འགོ་བརྗོད།

དམ་པའི་གསུང་རབ་ནང་ལས་གདམ་ཁ་རྐྱབ་མི་ ཨ་ནཱི་སྲུང་ཚུ་ལྷག་ནི་སྦེ་གྲོས་ཐག་ཆོད་ཆོདཔ་གི་དོན་ལུ་བཀའ་དྲིན་ཆེ་ འདི་ཚུ་ལྷབ་ད་ནཱ་བུ་ལུ་སྤྲོ་བ་འབྱུང་ནི་འོང་ཟེར་བའི་རེ་བ་ཡོད།

དམ་པའི་གསུང་རབ་ངོ་མ་འདི་ ཧིབ་རུ་དང་གིརིག་ཁ་སྐད་ནང་བྲིས་བྲིསཝ་ཨིན། དམ་པའི་གསུང་རབ་འདི་ དཀོན་མཆོག་གི་ཨིནམ་དང་ ཁོ་གིས་མཛད་མི་ མི་ཚུ་ག་ར་ཁོ་གིས་ག་དེམ་ཅིག་ཕངསམ་ཨིན་ན་གི་སྐོར་ལས་ཨིན། འདི་ནང་ སྤྱིར་བཏང་གི་མི་ཚུ་གིས་ དཀོན་མཆོག་དང་ཁོ་གི་སྲས་ཡེ་ཤུ་ཁིརཱིས་མཇལ་བའི་སྐོར་ལས་ཡོད། འདི་ནང་ཡོད་མི་ཚུ་སྤྱིར་བཏང་གི་སྲུང་རྐྱངམ་གཅིག་མེན་པར་ དམ་པའི་ཐུགས་ཉིད་ཀྱིས་འཁྱིད་གནང་གནངམ་གྱི་མི་ཚུ་གིས་ བྲིས་བྲིསཝ་གི་བདེན་པའི་བྱུང་རབས་འདི་ཨིན། དམ་པའི་གསུང་རབ་ནང་ན་ བསྡོམ་གྱི་དེབ་ ༦༦ ཡོད་ འདི་ཡང་ ཞལ་འཆེས་རྙིངམ་དང་ཞལ་འཆེས་གསརཔ་ཟེར་ ཡན་ལག་གཉིས་སྦེ་བགོ་བཤའ་བརྐྱབས་ཏེ་ཡོདཔ་ཨིན།

དམ་པའི་གསུང་རབ་འདི་ ཁ་སྐད་མ་འདྲཝ་ལེ་ཤ་ནང་སྐད་སྒྱུར་བརྐྱབས་ཡོད་དོ་བཟུམ་ཅི་ གཞན་ག་ཅི་གི་དེབ་ཡང་སྐད་སྒྱུར་རྐྱབ་རྐྱབ་མེད། འཛམ་བུ་གླིང་གི་རྒྱལ་ཁབ་ག་ཏེ་ལས་ཡང་མི་ཚུ་གིས་ ལོ་ན་གཞོནམ་དང་རྒསཔ་ཟེར་མེད་པར་ ཨ་ནཱི་དམ་པའི་གསུང་རབ་འདི་ལྷབ་སྟེ་ཡོད།

ད་ལྟོ་ནཱ་གིས་ལག་པར་བཤེད་མི་དེབ་འདི་ དམ་པའི་གསུང་རབ་མེན་ དེ་འབདཝ་ད་ འདི་ནང་ཡོད་མི་སྲུང་ཚུ་ག་ར་ དམ་པའི་གསུང་རབ་ལས་བཏོན་བཏོནམ་ཨིན། ང་བཅས་ཀྱིས་དམ་པའི་གསུང་རབ་ཀྱི་ཡན་ལག་རེ་ལས་ སྲུང་ ༦༠ རེ་གདམ་ཁ་བརྐྱབས་ཏེ་ བསྡོམ་གྱི་སྲུང་ ༡༢༠ གདམ་ཁ་བརྐྱབས་ཅི། འདི་སྲུང་ཚུ་ག་ར་བདེན་པ་ཨིནམ་མ་ཚད་ འདི་ཚུ་ནཱ་གི་དོན་ལུ་རྫོང་ཁའི་ ཁ་སྐད་ནང་སྐད་སྒྱུར་བརྐྱབས་ཏེ་བྲིས་བྲིསཝ་ཨིན།

ཨ་ནཱི་སྲུང་ལྷབ་མི་ཚུ་གིས་ འདི་ནང་ཡོད་མི་ མི་གི་མིང་དང་ས་གནས་ཀྱི་མིང་འདི་ཚུ་ ཧ་མི་གོ་འོང་མནོ་སྟེ་ ང་བཅས་ཀྱིས་ནཱ་བུ་ཚུ་གི་དོན་ལུ་ སྲུང་ནང་ཡོད་མི་མིང་ཚུ་ག་ར་ཚོས་གཞི་ཧོནམོ་སྦེ་བཟོ་སྟེ་ཡོད།

དེ་ལས་ཨ་ནཱི་དེབ་ཀྱི་རྒྱབ་ལུ་ སྲུང་ཚུ་གི་ གསུང་རབ་ཀྱི་རྒྱབ་རྟེན་ཡིག་ཆ་ཚུ་ཐོ་བཀོད་དེ་ཡོད་ དེ་སྦེ་ནཱ་བུ་ཚུ་གིས་འདི་སྲུང་ཚུ་དམ་པའི་གསུང་རབ་ནང་གཟིགས་ཚུགས། ཨ་ནཱི་དེབ་ཀྱི་མཐའ་མཇུག་ལུ་ཡོད་མི་བྱུང་རབས་ཀྱི་སབ་ཁྲ་ཚུ་གིས་ དེབ་ནང་ཡོད་མི་སྲུང་ཚུ་ག་ཏེ་ར་བྱུང་ཡི་ག་སྟོནམ་ཨིན། ནཱ་བུ་ཚུ་གིས་ཨ་ནཱི་སྲུང་ཚུ་ལྷབ་ད་ དཀོན་མཆོག་གིས་བྱིན་རླབས་གནང་བཅུག།

སྐད་སྒྱུར་པ།