Recommendation By - Mukund Marathe, Theater Veteran
प्रति,
कार्यक्रम समिती,
विषय: “अवघा रंग एकचि झाला” या संगीत नाटकाच्या सादरीकरणासाठी शिफारस
महाराष्ट्र मंडळ बे एरिया निर्मित, डॉ. मीना नेरुरकर लिखित आणि शीतल डोळस दिग्दर्शित "अवघा रंग एकचि झाला" हे नाटक आपल्या येथे जरूर व्हावं यासाठी मनापासून शिफारस करण्यासाठी हे पत्र लिहीत आहे.
बे एरियात नुकताच ह्या नाटकाचा भव्य प्रयोग पाहायला मिळाला. पडदा उघडताच एका जुन्या वाड्याच्या सेटने डोळे दिपवून टाकले आणि काहीतरी सुंदर सादरीकरण बघायला मिळणार याची खात्री झाली. वाड्याच्या खोल्या, कठडे, पायऱ्या, नक्षीदार कमानींनी नटलेली दारं, तुळशी वृंदावन, मखरात मंद प्रकाशात उभी विठोबाची मूर्ती, मोजकंच पण जुन्या काळाची आठवण करून देणारं फर्निचर, या सगळ्या गोष्टी दिग्दर्शक आणि सर्व टीम यांचं बारीकसारीक बाबींकडे किती काटेकोर लक्ष आहे याची जाणीव करून देत होतं.
डॉ. मीना नेरुरकर यांच्या सिद्धहस्त लेखणीतून उतरलेली ही तीन पिढयांची कहाणी. पारंपारिक कीर्तनकार वडील, त्यांचा नवीन संगीतावर प्रभुत्व असलेला मुलगा, मुलाच्या आणि वडिलांच्या वैचारिक तफावतीमुळे ओढली जाणारी आई, आणि वडिलांचा संगीत नाटकात काम करणारा मित्र अशी मोजकी पात्र पहिला अंक खुलवतात. वडिलांना वाटत असतं की आपल्या मुलानं आपली कीर्तनाची परंपरा पुढे चालू ठेवावी. मुलाला ती पारंपारिक कीर्तनं नव्या पिढीला ऐकावीशी वाटतील, गावीशी वाटतील म्हणून त्यांना नव्या चालींनी सजवावं असं वाटतं. वडिलांना हे नवं संगीत रुचत नाही आणि त्यातूनच वादाला सुरुवात होते. त्यानंतर त्यांच्याकडे अमेरिकेतून पारंपारिक कीर्तन शिकायला एक लहान मुलगी येते आणि पहिला अंक संपतो. दुसऱ्या अंकात ही शिकायला आलेली मुलगी गाणं शिकता शिकता सगळ्यांशी मैत्री करते, त्यांना लळा लावते, तिला येणाऱ्या वेस्टर्न म्युझिकची ओळख करून देते.
संगीत हा या नाटकाचा आत्मा आहे. सर्व कलाकार आणि साथीदार यांनी संगीताची बाजू अतिशय समर्थपणे पेलली आहे. त्यात मुलगा (अमोल परांजपे) आणि नात (शलाका डोळस) यांचं भारतीय तसेच पाश्चिमात्य संगीतावर असलेलं प्रभुत्व केवळ थक्क करून सोडणारं आहे. विशेषतः शलाका ही अमेरिकेत वाढलेली मुलगी आहे ह्यावर विश्वास बसणार नाही इतकी तिची तयारी आहे.
शीतल डोळस यांचं दिग्दर्शन खूप प्रभावी आहे. कलाकारांबरोबरच पडद्यामागील मोठ्या टीमची सांगड घालून हे शिवधनुष्य त्यांनी समर्थपणे पेललं आहे. भारतातून येणाऱ्या कुठल्याही नाटकाच्या तोडीस तोड अशी ही कलाकृती आहे. आपल्या अमेरिकेत ह्या दर्जाचं नाटक होऊ शकतं हे आपल्या येथील प्रेक्षकांना कळावं, त्यांना ते अनुभवता यावं यासाठी ह्या नाटकाचा प्रयोग आपल्या येथे होणं गरजेचं आहे.
ह्या नाटकाच्या प्रस्तावाचा आपण जरून विचार करावा अशी नम्र विनंती करतो.
आपला,
मुकुंद मराठे
संस्थापक, कॅलिफोर्निया आर्ट्स असोसिएशन (CalAA)
(सांस्कृतिक कार्यकर्ता, नाट्यप्रेमी, आणि ‘BMM मानाचा मुजरा’ गौरवान्वित)
