၁.၄။ ပဋိသာရဏဳယကမ်
၃၃။ ပ္ဍဲမွဲအခိၚ်တေံ တဳလပိုဉ်သုဓမ္မ ဒှ်ခမဳနွံပိုဉ်ဂဇအ်ဘာ သမ္ၚေဟ်စိတ္တ ပ္ဍဲဇနပိုဒ် မစ္ဆိကာသဏ္ဍရ၊ စိုန်သကီုပ္ဍဲကမၠောန်ကေၚ်ကာတၟိရ၊ မၞုံကဵုဝတ်ပိဏ္ဍပါတ်လၟိုန်ဒမၠိရ။
သမ္ၚေဟ်စိတ္တ ဇၟာပ်အခိၚ်မဘိက်နိမန် သၚ်ကီု ဂိုဏ်ကီု ပူဂိုလ်ကီုဂှ် သီုဟွံဂရၚ်ပတီ တဳလပိုဉ်သုဓမ္မဂှ် ဟွံဘိက်နိမန်ရ။ ပ္ဍဲအခိၚ်ဂှ် ထေရ်ဇၞော်ဂမၠိုၚ်မဂၠိုၚ်ဂၠၚ် မတွံဂး တဳလပိုဉ်သာရိပိုတ် တဳလပိုဉ်မဟာမောဂ္ဂလာန် တဳလပိုဉ်မဟာကစ္စာန တဳလပိုဉ်မဟာကောဋ္ဌိက တဳလပိုဉ်မဟာကပ္ပိန တဳလပိုဉ်ရာဟုလ က္ညဂေတ်ဂ္ၚေၚ် ဒေသစာရိတ် ပ္ဍဲကာသိရးဂမၠိုၚ်မ္ဂး စိုပ်ကၠုၚ်ဇနပိုဒ် မစ္ဆိကာသဏ္ဍအိုတ်ရ။ သမ္ၚေဟ်စိတ္တဂှ် “ခမဳထေရ်ဇၞော်ဂမၠိုၚ်မဂၠိုၚ်ဂၠၚ် စိုပ်ကၠုၚ်ဇနပိုဒ် မစ္ဆိကာသဏ္ဍ အိုတ်ရ” ရဴဝွံ သ္ဂောံမိၚ်ကေတ်ရ။
ပ္ဍဲအခိၚ်ဂှ် သမ္ၚေဟ်စိတ္တ ပြာပ်အာဇရေၚ် ခမဳထေရ်ဇၞော်ဂမၠိုၚ်တုဲ လ္ၚေဝ်သ္ပဝတ် ဗွဲမရှ်ေသှ်ေရဴဂဴတုဲမ္ဂး သမ္ၚေဟ်စိတ္တ မဂဇအ်ဒၟံၚ်ပ္ဍဲဒၞာဲမဗဗွဲဂှ် နကဵုဂလာန်ဓရ် တဳလပိုဉ်သာရိပိုတ်ကဵုတီညာတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုကေက်သကာတုဲ ကဵုမြဟ်မြဴတုဲမ္ဂး “ယွံတဳလပိုဉ်တအ် ထေရ်ဇၞော်ဂမၠိုၚ် တၞဟ်နသွက်တ္ၚဲယး ဩဝ်ဒုၚ်တဲ အာဂန္တုကဘတ် ‘ပိဏ္ဍပါတ် မဂပ်ဝ်ကဵုဒါန် ကုပူဂိုလ်ကွာ်တရဴဂမၠိုၚ်’ အဲဍိက်အိုတ်ညိ” ရဴဝွံ ဂရၚ်ပတီရ။ ခမဳထေရ်ဇၞော်ဂမၠိုၚ် နမဒၟံၚ်သ္ၚိတ်သ္ၚိတ်ဂှ် ဒုၚ်ကေတ်တဲအိုတ်ရ။
ပ္ဍဲအခိၚ်ဂှ် သမ္ၚေဟ်စိတ္တ တီကေတ် ခမဳထေရ်ဇၞော်ဂမၠိုၚ် ဒုၚ်တဲတုဲ ဒၠိုက်ကတဵုနူဒၞာဲတုဲမ္ဂးလ္ၚောဝ်သ္ပဝတ် ခမဳထေရ်ဇၞော်ဂမၠိုၚ်တုဲ သ္ပရှေ်သှေ်ရဴဂဴတုဲပ္ဍဲကြဴ ပြာပ်အာဇရေၚ် တဳလပိုဉ်သုဓမ္မတုဲမ္ဂး လ္ၚောဝ်သ္ပဝတ် ဒတူဒၟံၚ်ပ္ဍဲဒၞာဲမွဲတုဲ “ယွံတဳလပိုဉ် တဳလပိုဉ်ဂှ် တၞဟ်နသွက်တ္ၚဲယး ဩဝ်ဒုၚ်တဲပိဏ္ဍပါတ် အဲဍိက် မွဲဟာန်ကေုာံခမဳထေရ်ဇၞော်ဂမၠိုၚ်ညိ” ရဴဝွံ ဂရၚ်ပတီ တဳလပိုဉ်သုဓမ္မရ။
ပ္ဍဲအခိၚ်ဂှ် တဳလပိုဉ်သုဓမ္မဂှ် “သမ္ၚေဟ်စိတ္တဝွံ ဇၟာပ်အခိၚ်မဘိက်နိမန် သၚ်ကီု ဂိုဏ်ကီု ပူဂိုလ်ကီုဂှ် ကိုပ်ကၠာတေံ သီုဟွံဂရၚ်ပတီ အဲဂှ် ဟွံဘိက်နိမန်ဖိုလ် ပ္ဍဲအခိၚ်လၟုဟ် ဘိက်နိမန်ရ၊ လၟုဟ် သမ္ၚေဟ်စိတ္တတွံ လီုလာ်အာရ၊ ဟွံမွဲကဵုသဘဴပွမသ္ၚေဝ်မဲ ပ္ဍဲလတူအဲရ၊ ဟွံမွဲကဵုသဘဴ ပွမဍုက်ကေဝ်ရ” ရဴဝွံ (ပၠုပ်စိုတ်တုဲ) “ယွံသမ္ၚေဟ် ဒေါံရ၊ အဲဟွံဒုၚ်တဲရ” ရဴဝွံ သ္ဂးကဵု သမ္ၚေဟ်စိတ္တရ။
မရနုက်ကဵုၜါဝါလေဝ် ။ ပ ။ မရနုက်ကဵုပိဝါလေဝ် သမ္ၚေဟ်စိတ္တဂှ် “ယွံတဳလပိုဉ် တဳလပိုဉ်ဂှ် တၞဟ်နသွက်တ္ၚဲယး ဩဝ်ဒုၚ်တဲ ပိဏ္ဍပါတ်အဲဍိက် မွဲဟာန်ကေုာံခမဳထေရ်ဇၞော်ဂမၠိုၚ်ညိ” ရဴဝွံ ဂရၚ်ပတီ တဳလပိုဉ်သုဓမ္မရ။ ယွံသမ္ၚေဟ် ဒေါံရ၊ အဲဟွံဒုၚ်တဲရ ရဴဝွံ သ္ဂးကဵု သမ္ၚေဟ်စိတ္တရ။ ပ္ဍဲအခိၚ်ဂှ် သမ္ၚေဟ်စိတ္တဂှ် “တဳလပိုဉ်သုဓမ္မ ဒုၚ်တဲကဵုဒှ် ဟွံဒုၚ်တဲကဵုဒှ် ပသာ်ကြက်သ္ပကုအဲရော?” ရဴဝွံ လ္ၚောဝ်သ္ပဝတ် တဳလပိုဉ်သုဓမ္မတုဲ သ္ပရှ်ေသှ်ေရဴဂဴတုဲမ္ဂး ပါဲစ္ဍးအာရ။
၃၄။ ပ္ဍဲကြဴနူဂှ် နမကလိလောန်အာဗတမ်ဂှ် သမ္ၚေဟ်စိတ္တ ကဵုစဳရေၚ်စၞအာဟာရဘောဇိုန်မပြဲ သွက်ခမဳထေရ်ဇၞော်ဂမၠိုၚ်ရ။ ပ္ဍဲအခိၚ်ဂှ် တဳလပိုဉ်သုဓမ္မဂှ် “ဂွံသ္ၚေဝ်ရံၚ်ပိဏ္ဍပါတ် သမ္ၚေဟ်စိတ္တ မစဳရေၚ်လဝ် သွက်ခမဳထေရ်ဇၞော်ဂမၠိုၚ်မ္ဂး ခိုဟ်သန်ရ” ရဴဝွံ (ပၠုပ်စိုတ်တုဲ) ပ္ဍဲအခိၚ်နူဂယး သၠောံရုၚ်လတက်ပဠေဝ်သ္ၚာတုဲ ဂိုၚ်ကေတ်ဗဗေၚ်သ္ၚာ က္ညပြာပ်စဴအာ သ္ၚိသမ္ၚေဟ်စိတ္တတုဲမ္ဂး ဂဇအ်ဒၟံၚ် ပ္ဍဲသၞာမလးပညပ်လဝ်ရ။ ပ္ဍဲအခိၚ်ဂှ် ပြာပ်အာဇရေၚ် တဳလပိုဉ်သုဓမ္မတုဲ လ္ၚောဝ်သ္ပဝတ်တုဲမ္ဂး သမ္ၚေဟ်စိတ္တ မဂယအ်ဒၟံၚ်ပ္ဍဲဒၞာဲမွဲဂှ် “ယွံသမ္ၚေဟ် စၞအာဟာရဘောဇိုန် တၠအဲစဳရေၚ်လဝ်ဝွံတုန် ဂၠိုၚ်ဂၠၚ်ကွေံရ၊ ၜိုန်ဂှ် ပ္ဍဲစၞအာဟာရမဂၠိုၚ်ဂၠၚ်ဝွံ ကွာၚ်လ္ၚဴပေတ်မွဲဂကူတုန် ဟွံပါ ဟွံမွဲရ” ရဴဝွံ တဳလပိုဉ်သုဓမ္မ ဟီုသ္ဂးရ။
ယွံတဳလပိုဉ် ရတ်မဒှ်ဂလာန်ကျာ်မဂၠိုၚ်ဂၠၚ် သီုမၞုံတဴဂှ် တဳလပိုဉ် ဂလာန်ဝါတ်ခါဲ မတွံဂး ကွာၚ်လ္ၚဴပေတ်ဟေၚ် ဟီုသ္ဂးတဴရသွံ။
ယွံတဳလပိုဉ် ကေၚ်ဒှ်ကၠုၚ်ကိုပ်ကၠာတေံတုန် သၟာဗၞိက်ကောန်ညးဒက္ခိဏပထရးဂမၠိုၚ် သွက်ဂွံကူသာန် အာတဴ ဇနပိုဒ်ဗၟံက်အိုတ်ရ၊ သၟာဗၞိက်ကောန်ညးဒက္ခိဏပထရးဂမၠိုၚ်ဂှ် စာၚ်ၝောံမဂပ်ဝ်ရၚ်တၠုၚ်နၚ် နူဇနပိုဒ်ဗၟံက်ဂှ် ပံၚ်ဖက်ကေုာံခ္ဍာ်တုဲ ၜံၚ်သၠးတိတ်ကၠုၚ် ကောန်စာၚ်ရ၊ ယွံတဳလပိုဉ် ကောန်စာၚ်ဂှ် အခိၚ်မမိက်လရိုအ်ဂြဴရမျာၚ်ခ္ဍာ်ဂှ် အက်အက်အော် ရဴဝွံ ဗြုတိတ်ရ၊ အခိၚ်မမိက်ဂြဴရမျာၚ်စာၚ်ဂှ် အံက်အေဝ်အေဝ်အက် ရဴဝွံ ဗြုတိတ်ရ၊ ယွံတဳလပိုဉ် တုပ်သၟဟ်သာ်ဝွံဟေၚ် ရတ်မဒှ်ဂလာန်ကျာ်မဂၠိုၚ်ဂၠၚ် သီုမၞုံတဴဂှ် တဳလပိုဉ်ဂှ် ဂလာန်ဝါတ်ခါဲမတွံဂး ကွာၚ်လ္ၚဴပေတ်ဟေၚ် ဟီုသ္ဂးတဴရသွံ ရဴဝွံ (ဂရၚ်ပတီရ)။
ယွံသမ္ၚေဟ် တၠအဲ တ္ၜေဟ်လက်အဲရ၊ ယွံသမ္ၚေဟ် တၠအဲ လဗပ်ပကီုဟီုစုတ် ကဵုအဲရ၊ ယွံသမ္ၚေဟ် ဘာဝွံ ဘာတၠအဲရ၊ အဲစ္ဍးအာရ ရဝွံ (ဟီုသ္ဂးရ)။
ယွံတဳလပိုဉ် အဲဍိက် ဟွံတ္ၜေဟ်လက် တဳလပိုဉ်ရ၊ ဟွံလဗပ်ပကီုဟီုစုတ်ရ၊ ယွံတဳလပိုဉ် တဳလပိုဉ်ဂှ် ဩဝ်သ္ပဒတဴ ပ္ဍဲဥဒျာန်ဂြိုပ်ပကံက် (ဂအဳဗ္စး) မထေက်ကဵုမိပ်လဟိၚ် ဇရေၚ်ဇနပိုဒ် မစ္ဆိကာသဏ္ဍညိ၊ အဲဍိက် ကြက်ပတိတ်ဒြဟတ် နကဵုသ္ၚာ ပိဏ္ဍပါတ် ဘာ ဂဥုဲမဒှ်ကြိဗာပၟၚ်ပၟဲလမျီု မစှေ်စးကဵုယဲဂမၠိုၚ် ကုတဳလပိုဉ်ရ ရဴဝွံ (ဂရၚ်ပတီရ)။
မရနုက်ကဵုၜါဝါလေဝ် ။ ပ ။ မရနုက်ကဵုပိဝါလေဝ် တဳလပိုဉ်သုဓမ္မဂှ် “ယွံသမ္ၚေဟ် တၠအဲ တ္ၜေဟ်လက်အဲရ၊ ယွံသမ္ၚေဟ် တၠအဲ လဗပ်ပကီုဟီုစုတ် ကဵုအဲရ၊ ယွံသမ္ၚေဟ ဘာဝွံ ဘာ တၠအဲရ၊ အဲစ္ဍးအာရ ရဴဝွံ ဟီုသ္ဂးကဵုသမ္ၚေဟ်စိတ္တရ။
ယွံတဳလပိုဉ် တဳလပိုဉ်ဂှ် မုရဴဌာန်မွဲ က္ညအာရော? ရဴဝွံ (ဂရၚ်ပတီသၟာန်ရ)။
ယွံသမ္ၚေဟ် သွက်ဂွံဗဵုလ္ၚောဝ် တဳလမၞုံပိုဉ်ကျာ်တြဲ အဲအာဍုၚ်သာရဝှ်ရ ရဴဝွံ (သ္ဂးရ)။
ယွံတဳလပိုဉ် ဒှ်သာ်ဂှ်မ္ဂး ဂလာန်ဗၞတ်အဲဍိက်ကဵုတဳလပိုဉ် ဂပ်ဝ်ဟီုသ္ဂးအိုတ်သီုဂှ် ဩဝ်ဂရၚ်ပတီ ကုတဳလမၞုံမပိုဉ်ကျာ်တြဲညိ၊ ယွံတဳလပိုဉ် တဳလပိုဉ် ဒးကလေၚ်ကၠုၚ် ဇနပိုဒ်မစ္ဆိကာသဏ္ဍ မွဲလှေ်ပၠန်ဂှ် ဒှ်အရာ ဒးအမ်သဝ်ဟွံသေၚ်ရ ရဴဝွံ (ဂရၚ်ပတီရ)။
၃၅။ ပ္ဍဲအခိၚ်ဂှ် တဳလပိုဉ်သုဓမ္မ လပှ်သီဂိုၚ်ဒေပ် ဘာသၞာသတိက်သၞာဒၟံၚ်တုဲ ဂိုၚ်ကေတ်ဗဗေၚ်သ္ၚာတုဲမ္ဂး စ္ဍးအာဍုၚ်သာရဝှ်ရ၊ ဗွဲလၟေၚ်လၟေၚ် ပြာပ်အာဘာဇေတဝန် မဒှ်အာရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ် ဇရေၚ်တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ် တဳလမၞုံပိုန်ကျာ်တြဲ ဂဇအ်ဒၟံၚ်ပ္ဍဲဒၞာဲမွဲတုဲမ္ဂး ဂလာန်ဗၞတ်ဇကုကဵုသမ္ၚေဟ်စိတ္တ မဂပ်ဝ် ဟီုသ္ဂးအိုတ်သီုဂှ် ဂရၚ်ပတီ ကုတဳလမၞုံပိုဉ်ကျာ်တြဲရ။
တဳလမၞုံပိုဉ်ကျာ်တြဲ မပတၠပိုဉ်တြဲပြကာ ဟီုဂရိုဟ်ရ၊ “ဟွံထေက်ကုတြုံ မလ္ၚုသၟး (နူမဂ်ဖိုလ်) ရ၊ ဟွံဗဗွဲရ၊ ဟွံသပ္ပါယ်ရ၊ အာကာရအရာခမဳတအ် ဟွံသေၚ်ရ၊ ဟွံဂပ်ဝ်ရ၊ ဟွံထေက်ကဵုသ္ပရ၊ ယွံတြုံမလ္ၚုသၟး (နူမဂ်ဖိုလ်) တၠအဲဂှ် မုဟိုတ် တ္ၜေဟ်လက် သမ္ၚေဟ်စိတ္တ မၞုံကဵုဓရ်သဒ္ဓါ မလျုၚ်ဇြုၚ်သ္ဍိုက် မလေပ်ကဵုဒါန် မလေပ်သ္ပ (ဝေယျာဝစ္စ) မလေပ်ကၠောန်ၜိုတ်သၚ် နကဵုဂလာန်မယုတ်မာရော? ပျုတ်ဗ္ဒေက် နကဵုဂလာန်မယုတ်မာရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲ သ္ပဒးဝွံ) ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ တွံကဵုဂလာန်ဓရ်တုဲမ္ဂး ယွံခမဳတအ် ဒှ်သာ်ဂှ်မ္ဂး သၚ် ဩဝ်သ္ပပဋိသာရဏဳယကမ် ကုခမဳသုဓမ္မ ရဴဝွံမ္ဂး “တၠအဲ ဒးကဵုသမ္ၚေဟ်စိတ္တ အေၚ်ဒုၚ်ရ” ညိ ရဴဝွံ သ္ဂးကဵုခမဳဂမၠိုၚ်ရ။
ယွံခမဳတအ် ရဴဝွံ ဒးသ္ပရ၊ ဗွဲကိုပ်ကၠာ ဒးစောဒနာ ခမဳသုဓမ္မရ၊ စောဒနာတုဲ ပ္ဍဲကြဴ ဒးကဵုဗှ်ဗၞုဟ်ရ၊ ကဵုဗှ်ဗၞုဟ်တုဲပ္ဍဲကြဴ ဒးပတိုန်အာပတ်ရ၊ ပတိုန်အာပတ်တုဲပ္ဍဲကြဴ ခမဳ စဳကၠးဆိုက်ဗ္ဒက်တုဲ မၞုံကဵုအစောံသတ္တိဂှ် သ္ဒးကဵုသၚ်တီရ။
၃၆။ “ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳသုဓမ္မဝွံ တ္ၜေဟ်လက် သမ္ၚေဟ်စိတ္တ မၞုံကဵုဓရ်သဒ္ဓါ မလျုၚ်ဇြုၚ်သ္ဍိုက် မလေပ်ကဵုဒါန် မလေပ်သ္ပ (ဝေယျာဝစ္စ) မလေပ်ကၠောန်ၜိုတ်သၚ် နကဵုဂလာန် မယုတ်မာရ၊ ပျုတ်ဗ္ဒေက် နကဵုဂလာန်မယုတ်မာရ၊ ကမ်မၞုံကဵုအခိၚ်မဗဗွဲ ကုသၚ် ယဝ်ဒှ်မ္ဂး၊ သၚ် သ္ပပဋိသာရဏဳယကမ် ကုခမဳသုဓမ္မ ရဴဝွံမ္ဂး ‘တၠအဲ ဒးကဵုသမ္ၚေဟ်စိတ္တ အေၚ်ဒၚ်ရ’ ဣဝွံတုန် ပွမကဵုတီရောၚ်။
ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳသုဓမ္မဝွံ တ္ၜေဟ်လက် သမ္ၚေဟ်စိတ္တ မၞုံကဵုဓရ်သဒ္ဓါ မလျုၚ်ဇြုၚ်သ္ဍိုက် မလေပ်ကဵုဒါန် မလေပ်သ္ပ (ဝေယျာဝစ္စ) မလေပ်ကၠောန်ၜိုတ်သၚ် နကဵုဂလာန် မယုတ်မာရ၊ ပျုတ်ဗ္ဒေက်နကဵုဂလာန်မယုတ်မာရ၊ သၚ်သ္ပပဋိသာရဏဳယကမ် ကုခမဳသုဓမ္မ ရဴဝွံမ္ဂး ‘တၠအဲ ဒးကဵုသမ္ၚေဟ်စိတ္တ အေၚ်ဒၚ်ရ’၊ ယြဴကုတဳလပိုဉ်မွဲ သ္ဍိုက်မၠိုက် ပွမသ္ပပဋိသာရဏဳယကမ် ကုခမဳသုဓမ္မ ရဴဝွံမ္ဂး ‘တၠအဲ ဒးကဵုသမ္ၚေဟ်စိတ္တ အေၚ်ဒုၚ်ရ’ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
မရနုက်ကဵု ၜါဝါလေဝ် ဟီုသ္ဂးဟိုတ်ဂှ်ရ ။ ပ ။ မရနုက်ကဵုပိဝါလေဝ် ဟီုသ္ဂးဟိုတ်ဂှ်ရ။ ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳသုဓမ္မဝွံ တ္ၜေဟ်လက် သမ္ၚေဟ်စိတ္တ မၞုံကဵုဓရ်သဒ္ဓါ မလျုၚ်ဇြုၚ်သ္ဍိုက် မလေပ်ကဵုဒါန် မလေပ်သ္ပ (ဝေယျာဝစ္စ) မလေပ်ကၠောန်ၜိုတ်သၚ် နကဵုဂလာန် မယုတ်မာရ၊ ပျုတ်ဗ္ဒေက် နကဵုဂလာန်မယုတ်မာရ၊ သၚ်သ္ပပဋိသာရဏဳယကမ် ကုခမဳသုဓမ္မ ရဴဝွံမ္ဂး ‘တၠအဲ ဒးကဵုသမ္ၚေဟ်စိတ္တ အေၚ်ဒုၚ်ရ’၊ ယြဴကုတဳလပိုဉ်မွဲ သ္ဍိုက်မၠိုက် ပွမသ္ပပဋိသာရဏဳယကမ် ကုခမဳသုဓမ္မ ရဴဝွံမ္ဂး ‘တၠအဲ ဒးကဵု သမ္ၚေဟ်စိတ္တအေၚ်ဒုၚ်ရ’၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။
သၚ် ဂပ်ဝ်သ္ပပဋိသာရဏဳယကမ် ကုခမဳသုဓမ္မ ရဴဝွံမ္ဂး ‘တၠအဲ ဒးကဵုသမ္ၚေဟ်စိတ္တ အေၚ်ဒုၚ်ရ’ တုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ ရဴဝွံ သ္ဂးရ)။
