LCYF Thuanthu

A Hramthoknak

Pathian lamhruainak thawngin Lai Christian Fellowship (LCF) cu 2002 December 24 ah rak din thok a si. Pathian ih thluasuahnak ruangah minung kan hnihthum vivo tikah, Pathian thu le a phunphun ah mino pawl pitlin vivonak ding ruahsannak thawn Lai Christian Youth Fellowship (LCYF) cu 2004 January 1 ah rak din thok a si. Cumi ihsin thok LCYF committee ih kaihhruainak thawnin LCF ih mino zate* cu lungrual zet le titheitawk suah in biakinn hrangih a ṭulmi a phunphun ah ṭuanvo la tahrat in hnaṭuannak neih a si.

*LCYF sungtel cu LCF sungtel lak ihsin kum 13 in kum 40 tiang an si.

Committee le Subcommittee

LCYF hruaitu Committee cu 2004 ih a rak din hmaisabik ah minung 21 hril a rak si. Asinan 2009 hnuah cun Committee member 15 in hril a si. Pathian ih zangfahnak thawn mino cangvaihnak remcan le ṭhanso vivonak ding hrangah LCYF Subcommittee pawl dinnak kan rak nei: Pulpit Caanthiah, Fundraising / Financial (atu ah cun himi Subcommittee cu a um nawn lo), le Praise & Worship. Cule 2022 ah cun Media Team tiin group fate tla kan run nei thei a si. Cumi team cu meeting minutes le mino zuk pawl khawlkhawmnak, online post le himi website ra cangsuak dingih tawlreltu le ngaihtuahtu tla an si.

Pathian Biakkhawmnak

Pathian ih kaihhruainak thawn LCYF a rak din thok ihsin July thla a zarh hnihnak cu LCF Mino Ni (LCYF Day) tiin hmannak kan nei ringring. LCYF a din thok ihsin mino khawm zan cu Zarhte zaan si dingin nemhnget a rak si ih tuini tiang hman a si ringring lai.

Asinan 2020 March thla ah Covid-19 ruangih lockdown a um hnu ihsin 2021 March thla tiang khawmnak kan nei nawn lo. Asinan, Pathian ih zangfahnak thawngin March 21, 2021 (Sunday zaan) ah Zoom thawn online in LCYF hruaitu vial khawmnak kan nei thei sal a si. Cule April 11 zaan ihsin LCYF ih hohanak in LCF member zaten sawm in Zoom in online in khawmnak cu kan nei ringring thei. Cule July thla ih committee combine meeting-nak ih kan rel vekin July 31 zaan ihsin mino online Zoom khawmnak cu Zarhte zaan ah si dingin relcatnak kan nei. Cuticun 2022 February tiangin khawmnak kan nei thei ringring a si. 

Asinan, Pathian ih zangfahnak ruangah February 9, 2022 zaan ihsin EC ih rorelnak in lockdown hlan vekin biakinn ah mipum rori feh tahrat in khawmnak cu kan nei thei sal a si; Pathian hmin thangṭhat si ko seh. Sikhalsehla, February 18 ah EC ih emergency meeting vekin online in kan khawm sal lala na'n Pathian ih zangfahnak thawngin April 6, 2022 in biakinn ah mipum rori feh tahrat in kan khawm thei sal ih atui ni tiang cutin kan khawm thei lan a si. Pathian a ṭha. Lungrual zetin hnaṭuan tlangnak le peknak khal ah a hleice in kan ṭhangso; zumnak tiamkam le mino nikhat hlawh khonnak khal ah kan ruah hnakin a let tampi in zumtu unau pawl in Pathian hnaṭuannak an rak nei.

2023 ah cun minung pakhat in committee le subcommittee pahnih ah tel theih si nawn lo dingin general meeting ih thusuak a um ruangah hruaitu tampi thlengawknak a um. Asina'n ziangkim ah Pathian in a ṭha bik in lam in hruai ringring ruangah Pathian hmin kan thangṭhat a si.

Kawlram buainak ruangah member thar khal zarh tin rori in kan nei ih cuti cun mino tampi khal an rung thleng vivo hai. Atu rori ah tla cun hlazir le hnaṭuantlangnak pawl ah mipum tam ngaingai hi Pathian in in hruai khawm hai ruangah lungrual zetin ṭuan tlangnak kan nei ringring thei.

Motto le Logo

Kum tin ten LCYF in Thuken (Motto) kan nei ringring. Kan motto neih dahmi zaten hinah ah zoh theih a si: Click Here. LCYF in kanmah hrangah a hran te'n logo cu 2019 kum cem hnulam ihsin kan run nei thok a si. Hinah ah cumi logo cu download a theih: Download LCYF Logo.

Cangvaihnak Dangdang

LCF ih ṭulhainak a phunphun ah ṭuanvo laknak le zanghleicawinak kan nei ringring a si. A tlangpi thu in a hnuailam vekin cangvaihnak kan nei:

• LCF member dam lo pawl veihvaihnak

• Siat tongtu pawl topinak

• Biakinn kholhnak

• Rawl suan a phunphun suannak

• Ṭhitumnak hrang timlamnak

• Special service le training phunphun

• LCF Full-time pawl thawn komawknak

• LCF Mission hrang sumpai bomnak

• LCF CE vehvaihnak

• Choir le group song pawl saknak

• Gospel team in Fellowship dang pawl tlawnnak

• Gospel sing-song service neihnak

• MCCYF ih telnak (atu cu kan tel nawn lo)

• Retreat fehnak

• Hruaitu vial khawm/zanvar thlacamnak

• Fund hawlnak

• Committee uniform ngaihtuahnak

• Zumnak tiamkam

• LCF camping le crusade ah sumpai bomnak

• MCCAYD ih telnak

• Zaan men hmuak program pawl hruainak

tivek a phunphun ah sumpai in, thazang in, ṭuanvo laknak in, hohanak tivek pawl in cangvaihnak kan nei ringring a si.

Kan Dinnak San

• LCYF cu LCF EC hnuaiih um a si. EC kaihhruainak hnuai ah Pathian hnaṭuan in cangvaihnak a nei pei.

• Mino pawl Pathain thu le hla lam ih ṭhansoter ding.

• Pawlkomnak ah Khristian nuncan mawi langter ding.

• Ṭuansuaktu le mi hlawhtling va siter ding.

• Thuthangṭha karhzaiter ding.

• Siat ni ṭhat ni ah ṭhahnemngai in mi va bawm ding.