Kennari:  Íslenskukennari og stærðfræðikennari

Í þessum áfanga er tækifæri fyrir alla nemendur sem vilja auka færni sína í íslensku og/eða stærðfræði óháð núverandi færni. Námsefni og yfirferð er aðlöguð að nemendum og markmiðum sem þeir setja sér í samvinnu við kennara. Nemendur hafa val um hvora smiðjuna þeir fara í frá viku til viku. 

Námsmat: Símat þar sem lögð er áhersla á góð vinnubrögð og sjálfstæði.

Kennarar:  María Málfríður Guðnadóttir og Lilja Íris Gunnarsdóttir, íþróttakennarar

Lögð er áhersla á að auka hreysti nemenda og efla heilbrigt líferni þeirra. Reynt verður að blanda saman innihreysti og útiveru. Nemendur kynnast t.d. golfíþróttinni og íslenskri glímu. Undirbúningur fyrir skólahreysti til þess að efla nemendur til dáða og gefa öllum kost á að taka þátt sem hafa áhuga.

Útivera: Þríþraut (hjóla, hlaupa og synda), gengið kringum Elliðavatn, gengið á Esjuna, fjöruþrek, sjósund í Nauthólsvík. Skíðaferð í Bláfjöll.

Inniæfingar: Þrek og þol þar sem fléttaðar eru saman skemmtilegar og óhefðbundnar æfingar.

Kaðallinn verður tekinn í gegn.

Stökkkraftsmælingar.

Nemendur þurfa að vera tilbúnir að taka þátt og leggja sig fram af áhuga og gleði.

Mens sana in corpore sano.
Heilbrigð sál í hraustum líkama.

Námsmat: Símat er allan veturinn, þátttaka, verkefni, virkni, áhugi og hegðun nemanda gildir til lokaeinkunnar.

Kennari/DM: Hanna Clara Minshull

Kanntu að spila DnD? Viltu læra? Í áfanganum búa nemendur sér til persónu og spila í gegnum ævintýri sem DM (dungeon master) stýrir á ensku. Áhersla verður lögð á samskipti spilara í hlutverkaleik. Einnig verða önnur spil spiluð.

Námsmat: Símat þar sem metin verður virkni og þátttaka nemenda, samskipti og virkni.

Þjálfari: Hermann Óli Bjarkason, knattspyrnuþjálfari

Tímarnir verða aðallega verklegir. Áhersla er lögð á þjálfun og þekkingu á leiknum, uppsetning á æfingu og tímaseðli. Förum yfir góðar og skemmtilegar fótboltaæfingar  sem eru bæði einstaklings- og hópmiðaðar.

Markmið:

• Að þekkja reglur í fótbolta

• að auka eigin færni í fótbolta

• að þekkja grunnatriði í þjálfun yngri flokka

• að kunna að setja upp æfingu fyrir aðra eða sjálfan sig með tímaseðli

Helsta verkefnið verður að setja upp æfingu fyrir hópinn og þjálfa út frá tímaseðli og áherslu atriðum.

Námsmat: Mæting og þátttaka í tímum, verkefna skil.

Kennari :  Solveig Helga Gísladóttir

Þessi grein er hugsuð fyrir þá sem lesa ekki mikið og vilja breyta því og einnig fyrir þá sem hafa gaman af lestri og vilja tengjast vettvangi þar sem rætt er um bækur.

Leshringur getur bætt lesskilning og upplifun af lestri. Í leshring verður lesturinn að sameiginlegri upplifun og býður það upp á skemmtilegar umræður og samskipti.  Leslistinn verður ákveðinn í byrjun vetrar í samvinnu við nemendur til að hafa hann sem fjölbreyttastan.

Lesnar verða 3 bækur fyrir áramót og 3 bækur eftir áramót.  Nemendur munu einnig kynna eina uppáhaldsbók fyrir hópnum.  Ein bók verður lesin sem gerð hefur verið bíómynd eftir og horft á myndina og ætti það að geta boðið upp á skemmtilegar umræður.

Námsmat:

Símat byggt á lestrarþátttöku, umræðum og virkni í tímum

Þjálfun:  Kristín Lillý Kjærnested, forstöðumaður Demantabæjar

Nemendum býðst að koma í frístundina, Demantabæ í Lindaskóla og aðstoða við gæslu yngri nemenda í frístund, leika við þau og kynnast starfinu.  Forstöðumaður frístundar hefur yfirumsjón með starfinu og leiðbeinir nemendum.

Námsmat:  Símat allan veturinn, mæting, þáttaka, virkni, áhugi og hegðun nemanda gildir til lokaeinkunnar.

Kennari: Ásta Björk Agnarsdóttir

Þessi áfangi er ætlaður öllum þeim sem hafa áhuga og eru forvitnir um vísindi. Í kennslustundum verða fjölbreyttar tilraunir og athuganir bæði inni og úti.  Þið æfið ykkur einnig í að setja fram ykkar eigin rannsókn (skýrslugerð). Stefnt verður að heimsækja Vísindasmiðju Háskóla Íslands.

Markmið

·        Fái aukinn áhuga á tilraunum og náttúruvísindum

·        Tileinki sér vinnuferli og öðlist færni í að fylgja fyrirmælum.

·        Þjálfa vísindalæsi, beita skapandi og gagnrýnni hugsun í vinnu sinni.

Námsmat: Ástundun, virkni og áhugi. Einnig er unnið út frá hæfniviðmiðum í náttúrugreinum.

Kennari: Erla Sigurbjartsdóttir, heimilisfræðikennari

Í valáfanganum eldað og bakað verður áhersla lögð á matseld og bakstur. Í lok tímans borða nemendur saman afrakstur tímans eða taka með sér heim, ef verkefnin eru þannig uppbyggð. Nemendur læra að lesa uppskriftir rétt, þekkja helstu eldhúsáhöld og hráefni. Unnið er í hópum þar sem góð samvinna er lykilatriði. Mikil áhersla er lögð á hreinlæti, að nemendur tileinki sér góð vinnubrögð, samvinnu og að frágangur sé góður eftir að verkefni er lokið.

Námsmat: Símat þar sem metin verða vinnubrögð, samvinna, sjálfstæði og síðast en ekki síst frágang á sínu vinnusvæði

Kennari: Katrín Dögg Óðinsdóttir

Myndlistarval með yfirskriftinni “Abstract (óhlutbundin) kortlagning drauma”. 

Nemendur hafa stílabók eða skissubók nálægt rúminu sínu og skrifa eina setningu eða litla skissu um leið og þau vakna um draum næturinnar, unnið er út frá því.

Markmiðið með kúrsinum er hvernig við getum miðlað og túlkað alls kyns tilfinningar, rými, dýptir, birtu, takt og hvað eina annað grafískt og án orða. Notast verður við blandaða tækni, t.d. klippimyndir, vatnsliti, krítar, túss & blýanta.

Hér er upplagt tækifæri fyrir þá sem hafa áhuga á listum og miðlun þeirra. Þetta er kúrs bæði fyrir listræna og þá sem eru að leita að listamanninum í sér. 

Námsmat: Virkni í tímum og verkefni. 

Kennari: Solveig Gísladóttir

Langar þig að læra að búa til asískan götumat? Nemendur elda aðgengilegan asískan mat og fræðast um helstu krydd og hráefni sem notuð er í asískri matargerð.  Markmiðið er að nemendur kynnist ólíkum hefðum í matargerð, fræðist um lönd og matargerð þeirra og læri að útbúa ýmsa rétti.

Námsmat: Áhugi, virkni í tímum, framkoma, sjálfstæði og vandvirkni.

Kennari:  Sigríður Valdimarsdóttir, myndlistarkennari

Markmið: 

• að geta fylgt hugmynd til endanlegs myndverks.að geta nýtt sér í eigin sköpun grunnþætti myndlistar, s.s. teikningu, liti og formfræði, myndbyggingu og rými og áferð.

• að geta unnið sjálfstætt á grundvelli þekkingar og færni á grunnþáttum og aðferðum myndlistar.

• að þekkja og geta nýtt sér hugtök og heiti sem tengjast lögmálum og aðferðum myndlistar.

• að þekkja fjölbreytni nútímalistar.

Nám og kennsla: Aðallega verkleg kennsla ásamt kynningu á listasögu tengd þeim verkefnum sem lögð verða fyrir nemendur.

Verkefni: Skissur og hugmyndavinna, blýants og pennateikningar, olíukrítar og þurrkrítarverkefni, vatnslitamálun, akríl málun, þrykk, mótun og listasaga.

Námsmat: Í öllum kennslustundum er skoðað hvernig nemendur leysa verkefnin á sjálfstæðan hátt, hvernig þeim tekst að vinna með áunna þekkingu og reynslu í námsgreininni og hvernig þeir nýta sér handbækur og tiltæka gögn. Einkum er skoðað vinnusemi – virkni, færni – leikni, sköpun og umgengi um efni og áhöld.

Kennari:  Arndís Ármann Halldórsdóttir, viðskiptafræðingur og stærðfræðikennari

Í þessum áfanga munu nemendur kynnast heimi markaðsfræðinnar. Skoðað verður hvað markaðsfræði er og hvernig fyrirtæki markaðssetja vöruna sína og koma henni á markað. Nemendur skoða ýmis fyrirtæki og hvernig fyrirtækin eru farin að nota stafræna miðla t.d Facebook og Instagram til þess að auglýsa vörurnar sínar og gera þær eftirsóknarverðar. Einnig munu nemendur fá innsýn inn í heim fjármálalæsis.

Námsmat: Verkefnavinna og mæting. Ekkert lokapróf.

Kennari: Erla Sigurbjartsdóttir, heimilisfræðikennari

Í bakstursvali verður unnið með bakstur á brauði, öðrum gerbakstri,  og hrærðu deigi. Nemendur læra að lesa uppskriftir rétt ,þekkja helstu eldhúsáhöld og hráefni.

Unnið er í hópum þar sem góð samvinna er lykilatriði. Mikil áhersla er lögð á hreinlæti, að nemendur tileinki sér góð vinnubrögð, samvinnu og að frágangur sé góður eftir að verkefni er lokið.

Námsmat: Símat þar sem metin verða vinnubrögð, samvinna, sjálfstæði og síðast en ekki síst frágang á sínu vinnusvæði.

Kennari: Sandra Hólm, textílkennari

Langar þig að hanna og sauma árshátíðardressið þitt?
Með aðstoð kennara fær nemandi stuðning, ráð og aðstoð við að sauma á sig dressið fyrir árshátíðina.

Námsmat: Sjálfstæði, vinnusemi, jákvæðni, umgengni

Kennari: Stærðfræðikennari

Fylgt er áfangalýsingu Menntaskólans í Kópavogi. Áhersla er lögð á sjálfstæði og góð vinnubrögð. Nemendur sem velja þennan áfanga þurfa að hafa náð góðum árangri í stærðfræði (einkunn B+ á vorprófi)

Námsmat: Lokapróf tekið í MK og gildir 100%

Kennari:  Enskukennari

Áhersla er lögð á vandlegan lestur texta til þess að byggja upp virkan og hagnýtan orðaforða. Nemendur lesa bókmenntaverk og texta almenns eðlis.  Þjálfun í að tjá sig um almenn efni á ensku. Fjölbreyttar skriflegar æfingar og áhersla lögð á að skrifa skipulega texta og skipta í efnisgreinar. Nemendur hagnýti sér nýjan orðaforða á skapandi hátt.

Námsmat: Símat þar sem lögð er áhersla á sjálfstæði og góð vinnubrögð.  Próf og verkefni. Lokapróf tekið í MK.

*Nemendur sem velja þennan áfanga þurfa að hafa náð góðum árangri í ensku (einkunn B+ á vorprófi).

Kennari:  Arndís Ármann Halldórsdóttir, viðskiptafræðingur og stærðfræðikennari

Áfangi þar sem nefndin vinnur að árbók árgangsins. Vinnan felst í að finna og taka myndir af nemendum árgangsins til að hafa í bókinni og að vinna að uppsetningu árbókarinnar og velja útlit. Einnig mun nefndin þurfa að leita tilboða hjá prentsmiðjum til að prenta bókina. Bókin afhendist á útskrift nemenda. Takmarkaður fjöldi nemenda kemst í þennan valáfanga.

1. Hönnun og nýsköpun

2. Tréiðn

3. Pípulagnir

4. Málaraiðn 

5. Múraraiðn 

6. Rafiðn

7. Tækniteiknun

8. Málmiðn

9. Sjómennska

10. Forritun og vefsmíði

11. Ljósmyndun og myndvinnsla

12. Hársnyrting

13. Föt og fylgihlutir

Nánari upplýsingar:
https://drive.google.com/file/d/1-QkqMfAHOVcjjOaaCmoa6FXrRSwEoTXi/view