Ysgol y Graig

Diwrnod y Llyfr

Hyfryd oedd gweld ymdrech arbennig gan y plant (a'r staff) wrth i ni ddathlu diwrnod y llyfr unwaith eto eleni.

Diolch yn fawr iawn i chi fel rhieni am eich cefnogaeth yn sicrhau gwisgoedd arbennig i'r plant.

Agor y Llyfr.

Hyfryd oedd croesawu ein cyfeillion 'Agor y Llyfr' draw i gynnal gwasanaeth gyda'r ddwy uned; Graig Fach a Graig Fawr. Y stori y mis hwn oedd 'y Canwriad trist' gyda disgyblion o ddosbarthiadau Maethlu a Pedr yn darllen ac actio.

Diolch yn fawr am ddod atom unwaith eto.

Eisteddfod Cylch Cefni

Cynhaliwyd Eisteddfod Cylch Cefni ddydd Sadwrn, Chwefror 28 yn Ysgol Gyfun Llangefni gyda chystadlu brwd o'r ysgol o ganu i lefaru, o ddawnsio i actio, roedd hi mor braf gweld glas y Graig ar y llwyfan.

Llongyfarchiadau a dymuniadau gorau i'r canlynol fydd yn cystadlu yn Eisteddfod Sir yr Urdd yn Ysgol Syr Thomas Jones, Amlwch, Mawrth 21.

Gwenno ac Ani, dawnsio unigol, Llywarch, llefaru Blwyddyn 3 a 4, Gruffudd, Alaw Werin ac unawd Piano a'r Côr.

Diolch o galon i chi y rhieni am eich cefnogaeth barhaus drwy gydol y dydd – mae eich anogaeth yn golygu cymaint i ni.

A diolch arbennig i holl blant y Graig am fod mor wych drwy’r dydd; roeddech yn glod i’ch ysgol. 👏

Gwersi beics

Mae dosbarthiadau Blwyddyn 5 a 6 yn parhau i dderbyn gwersi beics gyda Ceri Williams.

Mae'n gyfle i'r disgyblion ail-atgoffa eu hunain o'r rheolau a'r sgiliau wrth feicio a chadw yn ddiogel ar y ffordd fawr.

Cinio Gŵyl Dewi

Diolch yn fawr iawn i staff y gegin am baratoi cinio bendigedig i'r plant yn ystod ein wythnos 'Cymru Cŵl'. Roedd pawb wedi mwynhau.

Cystadleuaethau Pêl-droed

Bu bechgyn a genethod Blwyddyn 5 a 6 yn brysur yn cystadlu mewn gwahanol gystadlaethau pêl-droed. Diolch i Mr Gwilym am hyfforddi ac i Mrs McGilvary am ddreifio'r bws mini a chefnogi'r timau.

Cyngor Eco

Bu'r Cyngor Eco yn brysur yn gwirfoddoli yn codi ysbwriel yn y dref. Braf gweld ein to ifanc yn ystyried llygredd ysbwriel. Diolch i Mrs Redvers Jones a Mr Williams am gefnogi'r criw.

Cyngor Ysgol Dalgylch Llangefni

Yn dilyn gorymdaith yn y dref, a chyfle i ddathlu diwrnod ein Nawddsant, aeth aelodau Cyngor Ysgol Dalgylch Llangefni gyda Mr Pritchard a Mrs Land, Ysgol Corn Hir i feirniadu ymdrech arbennig y busnesau yn addurno'r ffenestri.

Cyflwynwyd tystysgrif o 'ddiolch' i bob busnes. Yn unfrydol, teimlai'r disgyblion mai ffenestr siop Cain oedd yn derbyn y wobr gyntaf am addurno.

Diolch i Josh ac Isla am gynrychioli'r Graig.