Nemendur velja hvort þeir vilji dunda sér við að leika og taka upp stuttmynd, stoppmynd eða fari um skólasvæðið og myndi það sem um er að vera og setji saman í stuttmynd.

Nemendum er skipt í hópa og vinna saman að verkefnum. Nemendur koma með síma eða myndavél með sér. Þeir fá í hendur þemu sem skal fara eftir. Ef veður leyfir fer mikill tími í útiveru við myndatöku svo þau þurfa að vera vel búin. Í endann förum við saman í skólastofu og förum yfir afraksturinn.

Farið verður yfir undirstöðuatriðin í pílukasti og léttir leikir spilaðir.

Í útieldun ætlum við að fara yfir hvað hægt er að gera með einföldum hætti þegar kemur að því að elda úti á kolum. Við munum baka brauð og köku, útbúa einfalt grænmetis kúskús og poppa okkur popp og gæða okkur á því á meðan við bíðum eftir ljúffengu brauði og köku.

Mikilvægt er að hafa gaman saman og klæða sig vel eftir veðri!

Kínaskák er spilað á handspil. Skipt er í 4 manna hópa og spilað eftir ákveðnu ferli. Kínaskák er orðin vinsæl víða um land og eru margir klúbbar í gangi víðsvegar um landið. Haldið er nokkurs konar Íslandsmót árlega þar sem spilarar hittast og hafa þar gaman.

Um er að ræða tvískiptan tíma í íþróttahúsinu þar sem annars vegar er unnið með ringó og hins vegar blak.

Í báðum greinum er unnið með grunntækni og síðan spilað.

Hvað er ringó ?

Ringó svipar nokkuð til blaks en í stað bolta eru notaðir tveir gúmmíhringir, sem liðin kasta yfir net og reyna að koma í gólf hjá andstæðingnum. Aðeins má grípa hringina með annarri hendi og þar sem tveir hringir eru á lofti í einu verður oft æði mikið líf og fjör á vellinum. Spilað er á blakvelli í fjögurra(sex manna) manna liðum og þátttakendur þurfa ekki að búa yfir neinni sérstakri kunnáttu eða getu annarri en að geta gripið með annarri hendi og kastað yfir netið. Ringó er því frábær íþrótt fyrir fólk á öllum aldri og skemmtilegt hópefli fyrir fjölskyldur, vinahópa og vinnustaði.

Við byrjum á því að liðka okkur og styrkja í jóga. Í lokin á jógatímanum tökum við slökun. Þá skellum við okkur í Zumba og dönsum. Þar á eftir förum við í leiki. Mikið fjör, mikið gaman og mikið brosað.

Nemendur fræðast um bræðslu á vaxi og kertagerð og fá að steypa kerti.

Farið verður yfir helstu reglur í félagsvist og spilað. Hver fær flest stig? Hver situr lengst?

Kynning á íslenskri ull og hvernig ullarvinnsla var heima á sveitabæjum á Íslandi fyrir tíma vélvæðingu.

Nemendur kemba ull og læra að spinna á rokk.

Allir taka þátt í að skapa sama listaverkið. Við ætlum að skoða mismunandi útfærslur af veggmyndum og tilgang þeirra og menningargildi.

Finnum okkur svo þema, vinnum saman út frá því og krotum okkar eigin veggmynd. Öll saman á eitt stórt blað.

Hér er aðal markmiðið að hver og einn fái frelsi til þess að teikna/mála með sínum eigin stíl en á sama tíma að vinna í hópi. Útkoman verður síðan: skemmtilega fjölbreytt ein heild.

Endursköpun þekktra listaverka með sjálfan sig í listaverkinu. Unnið með pappír, liti, textíl o.fl.

Í hár- og förðunarvali ætlum við að leika okkur með alls kyns farðanir, bæði hefðbundnar farðanir og body paint. Þá ætlum við líka að prófa okkur áfram með heit járn og fléttugerð.

Endilega komið með eigin förðunarvörur, heit járn og hárbursta að heiman.

Kennt verður hvernig hægt er að búa til dýrindis mola með ýmsum bragðtegundum.

Farið verður yfir grundvallaratriði í almennri framreiðslu eins og uppdekkingu borða, servíettubrot og frágang. Farið verður yfir samskipti við viðskiptavini, hreinlæti og snyrtimennsku og eitthvað fleira skemmtilegt eins og blómaskreytingar kokkteilagerð og jafnvel kokkteilkeppni. Góður grundvöllur sem hægt er að nýta í öllum þjónustutengdum störfum.

Í lok dagsins mun Margrét Alda Magnúsdóttir, forvarnafulltrúi lögreglunnar, vera með fræðslu og umræður fyrir nemendur þar sem umræðuefnið verður m.a. samskipti á netinu.