Training Space @UNIZAR

O Consello d’a Fabla Aragonesa, conoxito popularmén como «Consello«, ye una asoziazión cultural naxita en 1976 e reconoxita legalmén en 1978, que l’ambito territorial ye Aragón.

As fins d’ista asoziazión son a esfensa, promozión, estudio y espardidura de l’aragonés en toz os suyos aspeutos: istoria, literatura, gramatica, lesico, toponimia, folclore, considerazión sozial e legal, pedagochía, didautica, amostranza, ezetra, parando espezial cuenta d’o estudio, protezión e desembolique de todas as suyas barians locals e comarcals, as cualas son l’alazet de l’aragonés común u estándar.

O quefer d’o Consello d’a Fabla Aragonesa s’alazeta en tres prenzipios:

1. Autitú rispetuosa enta ra reyalidá trilingüe d’Aragón.

2. No ascrizión coleutiba á dengún ligallo politico, sindical u relichioso.

3. Libertá ideyolochica d’as presonas que lo forman.

Ye de feito l’asoziazión de referenzia arredol d’a luenga aragonesa en tota ra soziedá aragonesa, nazional e internazional, estando l’organo de consulta obligato por parti de as instituzions, en estar o referén normalizador e normatibizador de l’aragonés.

Dende a suya creyazión, o Consello d’a Fabla Aragonesa ha treballato de rezio en a dinnificazión d’o idioma aragonés, contribuyindo á creyar un estato d’opinión faborable arredol d’ista chicorrona luenga romanica y espardindo o suyo conoximiento á trabiés de publicazions bariatas.