مقالات حول صعوبات التعلم

كلامنا النهاردة هيكون على اكتر حاجه مغلبانا ومبهدلانا فى شغلنا مع ولادنا .. وهي الذاكرة

. قبل ما نقول المشاكل اللى ممكن تواجهنا فى موضوع الذاكرة دة . محتاجين الاول نعرف هى ايه الذاكرة وايه الخطوات اللى بتمر بيها عشان نفهم طريقه عملها من البدايه الى مرحله الاستدعاء او التذكر وهنا بتكون المشكله ...

.

الذاكرة بمنتهي البساطه هي : مهاره كأى مهاره يمكن جدا تنميتها بالمران ومع التوجيه السليم, والذاكره ليست الا مستودعا للمعلومات وبالنسبه للبشر فإنها منظومه لمعالجه المعلومات قبل تخزينها ..

.

الكلام ده كدة نقدر نقول احنا عرفنا بيه الذاكرة ..

طب عايزين نعرف هي بتشتغل ازاى او ايه مراحلها .. هنعرف اهو ..

المرحله الاولى . استقبال الحاسه للمثير :: يعني الواحد لما يشوف صوره او يسمع كلمه او يحس بحاجه على جسمه مثلا

المرحله التانيه : معالجه المثير :: يعني بنفسر المثير دة وبنحاول نتعرف عليه ونفهمه

المرحلة التالته : التخزين :: فى المرحله دى بقى بنعمل زي فولدر جديد ف دماغنا علشان نحتفظ بالمعلومه او المثير اللى دخل ده .. او بنشوف المثير دة زي ايه من الحاجات اللى احنا مخزنين زيها وبنحطها معاه ,, يعني مثلا لو حيوان جديد اتعرفنا عليه اكيد مش هنعمله فولدر خاص بيه .. بس هنحطه فى فولدر الحيوانات اللي عندنا

اخر مرحله هى الاستدعاء :: وفى المرحله دى بقى اللى لما نتسأل عن الحيوان اللى احتفظنا بيه بنقدر نسترجعه ونوصفه او نتكلم عنه . يعني من الاخر بستخدم الحاجه اللى احتفظت بيها ف وقتها ومكانها ...

.

لما لقيت البوست طويل قولت الافضل انى اعمل بوست منفصل للانشطه وازاى اقدر اشتغل على الذاكره وامرنها كويس

دة فى البوست الجاى على طول

بس كان لازم نفهم الكلام ده علشان نعرف نشتغل على الذاكرة صح

#كلاكيع_صعوبات_التعلم

#محمد_جابر

#اخصائى_صعوبات_تعلم

هنكمل مع بعض الجزء التانى من موضوع الذاكرة ...

.

عندنا انواع عديدة للذاكرة .. بس يهمنا فيهم نوعين او تلاته ( السمعيه - البصريه - المشتركة : وهى اللى بتضم السمعي والبصري مع بعض )

طب نشتغل عليها ازاى دي بقى .....

.

هناخدهم واحدة واحدة ...... وهنبدأ بالسمعيه :::: وبما انها سمعيه يبقى الطفل هيسمع بس ومش هيشوف اى صورة ولا كارت ولا اى حاجه ..

1 - اقول عدد من الارقام والطفل يعيدهم ورايا بنفس الترتيب

2 - اقول عدد من الكلمات والطفل يعيدهم ورايا بنفس الترتيب

3 - وممكن اعمل مزيج من الكلمات على الحروف على الارقام

4 - اقول رقمين والطفل يقولهم بالعكس .. يعني مثلا قولت 2 5 هنا انا عايز الطفل يقولى 5 2 يعني ميقولهمش بنفس الترتيب وممكن يبقوا 4 ارقام او 5 كل دة بيتحدد بناءا على قدرة الطفل

5 - اعمل عدد معين من الخبطات على الترابيزة او بالتصفيق وهو يعمل نفس العدد

6 اعمل ايقاع او نغمه معينه بالخبطات على الترابيزة ( خبطتين - خبطه - خبطتين - 3 خبطات ) دة على سبيل المثال

طب دي كدة بعض اشكال للتدريب على الذاكرة السمعيه

.. فى شويه ملاحظات لازم نفهمها ....

- عادى جدا لما الطفل ميعرفش يعمل النشاط فى البدايه لانه لو بيعرف مكناش عملناه اصلا

- عادى جدا انه يتلغبط كتير .. كدة هو مش طفل غبي لا هو لسه ذاكرته مش قويه كفايه

- عادي جدا لما ينسى كلمات او حروف ماحنا قولنا هو لسه فى مرحله التدريب

.

واحدة واحدة مع الاطفال .. احنا بندرب مش بنختبر يعنى نفضل ندرب الى ان تظهر النتيجه .. وهتظهر ان شاء الله

البوست الجاى هنتكلم عن الذاكرة البصريه علشان البوست يبقى خفيف وصغير ومحدش يزهق مننا

دة لينك البوست الاول https://www.facebook.com/photo.php?fbid=373274763501545&set=a.193301611498862&type=3&theater

.

#كلاكيع_صعوبات_التعلم

#محمد_جابر

#اخصائى_صعوبات_التعلم

اخر حتة هنتكلم فيها عن الذاكرة ...

للتذكير ...

- فى اول بوست اتكلمت عن الذاكرة ومراحل عملها ..

- فى البوست التاني اتكلمت على نوع من انواع الذاكرة وهو الذاكرة السمعيه وذكرت بعض الانشطه الخاصه بيها .

وفى البوست دة هنتكلم عن الذاكرة البصريه وبعذ الانشطه الخاصه بيها ....

.

1 - اعرض صور على الطفل دون ذكر اسمهم واخبيهم والطفل يقولى هو شاف ايه

2 - ممكن اعرضهم مجسمات مش شرط صور بس وبرضو اخبيهم واقول للطفل انت شوفت ايه ؟

3 - عرض صور على الطفل .. واحطهم وسط صور تانيه .. والطفل عليه يطلع الصور اللى شافها فى العرض بس ويسيب التانيين

4 - طب لو الطفل مهاراته عاليه شويه وبيقرا ويكتب .... يبقى اخليه يقرا بعض اسامي الحيوانات بيعينه فقط ميطلعش صوت يعني ... وبعد كدة اخليه يجيب صور الحيوانات اللى قرأها من وسط حيوانات كتير

5 - ممكن العكس بقى يشوف الصور ... ويجيب مجموعه كلمات الاسامي للصور دي

6 - اعرض على الطفل صوره فيها اشياء كتير وبعد كدة اشيلها واخليه يتذكر الاشياء اللى شافها فى الصور

7 - اخليه يقرا كلمه .. واكون كاتب الحروف على بطاقات ورق .. ويروح يجيب حروف الكلمه فقط من وسط حروف كتير

.

الذاكرتين دول لما يشتغلوا كويس ان شاء الله .. يبقى الطفل مش هينسي الحروف ولا الارقام ولا معانى الكلمات ولا الدرس اللى سمعه ولا اللى قراه ولا هينسي الامر اللى اخده من بابا او ماما او من المدرسه بتاعته

دة لينك البوست الاول من الذاكرة : https://www.facebook.com/permalink.php?story_fbid=373274810168207&id=100024570742055&comment_tracking=%7B"tn"%3A"O"%7D

دة لينك البوست التانى : https://www.facebook.com/permalink.php?story_fbid=373783113450710&id=100024570742055&comment_tracking=%7B"tn"%3A"O"%7D

#كلاكيع_صعوبات_التعلم

#محمد_جابر

#أخصائي_صعوبات_تعلم

شويه حاجات كدة بنعرف بيها الطفل اللى عنده صعوبة فى التحصيل الدراسى :

ــــــــــــــــــــــــــــــــــــــــــــــــــــــــــــــ

• الحاجات اللى بتظهر فى القراءه :

- يصعب عليه ربط الصوت بالحرف

- يعكس الاحرف

- لا يقرا بطلاقه

- يستخدم اصابعه بشدة لتتبع المادة التي يقرأها

- يخلط بين الاحرف المتشابهه

- يكرر الاحرف والكلمات

- يستخدم الاحرف فى الكلمه بطريقه غير صحيحه

• الحاجات اللى بتظهر فى الكتابه الكتابه :

- بطئ فى اتمام الاعمال الكتابيه بشكل عام

- يستخدم تعبيرات كتابيه غير ملائمه لعمره

- يصعب عليه نسخ القطع

- الخلط بين الحروف المتشابهه

- الخط لا يقرأ

- ترتيب الكلمه غير صحيح مثل ( علم يكتبها عمل )

ومن خلال الحاجات دي بنعرف ان الطفل محتاج تدخل فردي

.

#كلاكيع_صعوبات_التعلم

#محمد_جابر

#اخصائي_صعوبات_تعلم

بتقابلنا دايما مشكله عكس الحروف .....

.

تلاقى الام بيطلع عينيها والمدرسه بتاعة الواد وفى الاخر يجي يكتبهم مقلوب ....

الموضوع دة اسمه علميا MIRRORING يعني المرايه .. او كتابه المرايه .. يعني ايه بقى الكلام دة ..

الموضوع ده له اكتر من زاويه .. يهمنا فيهم الزاويه التأهيليه ... اللى هى التد ريب يعني

الطفل اللى بيكتب مراية دة فى شويه مهارات ناقصاه .....

.

زي مثلا .. – الاتجاهات .. يا خبر ابيض فعلا موضوع الاتجاهات دة يخلي الولد يكتب بالشقلوب .. اه والله فعلا

طب ايه تاني ممكن يكون من اسباب المراية دى ؟؟

- التشويش اثناء تخزين الحرف او الرقم .. يعنى الطفل وهو بيدخله الحرف دة او الرقم دة مكنش مركز كفايه انه يخزنه صح او يظبط شكل المثير فى دماغة

- التمييز البصرى ( دة جانب من الادراك البصري – النمائي ) طب و دة ماله دة ... اهو بقى دة سبب كل البلاوي دى .. لغبطة الحروف والارقام - شكل الرقم او الحرف – اتجاه الرقم او الحرف – حجم الحرف او الرقم ......... وحاجات تانيه كتير

.

طب العمل ايه بقى مع الولد ::

- الولد لازم يعرف يمينه من شماله

- لازم يعرف كل الاتجاهات على نفسه وعلى غيرة ويكون فاهمها كويس ويكون فاهم ان يمين اللى ادامه يبقى شماله وشمال اللى ادامه يبقى يمينه ( ملغبطه شويه الحته دي .. بس حلوة )

- مهم جدا انه يدخله الحرف او الرقم بطريقه سهله ومافيهاش اى ضغط ويكون محفز انتباهه بدرجه كبيرة تساعده على انه يعرف كويس شكل الرقم

- ومهم جدا جدا جدا جدا العمل على الادراك الحركي ... بطريقه مباشرة

- لازم ومهم جدا ولابد وكل الحاجات اللى بتأكد الاهميه اننا نشتغل على الاداراك البصري وتحديدا التمييز البصري اللى هيساعدنا بدرجه كبيرة جدا على ان الطفل ميتلغبطش بين حروف متشابهه او يقلبها او يحط ةنقطة زيادة او يشيل نقطه وهكذا ....

- دى بقى حته كدة للاخصائيين ( هندخل الحرف دة او الرقم اللى الولد متلغبط فيه فى انشطه نمائيه كتير سواء ادراك سمعي او ادراك بصرى او اى حاجه نقدر نثبت بيها الشكل الصحصح للحرف ومنتعبش نفسنا ونضيع وقت ونفضل نشتغل على الحرف كل شويه )

.

#محمد_جابر

#أخصائي_صعوبات_تعلم