၈.၁၃ ။ စၞောန်ထ္ၜးကဵုအာစာရိယဝတ်
၃၇၉။ ပ္ဍဲအခိၚ်ဂှ် ခမဳကွးပဒတဴဇရေၚ်ဂမၠိုၚ် ဟွံဒ္ဂေတ်ဗွဲမဒးရး ပ္ဍဲအ္စာဂမၠိုၚ်အိုတ်ရ။
ခမဳပၟိက်အောန်ဂမၠိုၚ်ဂှ် “မုဟိုတ် ခမဳကွးပဒတဴဇရေၚ်ဂမၠိုၚ် ဟွံဒ္ဂေတ်ဗွဲမဒးရး ပ္ဍဲအ္စာဂမၠိုၚ်ရော” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။
ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ ။
“ယွံခမဳတအ် ခမဳကွးပဒတဴမွဲဇရေၚ်ဂမၠိုၚ် ဟွံဒ္ဂေတ်ဗွဲမဒးရး ပ္ဍဲအ္စာဂမၠိုၚ်အိုတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။
ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ ပ ။ ဟီုဂရိုဟ်တုဲ။ ပ ။ တွံကဵုဂလာန်ဓရ်တုဲမ္ဂး သ္ဂးကဵုခမဳဂမၠိုၚ်ရ။
၃၇၆။ ယွံခမဳတအ် ဒှ်သာ်ဂှ်မ္ဂး ကြက်ပညပ်တဴ ဒ္ဂေတ်ဝတ်ဗွဲမဒးရး ပ္ဍဲအ္စာဂမၠိုၚ် ကုခမဳကွးပဒတဴဇရေၚ်ဂမၠိုၚ်ရ၊ အတိုၚ်ဒ္ဂေတ်ဝတ်ဂှ် ခမဳကွးပဒတဴဇရေၚ်ဂမၠိုၚ် ဒးဒ္ဂေတ် ပ္ဍဲအ္စာဂမၠိုၚ်ရ။ ယွံခမဳတအ် ကွးပဒတဴဇရေၚ်ဂှ် ဒးဒ္ဂေတ်ပ္ဍဲအ္စာ ဗွဲမဒးရးရ။ ပ္ဍဲဂလာန်ဂှ် ကြက်သ္ဂးဂတဝွံတုန် ပွမဒ္ဂေတ်ဗွဲမဒးရးရောၚ်။
(ကွးပဒတဴဇရေၚ်ဂှ်) ဒၠိုက်ကတဵုနူဂယးပြဟ်တုဲ သၠောတ်ကၠေံဒၞပ်တုဲမ္ဂး လ္ၜက်ကၠေဟ်ပတိုန်သ္ၚာကၞေဟ် ပ္ဍဲလတူပၞးပါဲမွဲလပါ်တုဲ သ္ဒးဗဂိန်ကဵုဆုဒကရ၊ သ္ဒးဗဂိန်ကဵုဍာ်လာၚ်မုက်ရ၊ သ္ဒးလးသၞာဂဇအ်ရ၊ ယာဂုနွံမ္ဂး ကြဴကြာတ်ခရော်တုဲ သ္ဒးဗဂိန်ကဵုယာဂုရ၊ ကုအ္စာ မသုၚ်ယာဂုတုဲဂှ် ဒုၚ်ကဵုဍာ်တုဲ ဟောဝ်ဂိုၚ်ကေတ်ခရော်တုဲ သ္ပမွဲမဒးရး သီုဟွံကဵုထ္ဍိမြိလုက်စုက်ဒးဂှ် ကြဴကြာတ်တုဲမ္ဂး သ္ဒးသီဂိုၚ်ဒေပ်စွံရ၊ အ္စာ ဒၠိုက်ကတဵု (နူဒၞာဲ) မ္ဂး သ္ဒးသီဂိုၚ်ဒေပ်ထောံသၞာဂဇအ်ဂှ်ရ၊ ယဝ်သၟိက်ဟန်ဗန်နွံမ္ဂး သ္ဒးကွဟ်ကၟဟ် ဒၞာဲဂှ်ရ။ အ္စာ သၟိက်လုပ်ကွာန်မ္ဂး သ္ဒးဒုၚ်ကဵု သပိုၚ်ဗိုက်လုပ်ကွာန်ရ၊ သ္ဒးဂိုၚ်ကေတ်သပိုၚ်ဗိုက်ပ္ဍဲဘာရ၊ သ္ဒးဒုၚ်ကဵုကာယဗန်ရ၊ ထပ်လဝ် သ္ၚာသကိုပ်ဂမၠိုၚ်တုဲ သ္ဒးဒုၚ်ကဵုရ၊ ကြဴကြာတ်တုဲ သ္ဒးဒုၚ်ကဵုဗဗေၚ်မဒှ်မွဲဟာန်ကေုာံဍာ်ရ။ ယဝ်အ္စာ နွံပၟိက်ကဵုခမဳဗွက်ကြဴမ္ဂး ဗိုက်သပိုၚ် ဗွဲဗၞဳအဝဏ်မညဳသာ နမဂြောပ်ဗ္ဒန် ဗၞဳအဝဏ်ပိပြကာ (ဗၞဳအဝဏ်တၚ်က္ၜံၚ် ၜါလပါ် ကဵုပံၚ်ဠုတ် မိက်သ္ဂးရ)။ ဒက်ဇုက်ကာယဗန် သၠောံရုက်လတက် သ္ၚာသကိုပ်ဂမၠိုၚ် မထပ်လဝ် စုတ်ခၟောံသ္ၚာ ကြာတ်ကြဴဂိုၚ်ကေတ်ဗဗေၚ်တုဲ သ္ဒးဒှ်ခမဳဗွက်ကြဴ အ္စာရ၊ ဟွံထေက်ကဵုဗက်အာ ဗွဲမသ္ၚောဲလောန်ရ၊ ဟွံထေက်ကဵုဗက်အာ ဗွဲကြပ်လောန်ရ၊ သ္ဒးဒုၚ်ဂိုၚ်ကေတ် ပွမလှာဲဂတးဗဗေၚ်ရ၊ ဃောအ္စာ ဟီုဒၟံၚ်ဂလာန်ဂှ် ပၠံက်ပၠုပ်ပ္ဍဲအကြာအကြာတုဲ ဟွံထေက်ကဵုဟီုရ၊ အ္စာ ဟီုသ္ဂးကြပ်ညောန်ကဵုအာပတ်မ္ဂး သ္ဒးဆေဝ်ဒဝ်ရ။
ကလေၚ်ကၠုၚ် (နူဌာန်ဂ္ၚေၚ်ပိဏ္ဍပါတ်) မ္ဂး စဴကၠုၚ်ဗွဲကိုပ်ကၠာတုဲ သ္ဒးလးပညပ်လဝ်သၞာဂဇအ်ရ၊ သ္ဒးစွံပတန်လဝ် ဍာ်ကြဴဇိုၚ် ဂတဵုကြာတ်ဇိုၚ် ကဝေက်ပေါတ်ဇိုၚ် ပ္ဍဲဇရေၚ်ရ၊ ဒစးဒုၚ်တၠုၚ်တရဴတုဲ သ္ဒးဒုၚ်ဂိုၚ်ကေတ် ဗဗေၚ်သ္ၚာရ၊ သ္ဒးဒုၚ်ကဵုသပိုၚ်ဗိုက်ပ္ဍဲဘာရ၊ သ္ဒးဟောဝ်ဂိုၚ်ကေတ် သပိုၚ်ဗိုက်လုပ်ကွာန်ရ၊ ယဝ်သ္ၚာဍေက်ဒၟံၚ်ပလက်မ္ဂး ဗၞတ်မွဲခဏဍောတ် သ္ဒးစဲလဝ် ပ္ဍဲဂမ္တဴတ္ၚဲရ၊ ၜိုန်ဂှ် စွံလဝ် ဗွဲမလအ်ဟွံဂွံရ၊ သ္ဒးထပ်သ္ၚာရ၊ ထပ်သ္ၚာမ္ဂး “လ္ပကဵုဒှ်ကဝ်ကေက်’ပၞေတ်ခ္ဍပ်’ပ္ဍဲလဒေါဝ်ညိ” ရဴဝွံ သီုမပၠုပ်စိုတ် ယှအ်ကၠေံတၞုၚ်မုဟ်ပန်လပုဟ်တဲတုဲ သ္ဒးထပ်သ္ၚာရ၊ သ္ဒးစွံလဝ် ဇုက်ကာယဗန် ပ္ဍဲအပ္ဍဲသၞာထပ်လဝ်ရ။
ပိဏ္ဍပါတ်နွံတုဲ အ္စာလေဝ် မိက်သ္ပပြဘိုဂ်မ္ဂး ဒုၚ်ကဵုဍာ်ရပ်စပ်တုဲ သ္ဒးဗဂိန်ကဵုပိဏ္ဍပါတ်ရ၊ (နွံပၟိက်ဍာ်ဟာ ရဴဝွံ) သ္ဒးဂရၚ်ပတီသၟာန် အ္စာ နကဵုဍာ်သုၚ်ရ၊ ကုအ္စာ မကဵုပိုဉ်တုဲဂှ် ဒုၚ်ကဵုဍာ်တုဲ ဟောဝ်ဂိုၚ်ကေတ်ဗဗေၚ်တုဲမ္ဂး သ္ပဗွဲမဒးရး သီုကဵုထ္ဍိမြိလုက်စုက်ဒးဂှ် ကြဴကြာတ်သအးဇ္ၚးတုဲ သ္ပစဵုကဵုဍာ်ကှ်တုဲမ္ဂး ဗၞတ်မွဲခဏဍောတ် သ္ဒးစဲလဝ် ပ္ဍဲဂမ္တဴတ္ၚဲရ၊ ၜိုန်ဂှ် စွံလဝ် ဗွဲမလအ်ဟွံဂွံရ၊ သ္ဒးစွံဗဗေၚ်သ္ၚာရ၊ မိက်စွံဗဗေၚ်မ္ဂး နကဵုတဲမွဲလပါ်ဂှ် ရပ်ကေတ်ဗဗေၚ်တုဲ နကဵုတဲမွဲလပါ်ဂှ် ဇွိတ်စမ်ရံၚ် သၟဝ်ဇံၚ်ခါတ်ကီု သၟဝ်ဂတဵုကီုတုဲ သ္ဒးစွံရ၊ ဟဂွံစွံဗဗေၚ် ပ္ဍဲတိမဟွံမွဲကဵုသၞာရ။ မိက်ဂွံစွံသ္ၚာမ္ဂး နကဵုတဲမွဲလပါ်ဂှ် ရပ်ကေတ်သ္ၚာတုဲ နကဵုတဲမွဲလပါ်ဂှ် ဇွိတ်ပေါတ်ထောံဒုန်တေၚ်သ္ၚာ ဇုက်ဗလဲသ္ၚာတုဲ သ္ပလအိတ်မုဟ်ပ္ဍဲလပါ်တေံ သ္ပကဝးပ္ဍဲလပါ်ဏအ်တုဲ သ္ဒးစွံသ္ၚာရ။
အ္စာ ဒၠိုက်ကတဵု (နူဒၞာဲ) မ္ဂး သ္ဒးသီဂိုၚ်ထောံ သၞာဂဇအ်ဂှ်ရ၊ သ္ဒးသီဂိုၚ်ဒေပ်ထောံ ဍာ်ကြဴဇိုၚ် ဂတဵုပေါတ်ဇိုၚ် ကဝေက်ပေါတ်ဇိုၚ်ရ၊ ယဝ်သၟိက်ဟန်ဗန်နွံမ္ဂး သ္ဒးကွဟ်ကၟဟ်ဒၞာဲဂှ်ရ။ အ္စာ မိက်ဟုမ်ဍာ်မ္ဂး သ္ဒးစဳရေၚ်ဍာ်ဟုမ်ရ၊ နွံပၟိက်ကဵုဍာ်လၟုဟ်မ္ဂး သ္ဒးစဳရေၚ်ကဵုဍာ်လၟုဟ်ရ၊ နွံပၟိက်ကဵုဍာ်ဂမ္တဴမ္ဂး သ္ဒးစဳရေၚ်ကဵုဍာ်ဂမ္တဴရ။
အ္စာ မိက်ဂွံလုပ်သ္ၚိဇရုၚ်ပလက်မ္ဂး သ္ဒးထ္ၜိုန်ကလောံ ခၞိက်ကြကောတ် နကဵုဍာ်ရ၊ သ္ဒးဖ္ဍုက်တိကမၠေတ် နကဵုဍာ်ရ၊ ဂိုၚ်ကေတ်ဂတဵုသ္ၚိဇရုၚ်ပလက်တုဲ သီုမဗက်အာ နူလက်ကရဴ နူလက်ကရဴ အ္စာဂှ် ဒုၚ်ကဵုဂတဵုသ္ၚိဇရုၚ်ပလက်တုဲမ္ဂး ဟောဝ်ဂိုၚ်ကေတ်သ္ၚာတုဲ သ္ဒးစွံလဝ် ပ္ဍဲဌာန်မဗဗွဲရ၊ သ္ဒးဒုၚ်ကဵုခၞိက်ကြကောတ်ရ၊ သ္ဒးဒုၚ်ကဵုတိကမၠေတ်ရ။ ယဝ်သၟဟ်ရထမ္ဂး သ္ဒးလုပ်သ္ၚိဇရုၚ်ပလက်ရ၊ ခမဳမလုပ်သ္ၚိဇရုၚ်ပလက်ဂှ် လံက်လေတ်မုက် နကဵုတိကမၠေတ် မဖ္ဍုက်လတ်ဍာ်တုဲ ဂြောပ်ဓလီုလဝ် (နကဵုသၞုက်ဍာ်) နူဂတကီု နူလက်ကရဴကီုတုဲ သ္ဒးလုပ်သ္ၚိဇရုၚ်ပလက်ရ၊ ဃရိတ်ခဇ် ခမဳဇၞော်ဂမၠိုၚ်တုဲ ဟဂပ်ဝ်ဂဇအ်ရ၊ ဟဂပ်ဝ်ဆေဝ်ဒဝ်ခမဳသၟတ်ဂမၠိုၚ် နကဵုသၞာအိုတ်ရ၊ ပ္ဍဲသ္ၚိဇရုၚ်ပလက် သွက်အ္စာ သ္ဒးသ္ပကဵုကေၚ်ကာအိုဿီု (မပတမ် ပွမစံၚ်ဗဂဵုပၟတ်)ရ၊ ခမဳမတိတ်ကၠုၚ် နူသ္ၚိဇရုပ်ပလက်ဂှ် ဂိုၚ်ကေတ်ဂတဵုသ္ၚိဇရုၚ်ပလက်တုဲ ဂြောပ်ဓလီုလဝ် (နကဵုသၞုက်ဍာ်) နူဂတကီု နူလက်ကရဴကီုတုဲ သ္ဒးတိတ် နူသ္ၚိဇရုၚ်ပလက်ရ။
ပ္ဍဲအရာဟုမ်ဍာ်လေဝ် သွက်အ္စာ သ္ဒးသ္ပကေၚ်ကာအိုဿီု (မပတမ် ပွမတုဟ်ပေါတ်မိဟ်) ရ၊ ခမဳမဟုမ်ဍာ်တုဲဂှ် တိုန်ကၠုၚ်ဗွဲကိုပ်ကၠာ အ္စာတုဲ သ္ပဇကုဇကု စဵုကဵုဟွံမွဲကဵုဍာ်တုဲ ဗိုက်သပိုၚ်တုဲ သ္ဒးဇိုတ်ကဵုဍာ် နူဇကုအ္စာရ၊ သ္ဒးဒုၚ်ကဵုသပိုၚ်ရ၊ သ္ဒးဒုၚ်ကဵုသ္ၚာသကိုပ်ရ၊ ဂိုၚ်ကေတ်ဂတဵုသ္ၚိဇရုၚ်ပလက်တုဲ ကၠုၚ်ဗွဲကိုပ်ကၠာတုဲ သ္ဒးလးပညပ်လဝ် သၞာဂဇအ်ရ၊ သ္ဒးစွံပတန်လဝ် ဍာ်ကြဴဇိုၚ် ဂတဵုပေါတ်ဇိုၚ် ကဝေက်ပေါတ်ဇိုၚ် ပ္ဍဲဇရေၚ်ရ၊ (နွံပၟိက်ဍာ်ဟာ ရဴဝွံ) သ္ဒးဂရၚ်ပတီသၟာန် အ္စာ နကဵုဍာ်သုၚ်ရ၊ ယဝ်မိက်ကဵုလ္ၚတ်ကတ်ဗတောန်မ္ဂး သ္ဒးလ္ၚတ်ကတ်ဗတောန်ရ၊ ယဝ်မိက်ကဵုသၟာန်ဂၠိုၚ်ဂၠိုၚ်ကဵုဝါမ္ဂး သ္ဒးသၟာန်ဂၠိုၚ်ဂၠိုၚ်ကဵုဝါရ။
ဘာအ္စာ ပဒတဴဂှ် ယဝ်သၟိက်ဟန်ဗန်နွံမ္ဂး ယဝ်သၟဟ်ရထမ္ဂး သ္ဒးသောၚ် ဖ္ဍောၚ်ၚးတးရ၊ ခမဳမသောၚ်ဖ္ဍောၚ်ၚးတးဘာဂှ် ဗွဲကိုပ်ကၠာ ရၚ်တၠုၚ်ပတိတ် ဗဗေၚ်သ္ၚာတုဲ သ္ဒးစွံလဝ် ပ္ဍဲဒၞာဲမဗဗွဲရ၊ ရၚ်တၠုၚ်ပတိတ် သၞာနိသဳဒိုန်သၞာလးတိက်တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ရၚ်ရၚ်တၠုၚ်ပတိတ် ဖုန်ဂၞဳတုဲ သ္ဒးစွံလဝ် ပ္ဍဲဒၞာဲမဗဗွဲရ၊ ဇံၚ်ခါတ်ဂှ် သ္ပဗွဲမသဝ်ဒးရး သီုဟွံကဵုထ္ဍိမြိလုက်စုက်ဒး သၠတြၚ် ဇဵုတြၚ်ဂှ် ရၚ်တၠုၚ်ပတိတ်တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ဂတဵုဂှ် သ္ပဗွဲမသဝ်ဒးရး သီုဟွံကဵုထ္ဍိမြိလုက်စုက်ဒး သၠတြၚ် ဇဵုတြၚ်ဂှ် ရၚ်တၠုၚ်ပတိတ်တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ရၚ်တၠုၚ်ပတိတ် ဇိုၚ်ဇံၚ်ဂမၠိုၚ်တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ရၚ်တၠုၚ်ပတိတ် ထၟာဲဂစှ် (ထၟာဲတဲ) တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ရၚ်တၠုၚ်ပတိတ် ဂတဵုဒလာဲတုဲ သ္ဒးစွံလဝ် ပ္ဍဲဒၞာဲမဗဗွဲရ၊ သၞာလးတိဂှ် သမ္တီလဝ် ဒၞာဲလးလၟိုန်တုဲ ရၚ်တၠုၚ်ပတိတ်တုဲ သ္ဒးစွံလဝ် ပ္ဍဲဒၞာဲမဗဗွဲရ၊ ပ္ဍဲဘာ ယဝ်သ္ၚိစၟဇာဖိုၚ်နွံမ္ဂး သ္ဒးပါဲကၠေံ နူသၠဖ္ဍာန် ဗွဲကိုပ်ကၠာရ၊ သ္ဒးဇိုတ်ပေါတ်ဗတၚ်ကျာ ကေုာံ သကဲခဒမ်ဂမၠိုၚ်ရ။
ဗ္ဒၚ်မသ္ပကလိတ်ကလောတ် နကဵုခၞိက်တိကမၠေတ်ဗကေတ် (နကဵုဆီတၟံ) ဂှ် ပတိုဟ်တိုန်မ္ဂး ဖ္ဍုက်ဍာ်ယာတ်တမြံၚ်တုဲ ဝတ်ကၠေံတုဲမ္ဂး သ္ဒးဇိုတ်ပေါတ်ရ၊ တိမသ္ပလဝ်ကလိတ်ကလောတ် နကဵုသာ်လမ္စံက်ဂှ် ပတိုဟ်တိုန်မ္ဂး ဖ္ဍုက်ယာတ်တမြံၚ်တုဲ ဝတ်ကၠေံတုဲမ္ဂး သ္ဒးပေါတ်ဇိုတ်ရ၊ ဒှ်တိမဟဂွံသ္ပကလိတ်ကလောတ်မ္ဂး လၟုဟ်ဖရုဲဍာ်တုဲ “လ္ပကဵုမၠိုက်တိုန်ဘာညိ” ရဴဝွံ (စွံစိုတ်တုဲ) သ္ဒးကွဟ်ကၟဟ်ရ၊ ပကောံဖအုံလဝ် အိက်ကၟဟ်တုဲ သ္ဒးထောံထောံ ပ္ဍဲဌာန်မဗဗွဲရ။
စဲတ္ၚဲသအးဇ္ၚး သၞာလးတိတုဲမ္ဂး ဂရိုတ်ထောံတုဲ သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲဇိုတ်ပေါတ် ဇိုၚ်ဇံၚ်ဂမၠိုၚ်တုဲမ္ဂး သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚး ဇံၚ်ခါတ်တုဲမ္ဂး ဂရိုက်ထောံတုဲ သ္ပဗွဲမမသဝ်ဒးရး သီုဟွံထ္ဍိမြိလုက်စုက်ဒး သၠတြၚ် ဇဵုတြၚ်ဂှ် သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚး ဂတဵုတုဲမ္ဂး ဂရိုက်ထောံတုဲ သ္ပဗွဲမမသဝ်ဒးရး သီုဟွံထ္ဍိမြိလုက်စုက်ဒး သၠတြၚ် ဇဵုတြၚ်ဂှ် သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚး ဖုန်ဂၞဳတုဲမ္ဂး ဂရိုတ်ထောံတုဲ သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲသအးဇ္ၚး သၞာနိသဳဒိုန် သၞာလးတိက်တုဲမ္ဂး ဂရိုတ်ထောံတုဲ သ္ဒးကလေၚ်လးစွံ အတိုၚ်လးစွံလၟိုန်ရ၊ စဲတ္ၚဲဇိုတ်ပေါတ် ထၟာဲဂစှ်တုဲမ္ဂး သ္ဒးကလေၚ်စွံ ပ္ဍဲဒၞာဲအတိုၚ်စွံလဝ်လၟိုန်ရ၊ စဲတ္ၚဲဇိုတ်ပေါတ်ဂတဵုဒလာဲတုဲမ္ဂး သ္ဒးကလေၚ်စွံ ပ္ဍဲဒၞာဲအတိုၚ်စွံလဝ်လၟိုန်ရ။ သ္ဒးစွံဗဗေၚ်သ္ၚာရ။ ခမဳ မိက်ဂွံစွံဗဗေၚ်ဂှ် နကဵုတဲမွဲလပါ်ဂှ် ရပ်ကေတ်ဗဗေၚ်တုဲ နကဵုတဲမွဲလပါ်ဂှ် ဇွိတ်စမ်ရံၚ် သၟဝ်ဇံၚ်ခါတ်ကီု သၟဝ်ဂတဵုကီုတုဲ သ္ဒးစွံရ၊ ဟဂွံစွံဗဗေၚ် ပ္ဍဲတိမဟွံမွဲကဵုသၞာရ။ ခမဳ မိက်ဂွံစွံသ္ၚာဂှ် နကဵုတဲမွဲလပါ်ဂှ် ရပ်ကေတ်သ္ၚာတုဲ နကဵုတဲမွဲလပါ်ဂှ် ဇွိတ်ပေါတ်ထောံဒုန်တေၚ်သ္ၚာ ဇုက်ဗလဲသ္ၚာတုဲ သ္ပလအိတ်မုဟ်ပ္ဍဲလပါ်တေံ သ္ပကဝးပ္ဍဲလပါ်ဏအ်တုဲ သ္ဒးစွံသ္ၚာရ။
နူဒိုဟ်ဗၟံက် ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗတၚ်ကျာဒိုဟ်ဗၟံက်ဂမၠိုၚ်ရ၊ နူဒိုဟ်ပလိုတ် ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗတၚ်ကျာဒိုဟ်ပလိုတ်ဂမၠိုၚ်ရ၊ နူဒိုဟ်သၟဝ်ကျာ ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗတၚ်ကျာဒိုဟ်သၟဝ်ကျာဂမၠိုၚ်ရ၊ နူဒိုဟ်သၠုၚ်ကျာ ကျာမဒှ်မွဲဟာန်ကေုာံမၠိုက်ဂမၠိုၚ် ပိုက်လွိၚ်ကၠုၚ်အိုတ်မ္ဂး၊ သ္ဒးကၟာတ်ဒဝ်ကၠေံ ဗတၚ်ကျာဒိုဟ်သၠုၚ်ကျာဂမၠိုၚ်ရ၊ ဒှ်အခိၚ်ဂမ္တဴမ္ဂး ပ္ဍဲအခိၚ်တ္ၚဲ သ္ဒးကၟာတ်ဒဝ်လဝ် ဗတၚ်ကျာဂမၠိုၚ်ရ၊ ပ္ဍဲအခိၚ်ဗတမ် သ္ဒးပံက်လဝ်ရ။
ပြဝိုဏ် သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် ပြဝိုဏ်ရ။ မုက်ထော်တြၚ်ခဒမ်ဟုမ်ဍာ် သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် မုက်ထော်တြၚ်ခဒမ်ဟုမ်ဍာ်ရ။ ဇြပ်ကောံဓရီု သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် ဇြပ်ကောံဓရီုရ။ ရုၚ်ပၟတ် သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် ရုၚ်ပၟတ်ရ။ သ္ၚိဝစ်(သ္ၚိဍာ်) သၟိက်ဟန်ဗန်နွံဒှ်မ္ဂး၊ သ္ဒးကွဟ်ကၟဟ် သ္ၚိဝစ်ရ။ ဍာ်သုၚ်ဟွံမွဲမ္ဂး၊ သ္ဒးစွံပတန် ဍာ်သုၚ်ရ။ ဍာ်ရပ်စပ်ဟွံမွဲမ္ဂး၊ သ္ဒးစွံပတန် ဍာ်ရပ်စပ်ရ။ ပ္ဍဲနုၚ်ဍာ်ကြာတ် (နုၚ်သအးသ္ၚိဍာ်) ဍာ်ဟွံမွဲမ္ဂး၊ သ္ဒးဗပေၚ်စုတ်ဍာ်ရ။
ပွမဟွံမိပ်လဟိၚ် ကတဵုဒှ် ကုအ္စာမ္ဂး ကွးပဒတဴဇရေၚ်ဂှ် (အလဵုဇကုလေဝ်) သ္ဒးကော်ဏာဌာန်သအာၚ်ရ၊ (ညးသအာၚ်လေဝ်) သ္ဒးကဵုကော်ဏာရ၊ ဂလာန်ဓရ်လေဝ် သ္ဒးဟီုတွံကဵု ကုအ္စာဂှ်ရ။ ‘သံသယကုက္ကုစ္စ’ ပွမချပ်သၠေဟ်ပၟာ ကတဵုဒှ် ကုအ္စာမ္ဂး ကွးပဒတဴဇရေၚ်ဂှ် သ္ဒးပါဲပၠေၚ်ကၠေံရ၊ (ညးသအာၚ်လေဝ်) သ္ဒးကဵုပၠေၚ်ကၠေံရ၊ ဂလာန်ဓရ်လေဝ် သ္ဒးဟီုတွံကဵု ကုအ္စာဂှ်ရ။ ကွေတ်မှာရာ ကတဵုဒှ် ကုအ္စာမ္ဂး ကွးပဒတဴဇရေၚ်ဂှ် သ္ဒးသောၚ်ကလး ကဵုစာ်စ္ဍးအာရ၊ (ညးသအာၚ်လေဝ်) သ္ဒးကဵုသောၚ်ကလးစာ်စ္ဍးအာရ၊ ဂလာန်ဓရ်လေဝ် သ္ဒးဟီုတွံကဵု ကုအ္စာဂှ်ရ။ အ္စာ အာစိုပ်ဂရုကအာပတ်တုဲ ထေက်ကဵုတၞဟ်နပဒတဴပြဝးမ္ဂး ကွးပဒတဴဇရေၚ်ဂှ် “မုရဴသာ်လဵု သၚ် သ္ဂောံကဵုပြဝး ကုအ္စာဥပဇ္ၛာယ်ရော” ရဴဝွံ သ္ဒးသ္ပဂဗုဓ်လွဳပရာရ။ အ္စာ ထေက်ကဵုတံၚ်ဓဇက်တမ်ဒှ်မ္ဂး ကွးပဒတဴဇရေၚ်ဂှ် “မုရဴသာ်လဵု သၚ် သ္ဂောံတံၚ်ဓဇက်တမ် အ္စာရော” ရဴဝွံ သ္ဒးသ္ပဂဗုဓ်လွဳပရာရ။ အ္စာ ထေက်ကဵုဒ္ဂေတ် ‘မာနတ်’ ထေက်ကဵုသ္ဍိုက်မၠိုက်ဒှ်မ္ဂး ကွးပဒတဴဇရေၚ်ဂှ် “မုရဴသာ်လဵု သၚ် သ္ဂောံကဵုမာနတ် ကုအ္စာရော” ရဴဝွံ သ္ဒးသ္ပဂဗုဓ်လွဳပရာရ။ အ္စာ ထေက်ကဵုကော်ပၠုပ်အဗ္ဘာန်ဒှ်မ္ဂး ကွးပဒတဴဇရေၚ်ဂှ် “မုရဴသာ်လဵု သၚ် သ္ဂောံကော်ပၠုပ်အဗ္ဘာန် အ္စာရော” ရဴဝွံ သ္ဒးသ္ပဂဗုဓ်လွဳပရာရ။ သၚ်မိက်သ္ပ ‘တဇ္ဇနိယကမ်’ ပွမဘပဠကီု ‘နိယဿကမ်’ ပွမကဵုပဒတဴကေုာံအ္စာ နိဿယကီု ‘ပဗ္ဗာဇနဳယကမ်’ ပွမဗက်ဗ္ဒဴကီု ‘ပဋိသာရဏဳယကမ်’ ပွမကဵုကလအ်ဒုၚ်ဂုဏ်ကီု ‘ဥက္ခေပနဳယကမ်’ ပွမဗက်ပတိတ်ထောံကီု ကုအ္စာမ္ဂး၊ ကွးပဒတဴဇရေၚ်ဂှ် “မုရဴသာ်လဵု သၚ် ဟဂွံသ္ပကမ် ကုအ္စာရော?၊ မုရဴသာ်လဵု သ္ဂောံကဵုဒုဟ်သာစှေ်ရော?” ရဴဝွံ သ္ဒးသ္ပဂဗုဓ် လွဳပရာရ။ သၚ် သ္ပ ‘တဇ္ဇနိယကမ်’ ပွမဘပဠကီု ‘နိယဿကမ်’ ပွမကဵုပဒတဴကေုာံအ္စာ နိဿယကီု ‘ပဗ္ဗာဇနဳယကမ်’ ပွမဗက်ဗ္ဒဴကီု ‘ပဋိသာရဏဳယကမ်’ ပွမကဵုကလအ်ဒုၚ်ဂုဏ်ကီု ‘ဥက္ခေပနဳယကမ်’ ပွမဗက်ပတိတ်ထောံကီု ကုအ္စာမ္ဂး၊ ကွးပဒတဴဇရေၚ်ဂှ် “မုရဴသာ်လဵု အ္စာ သ္ဂောံဒ္ဂေတ်ဗွဲမဒးရးရော?၊ သ္ဂောံဖျေံတသော်မတွံဂးမာန်ရော?၊ ဒ္ဂေတ်တဴဒ္ဂေတ်မတိတ်ဗၠးမူဒဏ်ရော?၊ သၚ် သ္ဂောံလလမ်ကၠေံကမ်ရော?” ရဴဝွံ သ္ဒးသ္ပဂဗုဓ်လွဳပရာရ။
သ္ၚာအ္စာဂှ် ထေက်ကဵုဒးလပိုက်ကဆံၚ်ဒှ်မ္ဂး၊ ကွးပဒတဴဇရေၚ်ဂှ် သ္ဒးလပိုက်ကဆံၚ်ရ၊ “မုရဴသာ်လဵု သ္ဂောံလပိုက်ကဆံၚ် သ္ၚာအ္စာရော?” ရဴဝွံ ဂဗုဓ်လွဳပရာလေဝ် ဒးသ္ပရ။ သ္ၚာအ္စာဂှ် ထေက်ကဵုဒးဇိၚ်မ္ဂး၊ ကွးပဒတဴမွဲစွံဂှ် သ္ဒးဇိၚ်ရ၊ “မုရဴသာ်လဵု သ္ဂောံဇိၚ်သ္ၚာအ္စာရော?” ရဴဝွံ ဂဗုဓ်လွဳပရာလေဝ် ဒးသ္ပရ၊ သွက်အ္စာ ထေက်ကဵုဖျိန် ဍာ်လွံက်ဒှ်မ္ဂး၊ ကွးပဒတဴမွဲစွံဂှ် သ္ဒးဖျိန်ဍာ်လွံက်ရ၊ “မုရဴသာ်လဵု သ္ဂောံဖျိန်ဍာ်လွံက် သွက်အ္စာရော?” ရဴဝွံ ဂဗုဓ်လွဳပရာလေဝ် ဒးသ္ပရ။ သ္ၚာအ္စာဂှ် ထေက်ကဵုဒးဖျောန်ဒှ်မ္ဂး၊ ကွးပဒတဴမွဲစွံဂှ် သ္ဒးဖျောန်ရ၊ “မုရဴသာ်လဵု သ္ဂောံဖျောန် သ္ၚာအ္စာရော?” ရဴဝွံ ဂဗုဓ်လွဳပရာလေဝ် ဒးသ္ပရ။ ခမဳမဖျောန်သ္ၚာဂှ် သ္ဒးဖျောန်ဂတးဂတန် ဗွဲမဒးရးရ၊ ကိုပ်ကၠာ ထၞဟ်ဍာ်လွံက် ဓဇူဟွံပိုတ်ဏီ စ္ဍးအာဟွံဂွံရ။
သီုဟွံဂရၚ်ပတီပါန်အခေါၚ် အ္စာ ဟဂပ်ဝ်ကဵုဗဗေၚ် ကုညးလ္ၚဵုရ၊ ဗဗေၚ်ညးလ္ၚဵုဂှ်လေဝ် ဟွံထေက်ကဵုဂိုၚ်ကေတ်ရ၊ ဟဂပ်ဝ်ကဵုသ္ၚာ ကုညးလ္ၚဵုရ၊ သ္ၚာညးလ္ၚဵုဂှ်လေဝ် ဟွံထေက်ကဵုဂိုၚ်ကေတ်ရ၊ ဟဂပ်ဝ်ကဵုပရိက္ခရာ ‘အရပ်စပ်’ ကုညးလ္ၚဵုရ၊ ပရိက္ခရာညးလ္ၚဵုဂှ်လေဝ် ဟွံထေက်ကဵုဂိုၚ်ကေတ်ရ၊ ဟဂပ်ဝ်ကးသော်က္ဍိုပ် ညးလ္ၚဵုဂမၠိုၚ်ရ၊ ဟွံထေက်ကဵုကးသော်က္ဍိုပ်ဇကုဂမၠိုၚ် ကုညးလ္ၚဵုရ၊ ဟဂပ်ဝ်သ္ပကမၠောန်ကေၚ်ကာ ညးလ္ၚဵုဂမၠိုၚ်ရ၊ ဟွံထေက်ကဵုသ္ပကမၠောန်ကေၚ်ကာ (မပတမ် ပွမတုဟ်ပေါတ်မိဟ်) ကုညးလ္ၚဵုရ၊ ဟဂပ်ဝ်သ္ပကေၚ်ကာဇၞော်သၟတ် ညးလ္ၚဵုရ၊ ဟဂပ်ဝ်ကဵုသ္ပကမၠောန်ကေၚ်ကာ ဇၞော်သၟတ်ဇကု ကုညးလ္ၚဵုရ၊ ဟဂပ်ဝ်သ္ပခမဳဗွက်ကြဴ ညးလ္ၚဵုရ၊ ဟဂပ်ဝ်ကဵုညးလ္ၚဵု သ္ပခမဳဗွက်ကြဴဇကုရ၊ ဟဂပ်ဝ်ရၚ်တၠုၚ် ပိဏ္ဍပါတ် ညးလ္ၚဵုရ၊ ဟဂပ်ဝ်ကဵုညးလ္ၚဵု ရၚ်တၠုၚ်ပိဏ္ဍပါတ်ဇကုရ၊ သီုဟွံဂရၚ်ပတီပါန်အခေါၚ် အ္စာ ဟွံထေက်ကဵုလုပ်ကွာန်ရ၊ ဟွံထေက်ကဵုအာ သုသာန်ရ၊ ဟွံထေက်ကဵုစ္ဍးအာဌာန်သအာၚ်ရ၊ အ္စာ ဂိယဲဒှ်မ္ဂး၊ လုကဴကာလမဂျိုၚ်ဒၟံၚ်လမျီု သ္ဒးကၠောန်ၜိုတ်လွဳပရာရ၊ စဵုကဵုယဲအ္စာဂှ်ဗၠး သ္ဒးလၟတ်မၚ်ဒၟံၚ်ရ။
ယွံခမဳတအ် ဣဝွံတုန် ဒ္ဂေတ်ဝတ် ခမဳကွးပဒတဴဇရေၚ်ဂမၠိုၚ် မဒးဒ္ဂေတ် ပ္ဍဲအ္စာဂမၠိုၚ်ရ။ အတိုၚ်ဒ္ဂေတ်ဝတ်ဂှ် ခမဳကွးပဒတဴဇရေၚ်ဂမၠိုၚ် ဒးဒ္ဂေတ် ပ္ဍဲအ္စာဂမၠိုၚ်ရ ရဴဝွံ (သ္ဂးရ)။
