Bab 9 Sekar Alit/Pupuh

Teges Sekar Alit/Pupuh

Sekar Alit/Pupuh inggih punika tembang sane kaiket antuk uger-uger Padalingsa sane nganggen Basa Bali macampuh Basa Kawi taler Basa Melayu utawi Basa Pasasakan. 

Sekar Alit taler kawastanin geguritan. Geguritan mawit saking kruna lingga gurit sané maartos ngardi puisi, kruna gurit punika kadwipurwayang dados gegurit, sanékawewehin antuk pangiring –an.

Geguritan inggih punika carita sané metu saking wit pikayunan sang kawi, sané mawangun antuk puisi tradisional, sané prasida kagendingan antuk makudang-kudang pupuh.

Artos punika sané prasida minayang ring sajeroning karya sastra peparikan, sané wantah marupa karya sastra tetedunan (transformasi) saking karya sastra sané sampun wénten riinan. Indik pupuh-pupuh sané ketah kaanggehang ring sajeroning geguritan, sané lumrah wénten adasa (10) kuéhnyané, inggih punika: 

S : Sinom, Semarandana

M : Maskumambang, Mijil

P : Pucung, Pangkur

G : Ginada, Ginanti

D : Durma, Dandanggula 

Wangun Sekar Alit/Pupuh/Geguritan

Wangun Sekar Alit/Pupuh/Geguritan kaiket olih:

1. Padalingsa

Padalingsa tegesipun kecap wanda miwah wangun suara ring panguntat sajeroning acarik lan akéh carik sajeroning apada.

2. Guru Wilangan

Guru Wilangan inggih punika uger-uger kecap wanda sajeroning acarik.

3. Guru Dingdong

Guru dingdong inggih punika uger-uger wangun suara panguntat sajeroning acarik.

4. Guru Gatra

Guru gatra inggih punika uger-uger katah carik sajeroning apada. 

Ring sor puniki kasurat wangun pupuh sané kabaos sekar alit miwah uger-ugernyané :

• Sinom = 8a 8i 8a 8i 8i 8u 8a 8i 4u 8a

• Semarandana = 8i 8a 8o 8a 8a 8u 8a

• Maskumambang = 4a 8i 6a 8i 8a

• Mijil = 10i 6o 10e 10i 6i 8a

• Pucung = 4u 8u 6a 8i 4u 8a

• Pangkur = 8a 11i 8u 7a 12u 8a 8i

• Ginada = 8a 8i 8a 8u 8a 4i 8a

• Ginanti = 8u 8i 8a 8i 8a 8i

• Durma = 12a 8i 6a 8a 8i 5a 7i

• Dandanggula = 10i 10a 8e 7u 9i 7a 6u 8a 12i 7a 

Wirasan/Watak Pupuh (Sekar Alit)

Pupuh-pupuh punika ri tatkala ngendingang/ngwacén patut nganutang ring wirasan/ watak

pupuh ipun sakadi :

1. Pupuh sinom : mawirasa ramah tamah, tur lengut, taler becik anggén ri kala mapasuitran miwah ngicénin piteket-piteket.

2. Pupuh semarandana : mawirasa manut kayun, sedih, kaduhkitan saking asmara.

3. Pupuh mijil : kanggén ngicénin piteket-piteket, miwah anggén nyinahang kasmaran.

4. Pupuh maskumambang : nyinahang wirasa sané sedih, matetangisan.

5. Pupuh pucung : mawirasa enduk, tan parasa sané mamuncak, becik anggén ngicénin piteket-piteket.

6. Pupuh pangkur : mawirasa daging pikayun sané mamuncak, becik anggén ngicénin piteket-piteket sumeken taler anggén nyinahang kasmaran sané mapucak.

7. Pupuh ginada : nyinahang kayun sané kaduhkitan, sedih, merana, kuciwa/kecewa.

8. Pupuh ginanti : nyinahang rasa senéng, tresna asih, patut anggén ngicénin ajaran filsafat,miwah indik kasmaran.

9. Pupuh durma : nyinahang watak sané keras, bangras, bendu, muah nyritayang indik payudan.

10. Pupuh dandang gula : nyinahang rasa sané alus, makasih-kasihan taler anggén panguntat karangan. 

 Contoh Pupuh (Sekar Alit)

1. Pupuh Ginanti

Saking tuhu manah guru

Mituturin cening jani

Kaweruhe luir sanjata

Ne dadi prabotang sai

Kaanggen ngaruruh merta

Saenun ceninge urip

2. Pupuh Mas Kumambang :

Cai Tarka

Kema ka toko di gati

ne pipise aba

Beliang meme abesik

colok mecap ali baba

3. Pupuh Mijil :

Dadong dauh ngelah siap putih

Ba mataluh reko

Minab ada limolas taluhne

Nanging lacur ada ne nepukin

Anak cerik-cerik

Kaliwat rusit ipun

4. Pupuh Pucung :

Bibi anu lamun payu luwas manjus

Antenge tekekang

Yatnain ngaba masuwi

Tiyuk puntul

Bawang anggon pasikepan