Listasmiðjur

Um verkefnið

Listasmiðjur með listamönnum úr heimabyggð

Í fámennum skólum á landsbyggðinni getur reynst erfitt að bjóða upp á breiða flóru listgreinakennslu sökum smæðar skólans og fámenni staðar. Framboð kennslu í listgreinum ræðst af þeim kennurum sem skólinn státar af og þó vissulega fari fram gott listrænt starf getur það oftar en ekki einskorðast við ákveðið listform.

Markmiðið með þessu verkefni er að auka flóru listsköpunar í litlu skólunum okkar á sunnanverðum Vestfjörðum. Skólar á landsbyggðinni hafa hingað til haft ágætis aðgang að ýmsum listamönnum sem fara á milli skóla og bjóða upp á stuttar heimsóknir en þá er um stakan viðburð að ræða. Með þessu verkefni er stefnt á aukna kennslu og meiri dýpt.

Hér er um að ræða samstarf milli skólanna og þeirra listamanna sem búa á eða eru ættaðir af svæðinu. Listamennirnir taka þátt í verkefninu með því að deila sinni þekkingu og list til barnanna í heimabyggð. Verkefnið er sniðið að börnum frá elstu tveimur árgöngum leikskóla til 10. bekkjar grunnskóla.

Markmið

Að bjóða nemendum upp á fjölbreytt úrval listgreina.
Að opna fyrir fjölbreyttar leiðir fyrir nemendur í listsköpun sinni til að vinna með hugmyndir, varpa fram spurningum, endurspegla og túlka eigin reynslu og annarra.
Að nemendur öðlist aukinn skilning og læsi á eigið samfélag og menningu.
Að nemendur kynnist listamönnum af svæðinu og átta sig á að unnt er að vinna að list á sínu heimasvæði

Grunnþættir menntunar og Barnasáttmálinn

Bæði Barnasáttmáli Sameinuðu þjóðanna og grunnþættir menntunar falla vel að verkefninu. Fram kemur í Barnasáttmálanum að börn eigi að fá tækifæri til að tjá sig og að öll börn séu jöfn en jafnframt ekki eins. Þess vegna er mikilvægt að þau fái aukin tækifæri til að læra að tjá sig meðal annars í því listformi sem hentar þeim og leyfa þeim að velja.

Eitt markmiðanna með verkefninu er að nemendur öðlist aukið læsi á samfélagið sitt og undirliggjandi menningu með því að kynnast listamönnunum af svæðinu. Þannig fá börnin tækifæri til að byggja sig upp andlega og líkamlega með því að tjá sig í því listformi sem hentar þeim best. Þau verða því betur undirbúin að geta dafnað í samfélaginu og fá auk þess tækifæri til að efla samvinnu sína með öðrum. Grunnþættir menntunar snúast einnig um framtíðarsýn, getu og vilja til að hafa áhrif og að taka virkan þátt í að viðhalda samfélagi sínu, breyta því og þróa það.

Framkvæmd verkefnis

Listasmiðjunum er skipt niður í fimm lotur yfir skólaárið. Fyrstu fjórar smiðjurnar eru vinnusmiðjur og sú fimmta er lokahátíð og uppgjör. Smiðjurnar eru haldnar á tveggja mánaða fresti; fyrst 7. -11. september, 23.-26. nóvember, 25. - 29. janúar, 15.-19. mars og í lokin hátíð í 21. maí. Hver smiðja er í viku í senn. Hver skóli er hvattur til að aðstoða nemendur til þess að halda áfram með sína listsköpun milli listasmiðjanna og gefi þeim tækifæri og tíma til þess að sinna henni í stundaskrá. Þannig stuðlum við einnig að einstaklingsmiðuðu námi.

Listamenn fara á milli skólanna fyrir yngri hópinn og fær hver hópur kennslu í sínum skóla en eldri hópurinn sameinast á Tálknafirði. Nemendur í yngri hóp fá fjölbreytta kennslu í öllum listgreinum en eldri hópurinn fær aukinn möguleika á að velja þá listgrein sem þeir hafa áhuga á og fara þannig dýpra í greinina. Listgreinarnar sem verða í boði eru tónlist, leiklist, skapandi skrif, dans, myndlist, kvikmyndagerð og ljósmyndun. Í hverri lotu eru þrjár til fjórar listgreinar.

Aðstandendur verkefnis

Verkefnisstjórn

Birna Friðbjört S. Hannesdóttir er skólastjóri Tálknafjarðarskóla og verkefnisstjóri verkefnisins. Birna er fædd árið 1980 og uppalin á Bíldudal. Birna er með BS gráðu í ferðamálafræði, mastersgráðu í kennslufræði grunnskóla sem og mastersgráðu í Forystu og stjórnun, auk þess hefur hún viðbótar diplómu í stjórnun menntastofnana. Birna hefur starfað við margvísleg störf meðal annars sem verslunarstjóri Veitingastofunnar Vegamóta á Bíldudal, hún hefur unnið að verkefnum í ferðamálafræði þar með talið verkefnið Menning og saga á Bíldudal sem fékk styrk frá Menningarráði Vestfjarða. Það verkefni var síðar selt til annars aðila í ferðaþjónustu. Hún hóf störf sem skólastjóri í Tálknafjarðarskóla árið 2019 en starfaði þar áður sem leiðbeinandi/grunnskólakennari á sunnanverðum Vestfjörðum frá árinu 2014.

Listræn stjórnun

Kómedíuleikhúsið var stofnað árið 1997 og er fyrsta og eina atvinnuleikhús Vestfjarða. Leikhúsið hefur sett á svið 45 leikverk sem eiga það flest sameiginlegt að tengjast sögu Vestfjarða á einn eða annan hátt. Kómedíuleikhúsið hefur einbeitt sér að einleikjum sem hafa vakið mikla athygli bæði hér heima og erlendis. Stofnandi þess er Elfar Logi Hannesson, leikari, sem er fæddur árið 1971 og einnig uppalinn á Bíldudal. Elfar Logi hefur verið leikhússtjóri frá stofnum Kómedíuleikhússins. Hann hefur tekið þátt í öllum 47 leikritum leikhússins auk þess sem hann hefur tekið að sér ýmis hlutverk sem leikari ásamt því að sjá um leikstjórn ýmissa leikrita. Elfar Logi er vanur því að skipuleggja hátíðir, hann hefur meðal annars stjórnað Einleikjahátíðinni Act Alone frá árinu 2004 og er auk þess stofnandi þess.

Page updated

Report abuse