Dymuniadau gorau i'r disgyblion sy'n cystadlu yn y Cyflwyniad Theatrig a'r Côr. Diolch yn fawr iawn i Mrs Catrin Jones Hughes fu'n hyfforddi'r cyflwyniad a Mrs Grês Pritchard fu'n hyfforddi'r Côr. Dymuniadau gorau i Gruffudd Siôn sy'n cystadlu ar yr Alaw Werin a'r Unawd Piano.

Diolch i Mr Pritchard am ei gefnogaeth, ac i'r rhieni am eu cefnogaeth ar hyd y daith eisteddfodol. Profiadau arbennig i'r plant.

Bydd y ddwy gystadleuaeth yn cael eu cynnal yn y Pafiliwn Gwyrdd, dydd Iau, Mai 28.

Dewch i gefnogi ar y maes, neu beth am wylio ar y teledu!

Cafodd disgyblion Blwyddyn 3 a 4 ddeuddydd cofiadwy iawn wrth ymweld â Moelfre fel rhan o’u thema ar y Môr. Dechreuodd y diwrnod gyda cherdded ar hyd rhan o lwybr yr arfordir, gan fwynhau’r golygfeydd trawiadol a’r amgylchedd naturiol.

Cafwyd saib ym Mhorth Helaeth, lle bu’r plant yn cymryd rhan mewn her adeiladu tyrau gan ddefnyddio cerrig y traeth. Her hwyliog yn annog cydweithio a meddwl yn greadigol.

Ymlaen wedyn i Gwylfan Moelfre, lle cafodd y disgyblion gyfle i ddysgu am ddiogelwch ar y traeth ac yn y môr. Roedd cael gweld tu fewn i orsaf Bâd Achub Moelfre a gweld y gwch yn brofiad. I gwblhau’r ymweliad, bu’r plant yn mwynhau helfa drysor gyffrous.

Hoffem ddiolch yn fawr i Anti Val yng Nghapel Carmel am ei chroeso cynnes ac am ganiatáu i ni ddefnyddio ysgoldy’r capel i fwyta cinio. Diolch hefyd i Mrs McGilvary, Mrs Taylor, Mrs Redvers Jones a Mrs Moore am eu cymorth wrth gludo’r disgyblion yn ddiogel ar y bysus mini.

Yn ddi-os, roedd hwn yn gychwyn arbennig i’r thema, gan roi profiadau gwerthfawr i’r plant.

Fel rhan o’u thema ar fyd natur, bu disgyblion Dosbarth Derbyn a Blwyddyn 1 yn archwilio arwyddion natur ar hyd llwybr 'Traed Bach' sy'n amgylchynu Uned Graig Fawr. 

Defnyddiodd y plant eu synhwyrau i sylwi ar y byd o’u cwmpas, gan wrando, arogli, gweld a theimlo nodweddion amrywiol yr amgylchedd naturiol. Roedd hwn yn brofiad gwerth chweil a helpodd i ddatblygu eu hymwybyddiaeth a’u gwerthfawrogiad o fyd natur.

Croesawyd Mr Huw Tegid Roberts atom i Graig Fawr i annerch y plant drwy gyfrwng stori ysbrydoledig iawn. Cyflwynodd freichled arbennig gyda phob rhan yn wahanol, gan arwain at drafodaeth am amrywiaeth a hunaniaeth. Aeth ymlaen i ddangos lluniau o wahanol flodau ac anifeiliaid i bwysleisio’r neges. Ei brif neges oedd ein hatgoffa fod pawb yn wahanol, a bod hynny’n gwbl berffaith—yn wir, mae ein gwahaniaethau yn ein gwneud yn arbennig.

Roedd yn hyfryd hefyd cael croesawu disgyblion Blwyddyn 2 atom i’r gwasanaeth, gan gychwyn ar y broses bontio o Graig Fach i Graig Fawr mewn ffordd gynnes a chroesawgar.

Cafodd disgyblion Blynyddoedd 3 a 4 ymweliad diddorol iawn yn ddiweddar gan gwmni Dŵr Cymru. Bu’r sesiwn yn gyfle gwerthfawr i ddysgu mwy am bwysigrwydd dŵr, sut mae’n cael ei drin, a’n cyfrifoldeb ni i’w ddefnyddio’n ofalus.

Trwy weithgareddau rhyngweithiol a thrafodaethau difyr, cafodd y plant well dealltwriaeth o sut mae dŵr yn teithio o’r ffynhonnell i’n cartrefi, yn ogystal â’r effaith ar yr amgylchedd os nad ydym yn gofalu am y cyflenwad.

Roedd y sesiwn yn addysgiadol ac yn ysbrydoledig, gan gefnogi eu dysgu o fewn y thema ac yn annog agwedd gyfrifol tuag at ddefnydd dŵr yn y dyfodol.

Cafodd plant Graig Fach gyfnod arbennig iawn yn dathlu eu doniau a’u Cymreictod yn ystod  Eisteddfod Graig Fach eleni. Bu brwdfrydedd mawr wrth i bawb chwarae eu rhan a mwynhau’r profiad.

Rhoddwyd y cyfle i'r disgyblion gystadlu mewn amrywiaeth eang o gystadlaethau, gan sicrhau bod cyfle i bob plentyn gymryd rhan a disgleirio yn eu ffordd eu hunain. 

Diolch o galon i’r staff am eu gwaith caled yn hyfforddi, paratoi ac annog y disgyblion, ac i’r rhieni am eu cefnogaeth barhaus wrth annog y plant i gwblhau tasgau adref. Heb y cydweithio hwn, ni fyddai’r Eisteddfod mor llwyddiannus.

Roedd yn wir yn ddathliad bendigedig o’n hiaith, ein diwylliant a dawn ein disgyblion.