Samþætting

Samþætting

Í viðfangsefnum og aðferðum námsgreina eru nemendur að fræðast um allt frá nærumhverfi sínu yfir í fjarlæg heimshorn eða allt frá víðáttum geimsins til efnisagna sem tilheyra örheimi okkar. 

Í nútíma samfélagi þá eru verkefnin sem við þurfum að takast á við í daglegu lífi ekki klippt og skorin. Það getur verið erfitt að sundurgreina eitt frá öðru því eru þau iðulega samofin mörgum þáttum. Í skólastarfi sem fram fer í grunnskóla  þá erum við að undirbúa nemendur okkar fyrir framtíðina þar sem þeir þurfa að geta tekist á við ýmiskonar verkefni í sínu lífi hvort sem það er við nám eða störf. 

Þegar skólastarf er skipulagt er gott að hafa þessa þætti í huga það er að huga að áherslu á samþættingu námsgreina þar sem verkefni sem nemendur eru að vinna með hafi snertifleti við sem flestar námsgreinar. Með því að stuðla að samþættingu þá má nálgast það markmið að gera námið merkingarbærara fyrir nemendur og gera þeim kleift að skilja samhengi fræðigreina (Aðalnámskrá grunnskóla, 2011, bls. 53). 

Við undirbúning/vinnu kennsluáætlana fyrir námsgreinar þar sem samþætting er höfð að leiðarljósi er gott að hafa í huga að hafa að stundum vilja markmiðin týnast þegar margar námsgreinar eru samþættar. Í Læsi fyrir lífið er áherslan á að samþætta alla þætti læsis inn í sem flestar námsgreinar. Við áætlanagerð getur verið gott að styðjast við t.d. vennkort eða krossáætlun til að skýrt sé hvaða markmið tilheyra hverri námsgrein og hvar fléttast þessi markmið saman. 

Í handbókunum Að mörgu er að hyggja (Ingvar Sigurgeirsson, 1999) og Fagleg kennsla í fyrirrúmi (Hafdís Guðjónsdóttir o.fl., 2005) má fræðast meira um samþættingu námsgreina. Þessar bækur eru einkar vel upp settar og aðgengilegar handbækur kennara við undirbúning kennsluáætlana.