၁.၆။ ဥက္ခေပနဳယကမ် မဂပ်ဝ်သ္ပ ဟိုတ်ပွမဟွံဇအုဲဇဗအာပတ်
၅၆။ ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲလာဃောသိတာရာမ် ဇရေၚ်ဍုၚ်ကောသမ္ဗဳဂှ် တဳလပိုဉ်ဆန္န အာစိုပ်အာပတ်တုဲ ဟွံမိက်ဇအုဲဇဗဝဳဗလးအာပတ်ရ။
ခမဳပၟိက်အောန်ဂမၠိုၚ်ဂှ် “တဳလပိုဉ်ဆန္န အာစိုပ်အာပတ်တုဲ မုဟိုတ် ဟွံမိက်ဇအုဲဇဗအာပတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ကဵုခမဳသၚ် ကောံဓရီုတုဲမ္ဂး―
“ယွံခမဳတအ် ခမဳဆန္န အာစိုပ်အာပတ်တုဲ ဟွံမိက်ဇအုဲဇဗ အာပတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက် ခမဳဂမၠိုၚ်ရ။
ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။
တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ၊ “ယွံခမဳတအ် ဟွံထေက်ရ ။ ပ ။ ယွံခမဳတအ် တြုံမလ္ၚုသၟး (နူမဂ်ဖိုလ်) ဂှ် အာစိုပ်အာပတ်တုဲ မုဟိုတ် ဟွံမိက်ဇအုဲဇဗအာပတ်ရော?။ ယွံခမဳတအ် (ပွဆန္န သ္ပဒးဝွံ) ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ ။ ပ ။ တွံကဵုဂလာန်ဓရ်တုဲမ္ဂး―
ယွံခမဳတအ် ဒှ်သာ်ဂှ်မ္ဂး သၚ် ဩဝ်သ္ပဥက္ခေပနဳယကမ် ဟိုတ်ပွမဟွံဇအုဲဇဗအာပတ် မဟွံမွဲကဵုပွမပြဘိုဂ်မွဲစွံကေုာံသၚ် ကုခမဳဆန္နညိ ရဴဝွံ သ္ဂးကဵုခမဳဂမၠိုၚ်ရ။
ယွံခမဳတအ် ရဴဝွံ ဒးသ္ပရ။ ဗွဲကိုပ်ကၠာ ဒးစောဒနာ ခမဳဆန္နရ၊ စောဒနာတုဲ ပ္ဍဲကြဴ ဒးကဵုဗှ်ဗၞုဟ်ရ၊ ကဵုဗှ်ဗၞုဟ်တုဲပ္ဍဲကြဴ ဒးပတိုန်အာပတ်ရ၊ ပတိုန်အာပတ်တုဲပ္ဍဲကြဴ ခမဳ စဳကၠးဆိုက်ဗ္ဒက် ပ္ဍဲဝိနယ်သိက္ခာပိုဒ်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။
“ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳဆန္နဝွံ အာစိုပ်အာပတ်တုဲ ဟွံမိက်ဇအုဲဇဗအာပတ်ရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် သ္ပဥက္ခေပနဳယကမ် ဟိုတ်ပွမဟွံဇအုဲဇဗအာပတ် မဟွံမွဲကဵုပွမပြဘိုဂ်မွဲစွံကေုာံသၚ် ကုခမဳဆန္နရ၊ ဣဝွံတုန် ပွမကဵုတီရောၚ်။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳဆန္နဂွံ အာစိုပ်အာပတ်တုဲ ဟွံမိက်ဇအုဲဇဗအာပတ်ရ၊ သၚ် သ္ပဥက္ခေပနဳယကမ် ဟိုတ်ပွမဟွံဇအုဲဇဗအာပတ် မဟွံမွဲကဵု ပွမပြဘိုဂ်မွဲစွံကေုာံသၚ် ကုခမဳဆန္နရ၊ ယြဴကုတဳလပိုဉ်မွဲ သ္ဍိုက်မၠိုက် ပွမသ္ပ ဥက္ခေပနဳယကမ် ဟိုတ်ပွမဟွံဇအုဲဇဗအာပတ် မဟွံမွဲကဵုပွမပြဘိုဂ်မွဲစွံကေုာံသၚ် ကုခမဳဆန္နရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
မရနုက်ကဵုၜါဝါလေတ် ဟီုသ္ဂးဟိုတ်ဂှ်ရ။ ပ ။ မရနုက်ကဵုပိဝါလေဝ် ဟီုသ္ဂးဟိုတ်ဂှ်ရ။ ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳဆန္နဂွံ အာစိုပ်အာပတ်တုဲ ဟွံမိက်ဇအုဲဇဗအာပတ်ရ၊ သၚ် သ္ပဥက္ခေပနဳယကမ် ဟိုတ်ပွမဟွံဇအုဲဇဗအာပတ် မဟွံမွဲကဵု ပွမပြဘိုဂ်မွဲစွံကေုာံသၚ် ကုခမဳဆန္နရ၊ ယြဴကုတဳလပိုဉ်မွဲ သ္ဍိုက်မၠိုက် ပွမသ္ပ ဥက္ခေပနဳယကမ် ဟိုတ်ပွမဟွံဇအုဲဇဗအာပတ် မဟွံမွဲကဵုပွမပြဘိုဂ်မွဲစွံကေုာံသၚ် ကုခမဳဆန္နရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
သၚ် ဂပ်ဝ်သ္ပ ဥက္ခေပနဳယကမ် ဟိုတ်ပွမဟွံဇအုဲဇဗအာပတ် မဟွံမွဲကဵုပွမပြဘိုဂ်မွဲစွံ ကေုာံသၚ် ကုခမဳဆန္နတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ ရဴဝွံ သ္ဂးရ)။
ယွံခမဳတအ် “ဂပ်ဝ်သ္ပဥက္ခေပနဳယကမ် ဟိုတ်ပွမဟွံဇအုဲဇဗအာပတ် မဟွံမွဲကဵုပွမပြဘိုဂ်မွဲစွံကေုာံသၚ် ကဵုခမဳဆန္နတုဲရ” ရဴဝွံ ဘာအဆက်အဆက်လေဝ် ဒးဟီုလဴပတီအိုတ်ရ ရဴဝွံ (သ္ဂးရ)။
