iara, artiste - Paroles

ADINONY

Tovovavy izay, mpianatra iray

No indro tazanay raha nisaodisaody teny izahay

Miandry olona nga na mety ho lehilahy

Fa tsy mitsahatra ny mitazatazana, mierika

Somebiseby ery izany endriny

Mitebiteby ery izy miandry ny ora higadonany

Fa na nidona aza ny orana, tsy nasiany olana

Niandy ampitoniana izy, an’ilay olo tiany

Niaretany ny hatsiaka sy ny orana nifafy

Ilay olona niandrasany nefa toa mbola tsy avy

Afaka ora iray, niverina izahay

Dia mbola tazanay izy miantso amin ny finday

Nitanondrika, tena very hevitra

Nitady lalana dia iny izy no lasa ni pà

Lany teo ny ora, very ny fotoana

Ilay olona niandrasana tsy nety tonga foana

Izy nody irery, latsa-dranomaso

Jiatry ny hatsiaka no bongobongo maso

ALEO IZY HO ANY

Ny fitia voakarara, antoky ny fiainana tsara

Fa ny ady lava sy latsa matetika manimba tantara

Reo teny mandratra fo, mety hamela takaitra

Ny tsy firarahina koa, hitarika famoizam-po

Ka aleo izy ho any o, aleo izy ho any e

Aleo izy ho any, rehefa ela io ve tsy hanenina ihany

Aleo izy ho any, ianao nge tsara fa aza adino

Aleo izy ho any, ny ho avinao amin’izay re banjino

Adinoy amin’izay ireo sentosentonao fahiny

Mandehana amin’izay mizotra amin’ny lalan’ny ankehitriny

Aza asiana nenina, mba meteza tenenina,

Karakarao tsara, fenoy tsiky ny endrikao

Dia avelao izy ho any, avelao izy ho any

Aleo izy ho any, hitsiriritra sy hanenina any

Aleo izy ho any e, aleo izy ho any o

Aleo izy ho any, ahita sy higoka ny ngidiny any

Aleo izy ho any, aleo izy ho any, aleo izy ho any.

AMPASIKA

Toerana tsy dia betsaka mpiompy

Nefa dia ao ny valabe an’ny omby

Ireo mponina ao maro karazana

Samy hafa foko, samy hafa firazanana

Faritra eny Atsimondrano,

Toerana lonaka lalovana renirano

Faritra eny Atsimondrano,

Matetitetika mihintsy no isehoana angano

Raha vao maraina, vao mangiran-ratsy,

Ampasika dia efa injay mifoha sahady

Manakoako eny rehetra eny,

Ny kotabataban’ny mpanera, mpividy hena

Ampasika mifoha vao mangirana,

Kotaba lava tsy misy fahanginana

Ampasika toerana maresaka,

Mpivarotra mantsy no tena betsaka

Tazanao eny avokoa reo karazam-pivarotra maro loko

Enta-madinika, trondro, voankazo,

Fripy, légume, hanikotrana, tapan-kazo,

Mofo, composé, café sy dité,

Hotely, hopitaly, magazay lehibe,

Tany mena, biriky mbamin’ny vatokely,

Coiffure, epi-bar, ao koa ny abattoire

Ampasika, toerana maresaka, mpivarotra mantsy no tena betsaka

Ampasika nefa toerana bitika, mivangogo ao ireo mpisera madinika,

Rehefa hadiva hariva iny indray,

Malaza ratsy eny hoe feno adian-jiolahy,

Mpisinto mahery, malaso sy mpanendaka,

Tsy mifidy asiana na ngeza na kely endaka

Ampasika izao faritra mena,

Raha mandalo eny ianao dia aza mihenahena

Fa Ampasika izao faritra mena,

Na anaty bus na ligne 11, dia mba mitandrema.

ANDRO FETY

Na volana jiona, na volana desambra,

Indrindra moa janoary, ilay fampiakaram-bary,

Dia volana andro fety, hanaovana izay metimety,

Fa samy falifaly, izany mpianakavy,

Na manana na mijaly, manao izay tandrify azy,

Fa andro fety

Na ny fahaleovan-tena, na koa ny kirisimasy,

Indrindra ny taom-baovao, izay tsy atao ankilabao,

Dia andro manan-danja, hiravoana, hifaliana havanja,

Fa samy ravoravo, mikorana milanonana,

Dia mankalaza ny Avo, mivavaka anya m-piangonana

Fa andro fety

Ny fitsingerenan’ny taona, na koa ny mariazy,

Sy ireo maro etsetretsetra, ankafin’ny rehetra

Dia samy andro fety, ialana voly vetivety

Fa samy tretrika, mitsikitsiky mirana,

Tsy fahita matetika, manararaotra mihinana

Fa andro fety, fa andro fety, fa andro fety.

AZA DORANA NY ALA

Efa iara-mahita, iara mahalala ny fahasimban’ny ala

Vokatr’ireo hevi-diso, sy ny tsy fahalalàna

Zava-dratsy sy atambo maro, no setrin’izany

Mitaraina ny tany, loza tsy roa aman-tany

Loharanon-tsoa samy hafa, no hita any an’ala

Harena be sarobidy, tsy manan-tsahala

Koa kajio, kolokoloy, ireo zava-boaary

Fa lova be sesehena, efa tolo-Janahary

Aza dorana ny ala, aza doranao ny ala

Aza doranao ny ala, aza simbainao ny ala

Izaho sy ianao ndao handray andraikitra hikarakara,

Hiaro sy hikolo ny sisa ala eto Gasikara

Koa sahia mijoro, amin’ny fo sy tanam-polo

Hamerina indray ny hasin’ny ntotolo

Izaho sy ianao handeha hiaraka hisalahy

Hanefy sy hanitsy ny toe-tsain’ny tsirairay

Hanentana ny rehetra, hikajy ny voaary

Ny ho avin’ny taranantsika amin’izay tena ho lavorary

BETIZY

Rangahy iray izay, mpanao raharaha ao am-piangonanay

Tia tia misary adala, manenjika kala,

Matetiteka mihintsy izy izay, no mirevy ato amin ny bar anay

Mandanidany vola, manao tonton sola

Dia tsy menatra mikotikoty, mitilitily rony kalakely

Fandaniam-bola tsy hita velively, miala mandry mamonjy hotely

Toa manao kitoatoa, tsy misaina izay mety ahavoa

Fa manao ny tsy izy, toetra ratsy tena maha kivy

Laozana manao betizy, tsy mitsinjo an’ireto ankizy

Dia miseho tsy mivaky loha, satria mbola tanora moa

Mampirafy, manambady roa, mamitaka an-dramatoa

Tsy takina hafenina, fa toa vay an-kadrina

Ny ditra sy ny adalany, efa hita mibaribary

Reo mpiara monina efa, manao tondro molotra

Ry pasitera mivady, efa leo ny mananatr’azy

Fa manao kitoatoa, tsy misaina izay mety ahavoa

Manao ny tsy izy, toetra ratsy tena maha kivy

Laozana manao betizy, tsy mitsinjo an’i reto ankizy

Dia miseho tsy mivaky loha, satria mbola tanora moa

Mampirafy, manambady roa, mamitaka an-dramatoa

Mbola hanenina ihany moa, fa mbola hanenina ihany moa.

MIHOGAHOGA

Samy hiala eto an-tany avokoa, rehefa olona,

Na voa tso-drano izany, na koa ireo voaozona

Na tonta kely na mpanao asa soa

Na mpiasa be na jiolahy koa

Tsisy aharitra ela eto izany,

Mpandalo daholo isika eto an-tany

Samy hiala eto an-tany avokoa rehefa zanak’olona

Na ianao mino na tsy mino koa, an’ilay Mpamorona,

Na devolivoly na anjelinjely

N’andriambavilanitra na makorely

Tsisy aharitra ela eto izany,

Mpandalo daholo isika eto an-tany

Be ny tsaho re zay mandeha eny é

Aza taitaitra amin’izany isé

Reveo manja ben y fiainana é

Ny tany anie ka fandalovana é

Samy hiala eto an-tany avokoa, rehefa olona,

Na voa tso-drano izany, na koa ireo voaozona

Na mpiandry tsara na ny ondry nania

Na mpanefoefo na katr’ami

Tsisy aharitra ela eto izany,

Mpandalo daholo isika eto an-tany

Samy hiala eto an-tany avokoa rehefa zanak’olona

Na ianao mino na tsy mino koa, an’ilay Mpamorona,

Na jentilisa na mpivavaka,

Na osaosa na matanjaka,

Tsisy aharitra ela eto izany,

Mpandalo daholo isika eto an-tany

Page updated

Google Sites

Report abuse