ALEGIAK

Alegiak aukeratu ditugu unitate honetarako. Askotan animaliak protagonista diren istorio laburrak dira alegiak, eta beti izaten dute ikaskizun moral bat bukaeran, gogoetarako bidea ematen duena, hain zuzen ere. Prosan edo bertsoan egin daitezke. Historian zehar munduan izan diren alegiagile famatuen artean hauek aipa daitezke: mundu greko eta latinoko ordezkari gisa Esopo (Grezia, K. a. V. mendea) eta Fedro (I. mendea); denboran eta espazioan hurbilago, berriz, La Fontaine (Frantzia, XVII. mendea) eta Samaniego (Araba, XVIII. mendea). Egile horien alegia asko euskarara itzuli edo egokitu dira. Alegiak euskaraz landu dituztenen artean ditugu Juan Antonio eta Bizenta Mogel (XIX. mendea), Artxu (XIX.mendea), Iturriaga (XIX. mendea) eta Oxobi (XX. mendea), besteak beste.