဂှ်တုဲ လပှ်သီဂိုၚ်ဒေပ် ကယျာဆု ကယျာတိဂမၠိုၚ်တုဲ ကၟာတ်ဒဝ်ကၠေံ တြၚ်ဇၞော်ဗတၚ်ကျာတုဲ ဒးစ္ဍးအာရ။
ဘာဍေက်ဗြဲ(ဗြဲဓဇူ)မ္ဂး သၟဟ်ရထမ္ဂး ဒးကၟဳရ၊ “မုရဴသာ် ဂွံကၟဳဘာရော?” ရဴဝွံ ဓဗုဓ်ဓဝိၚ်လေဝ် ဒးကၠေံစိုတ်လွဳရ၊ နနယ်ဝွံ ကလိဂွံကၟဳဂှ်မ္ဂး ပွမကလိဂွံဝွံ ခိုဟ်သန်ရ၊ ယဝ်ဟွံကလိဂွံမ္ဂး ပ္ဍဲဌာန်ဟွံဍေက်ဍာ်ဗြဲ လးဇံၚ် ပ္ဍဲလတူတၟံဂမၠိုၚ်ပန်ကလောံတုဲ ပတိုန်စွံဇံၚ်မွဲ ပ္ဍဲလတူဇံၚ်မွဲတုဲ ပတိုန်စွံဂတဵုမွဲ ပ္ဍဲလတူဂတဵုမွဲတုဲ သၞာသတိက်သၞာဒၟံၚ်ဂှ် ဖအုံစွံ ပ္ဍဲလတူဂှ်တုဲ လပှ်သီဂိုၚ်ဒေပ် ကယျာဆု ကယျာတိဂမၠိုၚ်တုဲ ကၟာတ်ဒဝ်ကၠေံ တြၚ်ဇၞော်ဗတၚ်ကျာတုဲ ဒးစ္ဍးအာရ။
ဘာအလုံအိုဿီု ဍေက်ဗြဲ (ဗြဲဓဇူ) မ္ဂး သၟဟ်ရထမ္ဂး ဘာသၞာသတိက်သၞာဒၟံၚ်ဂှ် ဒးရၚ်တၠုၚ်ဏာ အပ္ဍဲကွာန်ရ၊ “မုရဴသာ်လဵု သၞာသတိက်သၞာဒၟံၚ်ဂှ် ဂွံရၚ်တၠုၚ်ဏာ အပ္ဍဲကွာန်ရော?” ရဴဝွံ ဂဗုဓ်ဓဝိၚ်လေဝ် ဒးကၠေံစိုတ်လွဳရ၊ နနယ်ဝွံ ကလိဂွံရၚ်တၠုၚ်ဏာ အပ္ဍဲကွာန်မ္ဂး ခိုဟ်သန်ရ၊ ယဝ်ဟွံကလိဂွံမ္ဂး ပ္ဍဲအမှဲအကး လးဇံၚ် ပ္ဍဲလတူတၟံဂမၠိုၚ်ပန်ကလောံတုဲ ပတိုန်စွံဇံၚ်မွဲ ပ္ဍဲလတူဇံၚ်မွဲတုဲ ပတိုန်စွံဂတဵုမွဲ ပ္ဍဲလတူဂတဵုမွဲတုဲ သၞာသတိက်သၞာဒၟံၚ်ဂှ် ဖအုံစွံ ပ္ဍဲလတူဂှ်တုဲ လပှ်သီဂိုၚ်ဒေပ် ကယျာဆု ကယျာတိဂမၠိုၚ်တုဲ “အဝယ်လစှေ်မပတမ်ၝောံဇံၚ်လေဝ် သှေ်သၟေဟ်တန်ဒှ်အိုတ်ရ” ရဴဝွံ (ပၠုပ်စိုတ်တုဲ) ဂြောပ်ဗ္ဒန်ကၠေံ နကဵုချောဲကီု နကဵုသၠဆုကီုတုဲ ဒးစ္ဍးအာရ။ ယွံခမဳတအ် ဣဝွံတုန် ဒ္ဂေတ်ဝတ်ခမဳကွာ်တရဴဂမၠိုၚ်ရ၊ အတိုၚ်ဒ္ဂေတ်ဝတ်ဂှ် ခမဳကွာ်တရဴဂမၠိုၚ် ဒးဒ္ဂေတ်ရ ရဴဝွံ (သ္ဂးရ)။
