本土語文學創作比賽

數念阿公    作者:王建文主任

從細漢我和阿公的感情上好，伊上捷騎鐵馬載我佇庄跤四界踅，一四界佮人開講，啊我嘛上愛共綴前綴後,連去巡田水，搭草，牽罟，割稻子、抱冬瓜我嘛要綴，跟伊做伙就是誠快樂，因為伊的脾氣上好，永遠攏是笑瞇瞇的，永遠攏是笑臉面對每一个人、每一件代誌，自細漢到大漢在來嘛毋捌看伊發脾氣過；勤儉的伊這一世人差不多攏咧種田，那種田那出海掠魚，佇農暇時嘛無一時閒，做土水工，共人鬥割稻仔，挽冬瓜甚至到基隆碼頭去搬貨，我猶原會記得國中彼年歇熱綴阿公去抱冬瓜，認真做代誌袂拖沙的阿公，攏無歇睏，一直做，汗流傷濟煞來致使跤糾筋，予人看著真毋甘；就是這款認真打拚的態度，予頭家攏誠愛倩伊來鬥相共，他常在共我講：甘願予人ㄆ一，嘛無愛ㄆ一別人；後來，厝裡的田地租予人做魚池，骨力的伊嘛無一時閒，他利用厝跤狹細的空地，田岸邊，大路邊，別人拋荒的田，共伊開墾做菜股，家己種菜，他常講：市仔賣的攏會噴農藥，咱家己種的食了較安心；所以他堅持毋噴農藥，早暗掠蟲；用無愛的菜葉做成有機肥就是為著予遮的囝孫吃了放心佮健康；只要阮一通電話：「阿公！阮無菜矣！」，阿公就會佇透早去菜園仔挽菜轉來、菜揀好等阮轉來提，全家人食這號新鮮又閣健康的菜，食甲真歡喜，有時陣閣會叫我加提一寡仔轉去分厝邊隔壁，因攏真欽羨我有一个遮爾好的阿公。佇我的心目中，阿公真正厲害，勤儉的伊看著物件歹去嘛毋甘掉，總是會當將別人無愛的物件修理、修改一下，閣共伊變成會當閣再利用的物件，親像這馬厝裡用的布拖仔，蚊ㄕㄨㄣˋ，攏是阮阿公家己做的，椅仔、櫃仔嘛是家己釘的抑是將人無愛的提來修理理閣再用，縛菜瓜棚，敲戶橂，鑿(一ㄚˋ)窗仔，貼thai3-lu3逐項都家己來，伊才是正港的DIY達人，我咧想：我應該有種著伊，才會愛釘東釘西的；我的阿公雖然沒機會讀冊，毋過伊的頭腦真巧，親情朋友的名佮電話、甚至厝裡的開銷，萬樣代誌伊攏記牢牢，無一項漏勾，家己學寫字、學算數，我常常在講：「阿公你有夠巧ㄟ，你若有讀冊一定做總統。」伊每一擺攏予我弄甲笑咳咳；阮阿公阿嬤兜雖然住佇海邊的庄跤，風飛砂真大，毋過愛清氣的伊厝裡厝外攏摒掃甲一點仔砂都無，菜股嘛整理甲清清氣氣，連一點仔雜草都無；衫櫥內的衫疊得整整齊齊，親像豆腐角仝款。從細漢到大漢，我看阿公就親像是一欉大樹，勇ㄎㄟˋㄎ ㄟˋ徛咧共阮蔭影，保護著阮；如今一時間這欉大樹雄雄煞倒落去，毋過伊這世人，勤儉、骨力、愛清氣、好性地，為阮遮的囝兒序細所建立起來的好模範，卻是深深留佇阮每一個人的心肝頭。無閒86年的阿公，這馬佛祖接引伊到無煩無惱的西方極樂世界做菩薩，阮雖然毋甘，毋過嘛是著放下，因為無閒一世人的伊總算有機會好好仔歇睏矣。「阿公！若有後世人，我欲閣做你的孫來予你疼；阿公！~阮永遠都懷念你。」