Vicente Goikoetxea Errasti Aramaioko Ibarran jaio zen, 1854ko apirilaren 4an. Zendu, ordea, Valladoliden zendu zen, 1916ko apirilaren 9an.

Musika erlijiosoaren arloan, polifonista klasikoen ondoren, garrantzi handikoa da. Izan ere, bere lanak zabalpen handia izan du munduan zehar.

Notaritza-ikasketak egin bazituen ere, ez zuen sekula horretan lan egin. Apaiz-ikasketak egiteko beharra sentitu zuen eta Gasteizko seminarioan sartzen saiatu zen. Ez zuen lortu eta, hortaz, Valladolidekoan sartu zen.

Musikari dagokionez, esan beharra dago oso berandu hasi zela. Formazio autodidakta eduki zuen, batez ere. Bere irakasle bakanen artean, honako hauek aipa ditzakegu: Jose Maria Abad, Gasteizko San Vicente elizako organu jotzailea, eta Felipe Gorriti. Ikasketa hori hobetzeko, musikagile handien lanak irakurri eta aztertu zituen: Bach, Cesar Franck, Gounod, XVI. mendeko polifonistak, Richard Wagner...