ការអប់រំគ្រូគឺជាបេសកកម្មរបស់គ្រូឧទ្ទេសបច្ចុប្បន្ន ដើម្បីធ្វើឱ្យពួកគេក្លាយជាគ្រូ​បង្រៀននាសតវត្សទី២១ ដែលពួកគេអាចនឹងមានសមត្ថភាពគ្រប់គ្រាន់ផ្នែកវិធីសាស្ត្របង្រៀន ចំណេះ​​ដឹងលើមុខវិជ្ជា ការវាយតម្លៃក្នុងការបង្រៀន និងការស្រាវជ្រាវប្រតិបត្តិ។

ការប្តេជ្ញាចិត្តក្នុងនាមជាគ្រូឧទ្ទេសម្នាក់នៅវិទ្យាស្ថានគរុកោសល្យរាជធានីភ្នំពេញ គឺត្រូវតែចូលរួមអនុវត្តភារកិច្ច និងបំពេញតួនាទីឱ្យបានខ្ជាប់ខ្ជួនដើម្បីសម្រេចឱ្យបាននូវគោលបំណងរបស់វិទ្យាស្ថានប្រកបដោយប្រសិទ្ធភាព និងប្រសិទ្ធផលខ្ពស់។

វិធីសាស្ត្របង្រៀនបែបស្ថាបនានិយមគួរតែប្រើប្រាស់ក្នុងការបង្រៀន និងរៀនក្នុងសតវត្សនេះនៅតាមសាលាមធ្យមសិក្សា។ ដូច្នេះ គរុនិស្សិតកំពុងសិក្សានឹងត្រូវទទួលបាននូវការបណ្តុះបណ្តាលចំណេះដឹងឯកទេសលើមុខវិជ្ជាដែលខ្លួននឹងបង្រៀន និងវិធីសាស្ត្របង្រៀន​បែបសកម្មដើម្បីជំរុញសកម្មភាពសិក្សារបស់សិស្ស ដើម្បីឱ្យពួកគេសម្រេចបាននូវលទ្ធផល​សិក្សាដែលរួមមាន វិជ្ជាសម្បទា បំណិនសម្បទា និងចរិយាសម្បទា។