၈.၁၄ ။ ဝတ်ဒးဒ္ဂေတ် ပ္ဍဲကွးပဒတဴဇရေၚ်ဂမၠိုၚ်
၃၈၁။ ပ္ဍဲအခိၚ်ဂှ် အ္စာဂမၠိုၚ် ဟွံဒ္ဂေတ်ဗွဲမဒးရး ပ္ဍဲကွးပဒတဴဇရေၚ်ဂမၠိုၚ်အိုတ်ရ။
ခမဳပၟိက်အောန်ဂမၠိုၚ်ဂှ် “မုဟိုတ် အ္စာဂမၠိုၚ် ဟွံဒ္ဂေတ်ဗွဲမဒးရး ပ္ဍဲကွးပဒတဴဇရေၚ်ဂမၠိုၚ်အိုရော” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ကဵုဂကောံခမဳ ကောံဓရီုတုဲမ္ဂး “ယွံခမဳတအ် အစာဂမၠိုၚ် ဟွံဒ္ဂေတ်ဗွဲမဒးရး ပ္ဍဲကွးပဒတဴဇရေၚ်ဂမၠိုၚ်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။
ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ ပ ။ ဟီုဂရိုဟ်တုဲ။ ပ ။ တွံကဵုဂလာန်ဓရ်တုဲမ္ဂး သ္ဂးကဵုခမဳဂမၠိုၚ်ရ။
၃၈၂။ ယွံခမဳတအ် ဒှ်သာ်ဂှ်မ္ဂး ကြက်ပညပ်တဴ ဒ္ဂေတ်ဝတ်မဒးဒ္ဂေတ် ပ္ဍဲကွးပဒတဴဇရေၚ်ဂမၠိုၚ် ကုအ္စာဂမၠိုၚ်ရ၊ အတိုၚ်ဒ္ဂေတ်ဝတ်ဂှ် အ္စာဂမၠိုၚ် ဒးဒ္ဂေတ် ပ္ဍဲကွးပဒတဴဇရေၚ်ဂမၠိုၚ်ရ။ ယွံခမဳတအ် အ္စာ ဒးဒ္ဂေတ် ပ္ဍဲကွးပဒတဴဇရေၚ် ဗွဲမဒးရးရ။ ပ္ဍဲဂလာန်ဂှ် ကြက်သ္ဂးဂတဝွံတုန် ပွမဒ္ဂေတ် ဗွဲမဒးရးရောၚ်။
ယွံခမဳတအ် အ္စာဂှ် သ္ဒးယိုက်ဒိုက်ထံက်ပၚ်သၚ်ရိုဟ် ကွးပဒတဴဇရေၚ် နပွမပကတ်ဗတောန် ပွမသၟာန်ဂၠိုၚ်ဂၠိုၚ်ကဵုဝါ ပွမဝေတ်ဗတောန် ဒၠောံဗတောန်စၞောန်ထ္ၜးရ။ ဗဗေၚ်အ္စာ နွံတုဲ ဗဗေၚ်ကွးပဒတဴဇရေၚ် ဟွံမွဲမ္ဂး၊ အ္စာ သ္ဒးကဵုဗဗေၚ် ကုကွးပဒတဴဇရေၚ်ရ၊ “မုရဴသာ်လဵု ဗဗေၚ်သ္ဂောံကတဵုဒှ်ကၠုၚ် ကုကွးပဒတဴဇရေၚ်ရော” ရဴဝွံ ဂဗုဓ်လွဳပရာလေဝ် ဒးသ္ပရ။ သ္ၚာအ္စာ နွံတုဲ သ္ၚာကွးပဒတဴဇရေၚ် ဟွံမွဲမ္ဂး၊ အ္စာ သ္ဒးကဵုသ္ၚာ ကုကွးပဒတဴဇရေၚ်ရ၊ “မုရဴသာ်လဵု သ္ၚာသ္ဂောံကတဵုဒှ်ကၠုၚ် ကုကွးပဒတဴဇရေၚ်ရော” ရဴဝွံ ဂဗုဓ်လွဳပရာလေဝ် ဒးသ္ပရ။ ပရိက္ခရာ ‘အရပ်စပ်’ အ္စာ နွံတုဲ ပရိက္ခရာကွးပဒတဴဇရေၚ် ဟွံမွဲမ္ဂး၊ အ္စာ သ္ဒးကဵုပရိက္ခရာ ကုကွးပဒတဴဇရေၚ်ရ၊ “မုရဴသာ်လဵု ပရိက္ခရာသ္ဂောံကတဵုဒှ်ကၠုၚ် ကုကွးပဒတဴဇရေၚ်ရော” ရဴဝွံ ဂဗုဓ်လွဳပရာလေဝ် ဒးသ္ပရ။
ကွးပဒတဴဇရေၚ် ဂိယဲမ္ဂး၊ ဒၠိုက်ကတဵုနူဂယးပြဟ်တုဲ သ္ဒးဒုၚ်ကဵုဆုဒကရ၊ သ္ဒးဒုၚ်ကဵုဍာ်လာၚ်မုက်ရ၊ သ္ဒးလးသၞာဂဇအ်ရ၊ ယာဂုနွံမ္ဂး ကြဴကြာတ်ခရော်တုဲ သ္ဒးဒုၚ်ကဵုယာဂုရ၊ ကုကွးပဒတဴဇရေၚ် မသုၚ်ယာဂုတုဲဂှ် ဒုၚ်ကဵုဍာ်တုဲ ဟောဝ်ဂိုၚ်ကေတ်ခရော်တုဲ သ္ပဗွဲမဒးရး သီုဟွံကဵုထ္ဍိမြိလုက်စုက်ဒးဂှ် ကြဴကြာတ်တုဲမ္ဂး သ္ဒးသီဂိုၚ်ဒေပ်စွံရ၊ ကွးပဒတဴဇရေၚ် ဒၠိုက်ကတဵု(နူဒၞာဲ)မ္ဂး သ္ဒးသီဂိုၚ်ဒေပ်ထောံ သၞာဂဇအ်ဂှ်ရ၊ ယဝ်သၟိက်ဟန်ဗန်နွံမ္ဂး၊ သ္ဒးကွဟ်ကၟဟ် ဒၞာဲဂှ်ရ။
ကွးပဒတဴဇရေၚ် သၟိက်လုပ်ကွာန်မ္ဂး သ္ဒးဒုၚ်ကဵု သပိုၚ်ဗိုက်လုပ်ကွာန်ရ၊ သ္ဒးဂိုၚ်ကေတ်သပိုၚ်ဗိုက်ပ္ဍဲဘာရ၊ သ္ဒးဒုၚ်ကဵုကာယဗန်ရ၊ ထပ်လဝ် သ္ၚာသကိုပ်ဂမၠိုၚ်တုဲ သ္ဒးဒုၚ်ကဵုရ၊ ကြဴကြာတ်တုဲ သ္ဒးဒုၚ်ကဵုဗဗေၚ်မဒှ်မွဲဟာန်ကေုာံဍာ်ရ။
“အခိၚ်ဗၞတ်ဝွံ ကြက်ကလေၚ်စဴကၠုၚ်ရ” ရဴဝွံ (ပၠုပ်စိုတ်တုဲ) သ္ဒးလးပညပ်လဝ်သၞာဂဇအ်ရ၊ သ္ဒးစွံပတန်လဝ် ဍာ်ကြဴဇိုၚ် ဂတဵုကြာတ်ဇိုၚ် ကဝေက်ပေါတ်ဇိုၚ် ပ္ဍဲဇရေၚ်ရ၊ ဒစးဒုၚ်တၠုၚ်တရဴတုဲ သ္ဒးဒုၚ်ဂိုၚ်ကေတ် ဗဗေၚ်သ္ၚာရ၊ သ္ဒးဒုၚ်ကဵုသပိုၚ်ဗိုက်ပ္ဍဲဘာရ၊ သ္ဒးဟောဝ်ဂိုၚ်ကေတ် သပိုၚ်ဗိုက်လုပ်ကွာန်ရ၊ ယဝ်သ္ၚာဍေက်ဒၟံၚ်ပလက်မ္ဂး ဗၞတ်မွဲခဏဍောတ် သ္ဒးစဲလဝ် ပ္ဍဲဂမ္တဴတ္ၚဲရ၊ ၜိုန်ဂှ် စွံလဝ် ဗွဲမလအ်ဟွံဂွံရ၊ သ္ဒးထပ်သ္ၚာရ၊ ထပ်သ္ၚာမ္ဂး “လ္ပကဵုဒှ်ကဝ်ကေက်’ပၞေတ်ခ္ဍပ်’ပ္ဍဲလဒေါဝ်ညိ” ရဴဝွံ သီုမပၠုပ်စိုတ် ယှအ်ကၠေံတၞုၚ်မုဟ်ပန်လပုဟ်တဲတုဲ သ္ဒးထပ်သ္ၚာရ၊ သ္ဒးစွံလဝ် ဇုက်ကာယဗန် ပ္ဍဲအပ္ဍဲသၞာထပ်လဝ်ရ။
ပိဏ္ဍပါတ်နွံတုဲ ကွးပဒတဴဇရေၚ်လေဝ် မိက်သ္ပပြဘိုဂ်မ္ဂး ဒုၚ်ကဵုဍာ်ရပ်စပ်တုဲ သ္ဒးဒုၚ်ကဵုပိဏ္ဍပါတ်ရ၊ (နွံပၟိက်ဍာ်ဟာ ရဴဝွံ) သ္ဒးဂရၚ်ပတီသၟာန် ကွးပဒတဴဇရေၚ် နကဵုဍာ်သုၚ်ရ၊ ကုကွးပဒတဴဇရေၚ် မကဵုပိုဉ်တုဲဂှ် ဒုၚ်ကဵုဍာ်တုဲ ဟောဝ်ဂိုၚ်ကေတ်ဗဗေၚ်တုဲမ္ဂး သ္ပဗွဲမဒးရး သီုကဵုထ္ဍိမြိလုက်စုက်ဒးဂှ် ကြဴကြာတ်သအးဇ္ၚးတုဲ သ္ပစဵုကဵုဍာ်ကှ်တုဲမ္ဂး ဗၞတ်မွဲခဏဍောတ် သ္ဒးစဲလဝ် ပ္ဍဲဂမ္တဴတ္ၚဲရ၊ ၜိုန်ဂှ် စွံလဝ် ဗွဲမလအ်ဟွံဂွံရ၊ သ္ဒးစွံဗဗေၚ်သ္ၚာရ၊ မိက်စွံဗဗေၚ်မ္ဂး နကဵုတဲမွဲလပါ်ဂှ် ရပ်ကေတ်ဗဗေၚ်တုဲ နကဵုတဲမွဲလပါ်ဂှ် ဇွိတ်စမ်ရံၚ် သၟဝ်ဇံၚ်ခါတ်ကီု သၟဝ်ဂတဵုကီုတုဲ သ္ဒးစွံရ၊ ဟဂွံစွံဗဗေၚ် ပ္ဍဲတိမဟွံမွဲကဵုသၞာရ။ မိက်ဂွံစွံသ္ၚာမ္ဂး နကဵုတဲမွဲလပါ်ဂှ် ရပ်ကေတ်သ္ၚာတုဲ နကဵုတဲမွဲလပါ်ဂှ် ဇွိတ်ပေါတ်ထောံဒုန်တေၚ်သ္ၚာ ဇုက်ဗလဲသ္ၚာတုဲ သ္ပလအိတ်မုဟ်ပ္ဍဲလပါ်တေံ သ္ပကဝးပ္ဍဲလပါ်ဏအ်တုဲ သ္ဒးစွံသ္ၚာရ။
ကွးပဒတဴဇရေၚ် ဒၠိုက်ကတဵု (နူဒၞာဲ) မ္ဂး သ္ဒးသီဂိုၚ်ထောံ သၞာဂဇအ်ဂှ်ရ၊ သ္ဒးသီဂိုၚ်ဒေပ်ထောံ ဍာ်ကြဴဇိုၚ် ဂတဵုပေါတ်ဇိုၚ် ကဝေက်ပေါတ်ဇိုၚ်ရ၊ ယဝ်သၟိက်ဟန်ဗန်နွံမ္ဂး သ္ဒးကွဟ်ကၟဟ်ဒၞာဲဂှ်ရ။
ကွးပဒတဴဇရေၚ် မိက်ဟုမ်ဍာ်မ္ဂး သ္ဒးစဳရေၚ်ဍာ်ဟုမ်ရ၊ နွံပၟိက်ကဵုဍာ်လၟုဟ်မ္ဂး သ္ဒးစဳရေၚ်ကဵုဍာ်လၟုဟ်ရ၊ နွံပၟိက်ကဵုဍာ်ဂမ္တဴမ္ဂး သ္ဒးစဳရေၚ်ကဵုဍာ်ဂမ္တဴရ။
ကွးပဒတဴဇရေၚ် မိက်ဂွံလုပ်သ္ၚိဇရုၚ်ပလက်မ္ဂး သ္ဒးထ္ၜိုန်ကလောံ ခၞိက်ကြကောတ် နကဵုဍာ်ရ၊ သ္ဒးဖ္ဍုက်တိကမၠေတ် နကဵုဍာ်ရ၊ ဂိုၚ်ကေတ်ဂတဵုသ္ၚိဇရုၚ်ပလက်တုဲ သီုမဗက်အာ နူလက်ကရဴ နူလက်ကရဴ အ္စာဥပဇ္ၛာယ်ဂှ် ဒုၚ်ကဵုဂတဵုသ္ၚိဇရုၚ်ပလက်တုဲမ္ဂး ဟောဝ်ဂိုၚ်ကေတ်သ္ၚာတုဲ သ္ဒးစွံလဝ် ပ္ဍဲဌာန်မဗဗွဲရ၊ သ္ဒးဒုၚ်ကဵုခၞိက်ကြကောတ်ရ၊ သ္ဒးဒုၚ်ကဵုတိကမၠေတ်ရ။ ယဝ်သၟဟ်ရထမ္ဂး သ္ဒးလုပ်သ္ၚိဇရုၚ်ပလက်ရ၊ ခမဳမလုပ်သ္ၚိဇရုၚ်ပလက်ဂှ် လံက်လေတ်မုက် နကဵုတိကမၠေတ် မဖ္ဍုက်လတ်ဍာ်တုဲ ဂြောပ်ဓလီုလဝ် (နကဵုသၞုက်ဍာ်) နူဂတကီု နူလက်ကရဴကီုတုဲ သ္ဒးလုပ်သ္ၚိဇရုၚ်ပလက်ရ၊ ဃရိတ်ခဇ် ခမဳဇၞော်ဂမၠိုၚ်တုဲ ဟဂပ်ဝ်ဂဇအ်ရ၊ ဟဂပ်ဝ်ဆေဝ်ဒဝ်ခမဳသၟတ်ဂမၠိုၚ် နကဵုသၞာအိုတ်ရ၊ ပ္ဍဲသ္ၚိဇရုၚ်ပလက် ကွးပဒတဴဇရေၚ် သ္ဒးသ္ပကဵုကေၚ်ကာအိုဿီု (မပတမ် ပွမစံၚ်ဗဂဵုပၟတ်) ရ၊ ခမဳမတိတ်ကၠုၚ် နူသ္ၚိဇရုပ်ပလက်ဂှ် ဂိုၚ်ကေတ်ဂတဵုသ္ၚိဇရုၚ်ပလက်တုဲ ဂြောပ်ဓလီုလဝ် (နကဵုသၞုက်ဍာ်) နူဂတကီု နူလက်ကရဴကီုတုဲ သ္ဒးတိတ် နူသ္ၚိဇရုၚ်ပလက်ရ။
ပ္ဍဲအရာဟုမ်ဍာ်လေဝ် သွက်ကွးပဒတဴဇရေၚ် သ္ဒးသ္ပကေၚ်ကာအိုဿီု (မပတမ် ပွမတုဟ်ပေါတ်မိဟ်) ရ၊ ခမဳမဟုမ်ဍာ်တုဲဂှ် တိုန်ကၠုၚ်ဗွဲကိုပ်ကၠာတုဲ သ္ပဇကုဇကု စဵုကဵုဟွံမွဲကဵုဍာ်တုဲ ဗိုက်သပိုၚ်တုဲ သ္ဒးဇိုတ်ကဵုဍာ် နူဇကုကွးပဒတဴဇရေၚ်ရ၊ သ္ဒးဒုၚ်ကဵုသပိုၚ်ရ၊ သ္ဒးဒုၚ်ကဵုသ္ၚာသကိုပ်ရ၊ ဂိုၚ်ကေတ်ဂတဵုသ္ၚိဇရုၚ်ပလက်တုဲ ကၠုၚ်ဗွဲကိုပ်ကၠာတုဲ သ္ဒးလးပညပ်လဝ် သၞာဂဇအ်ရ၊ သ္ဒးစွံပတန်လဝ် ဍာ်ကြဴဇိုၚ် ဂတဵုပေါတ်ဇိုၚ် ကဝေက်ပေါတ်ဇိုၚ် ပ္ဍဲဇရေၚ်ရ၊ (နွံပၟိက်ဍာ်ဟာ ရဴဝွံ) သ္ဒးသၟာန် ကွးပဒတဴဇရေၚ် နကဵုဍာ်သုၚ်ရ။
ဘာကွးပဒတဴဇရေၚ် ပဒတဴဂှ် ယဝ်သၟိက်ဟန်ဗန်နွံမ္ဂး ယဝ်သၟဟ်ရထမ္ဂး သ္ဒးသောၚ် ဖ္ဍောၚ်ၚးတးရ၊ ခမဳမသောၚ်ဖ္ဍောၚ်ၚးတးဘာဂှ် ဗွဲကိုပ်ကၠာ ရၚ်တၠုၚ်ပတိတ် ဗဗေၚ်သ္ၚာတုဲ သ္ဒးစွံလဝ် ပ္ဍဲဒၞာဲမဗဗွဲရ၊ ရၚ်တၠုၚ်ပတိတ် သၞာနိသဳဒိုန်သၞာလးတိက်တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ရၚ်ရၚ်တၠုၚ်ပတိတ် ဖုန်ဂၞဳတုဲ သ္ဒးစွံလဝ် ပ္ဍဲဒၞာဲမဗဗွဲရ၊ ဇံၚ်ခါတ်ဂှ် သ္ပဗွဲမသဝ်ဒးရး သီုဟွံကဵုထ္ဍိမြိလုက်စုက်ဒး သၠတြၚ် ဇဵုတြၚ်ဂှ် ရၚ်တၠုၚ်ပတိတ်တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ဂတဵုဂှ် သ္ပဗွဲမသဝ်ဒးရး သီုဟွံကဵုထ္ဍိမြိလုက်စုက်ဒး သၠတြၚ် ဇဵုတြၚ်ဂှ် ရၚ်တၠုၚ်ပတိတ်တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ရၚ်တၠုၚ်ပတိတ် ဇိုၚ်ဇံၚ်ဂမၠိုၚ်တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ရၚ်တၠုၚ်ပတိတ် ထၟာဲဂစှ် (ထၟာဲတဲ) တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ရၚ်တၠုၚ်ပတိတ် ဂတဵုဒလာဲတုဲ သ္ဒးစွံလဝ် ပ္ဍဲဒၞာဲမဗဗွဲရ၊ သၞာလးတိဂှ် သမ္တီလဝ် ဒၞာဲလးလၟိုန်တုဲ ရၚ်တၠုၚ်ပတိတ်တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ပ္ဍဲဘာ ယဝ်သ္ၚိစၟဇာဖိုၚ်နွံမ္ဂး သ္ဒးပါဲကၠေံ နူသၠဖ္ဍာန် ဗွဲကိုပ်ကၠာရ၊ သ္ဒးဇိုတ်ပေါတ်ဗတၚ်ကျာ ကေုာံ သကဲခဒမ်ဂမၠိုၚ်ရ။
ဗ္ဒၚ်မသ္ပကလိတ်ကလောတ် နကဵုခၞိက်တိကမၠေတ်ဗကေတ် (နကဵုဆီတၟံ) ဂှ် ပတိုဟ်တိုန်မ္ဂး ဖ္ဍုက်ဍာ်ယာတ်တမြံၚ်တုဲ ဝတ်ကၠေံတုဲမ္ဂး သ္ဒးဇိုတ်ပေါတ်ရ၊ တိမသ္ပလဝ်ကလိတ်ကလောတ် နကဵုသာ်လမ္စံက်ဂှ် ပတိုဟ်တိုန်မ္ဂး ဖ္ဍုက်ယာတ်တမြံၚ်တုဲ ဝတ်ကၠေံတုဲမ္ဂး သ္ဒးပေါတ်ဇိုတ်ရ၊ ဒှ်တိမဟဂွံသ္ပကလိတ်ကလောတ်မ္ဂး လၟုဟ်ဖရုဲဍာ်တုဲ “လ္ပကဵုမၠိုက်တိုန်ဘာညိ” ရဴဝွံ (စွံစိုတ်တုဲ) သ္ဒးကွဟ်ကၟဟ်ရ၊ ပကောံဖအုံလဝ် အိက်ကၟဟ်တုဲ သ္ဒးထောံထောံ ပ္ဍဲဌာန်မဗဗွဲရ။
စဲတ္ၚဲသအးဇ္ၚး သၞာလးတိတုဲမ္ဂး ဂရိုတ်ထောံတုဲ သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲဇိုတ်ပေါတ် ဇိုၚ်ဇံၚ်ဂမၠိုၚ်တုဲမ္ဂး သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚး ဇံၚ်ခါတ်တုဲမ္ဂး ဂရိုက်ထောံတုဲ သ္ပဗွဲမမသဝ်ဒးရး သီုဟွံထ္ဍိမြိလုက်စုက်ဒး သၠတြၚ် ဇဵုတြၚ်ဂှ် သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚး ဂတဵုတုဲမ္ဂး ဂရိုက်ထောံတုဲ သ္ပဗွဲမမသဝ်ဒးရး သီုဟွံထ္ဍိမြိလုက်စုက်ဒး သၠတြၚ် ဇဵုတြၚ်ဂှ် သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚး ဖုန်ဂၞဳတုဲမ္ဂး ဂရိုတ်ထောံတုဲ သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚး သၞာနိသဳဒိုန် သၞာလးတိက်တုဲမ္ဂး ဂရိုတ်ထောံတုဲ သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲဇိုတ်ပေါတ် ထၟာဲဂစှ်တုဲမ္ဂး သ္ဒးကလေၚ်စွံ ပ္ဍဲဒၞာဲအတိုၚ်စွံလဝ်လၟိုန်ရ၊ စဲတ္ၚဲဇိုတ်ပေါတ်ဂတဵုဒလာဲတုဲမ္ဂး သ္ဒးကလေၚ်စွံ ပ္ဍဲဒၞာဲအတိုၚ်စွံလဝ်လၟိုန်ရ။
သ္ဒးစွံဗဗေၚ်သ္ၚာရ။ ခမဳ မိက်ဂွံစွံဗဗေၚ်ဂှ် နကဵုတဲမွဲလပါ်ဂှ် ရပ်ကေတ်ဗဗေၚ်တုဲ နကဵုတဲမွဲလပါ်ဂှ် ဇွိတ်စမ်ရံၚ် သၟဝ်ဇံၚ်ခါတ်ကီု သၟဝ်ဂတဵုကီုတုဲ သ္ဒးစွံရ၊ ဟဂွံစွံဗဗေၚ် ပ္ဍဲတိမဟွံမွဲကဵုသၞာရ။ ခမဳ မိက်ဂွံစွံသ္ၚာဂှ် နကဵုတဲမွဲလပါ်ဂှ် ရပ်ကေတ်သ္ၚာတုဲ နကဵုတဲမွဲလပါ်ဂှ် ဇွိတ်ပေါတ်ထောံဒုန်တေၚ်သ္ၚာ ဇုက်ဗလဲသ္ၚာတုဲ သ္ပလအိတ်မုဟ်ပ္ဍဲလပါ်တေံ သ္ပကဝးပ္ဍဲလပါ်ဏအ်တုဲ သ္ဒးစွံသ္ၚာရ။
နူဒိုဟ်ဗၟံက် ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗတၚ်ကျာဒိုဟ်ဗၟံက်ဂမၠိုၚ်ရ၊ နူဒိုဟ်ပလိုတ် ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗတၚ်ကျာဒိုဟ်ပလိုတ်ဂမၠိုၚ်ရ၊ နူဒိုဟ်သၟဝ်ကျာ ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗတၚ်ကျာဒိုဟ်သၟဝ်ကျာဂမၠိုၚ်ရ၊ နူဒိုဟ်သၠုၚ်ကျာ ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗတၚ်ကျာဒိုဟ်သၠုၚ်ကျာဂမၠိုၚ်ရ၊ ဒှ်အခိၚ်ဂမ္တဴမ္ဂး ပ္ဍဲအခိၚ်တ္ၚဲ သ္ဒးကၟာတ်ဒဝ်လဝ် ဗတၚ်ကျာဂမၠိုၚ်ရ၊ ပ္ဍဲအခိၚ်ဗတမ် သ္ဒးပံက်လဝ်ရ။
ပြဝိုဏ် သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် ပြဝိုဏ်ရ။ မုက်ထော်တြၚ်ခဒမ်ဟုမ်ဍာ် သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် မုက်ထော်တြၚ်ခဒမ်ဟုမ်ဍာ်ရ။ ဇြပ်ကောံဓရီု သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် ဇြပ်ကောံဓရီုရ။ ရုၚ်ပၟတ် သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် ရုၚ်ပၟတ်ရ။ သ္ၚိဝစ် (သ္ၚိဍာ်) သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် သ္ၚိဝစ်ရ။ ဍာ်သုၚ်ဟွံမွဲမ္ဂး၊ သ္ဒးစွံပတန် ဍာ်သုၚ်ရ။ ဍာ်ရပ်စပ်ဟွံမွဲမ္ဂး၊ သ္ဒးစွံပတန် ဍာ်ရပ်စပ်ရ။ ပ္ဍဲနုၚ်ဍာ်ကြာတ်(နုၚ်သအးသ္ၚိဍာ်) ဍာ်ဟွံမွဲမ္ဂး၊ သ္ဒးဗပေၚ်စုတ်ဍာ်ရ။ ပွမဟွံမိပ်လဟိၚ် ကတဵုဒှ် ကုကွးပဒတဴမွဲစွံမ္ဂး အ္စာဂှ် (အလဵုဇကုလေဝ်) သ္ဒးကော်ဏာဌာန်သအာၚ်ရ၊ (ညးသအာၚ်လေဝ်) သ္ဒးကဵုကော်ဏာရ၊ ဂလာန်ဓရ်လေဝ် သ္ဒးဟီုတွံကဵု ကုကွးပဒတဴဇရေၚ်ဂှ်ရ။ ‘သံသယကုက္ကုစ္စ’ ပွမချပ်သၠေဟ်ပၟာ ကတဵုဒှ် ကုကွးပဒတဴဇရေၚ်မ္ဂး အ္စာဂှ် သ္ဒးပါဲပၠေၚ်ကၠေံရ၊ (ညးသအာၚ်လေဝ်) သ္ဒးကဵုပၠေၚ်ကၠေံရ၊ ဂလာန်ဓရ်လေဝ် သ္ဒးဟီုတွံကဵု ကုကွးပဒတဴဇရေၚ်ဂှ်ရ။ ကွေတ်မှာရာ ကတဵုဒှ် ကုကွးပဒတဴဇရေၚ်မ္ဂး အ္စာဂှ် သ္ဒးသောၚ်ကလး ကဵုစာ်စ္ဍးအာရ၊ (ညးသအာၚ်လေဝ်) သ္ဒးကဵုသောၚ်ကလးစာ်စ္ဍးအာရ၊ ဂလာန်ဓရ်လေဝ် သ္ဒးဟီုတွံကဵု ကုကွးပဒတဴဇရေၚ်ဂှ်ရ။ ကွးပဒတဴဇရေၚ်အာစိုပ်ဂရုကအာပတ်တုဲ ထေက်ကဵုတၞဟ်နပဒတဴပြဝးမ္ဂး အ္စာဂှ် “မုရဴသာ်လဵု သၚ် သ္ဂောံကဵုပြဝး ကုကွးပဒတဴဇရေၚ်ရော” ရဴဝွံ သ္ဒးသ္ပဂဗုဓ်လွဳပရာရ။ ကွးပဒတဴဇရေၚ် ထေက်ကဵုတံၚ်ဓဇက်တမ်ဒှ်မ္ဂး အ္စာဂှ် “မုရဴသာ်လဵု သၚ် သ္ဂောံတံၚ်ဓဇက်တမ် ကွးပဒတဴဇရေၚ်ရော” ရဴဝွံ သ္ဒးသ္ပဂဗုဓ်လွဳပရာရ။ ကွးပဒတဴဇရေၚ် ထေက်ကဵုဒ္ဂေတ် ‘မာနတ်’ ထေက်ကဵုသ္ဍိုက်မၠိုက်ဒှ်မ္ဂး အ္စာဂှ် “မုရဴသာ်လဵု သၚ် သ္ဂောံကဵုမာနတ် ကုကွးပဒတဴဇရေၚ်ရော” ရဴဝွံ သ္ဒးသ္ပဂဗုဓ်လွဳပရာရ။ ကွးပဒတဴဇရေၚ် ထေက်ကဵုကော်ပၠုပ်အဗ္ဘာန်ဒှ်မ္ဂး အ္စာဂှ် “မုရဴသာ်လဵု သၚ် သ္ဂောံကော်ပၠုပ်အဗ္ဘာန် ကွးပဒတဴဇရေၚ်ရော” ရဴဝွံ သ္ဒးသ္ပဂဗုဓ်လွဳပရာရ။ သၚ်မိက်သ္ပ ‘တဇ္ဇနိယကမ်’ ပွမဘပဠကီု ‘နိယဿကမ်’ ပွမကဵုပဒတဴကေုာံအ္စာ နိဿယကီု ‘ပဗ္ဗာဇနဳယကမ်’ ပွမဗက်ဗ္ဒဴကီု ‘ပဋိသာရဏဳယကမ်’ ပွမကဵုကလအ်ဒုၚ်ဂုဏ်ကီု ‘ဥက္ခေပနဳယကမ်’ ပွမဗက်ပတိတ်ထောံကီု ကုကွးပဒတဴဇရေၚ်မ္ဂး၊ အ္စာဂှ် “မုရဴသာ်လဵု သၚ် ဟဂွံသ္ပကမ် ကုကွးပဒတဴမွဲစွံရော?၊ မုရဴသာ်လဵု သ္ဂောံကဵုဒုဟ်သာစှေ်ရော?” ရဴဝွံ သ္ဒးသ္ပဂဗုဓ် လွဳပရာရ။ သၚ် သ္ပ ‘တဇ္ဇနိယကမ်’ ပွမဘပဠကီု ‘နိယဿကမ်’ ပွမကဵုပဒတဴကေုာံအ္စာ နိဿယကီု ‘ပဗ္ဗာဇနဳယကမ်’ ပွမဗက်ဗ္ဒဴကီု ‘ပဋိသာရဏဳယကမ်’ ပွမကဵုကလအ်ဒုၚ်ဂုဏ်ကီု ‘ဥက္ခေပနဳယကမ်’ ပွမဗက်ပတိတ်ထောံကီု ကုကွးပဒတဴဇရေၚ်မ္ဂး၊ အ္စာဂှ် “မုရဴသာ်လဵု ကွးပဒတဴဇရေၚ် သ္ဂောံဒ္ဂေတ်ဗွဲမဒးရးရော?၊ သ္ဂောံဖျေံတသော်မတွံဂးမာန်ရော?၊ ဒ္ဂေတ်တဴဒ္ဂေတ်မတိတ်ဗၠးမူဒဏ်ရော?၊ သၚ် သ္ဂောံလလမ်ကၠေံကမ်ရော?” ရဴဝွံ သ္ဒးသ္ပဂဗုဓ်လွဳပရာရ။
သ္ၚာကွးပဒတဴဇရေၚ်ဂှ် ထေက်ကဵုဒးလပိုက်ကဆံၚ်ဒှ်မ္ဂး၊ အ္စာဂှ် သ္ဒးလပိုက်ကဆံၚ်ရ၊ “မုရဴသာ်လဵု သ္ဂောံလပိုက်ကဆံၚ် သ္ၚာကွးပဒတဴဇရေၚ်ရော?” ရဴဝွံ ဂဗုဓ်လွဳပရာလေဝ် ဒးသ္ပရ။ သ္ၚာကွးပဒတဴဇရေၚ်ဂှ် ထေက်ကဵုဒးဇိၚ်မ္ဂး၊ အ္စာဂှ် သ္ဒးဇိၚ်ရ၊ “မုရဴသာ်လဵု သ္ဂောံဇိၚ်သ္ၚာကွးပဒတဴဇရေၚ်ရော?” ရဴဝွံ ဂဗုဓ်လွဳပရာလေဝ် ဒးသ္ပရ၊ သွက်ကွးပဒတဴဇရေၚ် ထေက်ကဵုဖျိန် ဍာ်လွံက်ဒှ်မ္ဂး၊ အ္စာဂှ် သ္ဒးဖျိန်ဍာ်လွံက်ရ၊ “မုရဴသာ်လဵု သ္ဂောံဖျိန်ဍာ်လွံက် သွက်ကွးပဒတဴဇရေၚ်ရော?” ရဴဝွံ ဂဗုဓ်လွဳပရာလေဝ် ဒးသ္ပရ။ သ္ၚာကွးပဒတဴဇရေၚ်ဂှ် ထေက်ကဵုဒးဖျောန်ဒှ်မ္ဂး၊ အ္စာဂှ် သ္ဒးဖျောန်ရ၊ “မုရဴသာ်လဵု သ္ဂောံဖျောန် သ္ၚာကွးပဒတဴဇရေၚ်ရော?” ရဴဝွံ ဂဗုဓ်လွဳပရာလေဝ် ဒးသ္ပရ။ ခမဳမဖျောန်သ္ၚာဂှ် သ္ဒးဖျောန်ဂတးဂတန် ဗွဲမဒးရးရ၊ ကိုပ်ကၠာ ထၞဟ်ဍာ်လွံက် ဓဇူဟွံပိုတ်ဏီ စ္ဍးအာဟွံဂွံရ။
ကွးပဒတဴဇရေၚ် ဂိယဲဒှ်မ္ဂး၊ လုကဴကာလမဂျိုၚ်ဒၟံၚ်လမျီု သ္ဒးကၠောန်ၜိုတ်လွဳပရာရ၊ စဵုကဵုယဲကွးပဒတဴဇရေၚ်ဂှ် ဗၠး သ္ဒးလၟတ်မၚ်ဒၟံၚ်ရ။
ယွံခမဳတအ် ဣဝွံတုန် ဒ္ဂေတ်ဝတ် အ္စာဂမၠိုၚ် မဒးဒ္ဂေတ် ပ္ဍဲခမဳကွးပဒတဴဇရေၚ်ဂမၠိုၚ်ရ။ အတိုၚ်ဒ္ဂေတ်ဝတ်ဂှ် အ္စာဂမၠိုၚ် ဒးဒ္ဂေတ် ပ္ဍဲခမဳကွးပဒတဴဇရေၚ်ဂမၠိုၚ်ရ ရဴဝွံ (သ္ဂးရ)။
✤✤✤ ဝတ္ထက္ခန္ဓကအဋ္ဌမတုဲရ။ ✤✤✤
ပ္ဍဲခန္ဓကဝွံ ဝတ္ထုစှ်ဒ္စိတ်ရောၚ်၊ ဒ္ဂေတ်ဝတ် စှ်ပန်ရောၚ်။
