E voletz prepausà'ns ua video ? Que la ve podem har ! Per aquò, que j'a quauques critèris ad arrespectar. Dens tots eths cas, que seram nosatis qui heram eth montatge video i audio.
Avetz ua enformacion qui pensatz enteressenda de tretar ? Escrivetz-nse un mail dab eras enformacions en questions i honts hidables entà que póishquiam escríver era presentacion en bonas condicions. Si'ns voletz mandar ua presentacion dejà escrivuda mes que non la voletz pas léger, qu'ei possible, mes qu'averam hrèita deras honts totparièr.
Avetz enveja d'enregistrar era vòste pròpia presentacion ? Genhèc ! Que seram hèra urós de póder prepausar ua diversitat de votz i dialèctes mei grana. Per aquò, que v'aconselham de contactà'ns abans de començar ad enregistrar, i calerà que hàsiatz cas a mantun punt :
Eth temps de lectura totau deu tèxte non deu pas despassar 1 minuta. Per adara, que publicam video bracas (shorts) sonque ; entad arrespectar eras demandas tecnicas de totas eths hialats sociaus, eth temps de video qu'ei limitat ad 1 minuta.
Enregistrament der audio : Enregistratz enas condicions mei calmas possibles, dab eth materiau mei bon qui avetz, shens brut de hons, sus ua sola pista audio, shens de har nat montatge de son (qu'avem reglatges qui aplicam a totas eras votz entad armonizar-las). Enregistratz ua lectura naturau. Que podetz tornar díser eras frasas autandes còps qui voletz dinc ad aver cada frasa plan prononçada, tant qui enregistratz eth tèxte en ordi de lectura. Er audio "brut" qui enviatz n'ei pas limitat en temps (que pòt durar mei d'ua minuta), qu'ei era lectura deth tèxte sancèr tot d'un còp (cronometratz-ve en exercici per exemple) qui non deu pas despassar 1 minuta. Eths prumèrs còps, que'vs demanderam dilhèu d'at arrehar entà aténher era qualitat voluda.
Hètz cas ara qualitat dera luenga i ara prononciacion. Que podem ajudà'vs a corregir eth tèxte escrivut, mes en cas de meishanta prononciacion que'vs demanderam era permission de léger eth tèxte nosatis medishs.
Que'vs demanderam totas eras vòstes honts i tanben eth vòste script (tèxte legut) entà que'u poishquiam botar en sostítols. Que voleram tanben saber en quin dialècte e parlatz (ex : gascon negue, coseranés, aussalés, vasadés...) entà podem agergar era video ena bona categoria sus Youtube.
Avetz enveja de prestar era vòste votz mes non sabetz pas que díser ? Qu'avem tostemps articles en preparacion. Si avetz ua beròia prononciacion, que podem prepausà'vs presentacions dejà escrivudas qui n'averatz sonque ad enregistrar (espiatz eth punt "Enregistrament der audio" mei haut entà saber quin har). Era sola causa qui'vs demanderam en aqueste cas que serà d'estar capable d'adaptar eth noste script tath vòste dialècte ; que volem cada presentator e légia en son dialècte particular.
Qu'averam tostemps besonh d'imatges libres de dret (domani public, utilizacion autorizada per atribucion, etc) o dera vòste proprietat dab era vòste autorizacion, entad illustrar eras videos. Que v'aconselham de mandà'ns imatges i eras mencions legaus qui nse'n premeten er' utilizacion. Ua presentacion, per excelenda qui sia, non serà pas publicada si non la podem pas illustrar promor que hèm videos i non pas articles escrivuts.
Qu'èm ara vòste dispausicion per tota question.
