題目:古早味--洪碧穗教師

時間倒退攄(lu) 攄轉去足久足久以前

亭仔跤 長椅條

𥴊仔店 尪仔標

阿公的三輪車載生活

阿媽的茄芷(ka-tsì)袋貯日子

猶有 阿爸的絃仔 阿母的嫁粧

古早味是一種甜甜的滋味

予人深深咧留戀

時間又閣倒退攄(lu) 閣攄轉去真久真久進前

稻埕 曝粟仔

廟口 拍干樂

阿公的牛車牽著講袂出的沉重

阿媽的笠仔戴著笑袂出的負擔

猶閣有

阿爸彼領破甲一空一空的紗仔衫 阿母彼雙割甲一巡一巡的手橐仔

古早味是一種苦苦的滋味

予人想著就心酸

時間定定一直倒退攄 攄甲予烏白的相片咧講故事

但是

時間又閣一直向前行 行甲予祖厝起大樓 田園變廠房

所以

古早味 一越頭 煞攏變成一種思念的滋味

遮有一間古早味 遐嘛一擔古早味

毋過 佇路頭 佇店內

阮閣較揣嘛揣袂著騎三輪車的阿公佮戴草笠仔的阿媽

猶有 阿爸和阿母彼段美麗的

記持

題目:踅菜市仔--洪碧穗教師

我又閣綴著媽媽的跤步去踅菜市仔。

透早的菜市仔是鬧熱滾滾。這擔的魚較鮮,彼擔的肉較俗,這間

賣的衫仔褲較實穿,彼間賣的雜貨較濟項。猶閣有這爿開一間新的水

果擔,頭家真親切;聽講彼爿彼个賣菜的阿姆七少年八少年就做阿媽

矣。包仔店生理好,外口排規列;糋雞翼的是糋甲袂赴人買,趁錢若

像趁水...規个菜市仔是人 人, 甲密喌喌。當年的我,佮當年的媽

媽嘛牽著 oo33 too55 bai51,捾著菜籃仔,定定佇遮咧共人鬥鬧熱。毋

過,今仔日,遮猶是人𤲍人, 甲洘秫秫,只是,我閣較看,閣較揣,

嘛揣袂著媽媽的形影,也聽袂著媽媽佮人講話的聲音。規个菜市仔是

一片大海,予我思念的船靠袂著岸。看別人母仔囝是歡歡喜喜咧踅菜

市仔,阮母仔囝煞已經變成兩个世界的人矣。

阮媽媽上愛踅菜市仔。毋管是寒人猶是熱人,是透風猶是落雨,

媽媽總是透早就出門,安全帽戴咧,oo33 too55 bai51騎咧,趕去菜市

仔,買魚買肉買菜買衫,毋但買一家伙仔的食食,也買伊的興趣。媽

媽定定共阮講:「心情若䆀的時陣,只要予我去踅菜市仔就好矣。這

爿看看,彼爿踅踅,就較爽快矣!」所以,伊若艱苦的時陣,踅菜市

仔會予伊較快活;伊若是歡喜的時陣,踅菜市仔就會予伊閣較歡喜。

菜市仔若親像蜂蜜 款,予媽媽的生活變甲甜粅粅,嘛若親像食薰,

一沐著,想欲改嘛真歹改。

毋但媽媽家己愛踅菜市仔,其實,阮嘛真佮意看媽媽去踅菜市

仔。因為,伊若按菜市仔倒轉來,定定就是大捾細捾,大包細包。這

个時陣,逐家就有食福矣。所以,一看著戴安全帽的媽媽按 oo33 too55

bai51落來,我佮小弟小妹就傱去媽媽遐,對伊的手中共物件承過來,

逐家相爭食。無論是芳芳的煙腸,軟軟的麻糍,抑是冰冰的豆花,燒

燒的番麥,這攏予阮將媽媽的手牽牢牢,牽成一段囡仔時代上有滋味

的記持。當然,疼惜阮的媽媽為著欲予阮的穿插綴時行,所以就有一

寡衫仔褲,嘛做伙坐著媽媽的 oo33 too55 bai51,轉來阮兜,共逐家打

扮甲媠噹噹。嘛因為踅菜市仔遮爾仔心適,遮爾仔趣味,所以,我就

定定變成一尾魚,綴著媽媽,泅入去菜市仔這片大海。

今仔日,我又閣來到這个和媽媽一生黏做伙的菜市仔,我沓沓仔

行,勻勻仔看。我那行那看,那看那想: 彼爿彼擔賣雞肉的頭家,敢

有發覺阮媽媽這个老主顧已經足久無來交關?遠遠彼个賣櫻桃的阿

婆,敢有咧等待媽媽來共伊買櫻桃予我補血顧目睭?

今仔日的我,敢是因為無食著媽媽買的櫻桃,所以目睭煞變甲茫

茫霧霧,看袂清頭前的路? 敢是因為無啉著媽媽燖的雞湯,所以才身

體荏,行袂緊,規雙跤就若像釘佇咧菜市仔這片思念的塗跤底?思念

重重疊疊,跤步沉沉重重。今仔日,我家己咧踅菜市仔,但是,我哪

會感覺菜市仔攏佇咧發草,攏佇咧拋荒,無聲無說,冷冷清清?

以前,我綴媽媽去踅菜市仔,踅出一段一段甜蜜溫暖的記持;毋

過,今仔日,我閣綴著媽媽的跤步踅菜市仔,風煞一直吹,雲煞一直

飛,吹甲我起畏寒,飛甲我心傷悲。因為,失去媽媽的我若親像一枝

草,予酸風吹啊吹,吹啊吹......艱苦的我,只有向望後世人,阮會當

閣和媽媽做母仔囝,閣手牽手做伙去踅菜市仔。