Штогод беларускія выдавецтвы здзіўляюць юных чытачоў россыпам новых кніг.
Кожнае выданне – падзея!
Чытачы, акунуўшыся ў свет дзівосных кніг, мараць і фантазіруюць, робяцца вынаходнікамі і адкрывацелямі, падарожнічаюць па фантастычных краінах і вучацца проста рабіць добрыя ўчынкі…
Кожная кніга адкрывае нешта новае, яркае, цікавае, неспадзяванае!
Жадаем карыснага чытання!
Эдзі Агняцвет "Мой рыжы Бім"
У кнігу ўваходзяць лепшыя творы вядомай паэткі Эдзі Агняцвет (1913-2000), уладальніцы Ганаровага міжнароднага дыплома імя Х. К. Андэрсена. "Мой рыжы Бім" будзе вам найлепшым сябрам і ў сумныя хвіліны, і ў вясёлы час.
Святлана Быкава "Мастак-чарадзей"
У кнізе аўтар у паэтычнай форме расказвае, як прырода, бы жывая істота, засынае восенню, адпачывае ўзімку, абуджаецца вясной, а ўлетку — квітнее і радуецца жыццю. Адрасуецца дзецям сярэдняга і старэйшага школьнага ўзросту, настаўнікам і бацькам.
Анастасія Валхоўская "Чарнічны мішка"
Нават самы звычайны дзень можа стаць святам, варта толькі захацець. А Чарнічны Мішка і яго сябар дапамогуць у гэтым. Іх чароўны каляндар падкажа маленькім і дарослым летуценнікам, як напоўніць жыццё цікавымі справамі, добрымі навінамі, цудоўным настроем і загадкамі. Напрыклад, такімі: што можна рабіць у Дзень біцця бібікаў або які швэдар апрануць у Дзень аранжавага настрою, як адчыніць скрыначку з радасцю і калі лепш майстраваць будан з посцілак?
Уладзімір Мазго "Казкі ката-марахода"
Вы не сустракалі ката-марахода, не чулі пра яго неверагодныя прыгоды? Тады хутчэй бярыцеся за гэтую кнігу, бо вас чакаюць розныя дзівосы: і кругасветнае падарожжа з галоўным героем, і перамога над марскімі піратамі, і танцы ў Антарктыдзе з вясёлымі пінгвінамі, і сяброўства з кітом-веліканам, і безліч іншых цудаў...
Кніга вучыць дабрыні і шчырасці, любові да радзімы і адказнасці за ўсё жывое на зямлі.
Для дзяцей дашкольнага і малодшага школьнага ўзросту.
Міхась Пазнякоў "Сынок"
Новую кнігу вядомага дзіцячага пісьменніка склалі апавяданні і казкі самай рознай тэматыкі. Творы маюць адметную пазнавальную і выхаваўчую скіраванасць. Аўтар па-мастацку, вобразна вырашае важныя пытанні сумленнасці, праўдзівасці, дабрыні, любові да ўсяго жывога, да прыроды, да Радзімы. Казкі напісаны пераважна пра жывёл, птушак і расліны, якія занесены ў Чырвоную кнігу Рэспублікі Беларусь.
Кацярына Хадасевіч-Лісавая "Вухуцік"
Перад вамі кніга-перакрутка! Адна частка — для чытачоў-хлопчыкаў, другая — для дзяўчынак. Гэта два розныя ўваходы ў адну кнігу. Адкрый і прачытай сваю частку! Альбо чытай з двух бакоў, а потым спыняйся на сярэдзіне, дзе цябе і тваіх сяброў чакае «Ван-друльня» (вандроўка і гульня).
Для дзяцей сярэдняга школьнага ўзросту.
Кацярына Хадасевіч-Лісавая
"Зорка нябесная,зорка зямная"
Нас заўсёды прываблівалі прыгожыя зорныя далячыні, хацелася спазнаць іх таямніцы. У выданні, якое вы трымаеце ў руках, адкрываюцца самыя запаветныя сакрэты бязмежнага космасу. Гэта больш чым навуковыя даследаванні, больш чым назіранне з дапамогай тэлескопаў. Гэта прыгожая рамантычная казка...
Кніга пазнаёміць чытачоў з самай абаяльнай зоркай, якая таемна пабывала на Зямлі. Фантастычныя пераўвасабленні і казачныя падзеі... Праз усё гэта давядзецца прайсці юным чытачам з незвычайным персанажам кнігі.
Аляксей Якімовіч "Белакрылая птушка"
У новых аповесцях вядомага беларускага пісьменніка
A. М. Якімовіча расказваецца пра падлеткаў, якія трапляюць у розныя драматычныя сітуацыі і годна спраўляюцца з імі.
У кнігу ўключаны і новыя вершы аўтара.
Для шырокага кола чытачоў.