TEKS UCAPAN ALU-ALUAN
Dr. LAMBAT ANAK LINDONG
PENGARAH INSTITUT PENDIDIKAN GURU KAMPUS RAJANG
e-SEMINAR BAHASA DAN BUDAYA IBAN TAHUN 2020
12 OKTOBER 2020 (KHAMIS)
Salam Sejahtera.
Terlebih dahulu, saya melafazkan setinggi-tinggi kesyukuran kepada Tuhan, kerana dengan izin-Nya, maka dapatlah kita berkumpul bersama-sama pada hari ini bagi menjayakan e-Seminar Bahasa dan Budaya Iban Tahun 2020 yang dianjurkan oleh Institut Pendidikan Guru Kampus Rajang, meskipun dalam norma baharu ekoran pandemik COVID-19. Saya ingin mengambil kesempatan ini untuk mengucapkan terima kasih yang tidak terhingga kepada semua pembentang dan peserta yang hadir kerana sudi meluangkan masa bersama-sama kita pada hari ini. Program ini tidak akan dapat direalisasikan jika tiada sokongan daripada kalian semua. Terima kasih sekali lagi saya ucapkan.
Tuan-tuan, puan-puan dan para hadirin yang dihormati sekalian
Izinkan saya meneruskan ucapan ini dalam Bahasa Iban. Program e-seminar kitai kesekali tu bisi pengelain mimit ari ke diatur ba taun-taun ke udah; ke taun tu kitai enda ulih ngatur pengawa tu sechara betimpai mua laban kitai agi dibalut pengerekai virus COVID-19 ke nyadi ukai semina ba menua kitai tang mega di serata dunya. Nya alai seriran enggau chara gawa dalam jeman norma baru tu, sehari tu Program e-Seminar Jaku enggau Budaya Iban dipejalaika ba dunya siber, ke alai deka dibantaika asil pansik enggau buah penemu bala panel perugu’ jaku enggau keretas kereja ari sekeda bala ke bisi masuk ungkup pengawa tu. Program tu mega ulih dipeda dalam tali arus nengah Webinar e-Seminar Jaku enggau Budaya Iban Taun 2020, IPG Kampus Rajang.
Tema seminar kesekali tu iya nya “Jaku Lati Bansa Pegari, Budaya Menyana Bansa Sedura”. Bekaul enggau nya, program e-seminar tu diatur dikena nyengkuran sereta nyungkak runding pasal pemansang jaku Iban, ngerembaika tradisyen ilmu ba bala intelektual, raban pengemeran ilmu enggau raban bansa Iban, sereta nempa siti tempara’ ilmu alai nerenak sereta ngemansangka jaku, litaricha enggau budaya Iban, ngambika nyadi waris ukai semina bansa kitai tang mega nyadi waris bansa Malaysia. Nya alai tinggi amat pengadang ati aku program tu ulih ngiri pemereti sereta meri penguntung ngagai semua kitai, kelimpah ari neriki’ pengeleda runding pasal pemesai guna waris jaku enggau budaya ba kitai Iban kelebih agi ba serak rebak baru ke diatu. Aku ngarika semua perayat IPG Kampus Rajang, ngarapka seminar kesekali tu ulih meri penemu enggau peneleba baru ngagai kitai ke enggau masuk seminar tu. Pia mega kelimpah ari nyapai tuju enggau objektif seminar tu, aku arapka nengah program tu kitai ulih ngempitka kaul enggau pangan diri ngambika kitai ulih begempung enggau berakup ngereja semua pengawa ke bekaul enggau bansa kitai.
Enggau awak tu mega, aku meri besai terima kasih ngagai bala panel perugu’ jaku, iya nya Datuk Patinggi Tan Sri (Dr.) Alfred Jabu Anak Numpang, Dato’ Seri Edmund Langgu, Profesor Madya Dr. Chemaline Osup enggau Encik Janang Ensiring ke udah kiruh amat meri buah penemu enggau sukung ngagai program tu. Bala kami sebuat mai kitai sama-sama ngukun penemu ke ditengkua kitai dalam seminar tu ngambika ulih dikena kita nempa jaku, budaya enggau bansa ke lati sereta pegari.
Terima kasih mega ngagai semua komiti pengereja pengawa enggau bala pengelicha ke udah kiruh meri diri gawa, sama-sama ngemujurka seminar tu. Pia mega, terima kasih ngagai semua bala ke udah sama kiruh mantu ngatur seminar tu.
Ke pengujung jaku, aku ngarika semua perayat IPG Kampus Rajang minta ampun enti sema bisi pengurang ba sepemanjai seminar tu diatur.
Arapka pengawa kitai sehari tu diberekat Tuhan.
Jaku lati, bansa pegari
Budaya menyana, bansa sedura
Nya aja, terima kasih.