Annwyl Fyfyriwr,

Pleser yw cael cyflwyno’r wefan yma i chi. Pwrpas y wefan yw rhoi arweiniad i’r rhai ohonoch sydd yn bwriadu parhau â’ch addysg llawn amser trwy amlinellu y llwybrau posib y gallwch eu cymryd yn dilyn Blwyddyn 11. Mae addysg yn llawn dewisiadau a phenderfyniadau.  Bu'n rhaid i chi benderfynu yn 11 oed ym mha ysgol uwchradd yr oeddech am barhau gyda'ch addysg; yna ar ddiwedd blwyddyn 9 pa bynciau yr oeddech am eu hastudio ar gyfer TGAU, Mae nawr gennych ddewis am ble i barhau gyda’ch haddysg. Gallwch aros yn Ysgol Bro Teifi, mynychu'r Chweched Dosbarth mewn ysgol arall neu fynd i Goleg Addysg Bellach. Bydd rhaid penderfynu pa gyrsiau, pa golegau mewn addysg uwch ac yna'n derfynol, maes o law, pa swydd/yrfa y dymunwch ei ddilyn. 

Cyn penderfynu beth sydd orau dylech roi ystyriaeth fanwl i'r manteision o aros yn Ysgol Bro Teifi. 

 ·        Awyrgylch sydd eisoes yn gyfarwydd i chi - rydych yn adnabod yr athrawon a'r disgyblion.

·        Safonau academaidd ardderchog.

·        Cyfleoedd di-ri ar gyfer gweithgareddau allgyrsiol – Eisteddfod Ysgol, Chwaraeon, Cerddoriaeth, Clybiau a Chymdeithasau, Gwaith Cymunedol.

·        Cymuned ddwyieithog agos a chlos gydag ethos Gymreig.

·        Cwricwlwm eang sy’n cynnwys amrywiaeth o gyrsiau academaidd a galwedigaethol yn ogystal ag ail-sefyll pynciau TGAU.

·        Wythnos o brofiad gwaith.

·        Cyfleusterau rhagorol gan gynnwys:

o   Ystafell Gyffredin fodern gyda loceri i bob aelod o’r Chweched

o   Ystafell Gyfrifiaduron pwrpasol i’r Chweched

o   Ystafell Waith

o   Mynediad i gaffi’r ysgol o 9 tan 2 bob dydd.

o   Mynediad i’r Llyfrgell ar gyfer cwblhau astudio personol neu ymchwil

·        Record o lwyddiant o safbwynt ein darpariaeth Bagloriaeth Cymru

Yr hyn sy’n bwysig yw eich bod yn gwneud yn fawr o bob cyngor ac arweiniad y cewch a’ch bod yn gwneud y penderfyniad sydd yn gywir i CHI! I gloi, o’m rhan innau a'r staff, dymunaf bob llwyddiant i chi yn eich arholiadau.  Rhowch o'ch gorau - ni ellir gofyn mwy wrth neb.

Yn gywir

G Evans

Pennaeth

Rhaid i chi ystyried yr holl bosibiliadau a phenderfynu ar beth sy'n addas ar eich cyfer chi.  Byddai’n syniad i gwblhau ymchwil gyrfaol er mwyn sicrhau eich bod yn dewis y llwybr mwyaf addas er mwyn eich caniatáu i ddilyn eich gyrfa dewisol.  Os nad ydych yn sicr, yna mae’n bwysig i chi gadw eich opsiynau yn agored a pheidio a dewis llwybr sydd yn rhy gul.  Yn fras, eich cam nesaf ar y llwybr gyrfaol fydd:

1.    Aros yn yr ysgol - Mynd ymlaen i Flwyddyn 12

2.   Gadael yr ysgol - Mynd i Goleg Addysg Bellach

3.   Gadael yr ysgol –Prentisiaeth/Cynllun Hyfforddi/Gwaith

Pam fod aros yn yr ysgol yn syniad da?

1.        aros yn yr ysgol byddwch yn cael y cyfle i ennill mwy o gymwysterau a phrofiadau perthnasol a fydd yn ei dro yn eich galluogi i fynd ymlaen i goleg addysg uwch neu brifysgol neu i ddilyn rhyw yrfa arbennig.

2.       Mi fydd astudio yn y 6ed am ddwy flynedd yn caniatáu i chi ohirio dewis gyrfa am gyfnod a chadw'r drysau ar agor ar gyfer posibiliadau eraill.

3.       Rydych chi'n gyfarwydd â'r ysgol, yr athrawon a'r disgyblion. Byddwch yn gweithio gyda staff sydd yn eich adnabod yn dda ac sy'n gwybod beth yw eich anghenion.

4.       Bydd y dulliau dysgu a ddefnyddir yn yr ysgol yn gyfarwydd i chi.

5.      Mae disgyblion y chweched yn ymddangos fel pobl ifainc i'r plant iau ac felly mae cyfle gwych i chi ymgymryd â rhagor o gyfrifoldebau a bod yn arweinwyr.

Beth sydd rhaid i mi wneud er mwyn sicrhau lle yn y Chweched Dosbarth ym Mro Teifi?

Croesewir pob disgybl sydd wedi penderfynu'n wirfoddol i ddychwelyd i'r ysgol i barhau â'i addysg. Rhaid cofio, fodd bynnag, fod gwir ddiddordeb yn y gwaith a'r ewyllys i weithio yn angenrheidiol.

Rhaid i ddisgyblion sy'n dymuno astudio tri neu ragor o gyrsiau lefel Uwch Gyfrannol lwyddo mewn o leiaf 5 pwnc TGAU gyda graddau A* - C.  Disgwylir i bob disgybl sy’n dychwelyd i’r ysgol i ddilyn o leiaf 3 chymhwyster a’r Fagloriaeth.

Bydd eich dewis o yrfa yn dylanwadu ar y pynciau a ddewisir gennych a doeth fyddai cysylltu â'r Swyddog Gyrfaoedd er mwyn gwybod am y cymwysterau angenrheidiol.

Os nad ydych wedi penderfynu pa yrfa yr ydych yn mynd i ddilyn, byddwch yn dewis amrywiaeth o bynciau er mwyn cadw'r drws yn agored i sawl maes gyrfaol.

 Yn y diwedd, eich penderfyniad chi ac nid unrhyw un arall sydd yn bwysig.

Wrth benderfynu, cofiwch ystyried y tri ffactor yma:

1    Dewiswch y pynciau yr ydych yn eu mwynhau fwyaf.

2    Dewiswch y pynciau yr ydych orau ynddynt.

3.   Dewiswch y pynciau sy'n hanfodol ar gyfer eich gyrfa / Cwrs Addysg Uwch.

Bydd hi’n bosibl i fyfyrwyr ddilyn amryw gyfuniadau ym mlwyddyn 12.

Dyma rai enghreifftiau:

Myfyriwr 1:            3 pwnc Uwch Gyfrannol + Y Bac Cymreig Lefel 3.

Myfyriwr 2:            2 bwnc Uwch Gyfrannol + 1 cwrs Galwedigaethol + Y Bac Cymreig Lefel 3.

Myfyriwr 3:                2 Bwnc Galwedigaethol + 1 Pwnc Uwch Gyfrannol + Y Bac Cymreig Lefel 3.

Mynd i Brifysgol neu Goleg

Ar gyfartaledd mae 90% o ddisgyblion Bro Teifi yn penderfynu mynd i Brifysgol neu goleg ar ôl gadael ysgol. Wrth feddwl am eich dewis o gyrsiau yn mhrifysgol neu goleg, mae’n bwysig ystyried pa bynciau sydd angen i chi astudio yn y Chweched Dosbarth.

Yn y wybodaeth ispod ceir y cyrsiau mwyaf poblogaidd yn y brifysgol gyda rhai syniadau o’r pynciau Lefel A/Galwedigaethol sydd angen er mwyn sicrhau cais UCAS llwyddiannus ym Mlwyddyn 13. Ewch i www.UCAS.com am fwy o wybodaeth

Cwrs Prifysgol a beth fydd rhan fwyaf o brifysgolion yn edrych am:

Addysg

Gellir gwneud gradd mewn Addysg a bydd nifer o bynciau yn addas ar gyfer astudio’r pwnc. Mae’n bosib hefyd i astudio gradd mewn pwnc a gwneud cwrs ôl-raddedig mewn addysg. Yng Nghymru, bydda angen gradd B TGAU mewn Saesneg/Cymraeg a Mathemateg yn ogystal.

Amaethyddiaeth

Does dim pynciau penodol ond bydd Bioleg a Daearyddiaeth yn rhoi sylfaen cryf i’ch astudiaethau.

Busnes

Mae astudio Busnes yn ddefnyddiol. Mae cyrsiau busnes yn amrywio'n fawr yn ôl y brifysgol yr hoffech ei mynychu ac efallai bydd rhai yn gofyn am Fathemateg.

Cerdd

Cerdd - fel arfer bydd angen gwneud clyweliad.

Celfyddydau Mynegiannol/Celf/Drama

Drama, Cerdd, Celf, Cymraeg, Saesneg. Os am astudio Celf mae llawer o ddisgyblion yn gwneud blwyddyn sylfaen yn gyntaf.

Ceiropracteg/Ffisiotherapi

Bioleg ac efallai Chwaraeon (yn dibynnu ar y cwrs)

Chwaraeon/Hyfforddi a Datblygu

Chwaraeon. Mae Bioleg hefyd yn gallu bod yn ddefnyddiol yn ddibynol ar natur y cwrs.

Cyfryngau/Ffilm

Efallai bydd angen i chi roi cyflwyniad o'ch syniadau / portffolio o'ch gwaith.

Dyniaethau

Yn dibynnu ar y pwnc.

Gwleidyddiaeth

Bydd amrywiaeth o bynciau Ieithyddol, Dyniaethau a Gwyddorau yn darparu sylfaen gadarn a gwybodaeth gyffredinol dda.

Gwyddorau

Bydd angen dwy lefel A Gwyddoniaeth ar y mwyafrif o brifysgolion. Bydd Mathemateg yn ofynnol ar gyfer y rhan fwyaf o raddau Ffiseg.

Mathemateg

Mathemateg a Mathemateg Bellach.

Meddygaeth

Ystyrir Cemeg fel arfer yn hanfodol ar gyfer meddygaeth, gydag o leiaf un pwnc gwyddoniaeth arall (Bioleg fel arfer).

Newyddiaduriaeth

Ieithoedd a’r Dyniaethau. 

Nyrsio

O leiaf un gwyddoniaeth - fel arfer Bioleg, Seicoleg neu Iechyd a Gofal.

Peirianneg/Peirianneg Sifil

Mathemateg ac o leiaf un gwyddoniaeth arall, fel arfer Ffiseg. Mae cwrs D&T hefyd yn ddefnyddiol er mwyn arddangos sgiliau angenrheidiol.  Mae Mathemateg Bellach yn hynod o ddefnyddiol i lefel UG o leiaf.

Y Gyfraith/Troseddeg

Nid oes unrhyw enghreifftiau penodol ond mae pynciau lle mae angen ysgrifennu’n estynedig yn ddefnyddiol.

Ieithoedd

Cymraeg/Saesneg/Ffrangeg

Gwasanaethau Cyhoeddus/Gwyddor Heddlu

Dim pynciau penodol ond mae Troseddeg yn ddefnyddiol.