作者紹介
作者紹介
Embedded Files
逐家好！阮是這本冊的作者，是三个國立臺中教育大學台灣語文學系的學生。
阮系的課程蓋多元、豐富，系上除了有行大甲媽、燒王船的民俗活動通參與，而且閣有真濟體驗台灣文化、學習台灣語言的課，這四冬的學習毋但予阮對台灣有閣較深的認捌，嘛予阮的大學生活過甲特別精采。
創作起源
創作起源
其實會想著用lia̍p-mī-ang-á做主題的原因真簡單，就是因為有一位組員定定會去彰化鹿港tshit-thô。
當當阮三个想袂出來會使做siánn-mih來當作畢業作品、而且閣愛有台語系特色的時陣，伊就雄雄想著lia̍p-mī-ang-á這个台灣傳統藝術。
因為誠少聽著有關lia̍p-mī-ang-á的推廣，阮才決定用lia̍p-mī-ang-á來做阮繪本的主體，希望看著這本繪本的gín-á抑是大人，會使閣較熟似lia̍p-mī-ang-á！予這項充滿趣味性、非常有意義的台灣傳統藝術，繼續傳承落去。
是按怎選擇兔仔做主角？
是按怎選擇兔仔做主角？
一開始設想的時陣，阮是對十二生相做出發點。阮決定主題的時陣是2023年，tú-hó輪著兔仔，嘛因為兔仔和十二地支中的「卯」對應，「卯」表示春意，代表黎明，充滿無限的生機。所以阮希望會使透過這本繪本予lia̍p-mī-ang-á這項傳統技藝閣一擺展現伊的風采。
一定愛親手做一擺lia̍p-mī-ang-á !
一定愛親手做一擺lia̍p-mī-ang-á !
因為阮是以lia̍p-mī-ang-á做主題，所以有揣這馬猶閣leh創作lia̍p-mī-ang-á的店面，親身體驗做lia̍p-mī-ang-á的趣味！
老師tsi̍t pōo tsi̍t pōo教阮欲按怎做，有簡單的pōo-hūn嘛有困難的所在。佇lia̍p的過程中，阮嘛感受著家己無可能捏出和老師一模一樣的lia̍p-mī-ang-á。毋過無要緊阮認為每一个人的lia̍p-mī-ang-á攏真有家己的特色！每一隻攏是阮用心創作的，伊嘛充滿阮手內的un-tōo。
最後，非常感謝『筑鹿港創意捏麵人』的陳佑筑老師願意予阮訪問！
Page updated
Google Sites
Report abuse