Eizeta.- Beasaingo Udalak 2015ean argitaratutako mapan Arrapaitz izenez aipatzen bada ere, badirudi egokiagoa dela Eizeta izena, Jose Zufiaurrek jasotzen duen bezala; Murumendiko gailurretik hego-mendebaldera dago, 500 bat metrora, eta, gaur egun, bere gailurra muino ireki bat da, bi oroitzapen-plakaz hornitua. Murumendiko bidearen ondoan, mendiaren ekialdeko hegalean, Arrapaitz iturria dago, eta iparraldean, basoaren erdian, Murumendiko iturria. Beasaingo Aizkorri Mendi Elkarteak 60ko hamarkadan konpondu zuen azken iturri hau, Murumendiko Damaren kobazuloaren ondotik jaisten den Erroitz ibaiaren sorburu dena.

Oharra: Izaskun Salazarrek egindako euskarazko wikipedian azaltzen den bezala, "Eizetak Arrapaitz izena du hainbat agiritan. 1705ean, Muruako Arrapaiz landagunea aipatzen da Beasain eta Itsasondo arteko mugen eta nekazaritza-eremuen banaketari buruzko irailaren 23ko agirian. 1942ko irailaren 11n Beasainen jasotako mugen aktan, Arrapaiz iturritik 32 pausotara eta gurdi bidetik 30 pausotara dagoen eremua dela aipatzen da".

Izaskun Salazarren bilduma lan interesgarria: https://eu.m.wikipedia.org/wiki/Eizeta