Ysgol y Graig

Mabolgampau

Cynhaliwyd Mabolgampau y Meithrin, Derbyn, Blwyddyn 1 a 2.

Roedd yn hyfryd gweld pawb yn barod i gystadlu a hynny yn gefnogol ac annogol o'u gilydd. Diolch i bawb fu'n trefnu.

Siambr y CYNGOR

Cafodd disgyblion Blwyddyn 6 fore buddiol a hynod ddiddorol wrth ymweld â Siambr y Cyngor Sir. Cawsom groeso cynnes gan Ddirprwy Gadeirydd y Cyngor a'i gyd-aelodau, a roddodd amser i rannu gwybodaeth werthfawr am eu gwaith.

Yn dilyn y croeso, cafwyd cyflwyniad i bwrpas a swyddogaeth y siambr, gan helpu'r disgyblion i ddeall sut y caiff penderfyniadau pwysig eu gwneud er budd y gymuned. Wedyn, cafwyd cyfle i'r plant ofyn cwestiynau aeddfed a threfnus iawn, gan ddangos eu chwilfrydedd a'u dealltwriaeth gynyddol o faterion lleol.

Roedd yn brofiad arbennig iawn i'n disgyblion ac yn gyfle gwych i ddysgu mwy am ddemocratiaeth a gwaith y cyngor mewn ffordd ymarferol a diddorol. Hoffem ddiolch yn ddiffuant i Ddirprwy Gadeirydd y Cyngor a'r aelodau am eu croeso cynnes a'u hamser.

GWERSI PBuzz

Cafodd disgyblion Blwyddyn 3 a 4 brofiad arbennig yn wrth gymryd rhan mewn sesiynau cerddoriaeth PBuzz. Bu'r plant yn dysgu sut i chwythu'r offeryn yn gywir a sut i greu amrywiaeth o seiniau a thonau.

Roedd y sesiynau yn hynod o ddifyr ac addysgiadol, a mwynhaodd y disgyblion bob munud o'r profiad. Roedd yn hyfryd gweld eu brwdfrydedd wrth ddatblygu sgiliau cerddorol newydd a magu hyder wrth berfformio.

Diolch yn fawr iawn i Mrs Kate Gwilliam am gynnal y sesiynau gwerthfawr hyn. Roedd y profiad yn un i'w gofio, ac mae'r disgyblion wedi mwynhau'n arw.

Garage Band

Cafodd y disgyblion gyfle i gymryd rhan mewn gweithdy cerddoriaeth cyffrous gan ddefnyddio Garage Band dan ofal Mr Bari Gwilliam. Yn ystod y sesiwn, dysgodd y plant sut i ddefnyddio'r dechnoleg i greu a recordio eu cerddoriaeth eu hunain, gan arbrofi gyda gwahanol offerynnau a synau.

Roedd y gweithdy yn brofiad gwerthfawr a chreadigol a roddodd gyfle i'r disgyblion ddatblygu eu sgiliau cerddorol a digidol mewn ffordd hwyliog ac ymarferol. Mwynhaodd pawb y sesiwn yn fawr iawn, a hoffem ddiolch yn ddiffuant i Mr Bari Gwilliam am rannu ei arbenigedd a'i frwdfrydedd gyda'r disgyblion.

CRoeso i'r Graig!

Roedd yn bleser mawr croesawu ein darpar rieni a'r plant fydd yn ymuno â Dosbarth Meithrin Pabo ym mis Medi. Cafwyd cyfle gwych i gyfarfod â'i gilydd a dysgu mwy am fywyd yn yr ysgol.

Yn dilyn gair cynnes o groeso gan Mrs Meinir Roberts, y Pennaeth, cyflwynodd Mrs Sarah Roberts, athrawes y dosbarth, fwrlwm a chyffro Dosbarth Pabo i'r rhieni. Rhannodd wybodaeth am y profiadau cyfoethog a diddorol y bydd y plant yn eu mwynhau drwy gydol y flwyddyn, yn ogystal â'r cyfleoedd niferus i ddatblygu eu sgiliau, eu hyder a'u hannibyniaeth.

Edrychwn ymlaen yn fawr at groesawu'r plant i ddechrau ar y bennod gyffrous hon o'u taith addysgol ym mis Medi. Croeso cynnes i chi gyd!

PONTIO I'r GYFUN

Treuliodd disgyblion Blwyddyn 6 ddeuddydd llawn hwyl a phrofiadau newydd yn Ysgol Gyfun Llangefni, gan gael blas ar yr hyn sydd i'w ddod wrth ddechrau'r ysgol uwchradd ym mis Medi.

Yn ystod yr ymweliad, cafodd y disgyblion gyfle i gymryd rhan mewn amrywiaeth o weithgareddau, cwrdd ag aelodau o staff a dod yn fwy cyfarwydd â'r ysgol a'i chyfleusterau. Roedd y profiad yn help mawr i feithrin hyder a chyffro wrth baratoi ar gyfer y cam nesaf yn eu taith addysgol.

Mwynhaodd pawb yn fawr iawn ac mae'r disgyblion yn edrych ymlaen at ddychwelyd ym mis Medi i ddechrau'r bennod newydd gyffrous hon.

sesiwn yn eu dosbarthiadau newydd

Cafodd y disgyblion gyfle i dreulio bore yn eu dosbarthiadau newydd er mwyn cyfarfod â'u hathrawon a chael blas ar y flwyddyn sydd o'u blaenau. Mwynhaodd pawb yn fawr.

LLais Plant CEFNI

Cyfarfu aelodau cynghorau ysgol yr ysgolion cynradd lleol yn Ysgol Corn Hir, dan arweiniad Mrs Land, i drafod a gwerthuso gweithgareddau'r flwyddyn. Roedd yn gyfle gwerthfawr i'r disgyblion rannu syniadau, myfyrio ar eu llwyddiannau a chydweithio gyda disgyblion o ysgolion eraill.

FAN LYFRGELL

Roedd yn braf croesawu'r Fan Lyfrgell i'r ysgol. Cafodd y disgyblion i gyd y cyfle i fynd i ddewis llyfrau newydd i'w mwynhau yn ystod cyfnodau darllen yn yr ysgol. Roedd amrywiaeth eang o lyfrau i'w dewis o ddiddordeb iddynt.

SWIM SAFE

Cafodd criw o ddisgyblion Blwyddyn 6 gyfle gwych i gymryd rhan yn rhaglen Swim Safe ym Mae Trearddur. Yn ystod y sesiwn, dysgodd y plant sgiliau pwysig i'w helpu i gadw'n ddiogel mewn amgylcheddau dŵr agored, gan fagu hyder a gwybodaeth werthfawr.

Diolch yn fawr i Mrs Manon Jones am drefnu'r profiad, ac i Mrs McGilvary am ei chefnogaeth drwy'r dydd.

TRAWSGWLAD

Llongyfarchiadau mawr i bawb a fu'n cystadlu yng nghystadleuaeth Trawsgwlad Ynys Môn yn Ysgol Gyfun Llangefni. Roedd y disgyblion yn glod i'r ysgol, gan ddangos ymroddiad, dyfalbarhad ac ysbryd chwarae teg drwy gydol y rasys. Rydym yn falch iawn o'u hymdrechion. Da iawn bawb!

Diolch

Hoffem estyn ein diolch diffuant i Miss Yvonne Jones, sydd wedi bod yn athrawes lanw yn yr ysgol ers bron i dair blynedd. Yn ystod y flwyddyn ddiwethaf, bu'n gyfrifol am Anghenion Dysgu Ychwanegol a Chynhwysiant yr ysgol, gan weithio'n hynod o galed i gefnogi ein disgyblion, ein teuluoedd a'r staff.

Mae ei hymroddiad, ei gofal a'i phroffesiynoldeb wedi gwneud cyfraniad gwerthfawr iawn i fywyd yr ysgol, ac rydym yn ddiolchgar iawn am ei gwaith diflino dros y cyfnod.

Croeso Nôl!

Mae'n bleser mawr gennym groesawu Mrs Rhian Griffiths yn ôl i'r ysgol yn dilyn ei chyfnod mamolaeth. Bydd Mrs Griffiths yn dychwelyd i'w rôl fel Cydlynydd Anghenion Dysgu Ychwanegol a Chynhwysiant, gan chwarae rhan allweddol wrth ddarparu cymorth a chefnogaeth i'n disgyblion, ein teuluoedd a'n staff.

Edrychwn ymlaen at gael budd o'i harbenigedd, ei hymroddiad a'i phrofiad wrth iddi ailafael yn ei dyletswyddau, a dymunwn groeso cynnes iawn iddi.