Tinalakay ng tatlong tagapagsalita ang kabuluhan ng pag-aaral ng kasaysayan ng Pilipinas lalo na sa panahon ngayong lumalaganap ang disimpormasyon at rebisyunismong historikal. Maliwanag sa presentasyon ni Dr. Wani-Obias ang kahalagahan ng pagkalap, pagsuri at paggamit ng mapagkakatiwalaang sanggunian sa pananaliksik at pag-aaral ng nakalipas. Isang mahalagang punto namang binigyang-diin ni Dr. Pagunsan na ang historical fact ay hindi lamang nakatuon sa kung ano, sino at saan naganap ang isang pangyayari kundi ang masusing paliwanag kung bakit at papaano ito naganap. Kaugnay nito, masinsin din tinalakay ni Dr. Galang kung ano ang interpretasyong pangkasaysayan, kung paano ito nabubuo at ang halaga nito sa disiplina. Sa huli, ang mga pangunahing kaalamang ito ay magagamit sa pag-unawa sa ating kasaysayan at sa kaugnayan ng nakaraan sa kasalukuyan.