6.鼓勵學校及教師以母語為主題進行創作、研究及發表

改編閩南語表演曲目：《世界恬靜落來的時》、《祝福》

許淑慧老師作品：《我上期待的日子》

我上期待的日子

許淑慧

　　我是一個過動症的囝仔，碼是愛作夢的囝仔，自細漢人佇繪圖攏是繪人繪花繪樹仔，我是繪恐龍繪蚼蟻繪草螟，妄想騎一隻蚼蟻入去蚼蟻巢走迷宮，妄想划一片樹葉仔隨水溝仔水流過公園流過愛河流去海裡，妄想騎一隻田嬰飛去看彩虹，人坐佇教室，心早著隨樹仔頂的鳥仔飛去五霄雲外  。阮阿爸看我常常恍神不用心，就送我去學行棋，這招有影合我的意，我常妄想家己是帶領軍隊的將軍，佇戰場殺出重圍去救被圍困的兵馬，所以我真愛行棋參加比賽。不過，我還是愛作夢不愛讀書，阮阿爸對我只有搖頭，不知影後日仔我會當作啥貨？

　　近來無人機屢來屢濟人耍，科技發達，無人機碼用途屢來屢濟，聽講會當拿來作宅配，拿來作偵察機，拿來救火，裝炸彈拿來作武器，碼會當裝鏡頭拿來拍影片，因為無人機會當深入人無法度入去的所在，所以有真濟神秘的所在，透過無人機的錄影展現佇咱的眼前。我不愛讀書，但是我對無人機真著迷，伊若親像我細漢時的田嬰草螟仔，會當引我的目啁四界飛。

　　自從我看著「看見台灣｣這個紀錄片了後，毋單是我，相信規台灣的人攏雄雄發現台灣真正有夠娞有夠罕見，台灣三分之二是山地，攏由綠色的森林掩蓋，遮是亞熱帶但是三千公尺以上的懸山寒天有機會掩覆著白色的冰雪，親像玉山就是寒天山頂積雪，未輸白玉仝款，日光下看起來遐尼晶瑩潔白，神聖安詳；台灣四面環海，藍色的海岸彎彎越越，白色的波浪親像白色的花蕊開佇藍色的草埔，漁船佇海浪中追逐魚群，飛魚鬼頭刀有當時呀衝出海面飛。澎湖的島嶼群像棋弈仔散落佇台灣海峽，蘭嶼和綠島、龜山島哪像浮出太平洋的海翁，亦有金門和馬祖親像北海的一隊戰船維護著台灣頭的安全。綠色的水田佇日頭下底親像一面鏡，照著藍天白雲，亦照著台灣農村寧靜富庶的倒影。這攏是齊柏林大導演辛辛苦苦上山落海，抑是坐飛機對空中攝落來的，伊欲予大家看著台灣咱的家是外尼呀特別，希望大家同齊來疼惜台灣咱的母親，我真佩服伊為台灣所奉獻的一切，真可惜！齊導演為著拍「看見台灣｣這部電影，坐直升機對花蓮起飛，誰知影竟然飛機失事煞來犧牲性命，一個將一生奉獻予台灣環境保護的戰士死在保護台灣的工作上，伊的目啁最後看的碼是鳥目台灣，伊留予世間人無限的懷念和感傷。我在想如果我若有無人機，我碼欲學習齊導演，將台灣的娞攝下來宣傳出去。

　　但是，台灣的美麗中有深深的哀愁，有真濟所在未著經濟的理由過度開發，山林中一塊一塊挖土機lu過的所在，著那像規粒山乎人開腸剖肚安爾；青Long Long的田中央起一棟一棟的工場，一間一間的別墅，那親像囝仔耍的積木不小心落佇青色的地毯遐爾Ak CAk，海岸積規堆的垃圾，熊熊看掠準是北極冰原的企鵝勒。我若是會曉飛，我要將台灣山林海岸過度開發的真相公布予逐家知，一塊一塊的非法茶園、高麗菜園、露營區是冒著土石流的風險是在啃食台灣的骨和肉，河川汙染、魚源枯竭、空氣汙染等等現象，攏是人為的破壞，我若有無人機，我會當利用高空鏡頭，將台灣的美麗和哀愁公布出來，為Fomosa美麗寶島的環保來打拚。所以我決定大學欲讀視覺傳達系，我欲用鏡頭來紀錄台灣的人文和景緻，阮阿爸答應我若願意認真學習，等我滿18歲生日那天，要買無人機予我做禮物，開始練習操作，遐是我上期待的日子，有盼望就有動力，我會認真打拚，未來做一個紀錄片的導演。