Грекокатилїцизем або грекокатолїцтво то термин котри ше одноши на восточни католїцки церкви котри провадза византийску обрядну и литурґийну традицию. Припаднїки тей церкви ше наволую грекокатолїки.

За грекокатолїкох, у православним швеце, часто ше хаснує уквилююца назва "унияти". Вона означує одпаднїкох од православней вири, односно дакого хто зрадзел свою виру. Термини "Униятска церква" и "унияти" представяю уквилююци назви за вирнїкох Грекокатолїцкей церкви, односно грекокатолїкох и нє треба их хасновац.

ЗГ "Грекокатолїки" то нєполитичне, нєвладове, нєпрофитне здруженє гражданох. На конститутивней скупштини отриманей 09.05.2021. року, ґрупа позбераних ентузиястох принєсла одлуку о снованю Здруженя, пред котри поставела лєм єден циль – "вичисцованє" медийного простору Републики Сербиї, од шицких деґутантних текстох и прилогох  котри содержую пейоративи и ширши стереотипи о припаднїкох тей вирскей заєднїци.

Нашо здруженє гражданох, од свойого снованя по нєшка, пренашло и одклонєло импозантне количество деґутантних статьох и ТВ прилогох. У нїх грекокатолїки наволани пей."Унияти", а їх церква пей."Униятска церква". Здруженю ше удало одклонїц значне число спорних статьох и прилогох зоз догварку, док ше при даєдних случайох порушал поступок пред компетентнима державнима орґанами.

Шлєбода виражованя, заґарантована зоз Уставом (член 46, став 1), виполнєта зоз правом каждого же би мал и виказал думанє о одредзеней идеї, зявеню, факту або подоби (наприклад шлєбода преси, уметнїцка шлєбода). Тиж, Устав ґарантує и право каждого кого виражованє тей шлєбоди иритира же би ше защицел од насилства, дискриминациї, повредзованя чесци и угляду, бешеди мержнї або очкодованя идентитету и приватносци (Устав Републики Сербиї член 46, став 2).

Право на чесц и угляд – Спрам члену 23.став 1.Уставу, людске достоїнство нєприкосновене, та шицки длужни почитовац го и щициц. Нажаль, тоти добра ше часто губя зоз повредзованьом чесци и угляду.

Чесц то збир нєматериялних вредносцох котри чловек як биолоґийне и социялне єство ма.

·   Биолоґийней димензиї чловека одвитує нукашня чесц. Вона ше здобува зоз родзеньом и продукт є одношеня чловека ґу власней подоби. Чесц ма кажди чловек, без огляду на тото яки живот ма и яки ма угляд. Понеже слово о субєктивним чувстве, може го мац лєм физичне лїцо.

·   Сициялней димензиї чловека одвитує вонкашня чесц зоз котру дружтвени штредок валоризує нукашню чесц.

Угляд то збир нєматериялних вредносцох котри чловек зоз роботу и способом живота здобува у узшим або ширшим окруженю.  Кед чесц продукт одношеня чловека ґу самому себе, угляд продукт одношеня других ґу чловекови. 

На чесц и угляд ше найчастейше напада зоз увредзованьом и клеветаньом. Увредзованє то напад на чловекову чесц зоз нєнависцу, знєважованьом, подценьованьом або на подобни способ, котри виражени вербално (наприклад, зоз словами: скаранїк, гохштаплер, спреводзкош, циґан, крадош...). Увредзованє и клевета то виновни дїла. Кед су окончени прейґ медийох,  представяю квалификовани (чежши) форми. 

Кед же пренайдзеце статї и ТВ прилоги котри нашо Здруженє глєда и "вичисцує" зоз медийного простору Сербиї, контактуйце нас на:  grkokatolici@gmail.com - а нашо волонтере превежню крочаї ґу їх одстраньованю. 

Тиж, шлєбодно нас контактуйце кед же маце предкладанє за сотруднїцтво або кед ше сцеце придружиц. Витайце!