[As it appears in Richard J. Tarrant's Oxford Classical Texts, with the addition of my own macrons]
Tum vērō placuit, nūdaeque cupīdine formae
Salmacis exārsit; flagrant quoque lūmina nymphae,
nōn aliter quam cum pūrō nitidissimus orbe
opposita speculī referītur imāgine Phoebus;
vixque moram patitur, vix iam sua gaudia differt, 350
iam cupit amplectī, iam sē male continet āmēns.
ille cavīs vēlōx adplausō corpore palmīs
dēsilit in laticēs alternaque bracchia dūcēns
in liquidīs trānslūcet aquīs, ut eburnea sī quis
signa tegat clārō vel candida līlia vitrō. 355
"vīcimus et meus est" exclāmat nais, et omnī
veste procul iactā mediīs inmittitur undīs,
pugnantemque tenet, luctantiaque ōscula carpit,
subiectatque manūs, invītaque pectora tangit,
et nunc hāc iuvenī, nunc circumfunditur illāc; 360
dēnique nītentem contrā ēlābīque volentem
inplicat ut serpēns, quam rēgia sustinet āles
sublīmemque rapit: pendēns caput illa pedēsque
adligat et caudā spatiantēs inplicat ālās;
utve solent hederae longōs intexere truncōs, 365
utque sub aequoribus dēprēnsum pōlypus hostem
continet ex omnī dīmissīs parte flagellīs.
Perstat Atlantiadēs spērātaque gaudia nymphae
dēnegat; illa premit commissaque corpore tōtō
sicut inhaerēbat, "pugnēs licet, inprobe," dīxit, 370
"non tamen effugiēs. ita, dī, iubeātis, et istum
nūlla diēs ā mē nec mē dēdūcat ab istō."
vōta suōs habuēre deōs; nam mixta duōrum
corpora iunguntur, faciēsque indūcitur illīs
ūna. velut, sī quis condūcat cortice rāmōs, 375
crēscendō iungī pariterque adolēscere cernit,
sīc ubi conplexū coiērunt membra tenācī,
nec duo sunt et fōrma duplex, nec fēmina dīcī
nec puer ut possit, neutrumque et utrumque videntur.
'Ergō ubi sē liquidās, quō vir dēscenderat, undās 380
sēmimarem fēcisse videt mollītaque in illīs
membra, manūs tendēns, sed iam nōn vōce virīlī
Hermaphroditus ait: "nātō date mūnera vestrō,
et pater et genetrīx, ambōrum nōmen habentī:
quisquis in hōs fontēs vir vēnerit, exeat inde 385
sēmivir et tāctīs subitō mollēscat in undīs!"
mōtus uterque parēns nātī rata verba bifōrmis
fēcit et incestō* fontem medicāmine tīnxit.'
*some versions use incertō