文章

先列教育部推薦用字文件有出現个，因為漢字个寫法卡有一个標準。另外才閣列幾位老師來指教，我整理補充，關係台語煮食个動詞：

1. 煮 tsú 優勢腔 / tsí 漳腔 / tsír 泉腔

2. 炒 tshá -- 「炒米粉」本來是動詞片語，指動作、過程；煮好了後个物件是「米粉炒」。即馬炒米粉嘛指迄項食物。

3. 炊 tshue -- 炊粿、炊粽、炊飯

4. 煎 tsian -- 煎卵、煎魚仔、蚵仔煎

5. 煎 tsuann -- 煎茶、煎藥仔

6. 糋 tsìnn -- 糋甜粿、豆乾糋

7. 炸 tsuànn -- 炸豬油、豬頭皮炸無油

8. 乍 tsànn -- 乍白菜、乍油

9. 炕 khòng -- 炕肉、炕窯

10. 餾 liū -- 餾凊飯，諺語：「九頓米糕無上算[tsiūnn-sǹg]，一碗凊糜抾起來餾」

11. 煏 piak -- 煏豬油、煏豆仔

12. 煠 sa̍h -- 煠卵、煠肉、煠麵

13. 燃 hiânn -- 燃茶

14. 磅 pōng -- 磅米芳

閣來是推薦用字無收个字眼，教育部台灣閩南語常用詞辭典有收袂少：

1. 燖(代用字) tīm -- 燖補、燖卵

2. 燉 tūn -- 燉肉、燉補。即字卡罕用。

3. 焄 kûn -- 焄蕃薯。豬跤箍仔kûn爛爛，枵鬼囡仔流喙瀾。

4. 滷 lóo -- 摻豆油落去煮足久个料理法：滷卵́、滷肉。

5. 滷 lóo -- 另外一種煮予伊出汁抑是牽羹个方法嘛叫做滷：白菜滷、滷麵。

6. 牽 khan -- 牽羹

7. 掜 tau -- 掜粉[tau-hún]了後，才落去糋[tsìnn]。

8. tsa̍h -- 第八聲，無鼻音，意思是無掜[tau]粉，用油糋[tsìnn]。親像「tsa̍h雞、tsa̍h魚」。
   毋知佮推薦用字所收个「乍 tsànn」有精差無？

9. 烰(代用字) phû -- 烰圓仔。蝦仔滒[kō]粉落去烰。

10. 炰 pû -- 炰蕃薯。飯菜煮了，利用灶空內猶閣紅紅个火烌[hu]，將蕃薯擲入去炰。

11. 拊 hú -- 拊魚拊

12. 酥 soo -- 酥魚酥

13. o -- o魚仔，是煎魚个意思。蔡桂珠老師提供，怹大家[ta-ke] 雲林縣土庫鎮馬光厝儂講个。

14. 摼 khiàn -- 摼甜粿。哪煮哪 lā 个料理法。

15. 煡 khi̍t -- 煡甜粿，佮頂面摼甜粿，扑算共款。

16. 芡 khiàn -- 芡芳[phang]、芡油蔥。

17. 熗 tshìng -- 熗油飯、熗蕃薯

18. 翕 hip -- 翕油飯、翕凊飯

19. 燜 būn -- 燜飯 佮 燜油飯 無共款。

20. bāu -- bāu麵，台灣油麵，bāu-bāu咧著通食。

21. 摵 tshi̍k -- 用摵仔 摵麵。名詞搣仔麵，一般攏寫做「切仔麵」，音、義袂通。

22. 封 hong -- 封肉。儂講：三頓封炕鹵[hong-khòng-lóo]。意思是逐三頓攏食高級料理。

23. 烘 hang -- 烘肉、烘鰇魚、烘煙腸[ian-tshiân/tshiâng]、烘pháng

24. 煙 ian -- 煙腸、煙肉、煙臘肉[la̍h-bah]。煙煙咧，鼻著芳貢貢。

25. 熬 gô -- 熬糖膏

26. 煉 liān -- 煉青草仔

27. 煨 ue -- 煨豬跤、煨糜

28. 熥 thn̄g 第七聲，漳音 thuīnn -- 冷去个菜尾，thn̄g予燒才通食。

29. tǹg 第三聲，漳音 tuìnn -- 佮頂面共意思，攏是指加熱冷去个菜。

30. 豉 sīnn -- 豉鹹菜、豉膎[kê]、蔭豉仔[ìm-sīnn-á]

31. 醃 am -- 醃瓜、醃肉

「紅燒」是兩字，無列佇頂面。其他落勾个台語單字煮食个動詞，才請各位閣再指教，感恩。

以下是王昭華小姐共阮牽教个，感謝伊：

「煉」，我是聽教我煮九尾雞的姐仔講的：「九尾草先煉湯煉煉个，才用煉好的湯落去燉雞肉...」。「煉」是煉丹煉藥無毋著，但是像藥草類的料理，湯嘛是用「煉」的。

這字「酥」，佇台語應該是動詞(我無查詞典)，只是這馬逐家攏以為是名詞。我第一个想著的是「蔥頭酥」，蔥頭酥，就是蔥頭落去酥的(袂當講是「炸」，有人講是煏，煏蔥頭酥)；溪哥仔、蝦猴、蝦仔，嘛是用油酥酥个(毋是炸、煎、炒)...按呢想起來，「酥」有可能是油比「炸」下較少，物件較毋成塊的，我想著「排骨酥」佮「鹽酥雞」，咱攏以為是因為食起來酥酥，所以叫「排骨酥」，但應該是「酥」是一種料理方式，就像蚵仔煎的「煎」、米粉炒的「炒」。因為這个詞兼有形容「口感」的意思，而且華語嘛仝義，有可能台語做動詞用的「酥」就無去矣。「拊」魚拊，「酥」魚酥。

以上潘科元老師整理（https://ppt.cc/fSijKx）

台語囡仔歌有一種是「連環謠 liân-khuân-iâu」个形式。簡單个例：

羊仔me-me，愛食番麥

番麥鹹鹹，愛食李鹹

李鹹酸酸，愛食尻川

尻川臭臭，愛食大砲

大砲磅[pōng]一下 死翹翹(khiàu-khiàu)

伊个結構是間插 (kàinn-tshah) 運用「鬥句」佮「頂真」兩種修辭技巧，做成(tsiânn)一環扣一環，袂了袂盡个效果。

另外有一首連環謠嘛真出名，著是「喂(ué)！喂！喂！台灣出甜粿……」，這 google 一下著有。

一直攏唸古早儂个物件嘛無意思。頂學期我用阮班裡一个同學做樣，想出一首新个連環謠。先講寡背景：即个雲林口湖鄉來个海口囡仔生做真媠，儂閣活骨，逐家講伊 是【正妹】（ㄓㄥˋ ㄇㄟ）。【正妹】是台灣即幾年少年儂時派个名詞。照我塊想，【正】是對【正點】來个，【正點】著是媠。【正點】是二、三十冬前个時行話，即馬罕得有儂用， 攏是講一字【正】，台灣華語【正妹】著是台語媠姑娘，請注意【妹】是唸華語第一聲。

讀者攏知影 :-) 我一直想欲恢復台語成做一个「完全」个語言：古早个媠氣話愛抾轉來用；有現代精神个新話嘛愛來創造。愈捷[tsia̍p]用著个意思，愛有愈儕詞來表現出無共程度、風格、態度个koh-iūnn性。除了「媠查某、媠姑娘、美女」即寡舊話以外，我閣借用【正妹】來造一个新詞「正妹」(tsiànn-me)， 「正」我唸白話音 tsiànn，表示是一種口語，「妹」我唸第一聲 me。

是按怎「妹」我唸做 me？「妹」咁毋是唸做 "muē, muāi, bē, bēr" 即幾種音？雖然腔口無仝，毋閣攏是去聲。咱若想卡真，著知影台語「老早」(láu-tsá) 著吸收北京話个親屬稱呼，將「妹」唸做第一聲矣：爸爸 (pa-pa)、媽媽 (ma-ma)、姊姊 (tse-tse)、哥哥 (ko-ko)、弟弟 (ti-ti)、妹妹 (me-me)。遮个外來語毋管伊原底个台語啥乜聲調，台語吸收華語了後，佇遮攏讀第一聲，而且閣有照台語變調个規則，頭前字唸中平調。另外閣有一種講法是 "pá-pah, má-mah, tsé-tsé, kó-koh, tí-tih, mé-meh"，即種講法前後字个調類無共，後字用 -h 第四聲來模擬 (bôo-gí) 北京話个輕聲。

既然華語新話【正妹】个【妹】是第一聲，台語嘛早著吸收「妹」唸第一聲，所以我著按呢予台語加一个外來語「正妹tsiànn-me」。

以上潘科元老師整理（https://ppt.cc/fSijKx）https://blog.xuite.net/khoguan/blog/44065504

台語經典流行歌「望春風」[Bāng tshun-hong]，純純[Sûn-sûn]（本名劉清香）1933 年原唱

李臨秋作詞 Lí Lîm-tshiu tsok-sû

鄧雨賢作曲 Tīng Ú-hiân tsok-khik

獨夜無伴守燈下 to̍k-iā bô-phuānn tsiú ting-ē

冷風對面吹 líng-hong tuì bīn tshe

十七八 未出嫁 tsa̍p-tshit-pueh, bē tshut-kè

見著少年家 kìnn tio̍h siàu-liân-ke

果然標緻面肉白 kóo-liân piau-tì bīn-bah pe̍h

誰家人子弟 suî ke lâng tsú-tē

想欲問伊驚歹勢 siūnn bueh mn̄g i kiann pháinn-sè

心內彈琵琶 sim-lāi tuânn pî-pê

想欲郎君做翁婿 Siūnn bueh liông-kun tsò ang-sài

意愛在心內 ì-ài tsāi sim-lāi

等何時 君來採 tán hô-sî, kun lâi tshái

青春花當開 tshing-tshun hue tng khai

忽聽外頭有人來 hut thiann guā-thâu ū lâng lâi

開門該看覓 khui-mn̂g kai khuànn bāi

月老笑阮戇大呆 gua̍t-ló tshiò gún gōng-tuā-tai

予風騙毋知 hōo hong phiàn m̄ tsai ------

聽講李臨秋个手稿寫「清風對面吹」，但是純純所唱，的確是「冷」，完全聽袂著「清 tshing」个送氣聲母音。

有幾字仔，音聽袂明，像「月老」个「老」，足siâng是 lo̍k 个音。「歹勢」个「歹」一開始有音，漸漸變無鼻音。「等何時」有儂記做「待何時」，我無採用，因為「等」字收尾个所在，是明顯个 -n 鼻音韻尾。

「開門該看覓」个「該 kai」是「共伊 kā i」个合音詞，寫「該」是傳統歌仔冊慣用个借音字。

台語老歌內底，「花開」个「開」有時為著叶韻[hia̍p-ūn]，刁工唱做 khai，佇遮「花當開」照講是「hue tng khui」才是媠氣自然个台語白話，但是為著鬥句，「開」改唸 khai。

伊唱个旋律，有寡所在比當今版較好。像「面肉白」，即馬普遍咧唱，聽起來煞親像「面 麻[bâ#] 白」。總講一句，即个古早版，無論歌詞、字音、旋律，攏佮咱現時真熟个唱法有出入。

總是，我袂因為是原始演唱版，就認定絕對是上蓋正pān、理想个歌詞、呼音、旋律。經典歌謠个傳承，當然會用得用理性來研究、調整，予伊閣較完美。

以上潘科元老師整理(https://blog.xuite.net/khoguan/blog/66810960)