Tāvs myusu
Tāvs myusu, kas esi debesīs, svēteits lai tūp Tovs vōrds, lai atnōk Tova vaļsteiba,
Tova vaļa lai nūteik kai debesīs, tai ari vērs zemes.
Myusu ikdīniškū maizi dūd mums šudiņ un atlaid mums myusu porōdus,
kai ari mes atlaižam sovim porōdnīkim, un naīved myusus kārdynōšonā, bet atpestej myusus nu ļauna. Amen.
***
Esi sveicynōta
Esi sveicynōta, Marija, žēlesteibas pylnō, Kungs ir ar Tevi.
Tu esi svēteita storp sīvītem un svēteits ir Tovas mīsas auglis Jezus.
Svātō Marija, Dīva Mōte, lyudzīs par mums, grēcinīkim tagad un myusu nōves stuņdē. Amen.
***
Gūds lai ir
Gūds lai ir Tāvam un Dālam, un Svātajam Goram, kai beja nu īsōkuma, tai tagad un vysod, un myužeigi myužam. Amen.
***
Credo (Es tycu)
Es tycu uz vīnu Dīvu, vysuvarenū Tāvu, dabasu un zemes, vysu radzamū un naradzamū lītu, Radeitōju.
Es tycu uz vīnu Kungu Jezu Kristu, Vīnpīdzymušū Dīva Dālu, pyrms vysim myužim nu Tāva dzymdynōtu,
Dīvu nu Dīva, gaismu nu gaismas, patīsu Dīvu nu patīsa Dīva, dzymdynōtu, na radeitu, byuteibā leidzeigu Tāvam, un caur kuru vyss ir radeits, un kurs myusu dēļ un myusu pesteišonas lobā ir nōcis nu dabasim, īmīsōjīs caur Svātū Goru nu Jaunovas Marijas un klivis cylvāks,
krystā pīkolts par mums Poncija Pilata laikā, cītis un apglobōts, trešajā dīnā augšancēlīs, kai pravītōts Rokstūs,
uzkōpis debesīs, sēd pi Tāva lobōs rūkas un otkon gūdeibā atnōs tīsōt dzeivūs un myrušūs, un Jō vaļdeišonai nabyus gola.
Es tycu uz Svātû Goru, Kungu un Atdzeivynōtōju, kas nu Tāva un Dāla izīt, kas ar Tāvu un Dālu teik leidzeigi pīlyugts un slaveits, kas ir runōjis caur pravīšim.
Es tycu uz vīnu, svātu, katōlisku un apostolisku Bazneicu. Es atzeistu vīnu kristeibu grāku pīdūšonai, gaidu myrušūs augšanceļšonū un dzeivi nōkamajā myužeibā. Amen.
***
Es tycu
Es tycu uz Dīvu, vysuvarenū Tāvu, dabasuun zemes Radeitōju un uz Jezu Kristu, Jō vīneigū Dālu, myusu Kungu, kas ir ījimts nu Svātō Gora, pīdzimis nu Jaunovas Marijas, cītis zam Poncija Pilata, krystā pīkolts, nūmiris un apglobōts, nūkōpis eļņē, trešajā dīnā augšancēlīs, uzkōpis dabasūs, sēd pi Dīva, vysuvarenō Tāva, lobōs rūkas, no kurīnes Jys atnōks tīsōt dzeivūs un myrušūs. Es tycu uz Svātū Goru, svātū katōliskū Bazneicu, Svātūs sadraudzeibu, grāku atlaisšonu, mīsas augšanceļšonūs un myužeigū dzeivōšonu. Amen.
***
KUNGA EŅGEĻS
V. Kunga eņgeļs pasludynōja Jaunovai Marijai,
R. Un jei ījēme nu Svātā Gora. Esi sveicynōta, Marija, žēlesteibas pylnā, Kungs ir ar Tevi. Tu esi svēteita storp sīvītem un svēteits ir Tovas mīsas auglis Jezus. Svātō Marija, Dīva Mōte, lyudzīs par mums grēciņīkim tagad un myusu nōves stuņdē.
V. Raug, es asu muna Kunga kolpyune,
R. Lai maņ nūteik pēc tova vōrda. Esi sveicynōta, Marija...
V. Un Vōrds kliva mīsa,
R. Un dzeivōja storp mums. Esi sveicynōta, Marija...
V. Lyudzīs par mums, svātō Dīva Dzemdeitōja!
R. Lai mes Kristus apsūlejumu toptu cīneigi. Lyugsimēs. Mes Tevi lyudzam, Kungs, īlej myusu sirdīs sovu žēlesteibu, lai mes, kas eņgeļa sludynōšonā asam pazynuši Kristus, Tova Dāla cylvāktopšonu, ar Jō cīsšonom un krystu tyktu īvasti augšanceļšonōs gūdeibā. Caur Jezu Kristu, myusu Kungu. Amen.
***
DEBESS KARALĪNE
(Leldīnu laikā)
Debess Karalīne, līksmojīs, alleluja,
Tys, kū Tu kai bārnu nesi, alleluja,
Augšancēlīs ir, kai teicis, alleluja,
Lyudz(īs) Dīvu par mums, alleluja.
V. Prīcojīs un līksmojīs, Jaunova Marija, alleluja,
R. Jo Kungs ir patīši augšancēlīs, alleluja!
Lyugsimēs. Dīvs, Tev ir labpaticis ar sova Dāla, myusu Kunga Jezus Kristus augšanceļšonūs īprīcynōt pasauli: mes Tevi lyudzam, aizbyldūt Jō Mōtei Jaunovai Marijai, ļauņ mums īmontōt myužeigōs dzeives prīcu. Caur Jezu Kristu, myusu Kungu. Amen.
***
Dīva Žāļsirdeibas krūneits
1.Apzeimej sevi ar krysta zeimi
2. Tāvs myusu …- 1 reizi
3. Esi sveicinōta Marija … - 1 reizi
4. Es tycu … (Credo) – 1 reizi
Uz rūžukrūņa lelajom zeileitem (1 reizi)
V.: Muyžeigais Tāvs, es upurēju Tev Tova meilō Dāla, Myusu Kunga Jēzus Kristus Mīsu un Asni, Dvēseli un Dīvišķeibu
R.: Kai pōrlūgumu par myusu un vysa pasauļa grākim.
Uz rūžukrūņa mozajom zeileitem (10 reizes)
V.: Jezus sōpeigūs cīsšonu dēļ
R.: Esi žāļsirdeigs mums un vysam pasauļam!
Nūslāgumā (3 reizes)
Svātais Dīvs, svātais, varenais Dīvs, svātais myužeigais Dīvs, apsažāloj par mums un vysu pasauli!
(3 reizes)
Jezu, es uzatycu Tev!
***
RŪŽUKRŪŅS
RŪŽUKRŪŅA DAĻU SADALEJUMS PA NEDEĻAS DĪNOM
Pyrmūdīn – Prīceigō daļa
Ūtardīn – Sōpeigō daļa
Trešdīn – Gūdeibas daļa
Catūrtdīn – Gaismas daļa
Pīktdīn – Sōpeigō daļa
Sastdīn – Prīceigō daļa
Svātdīn –Gūdeibas daļa
Sōkumā
Tāvs myusu..., 1x
Esi sveicynōta, Marija..., 3x
Gūds lai ir Tāvam..., 1x
Pēc kotra rūžukrūņa nūslāpuma:
Tāvs myusu...,
10 x Esi sveicynōta, Marija...,
Gūds lai ir Tāvam...,
V. Marija, bez īdzymtō grāka ījimtō,
R. Lyudz par mums, kas steidzamēs pi Tevis.
Privati lyudzūtīs, var pīvīnōt: Muns Jezu, atlaid mums myusu vaines, pasorgoj myususnu eļnes guņs un aizved vysas dvēseles uz dabasim, it seviški tōs, kurom vysvairōk vajadzeiga Tova žāļsirdeiba.
PYRMŌ DAĻA - PRĪCEIGŌ
Pyrmais nūslāpums
EŅGEĻA SLUDYNŌJUMS JAUNOVAI MARIJAI
Dīvs syuteja eņgeli Gabrieli uz Galilejas piļsātu, kas saucēs Nacarete, pi Jaunovas, kas beja sadarynōta Davida ciļts veiram, kam vōrds beja Jezups; un Jaunovas vōrds beja Marija. Un eņgeļs, īnōcis pi jōs, saceja: "Esi sveicynōta, žēlesteibas pylnō! Kungs ir ar tevi; tu esi svēteita storp sīvītem. Lyuk, tu ījimsi un dzemdēsi Dālu un nūsauksi jū vōrdā Jezus." (Sal. Lk 1,26 - 31)
Ūtrais nūslāpums
MARIJA APMEKLEJ SV. ELIZABETI
Marija, tamōs dīnōs cālusēs, steigšus aizgōja kolnūs, jūdu piļsātā. Un jei, īgōjuse Zaharija nomā, sveicynōja Elizabeti. Un nūtyka, ka Elizabetei, Marijas sveicynōšonu dzēržūt, bērneņš prīceigi sasakustēja jōs mīsōs un Elizabeti pīpiļdeja Svātais Gors; un jei skaļā bolsā sauce un saceja: „Tu esi svēteita storp sīvītem, un svēteits ir tovas mīsas auglis!” (Sal. Lk 1,39
Trešais nūslāpums
BETLEMES STALEITĪ PĪDZYMST JEZUS
Jezups nu Nacaretes piļsātas Galilejā nūgōja Judejā, Davida piļsātā, kas saucēs Betleme, tōpēc ka jys beja nu Davida noma un ciļts, lai pīsaraksteitu ar Mariju, sovu sadarynōtū, kas beja mōtes cereibōs. Un nūtyka, ka, jim tī asūt, pīnōce laiks, lai jei dzemdeitu. Un jei dzemdeja sovu pyrmdzymtū Dālu un ītyna jū auteņūs, un īlyka jū silē, jotim nabeja vītas mōjvītā. (Sal. Lk 1,4 -7)
Catūrtais nūslāpums
BĀRNA JEZUS UPURĒŠONA TEMPLĪ
Kod beja pagōjušas Mozus Lykumā nūteiktōs jūs škeisteišonōs dīnas, vacōki nese Jezu uz Jeruzalemi, lai jū stōdeitu Kungam prīškā. Un, lyuk, Jeruzalemē beja cylvāks, vōrdā Simeons. Nu Svātō Gora jys beja sajēmis atklōsmi, ka jys naredzēs nōves, pyrms nabyus uzlyukōjis Kunga Svaideitū.Jys pajēme Bārnu sovōs rūkōs, slaveja Dīvu un saceja: „Munas acis ir skatejušas Tovu pesteišonu, kū Tu sagatavōji vysu tautu prīškā: gaismu pogōnu apgaismōšonai un slavu sovai Izraeļa tautai.”(Sal. Lk 2)
Pīktais nūslāpums
BĀRNA JEZUS ATRASŠONA SVĒTNEICĀ
Jezups un Marija, kod Jezus beja divpadsmit godus vacs, pēc svātku īroduma gōja uz Jeruzalemi. Un, kod jī, izabeidzūt svātku dīnom, atsagrīze atpakaļ, Bārns Jezus palyka Jeruzalemē,bet jō vacōki Tū nazynōja. Un tī, naatroduši jū, atsagrīze Jeruzalemē, tū maklādami. Un nūtyka, ka pēc trejom dīnom tī jū atroda sēžam svētneicā storp Rokstu mōceitōjim, jimūs klausūtīs un jautojūt. Un vysi, kas jū dzērdēja, beja pōrsteigti par jō gudreibu un atbiļdem. (Sal. Lk 2,42 -46)
ŪTRŌ DAĻA – GAISMAS
Pyrmais nūslāpums
JEZUS KRISTEIBA JORDANĀ
Jezus atnōce nu Galilejas uz Jorda nu pi Jōņa, lai tys jū kristeitu. Pēc kristeibas Jezus tyuleņ izkōpe nu yudiņa, un, lyuk, dabasi atsavēre, un jys redzēja Dīva Goru bolūža veidā nūsalaižam uz sevi. Un lyuk, bolss nu dabāsim saceja: „Šis ir muns meilais Dāls, kurs maņ ļūti pateik.” (Sal. Mt 3)
Ūtrais nūslāpums
JEZUS ATSAKLŌŠONA KŌZŌS KANĀ
Un trešajā dīnā Galilejas Kanā beja kōzas, un, kod pītryuka veina, Jezus Mōte saceja Jezum: „Jim nav veina.” Bet Jezus jai atbiļdēja: „Vēļ muna stuņde nav pīnōkuse!” Jō Mōte saceja apkolpōtōjim: „Dorit vysu, kū jys jums saceis.” Jezus saceja jim: „Pīpiļdit traukus ar yudini!” Un jī tūs pīpiļdeja leidz molom. Kod goldzinis nūgaršōja yudini, tys beja pōrvārsts veinā, un jys saceja leigavaiņam: „Ikvīns cylvāks vyspyrms pasnādz lobū veinu, bet tu taupeji lobū veinu leidz šam.”Šū sōkumu breinumim Jezus dareja Galilejas Kanā, atklōdams sovu gūdeibu, un jō mōcekli ticējam jam. (Sal. Jņ 2)
Trešais nūslāpums
DĪVA VAĻSTEIBAS SLUDYNŌŠONA UN AICYNŌJUMS ATSAGRĪZT
Un Jezus saceja: „Laiks pīsapiļdejis, un Dīva vaļsteiba tyvu klōt! Gondorit par grākim un ticit Evangelijam!” (Sal. Mk 1)Jezus izdzīdynōja trīkas slymū, saceidams: „Dāls, tovi grāki tev teik atlaisti! (..) Celīs, jem sovu gultu un ej sovōs mōjōs!” Un tys tyuleņ cēlēs un,gultu pajēmis, aizgōja, vysim radzūt, tai, ka vysi breinōjōs un gūdynōja Dīvu, saceidami: „Tū mes vēļ nikod naasam redzējuši.” (Sal. Mk 2,5; 11 - 12)
Catūrtais nūslāpums
PŌRSAVEIDŌŠONA TABORA KOLNĀ
Jezus jēme leidza Pīteri, Jākubu un Jōni un uzkōpe kolnā, lai lyugtu Dīvu. Un jō sejas izskots kliva cytaidōks, un jō apgērbs topa bolts un storōja. Un, lyuk, divi veiri sasarunōja ar jū; tī beja Mozus un Elija. Jī pasarōdeja gūdeibā; un tī runōja par jō gola nūrisi, kūjys pīpiļdeis Jeruzalemē.Bet Pīters un tī, kas atsaroda pi jō, beja mīga nūmōkti; un uzamūduši tī redzēja jō gūdeibu un divus veirus, stōvūt pi jō. Un Pīters saceja Jezum: „Mōceitōj, mums ir labi ite byut; mes taiseisim trejs teļtis: vīnu Tev, vīnu Mozum un vīnu Elijam.” Jim tai runojūt, pasarōdeja mōkūņs un apānōja jūs. Un bolss atskanēja padebesī, saceidams: „Šys ir muns meilais Dāls, jū klausit!” (Sal. Lk 9, 28 - 35)
Pīktais nūslāpums
EUHARISTIJAS ĪDYBYNŌŠONA
Pyrms Leldīnu svātkim Jezus, zynōdams, ka jō stuņde atnōkuse, lai nu šō pasauļa aizītu pi Tāva, mīļōdams sovejūs, kas beja pasaulī, mīļōja tūs leidz golam. (Jņ13, 1) Un Jezus, jim ādūt, pajēme maizi, svēteja tū, lauze, deve jim un saceja: „Jemit, šei ir muna Mīsa.” Un jys jēme bikeri, pasateice un deve jim; un tī dzēre nu tō. Un Jys tim saceja: „Šys ir muns jaunōs dereibas Asnis, kas par daudzim tiks izlīts.”(Mk 14, 22 - 24)
TREŠŌ DAĻA – SŌPEIGŌ
Pyrmais nūslāpums
KUNGS JEZUS LYUDZĀS OLIVDŌRZĀ
Jēzus, ceļus nūsametis, lyudze Dīvu, saceidams: „Tāvs, joTu vēlejīs, atjem šū bikeri nu manis! Tūmār na muns, bet Tovs prōts lai nūteik!” Un jys, nōves baiļu pōrjimts, lyudze Dīvu jō korstōk. Un jō svīdri kliva kai ašņa lases, kas pilēja zemē. (Sal. Lk 22,41 - 44)
Ūtrais nūslāpums
KUNGS JEZUS TEIK ŠAUSTEITS
Pilats otkon uzrunōjajūs un saceja: „Kū tod jyus gribit, lai es doru ar jūdu Kēneņu? ”Bet tī otkon klīdze: „Sit jū krystā!” Un Pilats, grybādams ļaudim iztapt, atlaide tim Barabu, bet Jezu šausteja un nūdeve, lai jū systu krystā. (Sal. Mk 15,12 -15)
Trešais nūslāpums
KUNGAM JEZUM GOLVĀ UZLĪK ĒRŠKUKRŪNI
Un karaveiri, nūpynuši krūni nu ērškim, lyka tū Jezum golvā un nīdri lobajā rūkā. Un tī, jō prīškā ceļūs masdamīs, izsmēja jū, saceidami: „Esi sveicynōts, jūdu Kēneņ!” (Sal. Mt 27,29)
Catūrtais nūslāpums
KUNGA JEZUS CEĻŠ UZ GOLGOTU
Un Jezus, nasdams sovu krystu, gōja uz tū vītu, kas saucēs Golvas kausa vīta, bet ebrejiski Golgota. (Sal. Jņ 19,17)
Pīktais nūslāpums
JEZU PĪNOGLOJ PI KRYSTA, UN JYS MĒRST ŠAUSMEIGŌS CĪSŠONŌS
Un, kod jī nūnōce vītā, kas saucās Kalvarija voi Golgota, jī tur syta Jezu un slapkovas krystā: vīnu pa labi, ūtru pa kreisi. Un tys beja ap sastū stuņdi, un tymsa īsastōja leidz pat deveitajai stuņdei. Un saule tyka aptymsōta, un prīkškors svētneicā pōrpleisa vydā pušu. Un Jezus sauce skaļā bolsā, saceidams: „Tāvs, Tovōs rūkōs es atdūdu sovu goru!” Un jys, tū saceidams, izdvese goru. (Sal. Lk 23,33.44 - 46)
CATŪRTŌ DAĻA – GŪDEIBAS
Pyrmais nūslāpums
KUNGS JEZUS AUGŠANCEĻĀS
Eņgeļs uzrunōja sīvītes un saceja: „Nasabeistit, jo es zynu, ka jyus meklejat Jezu, krysta systu. Jō šeit nav, jojys ir augšancēlīs, kai beja sacejis. Nōcit un aplyukojit tū vītu, kur Kungs beja nulykts!” (Sal. Mt 28,5 - 6)
Ūtrais nūslāpums
KUNGS JEZUS UZKŌP DABASŪS
Kungs Jezus pēc tam, kod ar mōceklim beja runōjis, uzkōpe dabasūs un sēd pi Dīva lobōs rūkas. Bet jī gōja un sludynōja vysur; un Kungs jim paleidzēja un mōceibu apstyprynōja ar leidzejūšom zeimem.(Mk16,19 -20)
Trešais nūslāpums
SVĀTAIS GORS NŪSALAIŽ PŌR JAUNOVU MARIJU UN APOSTOLIM
Kod Vosorsvātku dīna beja pīnōkuse, pīpeši nu dabasim nōce ryukūņa, it kai stypra vēja pyusma, un pīpiļdeja vysu mōju, kur sēdēja Vysusvātō Jaunova Marija un apostoli. Un pasarōdeja it kai guņs mēles, kas sasadaleja un nūsalaide uz ikvīna nu jim. Un vysi tyka Svātō Gora pīpiļdeiti. (Sal. Apd 2,1 - 4)
Catūrtais nūslāpums
VYSUSVĀTŌ JAUNOVA MARIJA AR MĪSU UN DVĒSELI TEIK UZJIMTA DABASŪS
Vysuvareigais, myužeigais Dīvs, Tu bezvaineigōs Marijas, Tova Dāla Mōtes, mīsu un dvēseli pajēmi dabasu gūdeibā, dori, lai mes pastōveigi ryupātūs par goreigajim lobumim un nūpeļneitu sev leidzdaleibu jōs gūdeibā. („Romas Misale”)
Pīktais nūslāpums
MARIJA TEIK KRŪŅŌTA PAR DABASU UN ZEMES KARALĪNI
Tod pi dabasim pasarōdeja lela zeime: saulē tārpta sīvīte un mēness zam jōs kōjom, bet jai golvā divpadsmit zvaigžņu krūņs. (Atkl 12,1)
Es tycu uz Dīvu, vysuvarenū Tāvu, dabasuun zemes Radeitōju un uz Jezu Kristu, Jō vīneigū Dālu, myusu Kungu, kas ir ījimts nu Svātō Gora, pīdzimis nu Jaunovas Marijas, cītis zam Poncija Pilata, krystā pīkolts, nūmiris un apglobōts, nūkōpis eļņē, trešajā dīnā augšancēlīs, uzkōpis dabasūs, sēd pi Dīva, vysuvarenō Tāva, lobōs rūkas, no kurīnes Jys atnōks tīsōt dzeivūs un myrušūs. Es tycu uz Svātū Goru, svātū katōliskū Bazneicu, Svātūs sadraudzeibu, grāku atlaisšonu, mīsas augšanceļšonūs un myužeigū dzeivōšonu. Amen.
LITANIJAVYSUSVĀTŌKŌS JAUNOVAS MARIJAS GŪDAM
Kyrie, eleison!
Christe, eleison!
Kyrie, eleison!
Kristu, klausi myus!
Kristu, uzklausi myus!
Dīvs Tāvs nu dabasim, apsažāloj par mums!
Dīvs Dāls, pasauļa Pesteitōj,apsažāloj par mums!
Dīvs Svātais Gors, apsažāloj par mums!
Svātō Trejadeiba, vīns Dīvs, apsažāloj par mums!
Svātō Marija, lyudz Dīvu par mums!
Svātō Dīva Dzemdeitōja, ……..
Svātō jaunovu Jaunova, ……..
Jezus Kristus Mōte, ……..
Bazneicas Mōte, ……..
Dīva žēlesteibas Mōte, ……..
Vysuteirōkō Mōte, ……..
Vysuškeistōkō Mōte, ……..
Nanūzīdzeigō Mōte, ……..
Vysod jaunaveigō Mōte, ……..
Mīleigō Mōte, ……..
Breineigō Mōte, ……..
Loba padūma Mōte, ……..
Radeitōja Mōte, ……..
Pesteitōja Mōte, ……..
Vysugudrōkō Jaunova, ……..
Gūda cīneigō Jaunova, ……..
Slavejamō Jaunova, ……..
Vareigō Jaunova, ……..
Žēleigō Jaunova, ……..
Uzticeigō Jaunova, ……..
Taisneibas spūguļs, ……..
Gudreibas krāslys, ……..
Myusu prīcas īmeslis, ……..
Goreigais trauks, ……..
Cīnejamais trauks, ……..
Sevišks dīvakolpōšonas trauks, ……..
Goreigō rūze, ……..
Davida tūrnis, ……..
Zylūņkaula tūrnis, ……..
Zalta noms, ……..
Dereibas skreine, ……..
Dabasu durovas, ……..
Reita zvaigzne, ……..
Sliminīku veseleiba, ……..
Grēcinīku glōbēja, ……..
Bēdeigūs īprīcynōtōja, ……..
Kristticeigūs paleigs, ……..
Eņgeļu Kēnenīne, ……..
Patriarhu Kēnenīne, ……..
Pravīšu Kēnenīne, ……..
Apostolu Kēnenīne, ……..
Mūcekļu Kēnenīne, ……..
Izzinēju Kēnenīne, ……..
Jaunovu Kēnenīne, ……..
Vysu Svātūs Kēnenīne, ……..
Bez pyrmdzymtō grāka ījimtō ……..
Kēnenīne, Dabasūs uzjimtō ……..
Kēnenīne, Svātō Rūžukrūņa Kēnenīne, ……..
Gimiņu Kēnenīne, ……..
Mīra Kēnenīne, ……..
Mōraszemes Kēnenīne, lyudz Dīvu par mums!
Dīva Jārs, kas nūceļ pasauļa grākus,atlaid mums, Kungs un Dīvs!
Dīva Jārs, kas nūceļ pasauļa grākus, uzklausi myus, Kungs un Dīvs!
Dīva Jārs, kas nūceļ pasauļa grākus, apsažāloj par mums!
ZAM TOVA PATVĀRUMA steidzamēs, svātō Dīva Dzemdeitōja! Myusu lyugšonas, lyudzam, nasmōdej myusu vajadzeibōs! Bet nu ikvīnas nalaimes vysod myus izglōb, slaveigō un svēteigō Jaunova! Myusu Vaļdneica, myusu Vydutōja, myusu Aizbyldynōtōja! Samīrynoj myus ar sovu Dālu! Īteic myus sovam Dālam! Stōdi myus sovam Dālam prīškā!
V.Lyudzīs par mums, svatō Dīva Dzemdeitōja!
R.Lai mes Kristus apsūlejumu toptu cīneigi!
Lyugsimēs! Kungs Dīvs, mes Tevi lyudzam, dori, lai myusu, Tovu kolpu, dvēsele un mīsa vīnmār byutu vasala un ar slavejamōs Vysusvātōkōs Jaunovas Marijas aizbiļdeibu mes tyktu atbreivōti nu laiceigō ļaunuma un prīcōtūs myužeigā dzeivē. Caur Jezu Kristu, myusu Kungu. Amen.
VEĻTEIŠONŌS VYSUSV. J. MARIJAS BEZVAINEIGAJAI SIRDEI
(publiski var laseit Dīvamōtes svātkūs un mēneša I sastdīnōs)
Vysusvātōkō Jaunova, myusu Kunga Jezus Kristus Mōte, mes īpašā veidā veļtejam sevi Tovai Bezvaineigajai Sirdei. Ar šū veļteišonūs mes atjaunojam kristeibas svātsūlejumus un saskaņā ar Evangeliju uzajamam pīnōkumu īkšeji atsagrīst, atsaraiseit nu patmīleibas un nu lātas pīkōpeibas pasaulei, lai mes byutu piļneigi Tovā reiceibā, vysod pyldūt dabasu Tāva grybu. Bez tam mes uzticim Tev, Vysulobō Mōte, sovu kristeigū aicynōjumu. Mes gribim veidōt sovu dzeivi tai, kai Tu vēlejīs: gondareišonas un lyugšonas gorā. Mes gribim ar dedzeibu pīsadaleit svātajā Mises Upurī, apostoliski dorbōtīs, ik dīnas dīvbejeigi skaiteit rūžukrūni un - atbylstūši Evangelijam - prīceigi nest dzeives upurus, byut spējeigim atsateikt un gondareit. Mes gribim byut kristeigūs tykumu un škeisteibas paraugs pasaulei. Mes apsūlom byut uzticeigi Svātajam tāvam un vīnmār byut vīnōti kūpā ar jō veiskupim un prīsterim. Tovā Mōtes vadeibā un aizsardzeibā mes gribim byut apostoli, lai veicynōtu tik napīcīšamū lyugšonas un mīlesteibas kūpeibu ar pavestu, kas ir Bazneicas mōceitōjsun gons. Mes lyudzam Tevi, Bazneicas Mōte, snēgt jam sovu īpašūaizsardzeibu.Taipat mes Tev apsūlom lyugtīs par vysom dvēselem, vest cylvākus pi Tevis un pamudynōt jūs uz Tovas Sirds gūdynōšonu. Tai kai ļaunums un grāks pōrplyudynoj pasauli, mes ar paļōveibu paceļam skotu uz Tevi, žāļsirdeigō Mōte, un lyudzam glōbt vysus sovus bārnus. Tu, žēleigō un laipnō, Vysusvātōkō Jaunova Marija!
LYUGŠONA SV. JEZUPAM
Pi Tevis, svātais Jezup, mes steidzamēs sovōs bādōs, un, Tovas Vysusvātōkōs Leigovas paleidzeibu pīsaukuši, ari Tovas aizbiļdeibas lyudzam. Tōs mīlesteibas dēļ, kas Tevi vīnōja ar bezvaineigū Jaunovu, Dīva Dzemdeitōju, un tōs tēviškōs gōdeibas dēļ, ar kaidu Tu ryupējīs par Bērneņu Jezu, mes Tevi pazemeigi lyudzam, pasaver žēleigi uz montōjumu, kas atpērkts ar Kristus Kunga Asni, un myusu vajadzeibōs paleidzi mums ar sovu spēceigū pōrstōvnīceibu. Sorgoj, ryupeigais Svātōs gimines sorgs, izradzātūs Jezus Kristus bārnus, izglōb myusus, vysudōrgōkais Tāvs, nu ikvīnas sasamaitōšonas un moldim, styprynoj myusus, vysuceņteigōkais Aizbiļdni, ar debeseigu spāku šymā karā pret timseibas goru. Un kai cytkōrt Tu izglōbi Bērneņu Jezu nu jam draudūšom brīsmom, tai ari tagad sorgoj svātū Dīva Bazneicu nu īnaidnīku uzbrukumimun ikvīnas nalaimes! Uzjem myusus vysus sovā pastōveigā patvārumā, lai mes, pēc Tova parauga dzeivōdami un Tovas paleidzeibas styprynōti, varātu dīvbejeigi dzeivōt, svēteigi nūmērt un īmontōt myužeigū līgsmeibu debesīs. Amen.
LYUGŠONA SVĀTŌ TĀVA NŪDŪMĀ
(rūžukrūņa nūslāgumā)
Sovūs lāmumūs naizdybynojamais Tāvs,
kurs sovu kolpu, myusu pavestu N.,esi īcēlis par
vyspōrejōs Bazneicas gonu, pazemeigi Tevi lyudzam,
dōvoj jam napīcīšamōs žēlesteibas, lai jys izpiļdeitu
Tovus nūdūmusBazneicā un pasaulē.
Styprynoj jō apostoliskū dedzeibu,
lai tai pa vysu zemi tyktu pagūdynōts
Tovs svātais Vōrds.
Pastōveigi vairoj jō mīlesteibu uz Tevi un cylvākim,
lai caur jō kolpōjumu Bazneicā
tyvynōtūs un nūsastyprynōtu Tova Vaļsteiba,
bet vysu cylvāku sirdis
pasakļautu Tovai svātajai grybai.
Dabasu Tāvs,
dori, lai pavesta aicynōjums pījimt
Kristu un jō mīlesteibu
vastu tautas uz vīnōteibu,
bet sovstarpeja pīdūšona
nastu pasaulei Tovu žāļsirdeibu.
Meilais Dīvs,
pazemeibā un paļōveibā mes lyudzam šū žēlesteibu,
vīnōti ar Jezus Mōti,
Mōras zemes Karalīni. Amen.