၇.၁.၁ ။ သၟိၚ်သကျဝၚ်တြဴတၠ ပခမဳ
၃၃၀။ ပ္ဍဲအခိင်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴဒၟံၚ် ပ္ဍဲနိဂီုမၞုံယၟု အနုပိယ သၟိၚ်မလ္လဂမၠိုၚ်ဂှ် သၟိၚ်သကျဝၚ်မပြာကဋ်ဒယှ်တှ်လောန်ဂမၠိုၚ် ဒ္ဂေတ်ပတုပ်ဗက် တဳလမၞုံပိုဉ်ကျာ်တြဲ မသ္ပခမဳတုဲ ပခမဳအိုတ်ရ။
ပ္ဍဲအခိၚ်ဂှ် ပၞောဝ်သၟိၚ်သကျဝၚ်မဟာနာမ် ကေုာံသၟိၚ်သကျဝၚ်အနုရုဒ္ဓ ကောကဵုဒေံဂမၠိုၚ်ၜါတၠဂှ် သၟိၚ်သကျဝၚ်အနုရုဒ္ဓဂှ် ဍိုန်ဍောတ်ၜတ်တကတ်လောန်ရ၊ ကုကောန်သၟိၚ်ဂှ် ပြသာဒ်နွံပိတၞုၚ်အိုတ်ရ။ မွဲတၞုၚ်ဂှ်တုဲ ပြာသာဒ်ပဒတဴ ရာသဳမုဟ်ကျာရ၊ မွဲတၞုန်ဂှ်တုန် ပြသာဒ်ပဒတဴ ရာသဳက္ညၚ်ရ။ မွဲတၞုၚ်ဂှ်တုန် ပြသာဒ်ပဒတဴ ရာသဳဗြဲရ၊ ကောန်သၟိၚ်ဂှ် လုကဴဂိတုဗြဲဂမၠိုၚ်ပန်ဂိတု သီုမဒုၚ်စသုၚ် နကဵုကွိၚ်ကွိုက်ဂမၠိုၚ် ညးဗြဴဂမၠိုၚ်ဟေၚ်တိၚ်တိုက်ဂှ် ဟွံစှေ်ထပ်သၟဝ် ပြာသာဒ်ရ၊ ပ္ဍဲအခိၚ်ဂှ်— “ပ္ဍဲအခိၚ်လၟုဟ် သၟိၚ်သကျဝၚ် မပြာကဋ်ဒယှ်တှ်လောန်ဂမၠိုၚ် ဒ္ဂေတ်ပတုပ်ဗက် တဳလမၞုံပိုဉ်ကျာ်တြဲ မသ္ပခမဳတုဲ ပခမဳအိုတ်ရ၊ နူဂကူပိုဲညးဂမၠိုၚ် နူဂကူပိုဲညးဂမၠိုၚ် နူအဝေါၚ်ခရှ် လုပ်အဝေါၚ်ခမဳတုဲ ညးပခမဳလေဝ် ဟွံမွဲမွဲရ၊ အဲကဵုဒှ် အနုရုဒ္ဓကဵုဒှ် ဂွံပခမဳမ္ဂး ခိုဟ်သန်ရ” ရဴဝွံ ကသပ်ဒှ် ကုသၟိၚ်သကျဝၚ် မဟာနာမ်ရ။
ပ္ဍဲအခိၚ်ဂှ် သၟိၚ်သကျဝၚ်မဟာနာမ် ပြာပ်အာဇရေၚ် ကောန်သၟိၚ်အနုရုဒ္ဓတုဲပ္ဍဲကြဴ—
“ယွံဒေံအနုရုဒ္ဓ ပ္ဍဲအခိၚ်လၟုဟ် သၟိၚ်သကျဝၚ် မပြာကဋ်ဒယှ်တှ်လောန်ဂမၠိုၚ် ဒ္ဂေတ်ပတုပ်ဗက် တဳလမၞုံပိုဉ်ကျာ်တြဲ မသ္ပခမဳတုဲ ပခမဳအိုတ်ရ၊ နူဂကူပိုဲညးဂမၠိုၚ် နူအဝေါၚ်ခရှ် လုပ်အဝေါၚ်ခမဳတုဲ ညးပခမဳမမိက်ကဵုမွဲမွဲ ဟွံမွဲရ၊ ဟိုတ်ဂှ်ရ တၠအဲလေဝ် သြဝ်ပခမဳညိ၊ အဲလေဝ် ကြက်ပခမဳရ” ရဴဝွံ ဟီုသ္ဂးကဵုကောန်သၟိၚ်အနုရုဒ္ဓရ။
အဲဂှ် ဒှ်ညးဍိုန်ဍောတ်ၜတ်တကတ်လောန်ရ၊ နူအဝေါၚ်ခရှ် လုပ်အဝေါၚ်ခမဳတုဲသွက်ဂွံပခမဳဂှ် အဲဟွံသၟဟ်ရထရ၊ တၠအဲဟေၚ် သြဝ်ပခမဳညိ ရဴဝွံ (သ္ဂးရ)။ ယွံဒေံအနုရုဒ္ဓ သြဝ်ကၠုၚ်ညိ၊ စပ်ကဵုကမၠောန်ကေၚ်ကာခရှ် ညးပဒတဴသ္ၚိကၟိန်တုဲ ကြက်ဒၠောံဗတောန် တၠအဲရ။ ဗွဲကိုပ်ကၠာ ဒးကဵုထဲတိရ၊ ကဵုထဲတိတုဲ ဒးကဵုတဵုပဠုမ်(ဂြာတ်မ)ရ၊ကဵုတဵုပဠုမ်တုဲ ဒးသပၠုပ်ဍာ်ရ၊ ကဵုသပၠုပ်ဍာ်တုဲ ဒးကဵုပတိတ်ဍာ်ရ၊ ကဵုပတိတ်ဍာ်တုဲ ဒးကဵုဂစှေ် ချောဲဗဝ်တမ်ရ၊ ကဵုဂစှေ်ချောဲဗဝ်တမ်တုဲ ဒးကဵုရတ်ရ၊ ကဵုရတ်တုဲ ဒးကဵုရၚ်တၠုၚ်ပတိတ်ဏာရ၊ ကဵုရၚ်တၠုၚ်ပတိတ်ဏာတုဲ ဒးကဵုဗွဝ်ဖအုံရ၊ ကဵုဗွဝ်ဖအုံတုဲ ဒးကဵုပၠိုန်ရ၊ ကဵုပၠိုန်တုဲ ဒးကဵုရၚ်တၠုၚ် ၜံက်ဂရိုက်ပတိတ်ဆံက်ဂမၠိုၚ်ရ၊ ကဵုရၚ်တၠုၚ်ၜံက်ဂရိုက်ပတိတ်ဆံက်ရ၊ ဒးကဵုရၚ်တၠုၚ်ပတိတ် တဝ်သြောံသၟတ်ဂမၠိုၚ် ‘သ္ပအ်သြောံဂမၠိုၚ်’ ရ၊ ကဵုရၚ်တၠုၚ်ပတိတ် တဝ်သြောံသၟတ်ဂမၠိုၚ်တုဲ ဒးကဵုသရဳရ၊ ကဵုသရဳတုဲ ဒးကဵုရၚ်တၠုၚ်သပၠုပ်ဟၚ်စာတ်ရ၊ ကဵုရၚ်တၠုၚ်သပၠုပ်တုဲ ပ္ဍဲသၞာံဂတတေံလေဝ် ဒးကၠောန်သ္ပ အတိုၚ်ဝွံရ၊ သၞာံဂတဂတတေံလေဝ် အတိုၚ်ဝွံဟေၚ် ဒးကၠောန်သ္ပရ ရဴဝွံ (ဒၠောံဗတောန်ရ)။ ကမၠောန်ကေၚ်ကာဂမၠိုၚ် အိုတ်အာဟွံမာန်အိုတ်ရ၊ ပွမစိုပ်ဒတုဲ ကမၠောန်ကေၚ်ကာဂမၠိုၚ် ဟွံပြာကဋ်ရ၊ မုရဴပ္ဍဲအခိၚ်မွဲ ကမၠောန်ကေၚ်ကာဂမၠိုၚ် ကြက်အိုတ်အာမာန်အိုတ်ရော?၊ မုရဴပ္ဍဲအခိၚ်မွဲ ပွမစိုပ်ဒတုဲ ကမၠောန်ကေၚ်ကာဂမၠိုၚ် ပြာကဋ်ရော?၊ ပိုဲညးဂမၠိုၚ် မုရဴပ္ဍဲအခိၚ်မွဲ သီုဟွံမွဲဂဗုဓ်ဓဝိၚ် ဂွံဒုၚ်သိုၚ် ဗွဲမဍိုက်ပေၚ်စုမ်ရုမ် နကဵုကာမဂုဏ်ဂမၠိုၚ်မသုန်ပြကာအိုတ်ရော? ရဴဝွံ (သ္ဂးရ)။
ယွံဒေံအနုရုဒ္ဓ ကမၠောန်ကေၚ်ကာဂမၠီုၚ် အိုတ်အာဟွံမာန်အိုတ်ရ၊ ပွမစိုပ်ဒတုဲ ကမၠောန်ကေၚ်ကာဂမၠိုၚ် ဟွံပြာကဋ်ရ၊ သီုကမၠောန်ကေၚ်ကာဟွံအိုတ်ဟေၚ် မအံက်ဂမၠိုၚ်ကီု မိအံက်ဂမၠိုၚ်ကီု စုတိစဴသွဝ်တုဲအိုတ်ရ ရဴဝွံ သ္ဂးရ။ ဒှ်သာ်ဂှ်ဟေၚ် တၠအဲ (ကောဂၠု) ဟေၚ် ဩဝ်တီကေတ် ကမၠောန်ကေၚ်ကာခရှ် ညးပဒတဴသ္ၚိကၟိန်ညိ၊ အဲ နူအဝေါၚ်ခရှ် လုပ်အဝေါၚ်ခမဳတုဲ ကြက်ပခမဳရ ရဴဝွံ (သ္ဂးရ)။
ပ္ဍဲအခိၚ်ဂှ်ကော န်သၟိၚ်အနုရုဒ္ဓ ပြာပ်အာဇရေၚ် မိအံက်ဇကုတုဲပ္ဍဲကြဴ—
“ယွံမိအံက် နူအဝေါၚ်ခရှ် လုပ်အဝေါၚ်ခမဳတုဲ အဲ မိက်ပခမဳရ၊ နူအဝေါၚ်ခရှ် လုပ်အဝေါၚ်ခမဳတုဲ သွက်ဂွံပခမဳ ဩဝ်ကဵုအခေါၚ် ကုအဲညိ” ရဴဝွံ ဟီုသ္ဂးကဵုမိအံက်ရ။ ဟီုသ္ဂးတဴ ရဴဝွံမ္ဂး မိအံက်ကောန်သၟိၚ်အနုရုဒ္ဓဂှ်—
“ယွံကောန်အနုရုဒ္ဓ အဲသ္ဍိုက်ဆာန် မၞးကောန်အဲၜါတၠဂမၠိုၚ်ရ၊ သ္ဍိုက်မၠိုက်ရ၊ ဟွံက္ဍုဟ်မၠေံရ၊ ၜိုန်ဒးချိန်အာလေဝ် သီုဟွံမွဲပၟိက်အိုတ်ဂှ် ကြက်ဒးသာဲခြာအာ ကေုာံမၞးတအ်ညးဂမၠိုၚ်အိုတ်ရ၊ ဂျိုၚ်ဒၟံၚ်လမျီုတုန် နူအဝေါၚ်ခရှ်ဝွံ တၞဟ်နလုပ်စိုပ်အဝေါၚ်ခမဳ ပသာ် အဲဂွံကဵုအခေါၚ်ကဵုမၞးတအ်ညးဂမၠိုၚ်မာန်ရော?” ရဴဝွံ သ္ဂးကဵုကောန်သၟိၚ်သကျဝၚ် အနုရုဒ္ဓရ။
မရနုက်ကဵုၜါဝါလေဝ် ။ ပ ။ မရနုက်ကဵုပိဝါလေဝ် ကောန်သၟိၚ်အနုရုဒ္ဓဂှ် “ယွံမအံက် နူအဝေါၚ်ခရှ် လုပ်အဝေါၚ်ခမဳတုဲ အဲ မိက်ဂွံပခမဳရ၊ နူအဝေါၚ်ခရှ် လုပ်အဝေါၚ်ခမဳတုဲ သွက်ဂွံပခမဳ ဩဝ်ကဵုအခေါၚ် ကုအဲညိ” ရဴဝွံ ဟီုသ္ဂးကဵုမိအံက်ရ။
ပ္ဍဲအခိၚ်ဂှ် သၟိၚ်သကျဝၚ်မၞုံယၟုဘဒ္ဒိယ သ္ပဒၟံၚ်ဒဒှ်သၟိၚ် သၟိၚ်သကျဝၚ်ဂမၠိုၚ်ရ၊ သၟိၚ်ဂှ်တုန် ဒှ်သကအ်ပွံၚ် ကောန်သၟိၚ်အနုရုဒ္ဓရ။
ပ္ဍဲအခိၚ်ဂှ် မိအံက်ကောန်သၟိၚ်အနုရုဒ္ဓဂှ်—
“သၟိၚ်သကျဝၚ် မၞုံယၟုဘဒ္ဒိယ မဒှ်သကအ်ပွံၚ်အနုရုဒ္ဓဂှ် သ္ပဒၟံၚ်ဒဒှ်သၟိၚ် သၟိၚ်သကျဝၚ်ဂမၠိုၚ်ရ၊ သၟိၚ်ဂှ် နူအဝေါၚ်ခရှ် လုပ်အဝေါၚ်ခမဳတုဲ ပခမဳမာန်ဟွံသေၚ်ရ” ရဴဝွံ (ပၠုပ်စိုတ်တုဲ) “ယွံကောန်အနုရုဒ္ဓ သၟိၚ်သကျဝၚ် မၞုံယၟုဘဒ္ဒိယ နူအဝေါၚ်ခရှ် လုပ်အဝေါၚ်ခမဳတုဲ ပခမဳမ္ဂး တၠအဲလေဝ် ဩဝ်ပခမဳညိ” ရဴဝွံ သ္ဂးကဵု ကောန်သၟိၚ်သကျဝၚ်အနုရုဒ္ဓရ။ (ပ္ဍဲအကြာဝွံ ပ္ဍဲဗၟာ ဟွံတုပ်သၟဟ်ကဵုပါဠိရ၊ ဂိုၚ်ကေတ်လဝ်ပါဌ်သအာၚ်ရ၊ တေက်ရံၚ်ညိ)
ပ္ဍဲအခိၚ်ဂှ် ကောန်သၟိၚ်အနုရုဒ္ဓ ပြာပ်အာဇရေၚ် သၟိၚ်သကျဝၚ်မၞုံယၟုဘဒ္ဒိယတုဲ—
“ယွံသဟာဲ ပွမဂွံဒှ်ခမဳအဲဂှ် ဆပ်စပ်ဒၟံၚ်ကေုာံတၠအဲရ” ရဴဝွံ သ္ဂးကဵုသၟိၚ်သကျဝၚ်မၞုံယၟုဘဒ္ဒိယရ။
ယွံသဟာဲ ပွမဂွံဒှ်ခမဳတၠအဲဂှ် ဆပ်စပ်ဒၟံၚ်ကေုာံအဲကဵုဒှ် ပွမဆက်စပ် ပွမဟွံဆက်စပ်ဂှ် သောၚ်ဍေံရ (လဝ်ကဵုဒှ်ကၠာရ)၊ အဲ ကေုာံတၠအဲ အတိုၚ်နွံပၟိက်ဂှ် ဩဝ်ပခမဳညိ ရဴဝွံ (ဘဒ္ဒိယ သ္ဂးရ)။ (*ပ္ဍဲပိုဒ် အဲကေုာံတၠအဲဂှ် အဲ ပခမဳကေုာံတၠအဲရ ရဴဝွံ လဂွံကဵု ပွမစောဲစပ် ကဵုသကအ်ရဲဂှ် ၜိုန်မိက်ဟီုပတိတ်တိုဟ်တိုဟ်လေဝ် ဒှ်ညးမၞုံကဵုစိုတ်လောဘ တံၚ်ဂြဲစောဲဗာန် ပ္ဍဲတသိုခ်သၟိၚ်ဂှ်ရ အဲကေုာံတၠအဲ ဗၞတ်ဝွံဟေၚ်မြော်ဗြုတိတ်အာတုဲ ဂလာန်သှေ်ဂှ် ဟီုဗွဲမဍိုက်ပေၚ် ဟွံမာန်ဒှ်အာရ−ဋ္ဌ။)
ယွံသဟာဲ ဩဝ်ကၠုၚ်ညိ၊ ပိုဲတအ်သီုညးၜါတၠ နူအဝေါၚ်ခရှ် လုပ်အဝေါၚ်ခမဳတုဲ ပခမဳအိုတ်စိုအ် ရဴဝွံ (အနုရုဒ္ဓ သ္ဂးရ)။
ယွံသဟာဲ အဲ နူအဝေါၚ်ခရှ် လုပ်အဝေါၚ်ခမဳတုဲ ပခမဳဟွံမာန်ရ၊ မုရဴကိစ္စကေၚ်ကာ တၠအဲမွဲသအာၚ် အဲမကၠောန်သ္ပကဵုမာန်မွဲ ဂွံကၠောန်သ္ပရော?” တၠအဲဟေၚ် ဩဝ်ပခမဳညိ ရဴဝွံ (ဘဒ္ဒိယ သ္ဂးရ)။
ယွံသဟာဲ မိအံက်ဂှ် “ယွံကောန်အနုရုဒ္ဓ သၟိၚ်သကျဝၚ် မၞုံယၟုဘဒ္ဒိယ နူအဝေါၚ်ခရှ် လုပ်အဝေါၚ်ခမဳတုဲ ပခမဳမ္ဂး တၠအဲလေဝ် ဩဝ်ပခမဳညိ ရဴဝွံ ဟီုသ္ဂးကဵုအဲရ” ရဴဝွံ (အနုရုဒ္ဓ သ္ဂးရ)။
ဂလာန်မ္ဂး “ယွံသဟာဲ ပွမဂွံဒှ်ခမဳတၠအဲဂှ် ဆပ်စက်ဒၟံၚ်ကေုာံအဲကဵုဒှ် ဟွံဆက်စပ်ကဵုဒှ် ပွမဆက်စပ် ပွမဟွံဆက်စပ်ဂှ် သောၚ်ဍေံရ (လဝ်ကဵုဒှ်ကၠာရ)။ အဲ ကေုာံတၠအဲ အတိုၚ်နွံပၟိက်ဂှ် ဩဝ်ပခမဳညိ” ရဴဝွံ တၠအဲ ကေၚ်ဟီုသ္ဂးလဝ်ရ ဟွံသေၚ်ဟာ။ ယွံသဟာဲ ဩဝ်ကၠုၚ်ညိ ပိုဲတအ်ညးၜါတၠ နူအဝေါၚ်ခရှ် လုပ်အဝေါၚ်ခမဳတုဲ ပခမဳအိုတ်စိုအ် ရဴဝွံ (အနုရုဒ္ဓ သ္ဂးရ)။
ပ္ဍဲအဃောအခိၚ်ဂှ် မၞိဟ်ဂမၠိုၚ် မၞုံအလေံဟီုဍာံစၟတ်အိုတ်ရ၊ မၞုံအလေံဒုၚ်ဝန်ဍာံစၟတ်အိုတ်ရ၊ ပ္ဍဲအခိၚ်ဂှ် သၟိၚ်သကျဝၚ်ဘဒ္ဒိယဂှ်−
“ယွံသဟာဲ စဵုကဵုထပှ်သၞာံ ဩဝ်လၟတ်မၚ်ညိ၊ ပ္ဍဲအခိၚ်မကလိလောန်အာ ထပှ်သၞာံဂမၠိုၚ်ဂှ် ပိုဲတအ်သီုညးၜါတၠ နူအဝေါၚ်ခရှ် လုပ်အဝေါၚ်ခမဳတုဲ ပခမဳအိုတ်ရ ရဴဝွံ (ဘဒ္ဒိယ သ္ဂးရ)။
ယွံသဟာဲ ထပှ်သၞာံမ္ဂးဂှ် လအ်လောန်ကွေံရ၊ စဵုကဵုထပှ်သၞာံဂှ် အဲလၟတ်မၚ်ဟွံမာန်ရ ရဴဝွံ (အနုရုဒ္ဓ သ္ဂးရ)။
ယွံသဟာဲ စဵုကဵုတြဴသၞာံ ဩဝ်လၟတ်မၚ်ညိ ။ ပ ။ စဵုကဵုမသုန်သၞာံ။ စဵုကဵုပန်သၞာံ။ စဵုကဵုပိသၞာံ။ စဵုကဵုၜါသၞာံ။ စဵုကဵုမွဲသၞာံ ဩဝ်လၟတ်မၚ်ညိ၊ ပ္ဍဲအခိၚ်မကလိလ ောန်အာ မွဲသၞာံဂှ် ပိုဲတအ်သီုညးၜါတၠ နူအဝေါၚ်ခရှ် လုပ်အဝေါၚ်ခမဳတုဲ ပခမဳအိုတ်ရ ရဴဝွံ (ဘဒ္ဒိယ သ္ဂးရ)။
ယွံသဟာဲ မွဲသၞာံမ္ဂးဂှ် လအ်လောန်ကွေံရ၊ စဵုကဵုမွဲသၞာံဂှ် အဲလၟတ်မၚ်ဟွံမာန်ရ ရဴဝွံ (အနုရုဒ္ဓ သ္ဂးရ)။
ယွံသဟာဲ စဵုကဵုထပှ်ဂိတု ဩဝ်လၟတ်မၚ်ညိ၊ ပ္ဍဲအခိၚ်မကလိလောန်အာ ထပှ်ဂိတုဂမၠိုၚ်ဂှ် ပိုဲတအ်သီုညးၜါတၠ နူအဝေါၚ်ခရှ် လုပ်အဝေါၚ်ခမဳတုဲ ပခမဳအိုတ်ရ ရဴဝွံ (ဘဒ္ဒိယ သ္ဂးရ)။
ယွံသဟာဲ ထပှ်ဂိတုမ္ဂးဂှ် လအ်လောန်ကွေံရ၊ စဵုကဵုထပှ်ဂိတုဂှ် အဲလၟတ်မၚ်ဟွံမာန်ရ ရဴဝွံ (အနုရုဒ္ဓ သ္ဂးရ)။
ယွံသဟာဲ စဵုကဵုတြဴဂိတု ။ ပ ။ စဵုကဵုမသုန်ဂိတု။ စဵုကဵုပန်ဂိတု။ စဵုကဵုပိဂိတု။ စဵုကဵုၜါဂိတု။ စဵုကဵုမွဲဂိတု။ ဗၞတ်လပါ်ဂိတု ဩဝ်လၟတ်မၚ်ညိ၊ ပ္ဍဲအခိၚ်မကလိလောန်အာ လပါ်ဂိတုဂှ် ပိုဲတအ် သီုညးၜါတၠ နူဝေါၚ်ခရှ် လုပ်အဝေါၚ်ခမဳတုဲ ပခမဳအိုတ်ရ ရဴဝွံ (ဘဒ္ဒိယ သ္ဂးရ)။
ယွံသဟာဲ လပါ်ဂိတုမ္ဂးဂှ် လအ်လောန်ကွေံရ၊ စဵုကဵုလပါ်ဂိတုဂှ် အဲလၟတ်မၚ်ဟွံမာန်ရ ရဴဝွံ (အနုရုဒ္ဓ သ္ဂးရ)။
ယွံသဟာဲ ကိုပ်ကၠာအဲဟဂွံအပ်ပြာပ်ကဵု ကောန်ဂမၠိုၚ်ကီု ဒေံဂမၠိုၚ်ကီု ဒဒှ်သၟိၚ်ဏီဂှ် ထပှ်ဗၞတ်ထပှ်တ္ၚဲ ဩဝ်လၟတ်မၚ်ညိ ရဴဝွံ (ဘဒ္ဒိယ သ္ဂးရ)။
ယွံသဟာဲ ထပှ်တ္ၚဲမ္ဂးဂှ် ဟွံလအ်ကွေံကွေံရ၊ (အဲ) လၟတ်မၚ်ရ ရဴဝွံ (အနုရုဒ္ဓ သ္ဂးရ)။
၃၃၁။ ပ္ဍဲအခိၚ်ဂှ် ကောန်သၟိၚ်သကျဝၚ်ဂမၠိုၚ်တြဴတၠ မတွံဂး ဘဒ္ဒိယ အနုရုဒ္ဓ အာနန္ဒ ဘဂု ကိမိလ ဒေဝဒတ် သၟာဆတ္တာဥပါလိဟေၚ် ဒှ်မရနုက်ကဵုထပှ်တၠဂမၠိုၚ်တုဲ ပ္ဍဲအခိၚ်ကိုပ်ကၠာတေံ သၟဟ်ညံၚ်တိတ် တိဥဒျာန် နကဵုအၚ်္ဂပၞာန်ပန်ကၞိပ်အိုတ်ကီု တိတ်အာ နကဵုအၚ်္ဂပၞာန်ပန်ကၞိပ်အိုတ်ရ။ ကောန်သၟိၚ်ဂမၠိုၚ်ဂှ် အာစိုပ်ဇမ္ၚောဲတုဲမ္ဂး ကဵုဒပ်ပၞာန် ကလေၚ်ဆုတ်စဴတုဲ လုပ်စုပ်အာတွဵုရး သအာၚ်တုဲမ္ဂး သၠောတ်ကၠေံကယျိုၚ်ကယျဝ်တုဲ ဒက်စိုက်ဂွဳ နကဵုယာတ်ကၞေဟ်လတူတုဲ “ယွံသကအ် ဥပါလိ ဩဝ်ကလေၚ်စဴလၟုဟ်ညိ၊ ဒြပ်ကသပ်ဗၞတ်ဝွံ ဂယိုၚ်လမျီုရုမ်ဂပ် ကုတၠအဲရ” ရဴဝွံ သ္ဂးကဵုဥပါလိသၟာဆတ္တာအိုတ်ရ။ ပ္ဍဲအခိၚ်ဂှ် ကုသၟာဆတ္တာဥပါလိ ဃောကလေၚ်စဴဂှ်—
“သၟိၚ်သကျဝၚ်ဂမၠိုၚ် ကြမ်ကြအိုတ်ရ၊ ဥပလိဝွံ ကဵုကောန်သၟိၚ်ဂမၠိုၚ် တိတ်အာအိုတ်ရ ရဴဝွံ ဂစိုတ်လေဝ် ဂစိုတ်ထောံအဲအိုတ်ရ၊ ကောန်သၟိၚ်သကျဝၚ်ဂမၠိုၚ်ဝွံမှ နူအဝေါၚ်ခရှ် လုပ်အဝေါၚ်ခမဳတုဲ ပခမဳအိုတ်ဏီရ၊ အဲတုန် မုသ္ဇက်သ္ဂးနွံဏီရော?” ရဴဝွံ ကသပ်ဒှ်ရ။
(ချပ်ရဴဝွံတုဲ ပ္ဍဲကြဴ) သှ်ပၠိုဟ်ကၠေံ စိုက်ဂွဳဂှ်တုဲမ္ဂး ကွက်စွံ ဒြပ်ဂှ်ပ္ဍဲတၞံဆုတုဲ “ကုညးဆဵုညာတ်ဂှ် ကဵုလဝ်ဒါန်တုဲဒှ်ရ၊ (ညးလဵုဟွံဟီု) ဩဝ်ရၚ်တၠုၚ်ကေတ်ဏာညိ” ရဴဝွံ သ္ဂးတုဲ ပြာပ်အာဇရေၚ် ကောန်သၟိၚ်သကျဝၚ်ဂမၠိုၚ်ရ၊ ကောန်သၟိၚ်သကျဝၚ်ဂမၠိုၚ်ဂှ် ညာတ်ဒးသၟာဆတ္တာဥပါလိ ကၠုၚ်ဒၟံၚ် နူဇမ္ၚောဲတုဲ “ယွံသကအ်ဥပါလိ မုဟိုတ်ကလေၚ်ကၠုၚ်ရော?” ရဴဝွံ သၟာန်သၟာဆတ္တာဥပါလိအိုတ်ရ။
ယွံကောန်နာဲတအ် အဲဍိက်ဃောကလေၚ်စဴဂှ် “သၟိၚ်သကျဝၚ်ဂမၠိုၚ် ကြမ်ကြအိုတ်ရ၊ ဥပါလိဝွံ ကဵုကောန်သၟိၚ်ဂမၠိုၚ် တိတ်အာအိုတ်ရ ရဴဝွံ ဂစိုတ်လေဝ် ကဵုဂစိုတ်ထောံအဲအိုတ်ရ၊ ကောန်သၟိၚ်သကျဝၚ်ဂမၠိုၚ်ဝွံမှ နူအဝေါၚ်ခရှ် လုပ်အဝေါၚ်ခမဳတုဲ ပခမဳအိုတ်ဏီရ၊ အဲတုန် မုသ္ဇက်သ္ဂးနွံဏီရော?” ရဴဝွံ ကသပ်ဒှ်ရ။ ယွံကောန်နာဲတအ် အဲဍိက်ဂှ် သှ်ပၠိုဟ်ကၠေံ စိုက်ဂွဳဂှ်တုဲမ္ဂး ကွက်စွံဒြပ်ဂှ် ပ္ဍဲတၞံဆုတုဲ “ကုညးဆဵုညာတ်ဂှ် ကဵုလဝ်ဒါန်တုဲဒှ်ရ၊ (ညးလဵုဟွံဟီု) ဩဝ်ရၚ်တၠုၚ်ကေတ်ဏာညိ” ရဴဝွံ သ္ဂးတုဲ ကလေၚ်ကၠုၚ်ရ ရဴဝွံ (သ္ဂးရ)။
ယွံသကအ်ဥပါလိ ပွမကလေၚ်ကၠုၚ်ဂှ် ဒှ်ပွမသ္ပခိုဟ်သန်ရ၊ သၟိၚ်သကျဝၚ်ဂမၠိုၚ်ကြမ်ကြအိုတ်ရ။ “ဥပါလိဝွံ ကဵုကောန်သၟိၚ်ဂမၠိုၚ် တိတ်အာအိုတ်ရ” ရဴဝွံ ဂစိုတ်လေဝ် ကဵုဂစိုတ်ထောံတၠအဲအိုတ်ရ ရဴဝွံ (သ္ဂးအိုတ်ရ)။
ပ္ဍဲအခိၚ်ဂှ် ကောန်သၟိၚ်သကျဝၚ်ဂမၠိုၚ် ကော်ဏာဥပါလိ ဇရေၚ်တဳလမၞုံပိုဉ်ကျာ်တြဲတုဲမ္ဂး ဂဇအ်ကေတ် ပ္ဍဲဒၞာဲမွဲအိုတ်တုဲ—
“ယွံကျာ်မၞုံပိုဉ် ပိုဲဍိက်တအ် သကျဝၚ်ဂမၠိုၚ် နိဿယ်ကဵုမာနအိုတ်ရ၊ ယွံကျာ်မၞုံပိုဉ် သၟာဆတ္တာဥပါလိဝွံ လုကဴမလအ်ကာဖာ ဒှ်ညးကၠောန်ၜိုတ်ဥပကာ ပိုဲဍိက်တအ်ညးဂမၠိုၚ်ရ၊ တဳလမၞုံပိုဉ်ကျာ်တြဲ သ္ပခမဳကဵုဥပါလိ ဗွဲကိုပ်ကၠာညိ၊ ပိုဲဍိက်တအ်ညးဂမၠိုၚ် ကြက်သ္ပပွမလ္ၚောဝ် ပွမဒစးဒုၚ်တၠုၚ်တရဴ ပွမပၚ်ခၠအ်သၟိပ်တဲ ပွမရှေ်သှေ်ရဴဂဴ ကုဥပါလိဝွံအိုတ်ရ၊ သ္ပရဴဝွံမ္ဂး သာကဳယမာန် ပိုဲသကျဝၚ်ဂမၠိုၚ် ကြက်ကဝ်စှေ်ရ” ရဴဝွံ ပရၚ်ပတီအိုတ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ပခမဳကဵု သၟာဆတ္တာဥပါလိ ဗွဲကိုပ်ကၠာရ၊ ကြဴနူဂှ် ပခမဳကဵု ကောန်သၟိၚ်သကျဝၚ်ဂမၠိုၚ်ဂှ်ရ။
ပ္ဍဲအခိၚ်ဂှ် တဳလပိုဉ်ဘဒ္ဒိယ ပ္ဍဲအပ္ဍဲဒဂိုန်ဝှ်ဂှ်ဟေၚ် သ္ပဇၞောဝ်မတ် ဝဇ္ဇာပိပြကာဂမၠိုၚ်ရ၊ တဳလပိုဉ်အနုရုဒ္ဓ ကဵုကတဵုဒှ် ဒိဗ္ဗစက္ခုဉာဏ်ရ၊ တဳလပိုဉ်အာနန္ဒ သ္ပဇၞောဝ်မတ် သောတာပတ္တိဖိုဟ်ရ၊ ဒေဝဒတ် ကဵုကတဵုဒှ် ဣဒ္ဓိကြဳဇှ်ပုထုဇန်ဂမၠိုၚ်ထေက်ကဵုကလိဂွံရ။
၃၃၂။ ပ္ဍဲအခိၚ်ဂှ် တဳလပိုဉ်ဘဒ္ဒိယ ပြာပ်အာဂြိုပ်ကီု ပြာပ်အာသၟဝ်တမ်ဆုကီု ပြာပ်အာဌာန်သ္ၚိတ်ဇြကီု “ဩ. ဒှ်တသိုခ်ကွေံရသွံ” ရဴဝွံ ကြီုဒၟံၚ်ဥဒါန်ဟွံပိုတ်ရ။ ပ္ဍဲအခိၚ်ဂှ် ခမဳဂမၠိုၚ်မဂၠိုၚ် ပြာပ်အာဇရေၚ် တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ် ဂဇအ်ကေတ် ပ္ဍဲဒၞာဲမွဲတုဲအိုတ်မ္ဂး—
“ယွံတဳလမၞုံပိုဉ် တဳလပိုဉ်ဘဒ္ဒိယဂှ် ပြာပ်အာဂြိုပ်ကီု ပြာပ်အာသၟဝ်တမ်ဆုကီု ပြာပ်အာဌာန်သ္ၚိတ်ဇြကီု ‘ဩ. ဒှ်တသိုခ်ကွေံရသွံ’ ရဴဝွံ ကြီုဒၟံၚ်ဥဒါန်ဟွံပိုတ်ရ၊ ယွံတဳလမၞုံပိုဉ် တဳလပိုဉ်ဘဒ္ဒိယဂှ် ဨကန္တ သီုဟွံမိပ်လဟိၚ်ဂှ် ဒ္ဂေတ်ဒၟံၚ်ဒ္ဂေတ်မပြဲရ။
ဗှ်ဗၞုဟ်ဂွံသတိ တသိုခ်သၟိၚ်ကိုပ်ကၠာဂှ်တုဲ ပြာပ်အာဂြိုပ်ကီု ပြာပ်အာသၟဝ်တမ်ဆုကီု ပြာပ်အာဌာန်သ္ၚိတ်ဇြကီု ‘ဩ. ဒှ်တသိုခ်ကွေံရသွံ၊ ဩ. ဒှ်တသိုခ်ကွေံရသွံ’ ရဴဝွံ ကြီုဒၟံၚ်ဥဒါန် ဟွံပိုတ်ရ” ရဴဝွံ ဂရၚ်ပတီအိုတ်ရ။
ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ဟီုသ္ဂးကဵုခမဳမွဲဇကု ရဴဝွံရ “ယွံခမဳ ဩဝ်ကၠုၚ်ညိ၊ နကဵုဂလာန် အဲ ‘ယွံကောန်တၠဘဒ္ဒိယ ကျာ်တြဲ ကော်ဒၟံၚ်တၠအဲရ’ ရဴဝွံ တၠအဲ ဩဝ်အာကော် ခမဳဘဒ္ဒိယညိ” ရဴဝွံ (သ္ဂးတဴရ)။ “ယွံကျာ်မၞုံပိုဉ် ခိုဟ်ရ” ရဴဝွံ ခမဳဂှ် ဒုၚ်ဝန် ကုတဳလမၞုံပိုဉ်ကျာ်တြဲတုဲမ္ဂး ပြာပ်အာဇရေၚ် တဳလပိုဉ်ဘဒ္ဒိယတုဲ “ယွံကောန်တၠဘဒ္ဒိယ ကျာ်တြဲ ကော်ဒၟံၚ်တၠအဲရ” ရဴဝွံ ဟီုသ္ဂးရ။
“ခိုဟ်ရ ယွံကောန်တၠ” ရဴဝွံ ဒုၚ်ဝန် ကုခမဳဂှ်တုဲ ပြာပ်အာဇရေၚ် တဳလမၞုံပိုဉ်ကျာ်တြဲတုဲမ္ဂး လ္ၚောဝ်သ္ပဝတ်တုဲ တဳလပိုဉ်ဘဒ္ဒိယ မဂဇအ်ဒၟံၚ် ပ္ဍဲဒၞာဲမဗဗွဲဂှ် တဳလမၞုံပိုဉ်ကျာ်တြဲ သ္ဂးတိုန်ဂလာန်ဝွံရ။
“ယွံဘဒ္ဒိယ တၠအဲ ပြာပ်အာဂြိုပ်ကီု ပြာပ်အာသၟဝ်တမ်ဆုကီု ပြာပ်အာဌာန်သ္ၚိတ်ဇြကီု ‘ဩ. ဒှ်တသိုခ်ကွေံရသွံ၊ ဩ. ဒှ်တသိုခ်ကွေံရသွံ’ ရဴဝွံ ကြီုဒၟံၚ်ဥဒါန် ဟွံပိုတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။
ယွံဘဒ္ဒိယ တၠအဲ ဟိုတ်မညာတ်ကေတ် မုဖဵုတၟေၚ်မွဲ ပြာပ်အာဂြိုပ်ကီု ပြာပ်အာသၟဝ်တမ်ဆုကီု ပြာပ်အာဌာန်သ္ၚိတ်ဇြကီု “ဩ. ဒှ်တသိုခ်ကွေံရသွံ၊ ဩ. ဒှ်တသိုခ်ကွေံရသွံ” ရဴဝွံ ကြီုဒၟံၚ်ဥဒါန် ဟွံပိုတ်ရော? ရဴဝွံ (သၟာန်ရ)။
ယွံကျာ်မၞုံပိုဉ် အဲဍိက် ဃောဒှ်သၟိၚ်ကိုပ်ကၠာတေံ ပ္ဍဲအပ္ဍဲနန်လေဝ် ဒးစဳရေၚ်လဝ် ပၟၚ်ပၟဲဗွဲမဒးရးရ၊ ပ္ဍဲမ္ၚးနန်လေဝ် ဒးစဳရေၚ်လဝ် ပၟၚ်ပၟဲဗွဲမဒးရးရ၊ ပ္ဍဲအပ္ဍဲဍုၚ်လေဝ် ဒးစဳရၚ်လဝ် ပၟၚ်ပၟဲဗွဲမဒးရးရ၊ ပ္ဍဲမ္ၚးဍုၚ်လေဝ် ဒးစဳရေၚ်လဝ် ပၟၚ်ပၟဲဗွဲမဒးရးရ၊ ပ္ဍဲအပ္ဍဲဇနပိုဒ်လေဝ် ဒးစဳရေၚ်လဝ် ပၟၚ်ပၟဲဗွဲမဒးရးရ၊ ပ္ဍဲမ္ၚးဇနပိုဒ်လေဝ် ဒးစဳရေၚ်လဝ် ပၟၚ်ပၟဲဗွဲမဒးရးရ၊ ယွံကျာ်မၞုံပိုဉ် အဲဍိက်ၜိုန်ဂပ်ဝ်မၚ်မွဲလဝ်ရဴဝွံလေဝ် ၜိုန်ဂပ်ဝ်ကဵုဂြောပ်ဗ္ဒန်ရဴဝွံလေဝ် သီုမဖေက်ဂၟံက် သီုမလကိုတ်တ္ၚဵု သီုမသမ္ၚံက်သမ္ၚာတ် သီုမဇတဝ်ဒၟံပ်ဖြာပ်ဖြာပ်ဂှ် ဒးပဒတဴဒၟံၚ်ရ။ ယွံကျာ်မၞုံပိုဉ် အခိၚ်လၟုဟ်တုန် အဲဍိက်ဂှ် ပြာပ်အာဂြိုပ်ကီု ပြာပ်အာသၟဝ်တမ်ဆုကီု ပြာပ်အာဌာန်သ္ၚိဇြကီု ဟွံဖေက် ဟွံလကိုတ် ဟွံသမ္ၚံက်သမ္ၚာတ် ဟွံဇတဝ်ဖြာပ်ဖြာပ်တုဲ သီုဟွံမွဲကဵုဂဗုဓ်ဓဝိၚ် ဖျေံကၠေံတသော် မတွံဂးမာန်မာန ဂယိုၚ်လမျီု နကဵုပစ္စယ်ညးသအာၚ်ကဵုဒါန်တုဲမ္ဂး ညံၚ်ရဴသတ်ဒြာဲ ဂွံပဒတဴအာ နစိုတ်မဗၠးၜးရ။
ယွံကျာ်မၞုံပိုဉ် အဲဍိက် ဟိုတ်မညာတ်ကေတ် ဖဵုတၟေၚ်ဝွံဂှ်ရ ပြာပ်အာဂြိုပ်ကီု ပြာပ်အာသၟဝ်တမ်ဆုကီု ပြာပ်အာဌာန်သ္ၚိတ်ဇြကီု “ဩ. ဒှ်တသိုခ်ကွေံသွံ၊ ဩ. ဒှ်တသိုခ်ကွေံရသွံ” ရဴဝွံ ကြီုဒၟံၚ်ဥဒါန် ဟွံပိုတ်ရ ရဴဝွံ (ဂရၚ်ပတီရ)။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ တီကေတ် ဟိုတ်ပရူပရာဂှ်တုဲ ပ္ဍဲအခိၚ်ဂှ် ကြီုဂအောတ်တိုန် ဥဒါန်ဝွံရ။
ယြဴပ္ဍဲစိုတ်ညးမွဲ ပၞောတ်ဒေါသဂမၠိုၚ် ဟွံမွဲအိုတ်ရ၊ ဒုဟ်မပတမ်သမ္ပတ္တိ ဝိပတ္တိလေဝ် ကလိလောန်အာရ၊ ပူဂိုလ် မဟွံမွဲကဵုဘဲ မဒှ်တသိုခ် မဟွံမွဲကဵုပွမစံၚ်တူဂှ် ဒေဝတဴဂမၠိုၚ် ဟွံကလိဂွံ သွက်ဂွံဗဵုလ္ၚောတ်အိုတ်ရ ရဴဝွံ (ကြီုဂအောတ်တုန်
