傳統街市

雖然大橋街市嘅蔬菜價錢偏高，不過佢地所賣嘅蔬菜種類比起一般街市較多，你可以喺呢度搵到一啲唔常見嘅蔬菜(例如 冰菜、各種唔同嘅菇類)，呢個亦都係價錢偏其他菜市場高嘅原因之一。

而呢度嘅海鮮種類較多，平價同貴價海鮮都一應俱全，絕對係元朗區海鮮愛好者嘅首選街市。

另外，每年中秋前，大橋街市更加會變身成為打卡勝地——燈籠街，推介街坊前往選購傳統又美觀嘅燈籠，為節日增加一點色彩。

同益街市係一個比較傳統嘅街市。地下主要售賣海鮮同鮮肉，蔬果乾貨商戶設於一樓，格局分明。

地下海鮮檔被推廣為平價海鮮集中地，各位慳媽千祈唔好錯過。

由於鄰近由多個菜檔形成嘅元朗新街街市，生意被分薄，形成相對冷清嘅環境，適合寧靜休閒式嘅採買。

由菜檔、水果檔、麵包鋪、茶記形成嘅街道自然地成為一個小型街市。呢個係由朗天出發最近嘅街市仔，為於元朗廣場後嘅天橋下面。收工時段出售嘅特價蔬菜，更加會出現一番搶購潮。

呢條街道多年嚟都係售賣鮮菜鮮肉，相信係元朗最多人去嘅街市。種類繁多，包括蔬菜、水果、鮮肉、凍肉、鮮食、熟食、家禽、鮮花、雜貨、海味，小小街道，但所有食品用品都應有盡有！