للحجز والاستفسار : 01001424825 

الجفاف فى الاطفال

معناه فقدان الجسم للسوايل والاملاح المعدنية بشكل يؤثر على الوظايف الحيوية للجسم وممكن يؤثر على حياة الطفل اذا كانت درجة الجفاف شديدة .

#ايه أشهرالاسباب الى ممكن تدخل الطفل الرضيع فى جفاف

- اولا :قلة الرضاعة يعنى لو سبنا الطفل الرضيع نايم فترات طويلة وخاصة فى الحر ممكن يدخل فى جفاف .

-ثانيا :لف الطفل الرضيع بطبقات ملابس كتير اثناء الصيف والحر ده ممكن يدخله فى جفاف لانه بيعرق جامد ويفقد سوايل كتير من جسم .

-ثالثا :لو الطفل سخن وحرارته عالية برده بيفقد سوايل

-رابعا : النزلات المعوية سواء قئ لوحده أو أسهال لوحده او الاتنين مع بعض

ايه الاعراض الى لو لقيت حاجة منها انتبه واخد بالى ان الطفل داخل فى جفاف :

-اولا :لو لقيت الطفل ملهوف على شرب المايه مع وجود سبب من الاسباب الى قلنا عليها .

ثانيا : قلة التبول وده هاتاخدى بالك منه وانتى بتغيرى الحفاظة انها مش بتتملى بالمعدل الى انتى متعودة عليه وكمان لون البول بقى مركز واغمق من الاول .

-ثالثا :لو الطفل نايم على نفسه وحركته قليلة حتى لما يعيط الدموع قليلة .

رابعا : جفاف فى الفم والحلق .

خامسا: لون الجلد شاحب ،الطفل عيونه غايره لجوه ،وممكن يكون عصبى جدا ،ولو وصلنا لمرحلة جفاف شديدة ممكن لاقدر الله الطفل يدخل فى غيبوبة ويفقد الوعى .

ايه طرق العلاج؟؟

أولا :تفادى الاسباب يعنى نصحى الطفل نرضعه ماينامش فترات طويلة .

ثانيا : اللبس والغطا يكونوا بشكل مناسب للجو .

ثالثا : فى النزلات المعوية مهم جدا نعوض السوايل الى الطفل بيفقدها سواء بالرضاعة او محلول الجفاف.

رابعا : لو الطفل رافض السوايل يبقى لازم نعرضه على الطبيب او ننزل بيه المستشفى لانه ممكن يحتاج محاليل

د/ نهى يوسف جويد

أخصائي طب الأطفال وحديثي الولادة