Este proxecto xorde despois de coñecer a proposta do concurso internacional Wisibilízalas, cuxo obxectivo principal é destacar a loita da muller contra os estereotipos que asocian o traballo científico, únicamente co xénero masculino.

A través deste proxecto pretendemos conseguir varios obxectivos:

1. Dar visibilidade a mulleres que estudaron carreiras de ciencias e desenvolven a súa actividade profesional nese ámbito.
2. Potenciar referentes femininos no ámbito da ciencia e a tecnoloxía próximos, mulleres que estudaron no noso centro, que viven no noso concello ou que teñen alumnado matriculado no centro.
3. Coñecer novas mulleres referentes nos ámbitos científicos e que traballan en profesións.
4. Xerar reflexión na escola e na aula sobre a visibilidade das mulleres na ciencia e as posibilidades de futuro.
5. Achegar información real sobre os diferentes desempeños nas carreiras de ciencias.

O equipo de ArteixoenFeminino está formado por alumnado de 5º curso de Educación Primaria do CEIP Ponte dos Brozos, en Arteixo.

No noso sitio web atoparedes mulleres arteixáns, galegas, españolas ou de México que traballan preto de nós ou non, e que coa súa aportación espertaron a curiosidade polas carreiras científicas, enxeñerías e desenvolvemento das TIC, sen distinción de xénero.

Convidámosvos a que coñezades a estas mulleres referentes que se caracterizan por ser unhas bravas mulleres loitadoras que perseguiron os seus soños e nunca, nunca, deixaron de loitar por eles.

Equipo #ArteixoenFeminino