၃.၁.၁၆။ မပတမ်ပွမတံၚ်ဓဇက်တမ် ခမဳမထေက်ကဵုဒ္ဂေတ်မာနတ်

၁၂၇။ ပဒတဴပြဝးတုဲဒှ်တုဲ ဥဒါယဳ မထေက်ကဵုဒ္ဂေတ်မာနတ်ဂှ် ပ္ဍဲအပ္ဍဲဝတ် အာစိုပ်အာပတ်မွဲ သ္ပလွဳပရာနစေတနာတုဲ ပတိတ်ဍာ်သုက် မဂပ်ဝ်ဂြောပ်ဗ္ဒန်လဝ်မသုန်တ္ၚဲရ၊ ခမဳ ဥဒါယဳဂှ်―

“ယွံကောန်တၠတအ် အဲဍိက် အာစိုပ်အာပတ်မွဲ သ္ပလွဳပရာနစေတနာတုဲ ပတိတ်ဍာ်သုက် မဂပ်ဝ်ဂြောပ်ဗ္ဒန်လဝ် လပါ်ဂိတုရ ။ ပ ။ ပဒတဴပြဝးတုဲဒှ်တုဲ အဲဍိက် မထေက်ကဵု ဒ္ဂေတ်မာနတ်ဂှ် ပ္ဍဲအပ္ဍဲဝတ် အာစိုပ်အာပတ်မွဲ သ္ပလွဳပရာနစေတနာတုဲ ပတိတ်ဍာ်သုက် မဂပ်ဝ်ဂြောပ်ဗ္ဒန်လဝ်မသုန်တ္ၚဲရ၊ အဲဍိက် ပသာ်ဒးဒ္ဂေတ်သ္ပဏီရော? ရဴဝွံ ဟီုသ္ဂးလဴဗ္စ ကုခမဳဂမၠိုၚ်ရ။

ဂရၚ်ပတီ ဟိုတ်ပရာပရူဝွံ ကုတဳလမၞုံပိုဉ်ကျာ်တြဲအိုတ်ရ။ ယွံခမဳတအ် ဒှ်သာ်ဂှ်မ္ဂး ပ္ဍဲအပ္ဍဲဝတ် ဟိုတ်နူအာပတ်မွဲ သ္ပလွဳပရာနစေတနာတုဲ ပတိတ်ဍာ်သုက် မဂပ်ဝ်ဂြောပ်ဗ္ဒန်လဝ်မသုန်တ္ၚဲ သၚ်တံၚ်ဓဇက်တမ် ခမဳဥဒါယဳတုဲ ဩဝ်ကဵုပြဝးပံၚ်ပကောံကေုာံအာပတ်ကၠတုဲဒးပတဴ (ဒးပံၚ်ဒဂိုန်ဒ္ဂေတ်) ညိ။ ယွံခမဳတအ် ရဴဝွံ ဒးတံၚ်ဓဇက်တမ်ရ။ ပ ။ ယွံခမဳတအ် ရဴဝွံ ဒးကဵုပြဝး ပံၚ်ပကောံကေုာံ အာပတ်ကၠာတုဲပဒတဴရ ။ ပ ။ ကဵုရ ။ ပ ။ သၚ်ဂပ်ဝ်ကဵုပြဝး ပံၚ်ပကောံကေုာံအာပတ်ကၠာတုဲ ပဒတဴ ပ္ဍဲအပ္ဍဲဝတ် ဟိုတ်အာပတ်မွဲ သ္ပလွဳပရာနစေတနာတုဲ ပတိတ်ဍာ်သုက် မဂပ်ဝ်ဂြောပ်ဗ္ဒန်လဝ်မသုန်တ္ၚဲ ကုခမဳဥဒါယဳတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြ ရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ ရဴဝွံ သ္ဂးရ)။