home

1Ke Matome thata kheepe, Ke rema ga tee ka letšha.                              

Ke Mokoena mo ka mookatle,

Moroka wa meetse a pula,

Motsheakoma a mogale ke maroba,

O se bone motse ke maroba,

Meetse a pula a kwa gona.

2Ke Mokoena mo ila lehlaka,

Mmina jeka la bodupe,

Mmina noga ya meetsing.

Ke motho wa bo maboswina a Jelele,

Motho wa gore, go longwa ke boswina (menang) bja hwa.

3Ke batho ba Ramosibudi a Petlo,

Ba, Ramodjadji ke mo šaba ntlong,

Mo šaba tšhipi tša makgowa,

Ba re, Modjadji ke Mma-leakhobela,

La a khobela, ka lala ka tsela,

Ke mohlolo se na moloti,

Mo lota ke mabu a tsela.

4Ke motsheana mohlele betla,

Batho ba ba boyago Bodupe boupa lehlole,

Ga Mma, mogo wa matswele-Phusela,

Go na koa ga mogo mmukwa dihlole,

Mo la bangwe ba eja mafotla.

5Ke batho ba Mogale-a-Petlo,

Dibetlwa di betlwa bangwene,

Wa madimabe a fahlwa,

Ke petlwa ye e kwago godimo e betlilwe,

Ya re go fihla fase, ya betla dingwe.

6Ba re, ge ba itheta, ba re,

A gee maakana, phiri ya bogwabo, (go loka)

Ya lala le kgomo šakeng,

Bja re go sa, ya nyaka nama.

Ba re, o llelang o letše nayo šakeng.

7Ke tšhiwana, Ra-Modula noši,

Ke Ra-modula noši Mohlatlareng,

Mohlatlareng ga bo Moemela,

Le ema ka more lepipse,

La ema le nooši le ka wa

8Re ba letšibogo le wela molapo,

Nokeng-Kgolo ya mabitše,

Le Bakgaga ba wela ka lona,

9Ke batho ba go boya Bokgaga,

Bokgaga bja Mmakubela le Monyewete,

Ke Bokgaga bja mahlapane ka mapoto,

Wa hlapa ka meetse o a paologa.

10Agee Mogale,

Agee Motsheakoma,

Kgwadu ya meetse.