حج کوٹہ رواں برس بھی پوری طرح استعمال نہیں کرسکیں گے: سیکرٹری مذہبی امور

اسلام آباد(ڈیلی پاکستان آن لائن ) سیکرٹری وزارت مذہبی امور ڈاکٹر سید عطا الرحمان کا کہنا ہے کہ حج کوٹہ رواں برس بھی پوری طرح استعمال نہیں کرسکیں گے لیکن کوشش کریں گے آئندہ برس پورا حج کوٹہ استعمال کریں ورنہ یہ کم بھی ہوسکتا ہے۔ 

نجی ٹی وی جیونیوز کے مطابق یہاں پریس کانفرنس کرتے ہوئے انہوں نے کہا کہ اس سال 69 ہزار پاکستانی سرکاری حج سکیم کے تحت فریضہ حج ادا کریں گے جبکہ پرائیویٹ حج سکیم کے تحت عازمین کی تعداد بھی جلد سامنے آجائے گی۔انہوں نے کہا کہ اس بار 40 روز کے ساتھ 20 سے 25 روز کا بھی حج متعارف کرایا ہے، اس بار عازمین حج پاکستان سے پری انسٹال موبائل سم کے ساتھ سعودی عرب جائیں گے جس سے وہ واٹس ایپ پر پاکستان کال کرسکیں گے جبکہ عازمین حج کو خصوصی فیچر والے بیگ بھی فراہم کئے جارہے ہیں۔سیکرٹری مذہبی امور کا کہنا تھا کہ عازمین کو حج ایپ کی سہولت فراہم کی ہے جس میں فلائٹ شیڈول اور دیگر ضروری معلومات موجود ہیں، عازمین کو راستے سے بھٹکنے سے بچانے کے لئے حج ایپ سے مدد فراہم ہوگی جس میں حج ایپ سے ایک بٹن دبانے سے گم حاجی کی رہائش گاہ تک پہنچنے میں مدد ملے گی۔ 

ڈاکٹر عطاالرحمان نے مزید کہا کہ اس سال روڈ ٹو مکہ کی سہولت کراچی ایئر پورٹ پر بھی دستیاب ہوگی، منیٰ سے سرکاری حج سکیم کے تحت تمام پاکستانی عازمین کو ٹرین کی سہولت ملے گی جبکہ ڈاکٹرز اور پیرا میڈیکل سٹاف کا بھی این ٹی ایس کے ذریعہ انتخاب ہوگا۔ان کا کہنا تھا کہ خدام الحجاج کے انتخاب کے لئے نیشنل ٹیسٹنگ سروس کی خدمات لی جارہی ہیں، مدینہ منورہ میں مناسب کرائے پر بہترین اور قریبی مقامات پر عمارتیں حاصل کی ہیں جبکہ ادویات اور ویکسین کی خریداری میں 15 کروڑ روپے کی بچت کی ہے۔